Jân 16

1Mbi languwendi inyěni belombo těkabe na o banga wa kâbâni. 2Ba ka věngiděndi inyěni o sinegâg: e! egombe e vakandi ya uěhěpi a weyakě inyěni, e ka piviyě na a hakandi ehavu ya Anyambě. 3Ba ka handi inyěni belombo těkabe, ’kabojana ba ’wě Hangwě, n‘ Umba. 4Mbi langwakiyandi inyěni belombo těkabe na ovaně nd‘ inyěni o ka yongidě, o iwěla i ka pâyě, na Mbi langwakiyate inyěni beâ. Mbu langwakiya ’nyěni belombo těkabe o jali, ’kabojana Mbi diyaki n‘ inyěni. 5Ndi Mb‘ ’alandi o A lomaki ’Mba a jadi, o uwaki ’Mbani n‘ umbâkâ, na, Oa ’la l‘ ove? 6Ndi ebumulema eanyu e londi na ngěbě ti, ’kabojana Mbi languwendi inyěni belombo těkabe. 7Tombekete ka yâ e di nonaně, Mbi langwakiyandi inyěni pâkwěpâkwě, na: E ndi bwam‘ o pěl‘ ’anyu n‘ Umba mbi kěkě: ’kabojana Mbi vale, Unyěvidi mua viye inyěni o jadi; ndi oningě Mba věngěmě, vâkâna Mbi ka lomi mâ inyěni o jadi. 8O Mu a kâ pâyě a ka suli he o pěl‘ ea bobe na ea hohonganěngo, na ea yěkě: 9Ya bobe, ’kabojana ba kamakidě ’Mba; 10Ya hohonganěngo, ’kabojana Mb‘ ’alandi o Paia a jadi, n‘ inyěni oa yěne pi ’Mbani; 11Ya yěkě, ’kabojana upolo mua he těkaně u yěkěkudwěndi. 12Mbi na belombo beitě be kalakě n‘ inyěni, ndi oa yâli beâni kya těkaně. 13Nd‘ o Ilina ja pâkwěpâkwě i ka pâyě, i ka tumbwanandi inyěni o pâkwěpâkwě yěhěpi; ’kabojana A kale o pěl‘ ’aju mětě: ndi eaju e ka yokě, yâ nd‘ eaju e ka kalě: A ka leviděndi inyěni belombo be vakě. 14A ka hekidi ’Mba: ’kabojana A ka pahiyandi ibeamě, na Mâ‐a ka levakidě inyěni. 15Belombo bea Hangwě be janidi be ndi beamě; tina těně nd‘ eamě ya vâ na, A ka nângândi ibeamě, na Mâ‐a levidě inyěni. 16Ukili kwěi vâkâna oa yěne pi ’Mbani: n‘ ukili kwěi, vâkâna o yěni pi ’Mbani; ’kabojana Mb‘ ’alandi o Hangwě a jadi. 17Jâ ndi ja beyokwedi beaju beâkâ ja vâ bâ mětě na bâ mětě, na, Ekae e lě nde eaju e ma vâ na hwě, na, Ukili kwěi, vâkâna oa yěne pi ’Mbani: n‘ ukili kwěi, vâkâna o yěni pi ’Mbani: na ikabojana Mb‘ ’alandi o Hangwě a jadi. 18Ovaně nd‘ o bâ‐ba vâki, na, Ekae e lě nde eaju e vâki, na, Ukili kwěi? Hoa yowě o pakuwa ka Mâ‐a vâ. 19Ka Jisus a yowě na ba vahakandi o uwa Mâ, ka Mâ‐a vâ na bâ, na, O uwanakandini inyi mětě n‘ inyi mětě, o pěl‘ ’amě e ma vâ, na, Ukili kwěi, vâkâna oa yěne pi ’Mbani: n‘ ukili kwěi, vâkâna o yěni pi ’Mbani? 20Pâkwěpâkwě mětě Mbi vâki n‘ inyěni, na, O ka yandini na inyěni o hilwakani, ndi he e ka peyandi: o ka yěněndini ngěbě, ndi ngěbě ’anyu e ka ’luwandi mbya. 21Mwajo, o mâ‐a běkě a bě n‘ ijadi, a yěněki ngěbě ’kabojana iwěla jaju i pândi: nd‘ o mâ‐a diyakě a ja mwana, a yongakidě pě mehiyo na mbya ya na moto a jawudwěndi o he. 22O ndini kya těkaně na ngěbě: ndi Mbi ka yěni pě inyěni, vâkâna ebumulema eanyu e ka yěni mbya; moto a nângâne inyěni mbya ’anyu. 23O buhwa těboně oa uwi ’Mbani elombo. Mbi vâki n‘ inyěni pâkwěpâkwě mětě, na, Eanyu e ka uwě Hangwě na dina jamě, A ka věndi inyěni. 24O ’běni uwango elombo o vyo na dina jamě: uwakani, vâkâna o pahiyendini, ovaně nd‘ o mbya ’anyu e ka londě.

25Mbi kalakandi n‘ inyěni belombo těkabe na mekanakâdi, ndi egombe e vakandi eamě a ka diyě Mbi kale pě n‘ inyěni na mekanakâdi, ndi Mbi ka leviděndi inyěni Hangwě o bwebwe. 26O buhwa těboně ndi iboanyu bo ka uwě na dina jamě: Mba vâki n‘ inyěni na Mbi ka kaliyandi Hangwě o pěl‘ ’anyu: 27Ikabojana Hangwě mâ mětě A tândâkândi inyěni, ’kabojana o tandâkândi ’Mbani, na na o ndini kamiděngo na Mbi vakiyendi o Anyambě a jadi. 28Mbi vakiyendi o Hangwě a jadi, k‘ Umba‐mba, viya o he: Mbi dikaki pě he, na ’la o Hangwě a jadi. 29Beyokwedi beaju be vâki na ju, na, Hilakěte, oa kali bwe, ou kala pě n‘ ukanakâdi. 30Ho yowuděndi nandi, na O yowuděndi belombo beěhěpi, o ibě tepě na mala na moto a uwake âvě: ekae nd‘ eahu e kamakidě na o vakiyendi o Anyaambě a jadi. 31Jisus a yavwanaki, bâ, na, Nandi o t‘ inyěni o kamiděni? 32Umbwakiyateni, iwěla i vakandi na jâ i pândi, ijanyu i ka vanjanganě, moto moto iboko viaju mětě, o ka dikandi ’Mbani dipâ: ndi Mbi ’bě dipâ, ’kabojana Hangwě a n‘ Umba. 33Mbi langwakiyendi inyěni belombo těkabe, ovaně nd‘ inyěni o ka pahiyěni jonga o Umb‘-’i jadi. O ka diyandini na betuniya o he, ndi diyaki bwamu: Mbi bali he.

Currently Selected:

Jân 16: BNG1895

Highlight

Copy