मत्ती 23
23
1ओहाङःसैको येसुइ फेरीलेः हुम्ती मुओलम्कायःमा लयःकुस् वाह्ओमयःकायःमा स्यान्ती तोती 2“लौ ओउः धर्मा स्यान्ओमयःमा फरीसीलम्इमा मोसाइ बयःओ ऐन्कोः कुरा स्यान्नानी 3ओउःत झ्यान्ते ओउःमयःकोः स्यान्ती तोओ सायःती जाङ्ह्नु। माः रैस ओउःमयःइ तोओ कुराखे जाङ्ह्सालेः स्याव्तो ओउःमयःइ लयः जाङ्ह्ओ कुराखे तेःती जाङ्ह्तेःचानी दोह् हायःती दाय्ह्सा ओउःमयःइ अरुखेकायः स्यान्ती तोओपाय् लयःखेइ जाङ्ह्नीली 4ओउःमयःइ ‘लौ इपाय् ऐन्कोः कुरा लेःआः’ त दाय्ह्ती आन चाक्ओ काम्लम् अरुकायः जाङ्ह्ताक्नीतो ओउः काम् जाङ्ह्ओलम्कायः लव्ह्ती जाङ्ह्सा ओउःमयःइ गलमा ग्याइली। 5ओउःमयःइ हायःओ कुरालम् अरुइ योसाकायः ह सबै जाङ्ह्नानी। ओउःमयःइपाय् आन घोक्तोमा पेओ दोर गम्ओ झुह्र्नाय् लावनाःइसी लयःकोः नेह्रो ओर्ताक्सा थेङा। 6ओहाङःसैको थनःओ कीम्हाङः पोक्ओ बेलाहाङःलम्मा भोस् जाङ्ह्ओहाङःमा ओउःमयः फोल्यावःती बयःसा थाव्लम्हाङः च्युङःसामा बोङःनानी 7बजार्हाङः वाह्ती अरुलम्इ ‘लौ नमस्कार् गुरुय’ त दाय्ह्ओ सायःसामा आन झाक्नै। 8नीङ्खेइपाय् अरुलम्इ नीङ्कायः ‘गुरुय’ त तोसा ताक्तेःचानी यात्चाक् ह नीङ्कोः गुरु स्याव्नाः बा अरु मान्तालम् नीङ्कोः पुःचोङ्लेः स्याव्नै। 9फेरी ल्हाव्ह्दैबाङ्कोः मान्तालम् सुकायःमा ‘आपा’ ततेः फोल्यावःती तोतेःचानी। लाङ्काहाङः मुओ परमेस्वर् ह ओउःलेः नीङ्कोः आपा लेःआः। 10फेरी सुइमा नीङ्कायः ‘स्यालःओ मान्ता’ त तोसा ताक्तेःचानी। नीङ्कायः स्यालःओ मान्ता यात्चाक् ह स्याव्नाः ओउःपाय् ख्रीस् लेःआः। 11नीङ्कःगन सुखेलो अरुसै ताङ्ह्लेःनाः ओउःइलेः अरुकायः नोकरी काम् जाङ्ह्सा खेःतो। 12सुखेलो लयःकायः ताङ्ह्ताक्सा बोङःनाःइसी ओउःलेः अरुसै मीतो स्याव्नै। सुखेलो मीओ काम् जाङ्ह्नानी ओउःलेः अरुसै ताङ्ह्तो स्याव्नै।
13लौ नीङ् धर्मा स्यान्ओमयःमा फरीसीलम्मा लोनेतेः आन न्युम्ह्तोतेः स्याव्तेःनै बा। दोह् हायःती दाय्ह्सा नीङ्इ ब्रेह्ओ लेइ नोःती दाय्ह्तेःनै नीङ्इ परमेस्वर्कोः राजीहाङः आल्सा ल्याम् जुगाङ् पाङ्गती अरु राजीहाङः मुसा बोङःओलम्कायःमा नीङ्इ पोक्सा ताक्तेःनीली नीङ् लयःमा पोक्ती मुसा ग्यातेःइली। 