Genesỳ 11
11
Ny tilikambon’i Babèla
1Fiteny iray ihany ary voambolana mitovy no nampiasaina tamin’ny tany tontolo. 2Saingy rehefa nikisaka niantsinanana ny olona, dia nahita lemaka tao amin’ny tany Sinehara ary niorim-ponenana tao. 3Dia nifampiresaka izy ka nanao hoe: «Andao isika hanao biriky tanimanga ka handotra azy amin’ny afo.» Ny biriky no nataony solon’ny vato ary ny molanga no nataony solon’ny rihitra. 4Avy teo dia hoy koa ireo hoe: «Andeha isika hanorina tanàna misy tilikambo mahatakatra ny lanitra ny tendrony! Amin’izay dia halaza isika ka tsy hiparitaka amin’ny velaran’ny tany.»
5Dia nidina avy any an-danitra ny TOMPO mba hijery ny tanàna sy ny tilikambo izay naorin’ny zanak’olombelona. 6Ka hoy IZY hoe: «Indro ankehitriny fa firenena iray ihany izy rehetra ary fiteny tokana ihany no ampiasainy. Raha izany no fiandohan-javatra hataony, dia tsy hisy hahasakana azy tsy hahatanteraka izay kasainy. 7Koa andeha isika hidina hanakorontana ny fiteniny mba tsy hifankahazoany fiteny intsony.» 8Koa tao ny TOMPO no nampiely ny olona ho amin’ny velaran’ny tany tontolo; ary dia nilaozan’ireo ny fananganana ilay tanàna. 9Izany no niantsoana io tanàna io hoe Babèla#11.9 Babèla: anarana hebreo iantsoana an’i Babilôna; ny RM dia mampifamatotra io anarana io amin’ny matoanteny mifanakaiky aminy izay nadika hoe nanakorontana eto (jereo and 7 sy 9)., satria tao no nanakorontanan’ny TOMPO ny fitenin’ny olona, ary tao no nampielezany ny olona ho amin’ny velaran’ny tany tontolo.
Ny lisitry ny razambe hatramin’i Sema ka hatramin’i Abrama
10Toy izao no lisitry ny taranak’i Sema. Efa feno zato taona i Sema raha niteraka an’i Arpaksada, roa taona taorian’ny safo-drano. Taorian’ny nahaterahan’i Arpaksada, 11dia mbola velona dimanjato taona i Sema, ary niteraka zanakalahy sy zanakavavy hafa koa.
12Rehefa feno 35 taona i Arpaksada, dia niteraka an’i Sela. 13Taorian’ny nahaterahan’i Sela, dia mbola velona 403 taona i Arpaksada ary niteraka zanakalahy sy zanakavavy hafa koa.
14Rehefa feno 30 taona i Sela, dia niteraka an’i Hebera. 15Taorian’ny nahaterahan’i Hebèra dia mbola velona 403 taona i Sela, ary niteraka zanakalahy sy zanakavavy hafa koa.
16Rehefa feno 34 taona i Hebera, dia niteraka an’i Pelega. 17Taorian’ny nahaterahan’i Pelega, dia mbola velona 430 taona i Hebèra, ary niteraka zanakalahy sy zanakavavy hafa koa.
18Rehefa feno 30 taona i Pelega dia niteraka an’i Rehò. 19Taorian’ny nahaterahan’i Rehò dia mbola velona 209 taona i Pelega, ary niteraka zanakalahy sy zanakavavy hafa koa.
20Rehefa feno 32 taona i Rehò, dia niteraka an’i Seroga. 21Taorian’ny nahaterahan’i Seroga, dia mbola velona 207 taona i Rehò, ary niteraka zanakalahy sy zanakavavy hafa koa.
22Rehefa feno 30 taona i Seroga, dia niteraka an’i Nahôra. 23Taorian’ny nahaterahan’i Nahôra, dia mbola velona 200 taona i Seroga, ary niteraka zanakalahy sy zanakavavy hafa koa.
24Rehefa feno 29 taona i Nahôra, dia niteraka an’i Tera. 25Taorian’ny nahaterahan’i Tera, dia mbola velona 119 taona i Nahôra, ary niteraka zanakalahy sy zanakavavy hafa koa.
26Rehefa feno 70 taona i Tera, dia niteraka telo lahy dia i Abrama sy i Nahôra ary i Haràna.
27Ireto avy no taranak’i Tera, rain’i Abrama sy i Nahôra ary i Haràna. I Haràna dia niteraka an’i Lôta, 28ary maty tao amin’ny tany nahaterahany tao Ora any Babilônia izy fony fahavelon’i Tera rainy. 29Nanambady an’i Saray i Abrama; ary i Nahôra kosa nanambady an’i Milkà zanakavavin’i Haràna. I Haràna koa no rain’i Milkà sy i Jiskà. 30Ary i Saray dia tsy niteraka fa momba.
31Ary nentin’i Tera i Abrama zanany lahy sy i Lôta zafikeliny sady zanakalahin’i Haràna. Nentiny koa i Saray vinantovaviny, vadin’i Abrama. Dia niala tao Ora any Babilônia ireo ka nankany amin’ny tany Kanahàna. Tonga hatrany Haràna #11.31 I Haràna, tanàna tany Mezôpôtamia ambony, dia foiben’ny fivavahana amin’ny volana tahaka an’i Ora tanàna tany Mezôpôtamia ambany. izy ary nonina tao. 32Ary maty tao Haràna i Tera, rehefa feno 205.
Currently Selected:
Genesỳ 11: DIEMDC
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.
