Luke 8

Nakama ekaꞌa ma Jesus

1Kena imuli, Jesus uhaele valoko namakaꞌina elahi ma namakaꞌina soliꞌi ikaukaꞌu kelono kaualeꞌa kenoholana Keakua. Sehui ma lua nakama kaukali aia la ekaꞌa lakou hoi. 2Kama la ekonaꞌi nahine lavea ia ma nahine eisi nakipua saꞌino, kena nahine la ekaꞌa ma aia hoi. Kama la ehaise kauhiku nakipua saꞌino ikaha ma Mary Magdalene. 3Ia kama la ehaise kipua saꞌino ikaha ma Joanna (keꞌavana kela Chuza, kama heheaꞌu ma kekuꞌu Herod). Kena kama la ehaise nakipua saꞌino ikaha ma Suzanna, ia ma komaꞌi nahine hoi. Ia kena nahine la eau aꞌe Jesus ia ma nakama kaukali aia la naꞌai lakou iꞌai.

Kakala hulihuli kama ekoli nahua

(Mat 13.1-9; Mrk 4.1-9)

4Komaꞌi naonohenua namakaꞌina valaa ekaꞌa nohaꞌuku ma Jesus. Ko kama la ikakala aꞌe nakama la kakala hulihuli nei.

5“Kela hekama ehaele laku nahua ma isomo. Kulana kama la ehaele laku nahua la, alahua emaoha i keala. Ia keonohenua la ekakaꞌa iluna nahua la, ia namanu ulee iho noꞌai nahua la hoi. 6Alahua emaoha i keꞌina ehaku, ia sesomo avale. Kaꞌele la makauniki, kena nahua la umake. 7Alahua emaoha iluna keꞌina kiale. Ia kiale la esomo noꞌuhi valuna nahua la. 8Alahua emaoha iluna keꞌina kaꞌele kaualeꞌa nosomo kakahi, kena ehua huikalau nahua.”

Ia kena Jesus eme aꞌe, “Pena okou hihai ailoa, kena halono mai.”

Hakaꞌoko kela nakakala hulihuli

(Mat 13.10-17; Mrk 4.10-12)

9Nakama kaukali Jesus la evasili aꞌe kama la, “Hakaꞌoko nakakala hulihuli la emea maea?” 10Ko kama la ime aꞌe, “Keakua hihai okou imakino nakipukipu kenoholana aia kela nihunaa lia. Ia anau eaoaꞌo keonohenua la nakakala hulihuli pela,

‘Nakama la eꞌike, ia semakino hea lakou eꞌike.

Nakama la elono, ia semakino hea lakou elono.’

Kehakaꞌoko kakala hulihuli kekama haele laku nahua

(Mat 13.18-23; Mrk 4.13-20)

11“Kenei kehakaꞌoko nakakala hulihuli la. Nahua la o nakakala Keakua. 12Nahua kela emaoha keala la ehau poi nakama kela elono nakakala Keakua, ia Satan ehaele aꞌe noko nakakala Keakua ikaha ma nahakumanava nakama la, ipui nakama la isehakina Keakua. Pela Keakua mesekonaꞌi nakama la.

13“Nahua kela emaoha i keꞌina ehaku ehau poi nakama kela elono nakakala Keakua la, kena ihakina. Saika nakama la nilono, nakama la ehihia lo. Ia nakama la sekaohi mau nakakala la. Nakama la hakina kama saika oia. Ia keualoko naola lakou la ehainakaa, nakama la ukiaꞌi hea lakou nilono la.

14“Ia nahua kela emaoha i keꞌina kiale ehau poi nakama kela elono nakakala Keakua. Ia nakama la ehakekele maha naola lakou, nasileni lakou, ia ma nakahao lakou. Ia kena nakama la sehuli aꞌe nakipukipu kaualeꞌa iloko naola lakou.

15“Nahua kela emaoha i keꞌina kaꞌele kaualeꞌa, ala nikama hamaoni kela elono nakakala Keakua. Ia nahakumanava lakou ekaualeꞌa. Ia kena nakama la ekaohi mau nakakala la, kena inoho havalekoa nohuli aꞌe nakipukipu kaualeꞌa.

Keahi ilalo keumeke

(Mrk 4.21-25)

16“Selavaa hekama ikuni keahi nohakuu ilalo keumeke, ia ihaluu ilalo kelomoena. Emeia kama la mehakuu keahi la iluna. Ia kena nakama kela eo iloko hale la meꞌike keahi la.

17“Namea hakoa kela ehunaa lia mehuli aꞌe. Ia namea kela eꞌuhi meilavea lia oia.

