Luke 7
7
Jesus ekonaꞌi kama heheaꞌu
(Mat 8.5-13)
1Jesus uoki kekakala haiauna aꞌe keonohenua la, kena kama la uhaele nokae kemakaꞌina Capernaum. 2Kela hekama hamakua napulepule enoho ilaa. Kama hamakua la elaoi hamaoni kama heheaꞌu aia la, ia kama heheaꞌu la elavea haeꞌo, ukapili make. 3Keualoko kama hamakua la elono nakipukipu Jesus, ko kama la ihaunalia nakama hamakua na{Jiu} la ime aꞌe Jesus ihamai nokonaꞌi kama heheaꞌu aia la. 4Ko nakama la ikaꞌa noainoa aꞌe Jesus, “Hamai nokonaꞌi kama lavea la. Kama hamakua aia la hekama kaualeꞌa. 5Kama hamakua la elaoi makou, kena ihakuu hale loku makou la.”
6Kena iko Jesus io ma nakama la nokapili ikae kehale kama hamakua napulepule la. Ia kama hamakua la ehaunalia nasoa aia la nome aꞌe Jesus, “Kealiꞌi, aꞌoe isehakekele kehamai nokae mai inei. Anau sekau pela aꞌoe ihamai nonoho iloko hale kehale makou nei. 7Ia anau ehakaꞌoko pela anau sekau kehaele aku hoi. Emeia aꞌoe ime mai kakala oia, kena kama heheaꞌu anau la memaakala muli.
8“Anau ehalono nakama hamakua anau la. Ia napulepule anau la ehalono anau. Poi anau eme aꞌe pulepule la ihaele, kama la ehaele. Ia poi anau eme aꞌe kelaa pulepule ihamai, kena kama la ehamai. Ia poi anau eme aꞌe kama heheaꞌu la ipena kemea, kama la ehalono mai anau.”
9Keualoko Jesus elono nakakala nei, kama la umasalo haeꞌo, kena ihakiꞌe nome aꞌe keonohenua la, “Anau eme aku okou. Kama nei ehakina hamaoni Keakua. Anau sehikama elave iloko Israel kela ehakina penei hoi.”
10Kena nasoa kama hamakua la uvaꞌai muli i hale, noꞌike kama heheaꞌu la ukaualeꞌa.
Jesus ehaola muli kama emake
11Kena kela aho, Jesus uhaele kemakaꞌina Nain. Nakama kaukali aia la ia ma keonohenua elahi la ekaꞌa maia hoi. 12Keualoko nakama la nikaꞌa nokapili aꞌe kokoꞌa kemakaꞌina la, alakama keꞌina la esau aꞌe kinokama kekama umake. Kama umake la kaukahi kama kela kaukuaha hine keꞌina la. Ia komaꞌi nakama kemakaꞌina la ekaꞌa lakou ma kehine la hoi. 13Ia keualoko Kealiꞌi uꞌike kehine la, kama la ualoha haeꞌo, kena ime aꞌe kehine la, “Aꞌoe isekani.”
14Kena iko Jesus ikaohi kemoena kama umake la, kena nakama kela esau kinokama la uhamau. Kena iko Jesus ime aꞌe, “Kaupeala, masiꞌe iluna.” 15Ko kama la inoho iluna nokakala. Kena iko Jesus ivaꞌai muli aꞌe kaupeala la i kina aia la.
16Nakama la hakoa umasalo, kena i hamaha Keakua, kena ikakala solakou, “Kama hananiu kela ehakae nakakala Keakua la ukae mai. Keakua uhamai nokonaꞌi makou keonohenua aia la.”
17Kena kelono Jesus upalalaha iloko Judea ia ma naꞌina kapili aꞌe kemakaꞌina la.
Jesus laua ma John Baptist
(Mat 11.2-19)
18Nakama kaukali John Baptist la eme aꞌe John kelono Jesus. Kena iko John ianaa koꞌolua nakama la, 19kena ihaunalia koꞌolua la novasili aꞌe Jesus, “Aꞌoe o kekama kela Keakua ehaunalia iho? Poi seai, makou amehakali kelaa kama hoi?”
20Kena koꞌolua la eo aꞌe Jesus, kena ime aꞌe, “John Baptist ehaunalia mai maua novasili aku, ‘Aꞌoe o kekama kela Keakua ehaunalia mai, ma makou ihakali kelaa kama hoi?’ ”
21Saika la ia, Jesus ekonaꞌi komaꞌi nakama lavea ia ma nakama ehalono lihu namahana, ia ma nakama ekau lia nakipua saꞌino. Kama la ekonaꞌi komaꞌi nakama alemaka seni la noꞌike hoi.
22Kena iko Jesus ime aꞌe koꞌolua nakama kaukali John la, “Vaꞌai muli nome aku John hea olua eꞌike, ia hea olua elono.
Nakama alemaka seni la uꞌike,
Nakama navae emake la uhahaele.
Nakama elavea kemahana {leprosi} la ukaualeꞌa,
Nakama akalina kuli la ulono muli,
Nakama emake la umasiꞌe ikaha ma kemake,
Ia nakama haaloha la ehalono kelono kaualeꞌa Keakua.
23Poi hekama esenapa i nakipukipu anau nei, kena kama na mehakapu lia Keakua.”
24Kulana nakama kaukali John la uo, ko Jesus ikakala aꞌe keonohenua la nakipukipu John. “Okou ekaꞌa i keꞌina kukuaha la nomaka hekama pehe? Hekama enanaue, ehau poi naveve loloa aninia kemakani? Seai. 25Okou uo nomaka kekama kela eauꞌahu naauꞌahu kaualeꞌa? Seai hoi. Nakama ekuku laoi la eauꞌahu naauꞌahu esuinakaa, kena inoho i nahale nakuꞌu. 26Okou ekaꞌa keꞌina la noa? Imaka kekama hakae nakakala Keakua? Ino. Anau eme aku okou pela John elaꞌa iluna nakama hakae nakakala Keakua la hakoa. 27Nakakala nakipukipu John la emau iloko kelauniu kapu penei, ‘Anau ehaunalia iho kama hakae nakakala anau la imua aꞌoe, nokanakana keala aꞌoe mehaele la.’
