Jěnisis 18
18
1Ka Jěhova a pumiya o mâ‐a jadi o bele bea oak bea Mamre; ka mâ‐a diyakidi o ubiyâ mua mâkâ na yomu ya mwehe.
2Ka mâ‐a betaně mihâ maju oba, ka mâ‐a tamuwa, umbwakiyate, bamo balalo těměngo banjaniděngo na ju; o mâ‐a yěni bâ, ka mâ‐a ’la umbila oviya ubiyâ mua mâkâ na ’la ka lata na bâ, ka mâ‐a balama o he.
3Ka mâ‐a vâ, na, Upangiyi mwamě, oningě na mbi duwendi ehekwě o mihâ mâvě, mbi hâhâlâkiděnd‘ âvě, na, o tombake o uhayi muâvě u jadi.
4Bâbâkâ, mbi hâhâlâkiděnd‘ âvě, na, miba mahâlě ma vanakwě, na nâvě wa tuka beko beâvě, wa ta yâjâ o edingihě ya ’le.
5N‘ umba‐mba van‘ inyěni itambu ja pěmbě, n‘ inyěni wa kehěni melema meanyu, běngě o tombakeni, ikabojana o pândini o uhayi muanyu u jadi. Ka bâ‐ba vâ, na, Haka nonaně ka ’vě wa vâ.
6Ka Ebreham a ’la wâwâ o mâkâ o Serah a jadi, na, Hunganaka o kokě beyěja bea pěmbě eyamu belalo, wa nyinga yâ, na nâvě wa ha keki.
7Ka Ebreham a ’la umbila o mwanga mua nyati, ka mâ‐a vana etumbě ya nyati eyamu ya njângě, ka mâ‐a vě yâ uhayi mua momo; ka mâ‐a hadividě o paka yâ.
8Ka mâ‐a nângâ bâtâlâ, na manyângâ, na etumbě tě ya nyati eaju a kenjakidě, ka mâ‐a tědě bâ beâ; ka mâ‐a těmě o tina ’le baka na bâ, ka bâ‐ba ja.
9¶ Ka bâ‐ba vâ na ju, na, Mwad‘ ’âvě Serah a l‘ ove? Ka mâ‐a vâ, na, O mâkâ.
10Ka Mâ‐a vâ, na, Mbambayě, Mbi ka timband‘ o âvě‐o jadi o epedi e ka uluanidě; umbwakiyate, mwad‘ ’âvě Serah a ka jandi mua‐momo. Ka Serah a yoka yâ o ubiyâ mua mâkâ, u diyakid‘ o mbuhw‘ ’aju.
11Nandi Ebreham na Serah ba diyaki ba bě batodu mětě, hwi tombango; Serah au diyaka pě itingidi via bajo.
12Jâ ndi ja Serah ja yâ n‘ ulema, na, Mba bě utodu, na upangiyi muamě tepě utodu, mbi ka pahiyi pě mbya?
13Ka Jěhova a vâ, na, Ebreham, na, E lě nde ya Serah e yâkě, na, Mbambayě, mbi ka ji pě mwana, mba bě utodu?
14O na elombo e di bokolo sasě o Jěhova a jadi? O egombe tě e di levudwěngo nd‘ eamě e ka timbě o âvě‐o jadi o epedi e ka uluanidě, na Serah a ka ji mua‐momo.
15Jâ ndi ja Serah ja banga, ka mâ‐a hâhâ, na, Mbu yâ. Ka Mâ‐a vâ, na, Nyawě, o ma yândi.
16¶ Ka bamo tě ba ’muwa omě, ka bâ‐ba tamuwa o pělě ya Sâdam: ka Ebreham a ’la na bâ ka dikidě bâ o njea.
17Ka Jěhova a vâ, na, Mbi dimbake Ebreham elombo ’amě e hakě?
18Kabojana, mbambaě Ebreham a ka diyandi etomba eněně, na betomba bea he beěhěpi be ka vambudwěndi ibâtâ na ju.
19Kabojana Mbi yowudi mâ, na, a ka sombiyi bana baju na ba ndabo ’aju o mbuhw‘ ’aju, na bâ‐ba ka tati njeya ya Jěhova, o iha ja mahuwa na uhango; ovaně nd’ o Jěhova a ka pâdě o Ebreham a jadi, nyang‘ ’aju e kalaki na ju.
20Ka Jěhova a vâ, na, ikabojana iyama ja Sâdam na Gomâra i ndi iněně, n‘ ikabojana bobe bwabu bo nd‘ o kena sasě,
21Mbi ka hubandi ovoně pâni, ka yěně ipě ba te hango hohonganěngo n‘ iyama i di pângo o umbi jadi, ipě i běwě, Mbi ka yowěte.
22Ka bamo tě ba vonguwa oviya omě, ka bâ‐ba vala o pělě ya Sâdam; ndi Ebreham a těměkind‘ o boho bwa Jěhova.
23¶ Ka Ebreham a bengiya pyělě, ka mâ‐a vâ, na, O ka hinidě tepě bayamu na babe ta?
24Oningě mabo ma bato bayamu matano ma diya o mboka tě; o ka hinidě tepě yâ, o kobe iboko těvině opělě ya mabo tě ma bato bayamu matano ma jadi omě?
25Yeně e diyake yaviděngo na nâvě o iha ja ihadi těkavi, iweya ja bayamu na babe; na na bayamu ba diyake panika babe, yeně e diyake yaviděngo na nâvě. Ulenimehango mua he yěhěpi a haye hohonganěngo?
26Ka Jěhova a vâ, na, Oningě Mbi duwingě mabo ma bayamu matano o Sâdam o mboka, vâkâna Mbi kobindi iboko viěhěpi o nyang‘ abu.
27Ka Ebreham a yavwana, na, Nandi, umbwakiyate, umba mbi jadi ubulubulu na jubu, mbi tobwanindi ikala na Jěhova:
28Ipě batano ba pěně o mabo ma bayamu matano: o ka jilidě tepě mboka yěhěpi ikabojana batano ba ’bě? Ka Mâ‐a vâ, na, Oningě Mbi duwingě mabo manai na batano, vâkâna Mbà jilidě yâ.
29Ka mâ‐a kala pě na ju, na, Nandi, oningě ma duwaniya mabo manai omě. Ka Mâ‐a vâ, na, O nyanga ya mabo manai, Mbà haye yâ.
30Ka mâ‐a vâ na ju, na, A! Jěhova a lingwake, mbi ka kalandi: Oningě mabo malalo ma duwaniya omě. Ka Mâ‐a vâ, na, Mbà haye yâ, oningě Mba duwa mabo malalo.
31Ka mâ‐a vâ, na, Nandi, umbwakiyate, mbi tobwanind‘ o kala na Jěhova; Nd‘ oningě omě wa duwaniya mabo mabale. Ka Mâ‐a vâ, na, O nyanga ya mabo mabale Mbà jilidě yâ.
32Ka mâ‐a vâ, na, A! Jěhova a lingwake, mbi ka kalate kabo njo tě ya pâkâ ekaně: Oningě omě wa duwaniya jomu. Ka Mâ‐a vâ, na, Mbà jilidě yâ o nyanga ya jomu.
Currently Selected:
Jěnisis 18: BNG1895
Highlight
Copy
Compare
Share
Want to have your highlights saved across all your devices? Sign up or sign in
Published by the American Bible Society in 1895, 1926.
