Luke 13
13
Naluꞌuna ia ma nahaisala
1Keualoko nakama Galilee ekaa namanu lakou la nohoꞌi aꞌe Keakua iloko hale kapu, Pilate ekaa nakama la nomake hoi. Ia keualoko alakama eme aꞌe Jesus kelono la, 2ko Jesus ivasili aꞌe nakama la, “Okou ehakaꞌoko pela nakama la umake maikinimea nahaisala lakou elaꞌa iluna ma nahaisala alakama iloko Galilee? 3Seai. Ia anau eme aku. Okou iui ikaha ma nahaisala okou, aoki okou hakoa amemake pela hoi.
4“Sehui ma valu nakama nimake keualoko kauhu hale Siloam la nikeiho iluna lakou. Okou hakaꞌoko pela nakama la ehaisala, elaꞌa iluna ma alakama kela enoho iloko Jerusalem? 5Seai. Anau eme aku okou. Okou iui ikaha ma nahaisala okou, aoki okou amemake pela hoi.”
Okou isevave kehakonukonu alakama
6Jesus ekakala aꞌe nakama la kakala hulihuli nei. “Kela hekama eisi kelaꞌau ke{fig} esomo iloko paupaꞌu aia la. Kama la ehaele aꞌe ma iꞌahi ni{fig} maia, ia sehi{fig} emau. 7Kena iko kama la ime aꞌe kama lolosi paupaꞌu la, ‘Koukolu nahekau, anau evaꞌai mai nomaka kelaꞌau nei, ia anau sehi{fig} elave. Kuu kelaꞌau na ilalo. Aiea kelaꞌau na esomosomo haeꞌo laea?’
8“Ia kama lolosi paupaꞌu la eme aꞌe, ‘Kama hamakua, kiaꞌi kelaꞌau na isomo kelaa hekau. Anau meimulu nimuluna, kena uhi hakiꞌe pulapula kelaꞌau na. 9Poi kelaꞌau na ehua kaualeꞌa, kenaa. Ia poi kelaꞌau na sehihua, kena ukuu kelaꞌau na ilalo.’ ”
Jesus ekonaꞌi kehine i keaho kapu
10Kela heaho kapu, Jesus eaoaꞌo iloko hale loku. 11Ia kehine keꞌina la ekau lia kipua kemahana saꞌino. Sehui ma valu nahekau, kehine la hahaele susulu, selavaa kehamakau iluna. 12Keualoko Jesus niꞌike kehine la, ko kama la ianaa aꞌe kehine la ihaele aꞌe, kena ime aꞌe, “Anau esau kemahana aꞌoe na ikaha.” 13Kena iapaꞌe nokaohi kelima kehine la ihamakau nokuu konu. Kena kehine la ehamaha Keakua.
14Ia kama hamakua hale loku la uloko haeꞌo, maikinimea Jesus ekonaꞌi kehine la i keaho kapu, kena ime aꞌe keonohenua la, “Kela eono naaho kakou ekau keheheaꞌu. Ia okou ekau keo mai naaho la pela Keakua mekonaꞌi okou. Okou iseo mai i keaho kapu.”
15Kena iko Kealiꞌi ime aꞌe, “Okou ekakala uhiuhi oia. Okou haunu namanu okou i keaho kapu. Okou eveke namanu okou la, kena ihakaꞌi namanu la ikaha ma kama hale la nohaunu.
16“Satan ekaohi kehine nei sehui ma valu nahekau. Ia kehine nei hemopuna Abraham. Ia kena Keakua ekau kehasao kama nei ikaha ma namahi Satan i keaho kapu.”
17Keualoko Jesus nikakala penei, nakama hakoa kela nikakala hasaꞌino aia la unapa. Ia keonohenua la uhihia i namea kaualeꞌa kela Jesus ehuli aꞌe la.
Kehua soliliꞌi
(Mat 13.31-32; Mrk 4.30-32)
18Kena Jesus eme aꞌe, “Kenoholana Keakua ekipu pehe? 19Kenoholana Keakua ehau poi hehua holiliꞌi, kela hekama ekoli iloko kalina aia nosomo poi helaꞌau. Ia namanu la epena naohana lakou iluna nalala kelaꞌau la.”
