Genesỳ 17
17
Niova ho Abrahama ny anaran’i Abrama
1Rehefa feno 99 taona i Abrama, dia nisehoan’ny TOMPO ka nitenenany hoe:
–Izaho no Andriamanitra Tsitoha; aoka handeha eo anatrehako ianao sady tsy hanan-tsiny; 2fa hotolorako ny fanekempihavanako ianao, ary hohamaroiko fatratra.
3Dia niankohoka i Abrama; ary hoy indray Andriamanitra taminy:
4–Amiko, dia izao no fanekempihavanako aminao: Hanjary razamben’ny firenena maro ianao. 5Tsy hatao hoe Abrama intsony ny anaranao fa hanjary Abrahama, satria hataoko razamben’ny firenena maro ianao#17.5 Ny anarana hoe Abrahama amin’ny teny hebreo dia mampahatsiaro ny voambolana izay nadika hoe razamben’ny...maro eto; jereo Rm 4.17.. 6Hataoko maro taranaka fatratra ianao ka hanjary firenena maro, sady hisy mpanjaka hipoitra avy aminao. 7Hajoroko ny fanekempihavanako aminao mbamin’ny taranakao mandimby anao; ho fanekempihavanana maharitra mandrakizay izany, ka dia ho Andriamanitrao sy ny taranakao mandimby anao Aho#17.7 Jereo Lk 1.55.. 8Homeko anao sy ny taranakao mandimby anao ny tany Kanahàna manontolo, dia izao tany ivahinianao izao, ho fananany mandrakizay; ary ho Andriamanitr’izy ireo Aho#17.8 Jereo Asa 7.5..
9Dia hoy koa Andriamanitra tamin’i Abrahama:
–Hitandrina ny fanekempihavanako ianao sy ny taranakao mandimby anao hatrany hatrany. 10Izao no fepetra izay takîko hotandremanareo, dia ianao sy ny taranakao mandimby anao: hoforana ny lehilahy rehetra eo aminareo. 11Ny famorana anareo no ho famantarana ny fanekempihavanana ifanaovako aminareo. 12Hoforana ny zazalahy rehetra eo aminareo isaky ny taranaka mifandimby, rehefa feno valo andro; tahaka izany koa ireo mpanompo teraka ao an-tranonao na novidînao vola ka tsy isan’ny fokonao. 13Hoforana ny mpanompo teraka tao aminao sy ireo novidînao vola mba hitoetra eo amin’ny nofonareo ho fanekempihavanana maharitra mandrakizay ny mariky ny fanekempihavanako. 14Fa izay lehilahy tsy voafora eo amin’ny nofony dia hoesorina tsy ho eo amin’ny fireneny, satria tsy nanaja ny fanekempihavanako.
15Dia hoy koa Andriamanitra tamin’i Abrahama:
–I Saray vadinao dia tsy hantsoina intsony hoe Saray; fa hatao hoe Sarà#17.15 Saray sy Sarà: anarana iray ihany izay aseho amin’ny endrika roa, ary ny heviny dia mpanjakavavy na andriambavy. ny anarany. 16Hotahîko izy ary homeko zanakalahy avy aminy koa ianao. Hotahîko izy ka ho tonga razamben’ny firenena maro, ary hisy mpanjakam-pirenena avy amin’ny taranany.
17Dia niankohoka tamin’ny tany i Abrahama sady nihomehy, satria hoy izy anakampo hoe: «Moa mbola hisy zaza teraka avy amin’ny lehilahy zato taona ve? Ary i Sarà efa sivifolo taona ve dia mbola hiteraka?» 18Koa hoy i Abrahama tamin’Andriamanitra:
–Enga anie i Jismahela no ho velona eo anatrehanao!
19Fa namaly Andriamanitra hoe:
–Tsia, fa i Sarà vadinao dia hiteraka zazalahy ho anao ka ny anarany hataonao hoe Itsehàka#17.19 Amin’ny teny hebreo ny anarana hoe Itsehàka dia mampahatsiaro ny matoanteny izay nadika hoe mihomehy izy eo amin’ny and 17; ampit 18.12-15.. Hotanako ny fanekempihavanako aminy sy amin’ny taranany mandimby azy ho fanekempihavanana maharitra mandrakizay. 20Ary ny momba an’i Jismahela dia efa nohenoiko ny hatakao; indro hotahîko izy, ka hataoko maro anaka ary hampitomboiko fatratra ny taranany. Hiteraka andriana 12 izy sady ho razamben’ny firenen-dehibe iray. 21Fa ny fanekempihavanako kosa dia haoriko amin’i Itsehàka, izay haterak’i Sarà ho anao amin’ny herintaona toy izao.
22Rehefa vitan’Andriamanitra ny resaka nifanaovany tamin’i Abrahama, dia nandao azy Izy. 23Dia nalain’i Abrahama i Jismahela zanany lahy sy ireo mpanompony rehetra na izay teraka tao aminy na izay novidîny vola, dia ny lehilahy rehetra tao an-tranony; ka noforany avokoa ireo iny andro iny ihany araka izay nandidian’Andriamanitra azy. 24Efa 99 taona i Abrahama, raha noforana; 25ary i Jismahela kosa dia efa 13 taona. 26Andro iray ihany no namorana azy mianaka, 27mbamin’ny lehilahy rehetra tao an-tranon’i Abrahama, na ireo mpanompo teraka tao an-trano na ireo novidîny vola tamin’ny vahiny.
Currently Selected:
Genesỳ 17: DIEMDC
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.
