लुका 6
6
1ओहाङःसैको यहुदी मान्तालम्कोः काम् न्यास्ती धोओ दीन्हाङः येसुमा ओउःकुस् वाह्ओमयःमा गहुङ् राङ्हाङः च्योल्ती वाह्ओ खेःतो। च्योल्ती वाह्तोक् बेलाहाङः ओउःकुस् वाह्ओमयःइ यात्नीस् गहुङ्कोः चुय् काव्ह्ती जेःआकानी। 2ओउःमयःइ चुय् काव्ह्ती न्युत्ती जेःओपाय् फरीसीलम्इ च्यवःती येसुकःताङ् वाङ्ती “इ ङीइ जवओ धोओ दीन्हाङः दोह् हायःतीतेः चुय् काव्ह्ओ काम्तेः जाङ्ह्तेःनानी। धोओ दीन्हाङः दोह् काम्मा जाङ्ह्सा स्याव्ल बा” त दाय्ह्ती जान्तीलेः तोनीतो 3“लौ उय्ह्लेकोः दावुद् राजाइ दोह् दोह् जाङ्ह्ओ त नीङ्इ पह्रती चीःतेःनीलीया। दावुद्मा ओउःकोः साथीलम्मा योङ्क्राय्ती सीती 4झ्यान्ते परमेस्वर्कोः मन्दीर्हाङः पोक्ती परमेस्वर्कायः ल्हाती गम्ओ लाङ् रोत्ती जेःसाकायः आलःआकान्। ओउः लाङ्पाय् सुइमा जेःसा स्याव्ल मन्दीर्कोः पुरोहीत्लम्इ ह जेःसा स्याव्नाः त जवती गम्ओ मुनाः। ओउःत जवती गम्ओआः ओउः लाङ्पाय् दावुद्इमा जेःआकान् ओउःकोः साथीलम्कायःमा जेःसाकायः बयःआकान्। 5लौ ङा मान्ताकोः चोः त तोओपाय् धोओ दीन्हाङः दोह् काम्कायःमा ‘इखे जाङ्ह्सा स्याव्लेःनाः ओउःखे स्याव्ल’ त दाय्ह्सा हुकुम् बयःओ प्रभु लेःआः ङ” त दाय्ह्ती येसुइ तोआथास।
6ओहाङःसैको लोने स्याव्ओ धोओ दीन्हाङः येसु थनःओ कीम्हाङः पोक्ती ओहाङः हुम्ती मुओ मान्तालम्कायः स्यान्आथास। ओहाङः स्यान्तोक्हाङः यात्चाक् क्रुत् स्रीत्तो जीक्ओ मान्ता मुओ खेःतो। 7ओहाङःसैको फरीसीलम्मा धर्मा स्यान्ओमयःमा मुती “लौ इ धोओ दीन्हाङःपाय् जाङ्ह्सा स्याव्मालो त जवती तोओ काम् जाङ्ह्ती येसुइ इ जीक्ओकायः स्याक्ताक्नौया स्याक्ताक्उलुया। स्याक्ताक्नौ त खेःया ओउःकायः गाल्तुम्ती तोसा खाय्नाःतय्ह्नी” त दाय्ह्ती लयःमयःकुस् नोःकाय्ती येसुकायः ल्हुङ्तुक् कुःती योसा बोङःनीतो। 8ओउःमयःकोः नोःकाय्ओ ल्हुङ्तुक् चीःती येसुइ ओउः जीक्ओ मान्ताकःताङ् ल्हेःती “लौ इहाङः चीङ्लाङ् वाङ्अ दा” त दाय्ह्ती येसुइ तोआथै। इत तोआक्तीको ओउः क्रुत् स्रीत्ओ मान्ता येसुकुस् सबैकोः मीक्हाङः चीङ्ती मुआ। 9ओहाङःसैको ओउः फरीसीलम्कायः “लौ गततेः तोतेःचानी। धोओ दीन्हाङः गाव्खे जाङ्ह्सा स्याव्लेःनाः पेओ काम्खे जाङ्ह्साया रेव्ओ काम्खे जाङ्ह्साया। मान्ताकायः स्याक्ताक्सा काम्खेया सीताक्सा काम्खेया गाव्खे जाङ्ह्सा स्याव्लेःनाः” त दाय्ह्ती येसुइ व्हत्आथास। 