14लौ नीङ् धर्मा स्यान्ओमयःमा फरीसीलम्मा लोनेतेः आनतेः न्युम्ह्तेःनानी दोह् हायःती दाय्ह्सा नीङ्इ ब्रेह्ओ लेइ नोःती दाय्ह्तेःनै नीङ्इ बुधा सीती वाय्ओ मोमःचोःलम्कोः कीम्ताङ् आल्ती पोक्ती ओउः कीम्कोः माल्ताल्लम् आलःती जेःतेःनानी। जेःआक्तीको अरुकायः ‘लौ ङापाय् पेओ मान्तालेः’ त छ्यानःसा थेङा ओउःमयःकोः मीक्हाङः नीङ्इ परमेस्वर्कायः ज्याङःतोलेः तोओमा जाङ्ह्तेःनानी। दोङ्सीलेः इलो खेःआ माःओ जाङ्ह्झ्याङ्कायः नीङ्पाय् लोनेः न्हाङ्तोलेः नाःतोलेः न्युम्ह्तेःनानी। 15लौ नीङ् धर्मा स्यान्ओमयःमा फरीसीलम्मा लोनेतेः न्युम्ह्तेःनानी बा दोह् हायःती दाय्ह्सा नीङ्इ ब्रेह्ओ लेइ नोःती दाय्ह्तेःनै यातैचाक्कायः नीङ्कोः लयःकोः धर्मा स्यान्सा थेङा नीङ् ल्हाव्ह्दैबाङ्कोः चार् दोवाताङ् आल्सा ग्यातेःइतो ओउः मान्ताइ नीङ्कोः स्यान्ओ ङ्हाम्आक्तीको नीङ्सै न्हाङ्तोलेः पेमालो स्याव्नाः बा।
16लौ नीङ् चीःमाःत स्यान्ओलम् नीङ्इ स्यान्ओ इलेःआः सुसुइ परमेस्वर्कोः मन्दीर्कोः मय्ङ्खे पेह्ती ‘लौ ङाइ इ कुरा जाङ्ह्लेःनेःनाङ् बा’ त दाय्ह्ती कीरीया जेःती तोचौ ओउः कीरीयाकोः कुरापाय् ‘नाङ्इ लोने जाङ्ह्सा परल’ त दाय्ह्ती स्यान्तेःनीतो सुसुइ मन्दीर्कोः सुन्कोः मय्ङ्खे पेह्ती ‘लौ ङाइ जाङ्ह्नेःनाङ्’ त दाय्ह्ती कीरीया जेःती तोचौ ओउः कीरीयाकोः कुरापाय् ‘नाङ्इ लोने जाङ्ह्सा परलेःनाः’ त दाय्ह्ती स्यान्तेःनानी। 17नीङ् जुगाङ् चीःमालोलम् लेःतेःइ। गाव्खे ताङ्ह्लेःनाः ओउः मन्दीर्कोः सुन्या परमेस्वर्कोः मन्दीर्या। दोङ्सी ओउः सुन्कायः ताङ्ह्ताक्सा मन्दीर्लेः ताङ्ह्आनाः बा। 18फेरी इतलेःमा नीङ्इ स्यान्तेःनै। सुसुइ मन्दीर्कोः बेदीकोः मय्ङ्खे पेह्ती ‘लौ ङाइ जाङ्ह्नेःनाङ्’ त दाय्ह्ती कीरीया जेःती तोचौ ओउः कुरापाय् ओउःइ लोने जाङ्ह्सा परल। सुसुइ ओउः बेदीहाङः मुओ ल्हाती बयःओ थोक्कोः मय्ङ्खे पेह्ती ‘लौ ङाइ जाङ्ह्नेःनाङ्’ त दाय्ह्ती तोचौ ओउःइ लोने जाङ्ह्सा परनाः एत नीङ्इ स्यान्तेःनानी। 19नीङ् जुगाङ् चीःमालोलम्लेःतेःइ। गाव्खे ताङ्ह्लेःनाः ओउः बेदीहाङः ल्हाओ थोक्लम्या ओउः मन्दीर्कोः बेदीया। दोङ्सीलेः ओउः थोक्लम्कायः छय्ङ्ताक्सा खाय्ओ बेदीपाय् ताङ्ह्लेःनाः बा। 