18“Keualoko okou elono, kena halono hakaualeꞌa. Poi hekama eko namea Keakua eau aꞌe i aia, Keakua mehapaa aꞌe alamea hoi. Ia poi hekama ehakaꞌoko maia ekuku laoi, kena iseko namea Keakua ehihai iau aꞌe i aia, kena Keakua meiko namela hakoa ikaha ma kama na.”

Nakaina ia ma kina Jesus

(Mat 12.46-50; Mrk 3.31-35)

19Vahola, kina Jesus ia ma nakaina aia la eo aꞌe nomaka aia. Ia nakama la selavaa, maikinimea keonohenua la emumui aꞌe kehale la. 20Kena hekama iloko hale la eme aꞌe Jesus, “Kina aꞌoe ma nakaina aꞌoe la ekuu imaka hale, hihai imaka aꞌoe.”

21Ia Jesus eme aꞌe nakama la, “Nakama kela ehalono nakakala Keakua, kena ipena kaukali nakakala la, kena kina anau ia ma nakaina anau.”

Jesus ehamau kemakani

(Mat 8.23-27; Mrk 4.35-41)

22Kela heaho, Jesus ma nakama kaukali la eꞌae iluna kemonoui. Kena Jesus eme aꞌe nakama la, “Kakou io i kelaa vahi kemoana.” Nakama la ealeko puꞌei, 23ia keualoko lakou nikele, Jesus emoe. Vahola, nakama la ukilia kemakani maili, kena kemonoui la ukapili iapulu. 24Nakama kaukali Jesus la uo nohano kama la, kena ime aꞌe, “Kealiꞌi, kakou memalemo.”

Ko Jesus imahulu, kena ihai aꞌe kemakani ma napeau la. Kena kemakani la ukeiho, ia kemoana la umalino. 25Ko Jesus ime aꞌe nakama la, “Ea, okou sehakina?”

Nakama kaukali la umasalo haeꞌo, kena ikakala solakou, “Kenei hekama pehe? Kama la ekakala aꞌe kemakani la ma napeau la, ia namela ehalono nakakala aia la.”

Jesus ehakui nakipua saꞌino ikaha

(Mat 8.28-34; Mrk 5.1-20)

26Kena Jesus ma nakama kaukali aia la uhulo nokae kelaa vahi kemoana Galilee, keꞌina nakama Gerasa. 27Keualoko Jesus nikuu iho nohaele iuka, hekama kemakaꞌina la ehaele aꞌe nokili aia. Kama la eisi nakipua saꞌino iloko aia. Saika loloa lo, kama la senoho veihale. Kama la enoho i keꞌava, sehipamalo leleu. 28Keualoko kama la niꞌike Jesus, kama la ekoukuli imua Jesus, nokani aꞌe hamaloa, “Hea ilakonu kaua, Jesus kama Keakua hananiu? Anau eainoa aku aꞌoe isemea anau ihalono lihu.” 29Kipua la ekakala penei, maikinimea Jesus umea aꞌe kipua la ihaele ikaha ma kama la.

Kipua la ekau kahi kama la. Ia kena nakama kemakaꞌina la elolosi kama la, ia esaisai na{seni} nalima ma navae aia. Ia kama la emosimosi na{seni} la. Kena kipua la ehakaꞌi kama la nonoho iloko keꞌina kukuaha.

30Ko Jesus ivasili aꞌe kama la, “Oai kemale aꞌoe?”

Ko kama la ime aꞌe, “Komaꞌi.” Maikinimea komaꞌi nakipua saꞌino ekau iloko kama la. 31Ia nakipua la eainoa aꞌe Jesus isehaise lakou i kelua enoko kela epouli kakano.

32Saika la, komaꞌi na{piki} esusuei i kevahi kemouna la nolave naꞌai. Ko nakipua la iainoa aꞌe Jesus ihaunalia lakou ikau iloko na{piki} la. Kena iko kama la ihakana nakipua la io. 33Kena nakipua la uo ikaha ma kama kemakaꞌina la nokau iloko na{piki}. Kena iko na{piki} la hakoa ihulo ilalo keunuku mokuhua la nomaoha i kemoana nomalemo nomake.

34Keualoko nakama lolosi na{piki} la uꞌike na{piki} la umalemo, nakama la uhulo ikaha nokakala aꞌe nakama iloko moꞌu ia ma nakama kemakaꞌina la. 35Kena nakama la hakoa ekaꞌa aꞌe nomaka hea eapihi la. Ia keualoko keonohenua la nikae aꞌe Jesus, nakama la uꞌike kama kemakaꞌina lakou la enoho kapili Jesus, ia nakipua saꞌino la uo ikaha ma kama la. Kama la eleleu pamalo, ia hakaꞌoko aia la ukaualeꞌa. Ia kena keonohenua la umakaꞌu.