10व्हत्आक्तीको सबैकायः त्यास्तीलेः योती ओउः जीक्ओ मान्ताकःताङ् ल्हेःती “लौ क्रुत् प्योस दा” त दाय्ह्ती येसुइ तोथातो ती ओउः मान्ता क्रुत् प्योआक्तीको जुगाङ् सेलः स्याव्आ। 11इत हायःती “येसुइ क्लीमःआतय्ही” त चीःती ओउः फरीसीलम् आन ल्हुङ् मल्ह्ती “इ येसुकायः गत हायःती सात्ती वाय्चाःतय्ह्नी” त दाय्ह्ती लयःमयःकुस् नोःकाय्आकाय्।
12ओहाङःसैको इत स्यान्ती तोओ काम् जाङ्ह्नम् दीन्लम्हाङः येसुपाय् परमेस्वर्कायः तेती तोसा थेङा स्यालुङ्ताङ् लन्ह्ती आल्आ। ओहाङः आल्आक्तीको येसुइ न्हीदीङ्मा याह्दीङ्मा परमेस्वर्कायः तेतीलेः तोआकान्। 13ओहाङःसैको न्याम् दाह्आक्तीको ओउःकोः लयःकुस् वाह्ओमयःकायः गोत्ती ओउःमयःकःसै येसुइ बारजन छ्युङ्ह्ती “लौ नीङ् बारजनपाय् ङाकोः पेओ समचार् थोल्ह्ती तोसा ल्होक्ओमयःलेःतेः स्याव्तेःपै” त दाय्ह्ती तोआथास। 14ओउः बारजनकोःपाय् सीमोन् अन्द्रीयस् त तोओ नीस्पुःचाः खेःचतो। सीमोन्कायः लोने पत्रुस् त तोओ येसुइ हाल् मय्ङ् बयःआथै। ओहाङःसैको याकुब् युहना त तोओ नीस् पुःचाःमा खेःचतो। अरुपाय् फीलीप् बर्थोलोमा 15मत्ती थोमा खेःइतो। आल्फीयस्कोः चोः याकुब् फेरी जेलोत् त हाल् मय्ङ्ओ सीमोन् 16याकुब् त तोओकोः चोः यहुदामा ओउः अरु येसुकायः सात्साकायः ल्हाओ यहुदामा खेःइतो सबै बारजन छ्युङ्ह्ओ खेःइतो।
17ओहाङःसैको ओउः बारजन छ्युङ्ह्आक्तीको येसु ओउःमयःकुस् कामःअ ग्ल्युङ्ह्ती चवर्राङ्हाङः दाक्ती ओउःहाङः नाःतो ओउःकुस् वाह्ओमयः हुम्लाङ् वाङ्आकाय्। ओउःमयःकुस् नाःतो अरु मान्तालम् यरुसालेम्सैमा सबै यहुदीया देस्सैमा द्युम्मालो तीःकोः छेव्हाङः मुओ तायर् सीदोन् सहर्नीस्सैमा येसुकायः सायःलाङ्मा वाङ्आकाय् जीक्ओ मान्तालम्कायः काःहाल्ती तोलाङ्मा वाङ्आकाय्। 18ओउःमयः येसुकःताङ् वाङ्तोक्हाङः लान्इ ङायःओलम् सेलः स्याव्ओ खेःतो। 19येसुकोः स्याक्ताक्ओ ग्वम् दोःसाकायः नाःतो मान्तालम्इ ओउःकायः दीन्ह्सा बोङःआकानी ओउःकायः दीन्ह्आक्तीको सबै सेलः स्याव्आकाय्।
