Jân 12

1Jâ ndi ja Jisus ja vala o Bětane ya Laserâs a diyakidi wango, uaju A pumbwakidě, hw‘ utoba ovaně isango j‘ Ikunduwa i t‘ o pâ. 2Omě nd‘ o bâ‐ba yambakiyi Mâ beja bea kolo; na Martha a dilakě: ndi Laserâs nd‘ umbâkâ a diyaki na ju o tagulu. 3Jâ ndi ja Meri ja nângâ iwěla ja mavulě ma kango ma spaiknard ma weyakě ihambe iněně, a hakiyi beko bea Jisus, na mâ‐a ka titwaka bea na howe jaju: ndabo e londakindi ti na kango ya mavulě tě. 4Jâ ndi ja eyokwedi ’aju yâkâ, Judas Iskariât, mwan‘ ’a Saimân, a kândâkiyi Mâ, 5ja vâ, na, Mavulě tě ma kango ekama, ma ’nyělwě o hambwě na kama ja fula ilalo nande, na jâ‐ja věwě mekuge? 6A vâkind‘ ekae, hanga o nyanga ya na a yěněkindi mekuge isâlâ; ndi ’kabojana a diyakindi mwibi, mâ tepě a diyakidi na elandi, a ma bapakě be vamakwě omě. 7Jâ ndi ja Jisus ja vâ, na, Dikaka mâ mbwe: a tatakindi ekae ya buhwa boamě bo ka tongwě. 8Ikabojana o ndini na mekuge egombe yěhěpi; o ’běni n‘ Umba egombe yěhěpi.

9Bato ba Jiu baitě ba yowakidě na A nd‘ omě: ba kěkěndi hanga o pěl‘ ’a Jisus pa, ndi ovaně nd‘ o bâ‐ba ka yěně Laserâs tepě, uaju a pumbwakidě. 10Ndi prist ja meolo i hakindi ehoka nana ba weyaka Laserâs tepě; 11Ikabojana tin‘ ’aju ndi ya Jiu baitě ba kěkidi, ka bâ‐ba kamidě Jisus.

12O buhwa bo vitakidě bato baitě ba vakidi o isango, o bâ‐ba yokakidi na Jisus a vakandi o Jěrusalěm, 13Ba nângâkindi magogo ma biya, ka bâ‐ba vala ka lata na ju, ba yamaka, na, Hosana: Ibâtâ n‘ Upolo mua Israěl, a vakě na dina j‘ Upangiyi. 14O Jisus a duwakidi mwan‘ ’a buru, A diyakind‘ o eâ diya; pani ka yâ e di lěndwěngo, 15na, O bangake, mwamwajo ua Saion: umbwakiyate, Upolo muâvě u vakandi, diyango o mwana buru. 16Beyokwedi beaju bu bweyakidě belombo těkabe o bohoboho: nd‘ o Jisus a diyakidi a hekudwě, ka bâ‐ba yongidě na belombo těkabe be lěnděkudwěndi o pěl‘ ’aju, na na ba haki tepě Mâ belombo těkabe. 17Ebimba e diyaki na ju o Mâ‐a ndakiyi Laserâs o malonga maju na pumbudě mâ, ba pakwakindi. 18Tina těkaně bato ba lataki na ju, ’kabojana ba yokaki na a hakindi ugoma těkamu. 19Ovaně nd‘ o Farisi ba vâkidi bâ mětě na bâ mětě, na, Oa yěněkěni na oa hakani elombo? umbwakiyateni, he e vitidi Mâ.

