Jân 2

1Diba i diyakindi o hwi ’lalo o Kena ya Galili, nyangwě ya Jisus a diyakind‘ ovoně. 2Jisus na beyokwedi beaju ba ndakudwě tepě o diba. 3O bâ‐ba vahi wain, ka nyangw‘ ’a Jisus a vâ na Ju, na, Ba ’bě na wain. 4Ka Jisus a vâ na ju, na, Mwajo Mbi ka ha lě na nâvě na? iwěla jamě i ha pâyete. 5Nyangwě a vâkindi na bahayi, na, Elombo yěhěpi eaju e ka vâyě n‘ inyěni, na, Hakani; hakani. 6Omě o diyakindi na bevondo bea miba utoba bea malale, itokidi via Jiu, be weyaka yâkâ galân ibale na ba ilalo. 7Jisus a vâki na bâ, na, Londakěni bevondo na miba. Ka bâ‐ba londě beâ nal‘ udumbu. 8Ka Mâ‐a vâ na bâ, na, Tokani, oa valanani gâveni y‘ isango. Ka bâ‐ba valana. 9O upangiyi mu‘ isango u běki miba ma ’lwakudwě wain vekango, au yowakě o yâ e vakiyedi, (kabo bahayi ba tokaki miba ndi ba yowakidě,) ka gâveni y‘ isango ya ndiya ubayi, 10ka mâ‐a vâ na ju, na, Moto uěhěpi a těkidi wain eyam‘ o jali, na oningě bato ba maděngě o mâtâ bwamu, běngě a těkidě ebe: nd‘ âvě o tatango wain eyamu na pâ kya těkaně. 11Jali tě ja belembo ekadi, ndi ja Jisus i hakidi o Kena ya Galili, ka yâ‐ya levidě ivenda jaju, ka beyokwedi beaju bea kamidě Mâ.

12Ka Mâ‐a vala o Kapěrnaum o ekae e běki pa, na nyangwě na bana ba nyangwě na beyokwedi beaju; bu bembaka ovoně hwi iitě.

13Isango ja Jiu j‘ Ikunduwa i diyakindi ja bě piělě, ka Jisus a vala o Jěrusalěm. 14Ka Mâ‐a duwa o těmpěl ba ma hambakidě nyati, na medâmbě, na mbenga, na bapepengani ba dâlě bâ diyediye: 15o Mâ‐a běkidi hango ukasa mua mekâdi mehâlě, ka Mâ‐a duma bâ běhěpi o těmpěl na medâmbě na nyati; ka Mâ‐a hova dâlě ja bapepengani, na Mâ‐a ka idakě tagulu; 16ka Mâ‐a vâ n’a ba ma hambaka mbenga, na, Věngěkidi belombo těkabe okava: o pangakeni ndabo ’a Paia ya bě ndabo ya mahambe. 17Ka beyokwedi beaju bea yongidě na e lěndwěngo, na, Edoko ya ndabo ’âvě e ji ’mba. 18Jâ ndi ja Jiu ja yavuwa, ka bâ‐ba vâ na ju, na, Nandi o haka belombo těkabe, ndi e lě nja nděmbo ě eâvě e levakidě hwě? 19Ka Jisus a yavwana, ka Mâ‐a vâ na bâ, na, Bulwakidi těmpěl těkaně, Mbi ka těděte yâ na hwi ilalo. 20Ka Jiu ba vâ, na, Těmpěl těkaně e diyakindi mabo ma mepuma manai na mepuma utoba ilongwě, o ka těděte yâ na hwi ilalo? 21Ndi A kalakindi těmpěl ya nyolo ’aju mětě. 22O Mâ‐a diyakidi A pumbuwa oviya bawewe, ka beyokwedi beaju bea yongidě na yâ nd‘ eaju e kalaki na bâ: ka bâ‐ba kamidě ilěndwě, na ndaga ya Jisus e kalakidi.

23O Mâ‐a diyakidi o Jěrusalěm o ikunduwa, o buhwa bo‘ isango, baitě ba kamakidi dina jaju, o bâ‐ba yěněkidi belembo beaju be ma haka. 24Ndi Jisus Au věkě bâ nyolo ’aju, ’kabojana A yowakiděte bato běhěpi. 25Au vahaka tepě na moto a pakwakiye Mâ o pěl‘ ’a moto: ’kabojana a yowakiděte nyanga e diyakidi o moto a jadi.

Currently Selected:

Jân 2: BNG1895

Highlight

Copy