20ओहाङःसैको ओउःकुस् वाह्ओमयःकःताङ् ल्हेःती योती “लौ नीङ् नाःतो नाःमालो मान्तालम् चोङाय्तोतेः स्याव्तेःनै दोह् हायःती दाय्ह्सा परमेस्वर्कोः राजी नीङ्कोःलेः स्याव्नाः। 21नीङ् तेन्छ्याङ् योङ्क्राय्ती मुओ मान्तालम्मा चोङाय्तोतेः स्याव्तेःनै दोह् हायःती दाय्ह्सा लोनेः नीङ् धुमुक्त कोस्तेःनै। नीङ् तेन्छ्याङ् र्याःती मुओलम्मा चोङाय्तोतेः स्याव्तेःनै लोनेः नीङ् आसती स्याव्तेःनै। 22ङा ओउः मान्ताकोः चोः त तोओकोः कुरा ङ्हाम्ती जाङ्ह्ओ त झ्यान्ते अरुइ नीङ्कायः ल्हुङ् चोरःती ब्लाय्क्सीःओ योती हेला क्लाःती गाल्धैतीलेः नोःतेःनै। 23ओउः बेलाहाङः आन चोङाय्तोलेः स्याव्ती स्याह्तेःपै लोनेः लाङ्काहाङः नीङ्कोः जाङ्ह्झ्याङ्कायः आन पेतोतेः दोःतेःनै। उय्ह्लेकोः परमेस्वर्कोः कुरा छ्यानःओमयःकायःमा नीङ्कायः लीह्सीःओ बयःओलम्कोः तोकानःलम्इ ओउःतलेः लीह्सीःओ बयःआथास। 24नीङ् नाःतो नाःओलम्खेपाय् लीह्तोतेः स्याव्तेःनै नीङ्कोः तेन्छ्याङ् ङोस्तो मुओ लोनेः द्योक्लेःनाः। 25नीङ् तेन्छ्याङ् तुक् कोस्तो मुओलम्मा लीह्तोतेः स्याव्तेःनै लोनेः नीङ् योङ्क्राय्तीलेः सीतेःनै। नीङ् तेन्छ्याङ् आसतोलेः मुओलम्मा लीह्तोलेः स्याव्तेःनै लोनेः नीङ् आन क्रेस्तीलेः र्याःतेःनै। 26सुसुकायःतेः मान्तालम्इ लुङ्तीलेः तोतेःचनै ओउः मान्तापाय् लीह्तोतेः स्याव्तेःनै। ओउः उय्ह्लेकोः माःती तोओ ‘परमेस्वर्कोः कुरा छ्यानःओ मान्ता लेःआः ङ’ त दाय्ह्ओलम्कायःमा अरुलम्इ ओउःतलेः लुङ्ती तोआथास” त दाय्ह्ती येसुइ स्यान्ती तोआकान्।
27“लौ ङाइ तोओ कुरा सायःओलम्कायः इत तोलेःनाङःसु। सुसुइ नीङ्कः अह्र्तोलेः मुनाः ओउःकायः राप्नु दा सुसुइ नीङ्कायः पेमालो हायःतेःनै ओउःकायःलेः पेतोलेः हायःनु। 28सुसुइ नीङ्कायः प्रनःतेःनै ओउःकायःलेः आसीक् बयःनु। सुसुइ नीङ्कायः लीह्सीःओ बयःतेःनै ओउःकायःपाय् ‘पेतो स्याव्ताक्उ’ त दाय्ह्ती परमेस्वर्कायः तेती तोनु। 29सुसुइ नाङ्कायः ग्वेर्हाङः यात् प्र्याक् घान्तेःनाः त खेःया अरु ग्वेर्मा घान्साकायः ओउःकःताङ् तालाङ् हीलःउ। सुसुइ नाङ्कोः क्रमःनाय् लाती आलःबत्तेःनै त खेःया ओउःइ नीङ्कोः कमीत्मा लाती आलःसा ताक्नु। 30सुसु नाङ्कः तेलाङ् वाङ्चै ओउःकायःलेः बयःउ। सुसुइ नाङ्कोः माल्ताल्लम् लयःकायः आलःती गम्नानी ओउः आलःओ माल्ताल्लम् पाय्क्ताक्लाम्। 31दोह् दोह्लो अरुखेइ नीङ्कायः जाङ्ह्सा झाक्तेःचै ओउःलेः अरुकायः नीङ्खेइ जाङ्ह्नु। 