28“Anau eme aku okou. Sehikama kemaalama nei ehananiu iluna John. Ia kekama emoulalo soia iloko kenoholana Keakua mehananiu iluna John.”
29Keualoko keonohenua la nilono nakakala Jesus, nakama la uhaio hakoa pela Keakua ekonu. Niaina nakama aoao na{kakisi} la ehaio pela hoi. Ala nikama kela John Baptist nihaauꞌau kapu la. 30Ia naFarasi ma nakama polopolo nakuaa la sehihai Keakua ikonaꞌi lakou. Ala nikama kela John sehaauꞌau kapu la.
31Ko Jesus ime aꞌe, “Nakama kaukama nei ekipu pehe? 32Nakama la ehau poi nikamaliꞌi kamumu kahi. Nakama la enoho iloko kalaniu nohavava solakou penei,
‘Makou kahao keꞌohe ilue okou. Ia okou sehilue.
Makou ehua saꞌa, ma ikani okou, ia okou sekani.’
33“John Baptist ehamai hamakapu ma ihasese hiꞌai, ia seunu namevale. Kena okou ekamumu ma, ‘Kama la ekau lia kipua saꞌino.’ 34Ia keualoko ke{kama ekipu kama} uhamai, kama la eꞌai ia eunu. Kena okou ekamumu hoi, ‘Ila aꞌe. Kama la aiꞌai vale, ia unuꞌunu vale. Ia kama la esoa laoi ma nakama aoao na{kakisi}, ia ma nakama haisala.’ 35Ia {Kama ekipu kama} eakamai. Naola nakama kaukali aia la hakoa ehuli aꞌe pela aia ekonu.”
Simon keFarasi
36Kela hekama naFarasi eme aꞌe Jesus iꞌai maia. Kena Jesus uhaele iloko hale kehale keFarasi la, nonoho noꞌai. 37Vahola, hehine haisala haeꞌo enoho iloko kemakaꞌina la. Ia kulana kehine la emakino pela Jesus eꞌai iloko hale kehale keFarasi la, kama la uhaele aꞌe, ma kelo*f4* manoni esuinakaa haeꞌo.
38Kena kehine la uhaele aꞌe nokuu kevahi Jesus nokani kani. Naleimaka aia emaoha iluna nakapuae Jesus. Kena iko kehine la ikoukuli ilalo ihapaupaꞌu nakapuae Jesus keloulu aia, kena ivaisoni nakapuae kama la. Kena iko kelo la noamusi nakapuae Jesus.
39KeFarasi kela nialu aꞌe Jesus la uꞌike kehine la, kena ekakala soia, “Poi Jesus hekama hakae nakakala Keakua, kama nei ekau kemakino pela kehine kela ekaohi aia la ehaisala.”
40Ko Jesus ime aꞌe keFarasi la, “Simon, anau hihai ikakala aku aꞌoe.” Ko Simon ime aꞌe, “Rabai, me mai hea.”
41Ko Jesus ime aꞌe, “Kela hekama hamakua eau aꞌe namoni aia i sakanaka, kekama eko lima huikalau namoni, kelaa kama eko kipulima namoni oia. 42Koꞌolua la sehimoni kesui muli kama hamakua la. Kena iko kama la ihakana koꞌolua la isesui muli namoni aia la. Kama hee iloko koꞌolua la melaoi mahi kama hamakua la?”
43Ko Simon ime aꞌe, “Anau hakaꞌoko meo kekama amaka. Kama hamakua la ehaialoha kama la isesui muli namoni komaꞌi.”
Ko Jesus ime aꞌe Simon, “Kehakaꞌoko aꞌoe la ekonu.” 44Kena iko Jesus ihakiꞌe noꞌike kehine la, kena ime aꞌe Simon, “Aꞌoe eꞌike kehine nei? Keualoko anau nihamai iloko hale kehale aꞌoe nei, aꞌoe seau mai hevai isolo nakapuae anau. Ia kehine nei esolo naleimaka aia iluna nakapuae anau, kena ihapaupaꞌu nakapuae anau keloulu aia. 45Aꞌoe sevaisoni mai anau. Ia keualoko anau ukae mai, kehine nei uꞌamaka novaisoni kahi nakapuae anau. 46Aꞌoe seamusi pohoulu anau kelo, ia kama nei eamusi nakapuae anau kelo manoni. 47Anau eme aku aꞌoe. anau mesolo nahaisala kehine nei hakoa ikaha. Kela hea kama nei elaoi hamaoni anau. Ia poi okou sehihai anau isolo nahaisala okou la hakoa ikaha, kena okou meselaoi hamaoni anau.”
48Kena iko Jesus ime aꞌe kehine la, “Anau esolo nahaisala aꞌoe ikaha.”
49Ia nakama kela enoho ilaa ukakala solakou, “Kenei hekama pehe? Kama nei eme aꞌe pela aia elavaa kesolo nahaisala ikaha.”
50Kena iko Jesus ime aꞌe kehine la, “Anau konaꞌi aꞌoe, maikinimea aꞌoe ehakina. Haele. Aꞌoe menoho laoi.”
Currently Selected:
Luke 7: ojv
Highlight
Share
Copy
Want to have your highlights saved across all your devices? Sign up or sign in
© 1999, Wycliffe Bible Translators, Inc. All rights reserved.