Kakala hulihuli ke{iist}
(Mat 13.33)
20Ko Jesus ime aꞌe hoi, “Kenoholana Keakua ekipu pehe? 21Kenoholana la ehau poi ke{iist} kela kehine ehilo iloko nahalaoa,*f13* kena ihamoe nohuka.”
Keala kevaelani ehainakaa haeꞌo
(Mat 7.13-14,21-23)
22Keualoko Jesus nikui sala pela i Jerusalem, kama la eaoaꞌo iloko namakaꞌina la. 23Kela hekama kemakaꞌina la eme aꞌe Jesus, “Kealiꞌi, Keakua mekonaꞌi ehia nakama iola? Nikamaa kama oia?”
Ko kama la ime aꞌe, 24“Okou ihamamahi iulu iloko kokoꞌa eꞌao la. Komaꞌi nakama haꞌikeꞌike ma iulu, ia meselavaa. 25Keualoko kama hamakua la umasiꞌe nopui kokoꞌa la, okou mekuu imaka aho nokikili kokoꞌa la, kena ume aꞌe, ‘Kealiꞌi. Kalaꞌi mai kokoꞌa nei.’ Ia kama la meime aku, ‘Anau semakino okou. Okou omai ihee?’ 26Kena okou meime aꞌe, ‘Makou eꞌai, ia eunu maꞌoe. Aꞌoe niaoaꞌo mai makou iloko kemakaꞌina makou la.’ 27Ia kama la meisui muli aku, ‘Anau semakino okou. Anau semakino keꞌina okou omai la. Oikaha manau. Okou hakoa nikama haisala.’
28“Okou meiꞌike Abraham, Isaac, Jacob, lakou ma nakama hakae nakakala Keakua la hakoa. Nakama la menoho iloko kenoholana Keakua la. Ia Keakua mehaise okou ikaha nokanikani, ia haꞌaki naniho okou. 29Naonohenua meio mai ikaha ma keanaꞌe, kelaꞌi, koꞌolau, ia ma keꞌupu. Nakama la meinoho iloko kenoholana Keakua noꞌai. 30Alakama hananiu meikeiho ilalo. Ia alakama moulalo meihananiu.”
Jesus memake iloko Jerusalem
(Mat 23.37-39)
31Keualoko la, alaFarasi eo nome aꞌe Jesus, “Kiaꞌi keꞌina nei, haele kelaaꞌina. Herod hihai ikaa aꞌoe imake.”
32Ko Jesus ime aꞌe nakama la, “Kaꞌa nome aꞌe kama saꞌino la,*f14* ‘Keaho nei ma kaiao anau mehakui nakipua saꞌino la ikaha, ia konaꞌi nakama lavea. Kena i keaho kanahakolu, keheheaꞌu anau nei meoki.’ 33Ia keaho nei, kaiao ma kela aho, anau meikui sala pela i Jerusalem. Maikinimea nakama hakae nakakala Keakua ekau kemake iloko Jerusalem.
34“Okou nakama i Jerusalem. Okou ekaa nakama ehakae nakakala Keakua la nomake. Kena okou emaꞌa nahaku la ikaa nakama kela Keakua nihaunalia iho la nomake. Anau hihai ihaꞌuku okou, ehau poi hemoa hine ehaꞌuku nakamaa moa aia la ilalo napaꞌau aia. Ia okou sehihai. 35Ila aꞌe. Nahale okou na mepuni, sehikama menoho inaa. Anau eme aku okou. Okou meseꞌike anau imuli. Haele nokae keualoko okou meikakala pela, ‘Hamaha kekama kela ehamai i kemale Kealiꞌi.’ ”
Currently Selected:
Luke 13: ojv
Highlight
Share
Copy
Want to have your highlights saved across all your devices? Sign up or sign in
© 1999, Wycliffe Bible Translators, Inc. All rights reserved.