32रेव्तो हायःओ मान्तालम्इमा सबै मान्तालम्इमा लयःकुस् ब्राङ्काय्ओलम्कायः राप्नानी। नीङ्इमा लयःकुस् ब्राङ्काय्ओलम्कायः ह राप्तेःचानी त खेःया ओउःपाय् दोह् पेओ काम् खेःचाः र नीङ्इ रेव्ओ मान्तासै पेतोलेः हायःतेःनीली बा। 33फेरी नीङ्कायः पेतो जाङ्ह्ओलम्कायः ह नीङ्इ पेतो जाङ्ह्तेःचानी त खेःया ओउःमा दोह् पेओ काम् खेःचाः र। रेव्ओ काम् जाङ्ह्ओलम्इमा ओउःतलेः जाङ्ह्नानी बा। 34फेरी रीन् पाय्क्सा खाय्ओ मान्तालम्कायः ह नीङ्इ रीन् बयःतेःचानी त खेःया ओउःमा दोह् पेओ काम् खेःचाः र। रेव्ओ काम् जाङ्ह्ओलम्इमा सुसुकायः ‘लौ इइपाय् ङाकोः पैसा लोने पाय्क्नाःताङः’ त दाय्ह्ती ताःनानी ओउःकायः रीन् बयःसा ग्यालेःनै बा। 35ओउःतलेः रेव्तो जाङ्ह्ओलम्खेइ जाङ्ह्लेःनानी नीङ्खेकायः ङाइ इतलेः तोनेःनाङ्स। नीङ्कायः रेव्तो हायःओलम्कायःमा राप्मानु पेतोलेः हायःमानु। फेरी ‘लौ इ पाय्क्सा खाय्नौ’ त दाय्ह्ती म्हर्मामाःत रीन् बयःनु दा। ओहाङःसैको नीङ्इ ओउःत हायःओ त खेःयाकायः नीङ्पाय् आन पेतोतेः दोःतेःनै बा। सबैसै ताङ्ह्ओ परमेस्वर्कोः चोःलो लेखालेः स्याव्तेःनै दोह् हायःती दाय्ह्सा ओउःइपाय् रेव्तो हायःओलम्कायःमा ओउःकः ब्लाय्क्ओ मान्तालम्कायःमा सबै योनःतीलेः योनौ। 36गतलो नीङ्कोः परमेस्वर् आपाइ मान्तालम्कायः योनःतीलेः योनाःथास ओउःतलेः नीङ्इमा अरुकायः योनःतीलेः योनु दा।
37अरुलम्कायः गाल्तुम्ती नोःलाम् ओहाङःसैको परमेस्वर्इ नीङ्कायःमा तुम्ती तोतेःइली। अरुकायः पेमालो नोःलाम् ओहाङःसैको नीङ्कायःमा परमेस्वर्इ पेमालो नोःतेःइली। अरु मान्ताकः नीङ् ल्हुङ् मल्ह्तेःनै त खेःया नीङ्कोः मल्ह्ओ ल्हुङ् स्याक्तेःपै ओहाङःसैको नीङ्कः परमेस्वर्कोः मल्ह्ओ ल्हुङ् स्याक्लेःनाः। 38अरुलम्कायः साय्क्तोलेः बयःनु दा ओहाङःसैको परमेस्वर्इ नीङ्कायः न्हाङ्तोलेः बयःतेःनै। दाप्जम्च्युक् दाप्मालो बयःलेःनौ बा। गुच्युक् पेतोतेः अरुखेकायः जाङ्ह्तेःनानी ओउःच्युक्लेः द्यानःती नीङ्खेकायः पाय्क्तेःनै बा” त दाय्ह्ती स्यान्ती येसुइ लयःकुस् वाह्ओमयःकायः तोआथास। 39ओहाङःसैको अरु कुरा स्यान्ती तोतोक्हाङः “लौ यात्चाक् मीक् लोक्ओ मान्ताकायःपाय् अरु मीक् लोक्ओ मान्ताइ ज्योती लात्ती ल्याम् छ्यानःसा खाय्उलु उया नीस्चाक्पाय् ल्याम् मीह्ती घाङ्हाङः ह्रप्ती तोन्चाःच। 