20Griki jâkâ i diyakidi tepě o bâ‐ba jadi, ba vakidi ka kaliya o isango. 21Bâ ndi ba vakidi o Filip a jadi, a diyakidi ua Bětseda ya Galili, ka bâ‐ba vâ na ju, na, Paia, ho vahakandi o yěně Jisus. 22Ka Filip a viya ka languwa Andru: ka Andru na Filip ba languwa pě Jisus. 23Jâ ndi ja Jisus ja yavwana bâ, na, Iwěla i pândi ja Mwana moto i ka hekudwě. 24Mbi vâki n‘ inyěni pâkwěpâkwě mětě, na, Kabo dihâ ja wheat ja kwa o he, na jâ ja wa, i diyakate dipâ: nd‘ oningě ja wa, vâkâna i lângâkândi bebuma beitě. 25A tândâkě eměnâ ’aju, a ka nyangi yâ; ndi a binakě eměnâ ’aju, o he těkaně, a ka tati yâ o eměnâ ya egombe yěhěpi. 26Oningě moto ka moto a dilakě ’Mba, a vitake ’Mba; o Umbi jadi, omě tepě udili muamě u ka diyě: oningě moto te moto a ka dilě ’Mba, Mâ ndi ua Paia a ka hekidě. 27Ilina jamě i yěněki njuke kya těkaně; nandi Mbi ka vâ lě na? Paia, yongakě ’Mba oviya iwěla těkadi: ndi tina těkaně nd‘ eame e vanakidi o iwěla těkadi. 28Paia, hekakidě dina jâvě. Ka joyi ja viya oviya Hěvěn, na, Mbi jâ hekiděngo, n‘ Umba‐mbi ka hekidě tepě jâ. 29Ebimba e diyaki těměngo omě e yokaki jâ, ka eâ ea vâ, na, E ndi ngadi. Bâkâ mâ, na, Enjěl nd‘ e kalaki na ju. 30Jisus a yavwanakindi, ka Mâ‐a vâ, na, Joyi těkadi ju viya o pěl‘ ’amě, ndi o pěl‘ ’anyu. 31Yěkě ya he těkaně ya běndi kya těkaně: kya těkaně upolo mua he těkaně u ka ’hwěndi. 32Nd‘ Umba, oningě ’Mba betwě oba ea he, vâkâna Mbi ka duli bato běhěpi o ’Mbi jadi. 33(A vâkindi ekae, ilevidě j‘ iwedo jaju i ka wě.) 34Ebimba e yavwanaki Mâ na, Ho ndi yokango o Belekanako na Kraist a ka diyate egombe yěhěpi: nd‘ O vâkâ lě pě, na, Mwana moto a ka betwěnd‘ oba, nande? Mwana tě ua moto ekaně a lě nja? 35Jâ ndi ja Jisus ja vâ na bâ, na, Bwe e te n‘ inyěni okava egombe ehâlě. Tamwakani egombe ’anyu e di na bwe, obanga ivititi via pâ o inyěni o jadi: jambojana a tamwakě n‘ ivititi, a ’we pělě ’aju e kěkě. 36Kamakiděni bwe, o inyěni o jadini na bwe, ovaně nd‘ inyěni o ka diyěni bana ba bwe.

O Jisus a kalakidi belombo těkabe ka Mâ‐a věngěmě, ka Mâ‐a kuta nyolo ’aju oviya o bâ‐ba jadi. 37Ndi tombekete ka Mâ‐a hakidi megoma meitě o bâ‐ba jadi, 38bu kamakidě Mâ: Na ovaně nd‘ o ndaga ja Iseyas usâki i kalakidi, i ka hohonganě, na,

Upangiyi, a lě nja a di kamiděngo upako muahu? a lě nja a levudwě enâ y‘ Upangiyi?

39Ovaně nd‘ o bâ‐ba ha yâlâkidě o kamidě, ’kabojana Iseyas a vâki pě, na,

40A ndi dibango mihâ mabu, na Mâ‐a delidě bebumulema beabu; ovaně nd‘ o bâ‐ba ka diyě ba yěne na mihâ mabu, na bâ‐ba bweyidě na melema meabu, na ba ’luwa, n‘ Umba‐mba yongě bâ.

41Iseyas a vâkindi belombo těkabe o mâ‐a yěněkidi ivenda jaju, ka mâ‐a kala o pěl‘ ’aju. 42Tombekete ka yâ e diyakidi nonaně, bapangiyi baněně baitě ba kamakidi Mâ; ndi bu měměkě Mâ o pěl‘ ’a Farisi, o banga ba věngudwě o sinegâg: 43Ikabojana ba ma tândâkândi ibendě ja bato, wa na ibendě ja Anyambě.

44Jisus a yamaki ka Mâ‐a vâ, na, A di ’Mba kamiděngo a yamakindi ’Mba, ndi a kamakiděndi A lomaki ’Mba. 45Na a yěněkě ’Mba, a yěněkěte A lomaki ’Mba. 46Mbi pândi bwe o he těkaně, nana uěhěpi a kamakidě ’Mba, a diye n‘ ivititi. 47Oningě moto te moto a ka yokě ndaga jamě, na mâ‐a kamidě jâ, Mba yěkidě mâ: jambojana Mbu vaka ka yěkidě he, kabo ka hungina he. 48A kiyakě ’Mba, na mâ‐a věhělidě ndaga jamě, a n‘ Umbâkâ a yěkěkidě mâ: ndaga jamě i di kalango, jâ ndi i ka yěkidě mâ o buhwa boa madikanido. 49Ikabojana Mbu kalaka Umba mětě; ndi Hangwě e lomaki ’Mba, nd‘ A věki ’Mba elekanako nyanga ’amě e ka vâyě, na nyanga ’amě e ka kalě. 50Mbi yowěngo na elekanako ’aju ndi eměnâ ya egombe yěhěpi: nyanga ’amě e kalakě yěhěpi, e ndi ka Hangwě a vâki n‘ Umba, nonaně tepě Umb‘ ’i kalakě.

Currently Selected:

Jân 12: BNG1895

Highlight

Copy