Jěnisis 13
13
1Ka Ebream a puma o Ijipt, bâ, na mwad‘ ’aju, na ibeaju be diyanakidi beěhěpi, na Lât, na ’la o diko.
2Ebream a diyakindi kenango nangudi o bembe na hika etano, na hika.
3Ka mâ‐a vala o ekěndâ ’aju oviya o diko na ’la o Běthel, o iboko via mâkâ muaju vi diyakind‘ o jali, o hanganě ya Běthel na Ai.
4O iboko via âltar ’aju e hakid‘ omě o bohoboho; omě nd‘ o Ebream a dakakiyedi dina ja Jěhova.
5¶ Lât a kěki tepě na Ebream, a diyaki na myanga, na bembe na myâkâ.
6Ehe tě y‘ u yâlâkě o koka bâ, na ba diyake ta; ikabojana ngumb‘ ’abu e diyakindi eitě, ovaně nd‘ o bâ‐ba ha yâlâkidě o diya ta.
7Omě o diyaki n‘ usâju o hanganě ya batati ba bembe bea Ebream na batati ba bembe bea Lât. Nandi, ba‐Keneani na ba‐Pěrizi ba diyakindi o ehe tě.
8Ka Ebream a vâ na Lât, na, Mbi hâhâlâkiděnd‘ âvě, na, usâju u diyake o hanganě ’ahu na nâvě, na o hanganě ya batati bamě na batati bâvě; ikabojana ho ndi nyangwě pâkâ.
9Ehiki yěhěpi e ’bě o boho bwâvě? mbi hâhâlâkiděnd‘ ’âvě, na, palwakidě nyal‘ ’âvě o umbi jadi: oningě wa nângâ pělě ya ’nâ ya ’měngwě, vâkâna mbi valindi o pělě ya ’nâ eyomi; nd‘ oningě wa ’la o pělě ya ’nâ eyomi, vâkâna mbi ka valandi o ya ’měngwě.
10Ka Lât a betě mihâ maju, ka mâ‐a yěně ehanjiboka ya Jârdan yěhěpi, na, e ma bâhâki bwamu pělě jěhěpi, panika muanga mua Jěhova (ovaně Jěhova a t‘ o jilidě Sâdam na Gomâra) panika ehe ya Ijipt, ona o kěkě o Zoar.
11Nonaně ndi o Lât a pânâkiyi mâ mětě, ehanjiboka ya Jârdan yěhěpi; ka Lât a vala o pělě ya ’hiki; ka bâ‐ba palwanidě upâkwě oviya upâkwě a jadi.
12Ebream a diyakindi o ehe ya Kenean, ka Lât a diya o mamboka ma ehanjiboka, ka mâ‐a ’mudě mâkâ muaju kwanga na o Sâdam.
13Nandi bato ba Sâdam ba diyaki babe, na ba hayi Jěhova bobe nangudi.
14¶ Ka Jěhova a vâ na Ebream, o Lât a diyakidi a palwanidě na ju, na, Betakě, nandi, mihâ mâvě, wa hilě oviya iboko viâvě vi jadi na ’la o pělě ya ngângâ, na o pělě ya diko, na o pělě ya ’hiki, na o pělě ya manga:
15Kabojana ehe tě eâvě e yěněkě ekae, yâ nd‘ eamě e ka vě âvě, n‘ ibângâ jâvě egombe yěhěpi.
16N‘ Umba‐Mbi ka pangandi ibângâ jâvě i diyaka panika ubulubula mua he: oningě na moto a langingě ubulubulu mua he, vâkâna ibângâ jâvě i ka langaniya tepě.
17Umwaka, wa pudungana o ehe, o bwaba bwa omě, na njanjo ya omě; ikabojana Mbi ka věnd‘ âvě yâ.
18Ka Ebream a věngidě mâkâ muaju, ka mâ‐a pâ, ka mâ‐a diya baka na bele bea oak bea Mamre, be jadi o Hibrân; ka mâ‐a longiya Jěhova âltar omě.
Currently Selected:
Jěnisis 13: BNG1895
Highlight
Share
Compare
Copy
Want to have your highlights saved across all your devices? Sign up or sign in
Published by the American Bible Society in 1895, 1926.