40लयःकायः स्यान्ओ गुरुसै यात्चाक् स्यान्लाङ् सायःओ मान्ताइपाय् चीःसा खाय्उलु। स्यान्ती दप्ओहाङःसैकोः ह ओउःइ लयःकोः गुरुइ चीःजम्च्युक् चीःसा खाय्लेःनौ बा। 41नाङ्कोः लयःकोः मीक्हाङः मुओ घ्यालःसीङः च्यवःमाःत दोह् हायःतीतेः अरुकोः मीक्हाङः मुओ धान्ह् च्यवःतेःनौ। 42नाङ् मीक्पाय् सीङःइ जुगाङ् क्रावःतेःनाः त खेःया पेतो च्यवःसा खाय्तेःउलु ओउःत झ्यान्ते नाङ्इ अरुकोः मीक्सै पोक्ओ धान्ह् त्युत्ती वाय्सा गत हायःती खाय्तेःचौ र। लयःकोः मीक्हाङः पोक्ओ सीङः वाय्आक्सा खेःतो। ओउःत हायःआक्तीको ह नाङ्इ धेस्तो च्यवःती अरुकोः मीक्सै पोक्ओ धान्ह् वाय्सा खाय्तेःनौ। इलो लेखा अरु मान्ताकायः पेमालो गाल्तुम्ओ कुरा नोःमाःत लयःकोः काम् पेतो जाङ्ह्आक्उ। 43सायःओ सीङःपाय् पेमालो त खेःया ओउः सीङःखेपाय् पेओ सायः सायःउलु पेओ सीङःखे पेमालो सायः सायःउलु। सीङः सायःआक्तीको ‘इ सीङःखे पेनाः ओउः सीङःखे पेल’ त चीःसालेः खाय्नाः। 44फेरी राम्घाक्सीङःसै एसायःपाय् गलमा काव्ह्सा दोःल। राङ्चुःसै दुम्बुरीसायःमा काव्ह्सा दोःल। 45इलो लेखालेः ल्हुङ् पेओ मान्ताखेइ पेओ काम् जाङ्ह्नानी ल्हुङ् पेमालो मान्ताखेइ रेव्ओ काम् जाङ्ह्लेःनानी। मान्तापाय् गतलो ल्हुङ्तुक् म्हर्नाः ओउःतलेः लेइमा नोःलेःनाः बा।
46दोह् हायःतीतेः ङाकायः ‘प्रभुय’ ततेः तोतेःनेःनानाङ्सतो ङाइ तोओ कुरातेः जाङ्ह्तेःनीली। 47सुसुखेइ ङाकःताङ् वाङ्ती ङाइ तोओ कुरा सायःआक्तीको ङ्हाम्तीलेः जाङ्ह्नानी ओउःपाय् कीम् जाङ्ह्साकायः पेतो चीःओ मान्तालो लेखा मुनाः। 48ओउः चीःओ मान्ताखेइ कीम्कायः तोस् ज्युम्ह्तो द्यावःती चेनःबाङ्हाङःसै तुङः देती जाङ्ह्नौ। ओहाङःसैको नाःतो तीः वाङ्ओ बेलाहाङः ओउः पेतो जाङ्ह्ओ कीम्पाय् भमाःत ग्रमःत मुलेःनाः। 49सुसुखे ङाकोः कुरा सायःआक्तीको ङ्हाम्ती जाङ्ह्सा ग्याइली ओउःपाय् कीम् पेतो जाङ्ह्सा चीःमालो मान्तालो लेखा मुनाः। ओउः चीःमालो मान्ताखेइ कीम्कायः रुत् पेतो कामाःत जाङ्ह्नौ। ओहाङःसैको तीः नाःतो वाङ्ओ बेलाहाङः ओउः कीम्पाय् भती वाय्लेःनाः। जुगाङ् ह्र्योङःतोलेः वाय्ती झ्यान्ते ओस्तोक्रीङ्तलेः स्याव्नाः बा” त दाय्ह्ती येसुइ स्यान्ती तोआथास।
Currently Selected:
लुका 6: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