36Kena nakama lolosi na{piki} la eme aꞌe keonohenua pela Jesus ehakui nakipua saꞌino la ikaha ma kama la. 37Kena nakama Gerasa hakoa eme aꞌe Jesus ihaele ikaha ma keꞌina lakou la, maikinimea nakama la umakaꞌu haeꞌo. Kena iko Jesus iꞌae aꞌe iluna kemonoui la.

38Ia kama kela Jesus nikonaꞌi la eainoa aꞌe Jesus ikaꞌa laua. Ia Jesus uhaunalia kama la, kena ime aꞌe, 39“Haele i hale aꞌoe la, nokakala aku nakama la pela Keakua ekonaꞌi aꞌoe.”

Ia kena kama la uhaele valoko kemakaꞌina la nohaꞌali aꞌe pela Jesus ekonaꞌi aia.

Kamaliꞌi hine umake, ia ma kehine eosooso haeꞌo

(Mat 9.18-26; Mrk 5.21-43)

40Keualoko Jesus evaꞌai muli i Galilee, keonohenua la ekali mai kama la, ehihia pela kama la ukae mai. 41Kela hekama emale ma Jairus elolosi hale loku la. Vahola, kama la ehaele aꞌe nokoukuli imua Jesus noainoa aꞌe kama la ihaele aꞌe kehale aia la. 42Kaukahi kamaliꞌi hine Jairus la ukae sehui ma lua nahekau kemakua aia, ia kamaliꞌi la ukapili imake. Ia keualoko Jesus ehaele aꞌe kehale Jairus, keonohenua la emumui aꞌe aia.

43Kela hehine ilaa eosooso haeꞌo sehui ma lua nahekau, ia sehikama elavaa kekonaꞌi aia. 44Ko kehine la ihaele aꞌe vamuli Jesus nohakili keunuku pamalo kama la. Saika la oia, haeꞌo osooso la uhamoku. 45Kena iko Jesus ime aꞌe, “Oai kekama ehakili mai anau?”

Ko nakama la hakoa iꞌole aꞌe pela lakou sehakili Jesus. Kena Peter eme aꞌe, “Kealiꞌi, keonohenua la hakoa emumui aku aꞌoe.”

46Ko Jesus ime aꞌe, “Hekama ehakili anau. Anau elono alamahi anau uo ikaha manau.” 47Keualoko kehine la umakino pela aia selavaa kehuu, kama la uhaele pole aꞌe nokoukuli imua Jesus. Kehine la ekakala aꞌe Jesus imua namaisu keonohenua la hakoa pela aia ehakili kama la ioki kemahana aia la, ikaualeꞌa. 48Ko Jesus ime aꞌe kehine la, “Kaukama, aꞌoe ehakina i anau, ia kena aꞌoe ukaualeꞌa. Haele. Aꞌoe menoho laoi.”

49Keualoko kama la oikakala, kekama kehale Jairus la ukae aꞌe. Kena kama la eme aꞌe Jairus, kama hamakua keloku la, “Aꞌoe iseme aꞌe keRabai na ikonaꞌi kamaliꞌi hine aꞌoe la. Maikinimea kamaliꞌi la umake.”

50Jesus elono nakakala la, kena ime aꞌe Jairus, “Aꞌoe isemakaꞌu. Hakina, kena kamaliꞌi hine aꞌoe na mekaualeꞌa.”

51Keualoko nakama la ukae kehale Jairus, Jesus epui nakama la iseulu iloko hale la. Kena Jesus eko Peter, John, James, ia ma namakua kamaliꞌi la io lakou iloko hale. 52Vahola, nakama iloko hale la ukanikani hamaloa, ia ehua saꞌa. Ko Jesus ime aꞌe, “Okou isekani. Kamaliꞌi na semake, kama na emoe oia.”

53Ia nakama la ukakala hasanosano aꞌe Jesus, maikinimea nakama la umakino pela kamaliꞌi la umake. 54Ko Jesus ikaohi kelima kamaliꞌi la, kena ime aꞌe, “Kaukama, masiꞌe iluna.” 55Saika la oia, keanana kamaliꞌi la uvaꞌai muli, kena kama la umasiꞌe iluna. Kena Jesus ume aꞌe nakama la iau aꞌe niꞌai iꞌai kamaliꞌi la. 56Namakua kamaliꞌi la umasalo. Ia Jesus eme aꞌe nakama la isekakala aꞌe alakama hea aia epena la.

Currently Selected:

Luke 8: ojv

Highlight

Copy