20सुसुइ बेदीकोः मय्ङ् पेह्ती कीरीया जाङ्ह्नानी ओउःइपाय् बेदीहाङः ल्हाओ थोक्लम्मा पेह्ओलो लेखा कीरीया जेःनानी। 21सुसुइ मन्दीर्कोः मय्ङ् पेह्ती कीरीया जेःनानी ओउःइ मन्दीर्हाङः मुओ परमेस्वर्कोः मय्ङ्मा पेह्ओलो लेखा कीरीया जेःनानी। 22फेरी सुसुइ लाङ्काकोः मय्ङ् पेह्ती कीरीया जेःनानी ओउःइ परमेस्वर्कोः थाव्मा परमेस्वर्कोः मय्ङ्मा पेह्ओलो लेखा कीरीया जेःनानी।
23लौ नीङ् धर्मा स्यान्ओमयःमा फरीसीलम्मा लोनेःतेः आनतेः न्युम्ह्तेःनानी बा दोह् हायःती दाय्ह्सा नीङ्इ सबै कुरा सोरःताङ् जाङ्ह्तेःनानी। सोफ्कोःमा जरामरीत्कोःमा मोसाइ तोओलो लेखालेः दस् भाक्हाङः ओम्त वेःती नीङ्इ यात् भाक् परमेस्वर्कायः ल्हातेःनानी। इलो खेःओ मीओ हुकुम्लम्खे नीङ्इ पेतोलेः जाङ्ह्तेःनीतो परमेस्वर्कोः ताङ्ह्ओ हुकुम्लम्खे नीङ्पाय् जाङ्ह्सातेः ग्यातेःइली अरु मान्तालम्कायः पेतो जाङ्ह्ओमा अरुकायः योनःती योओमा परमेस्वर्कायः ङ्हाम्ओमा ग्यातेःइली। इ ताङ्ह्ओ हुकुम्लम्पाय् ओउः अरु मीओ हुकुम्लम्कुस् घार्ती जाङ्ह्चाः खेःतेःइतो 24नीङ् चीःमालो स्यान्ओमयः तुङ्ओ बेलाहाङः नीङ्इ तीःहाङः मुओ मस्याङ्खे हक्ती वाय्तेःनीतो मोयाङ्खे योक्तेःनानी 25लौ नीङ् धर्मा स्यान्ओमयःमा फरीसीलम्मा लोनेतेः आनतेः न्युम्ह्तेःनानी बा। दोह् हायःती दाय्ह्सा नीङ् आङ् बाहीरखेताङ् पेतो छय्ङ्ताक्साकायः आन जेस्ओ जवतेःनानी भीत्रखे नीङ्कोः छय्ङ्मालो ल्हुङ्पाय् लओमा रेव्ओमा आनलेः मुनाः। 26नीङ् चीःमालो फरीसीलम्इ नीङ्कोः भीत्रकोः ल्हुङ्पाय् ङ्हासै पेतो छय्ङ्तो जाङ्ह्आक्नु दा ओहाङःसै नीङ् बाहीरमा पेतो स्याव्तेःनै। 27नीङ्पाय् पेतो देती गम्ओ बाङ्कोः तेस्लो लेखा मुतेःनै। बाहीरसै ओउः तेस् योसा पेओलेः मुनाः भीत्र मान्ताकोः सय्ङ्ओ मायःमा ह्रुस्मा मुनाः 28ओउःतलेः अरुकोः मीक्हाङः नीङ्पाय् पेतो काम् जाङ्ह्तेःनानी भीत्रहाङः नाङ्कोः ल्हुङ् आन रेव्तोलेः मुनाः। 29लौ नीङ् धर्मा स्यान्ओमयःमा फरीसीलम्मा लोनेःतेः आनतेः न्युम्ह्तेःनानी बा दोह् हायःती दाय्ह्सा नीङ्इ सबै सोरःताङ् जाङ्ह्तेःनानी बा। उय्ह्लेहाङः सीओ परमेस्वर्कोः कुरा छ्यानःओमयःकायःमा अरु पेओ मान्तालम्कायःमा नीङ्इ तेस्कोः पेओ बाङ्लम् देती गम्ती 30‘लौ ङीकोः आय्कानः तोकानःलम्खेइ परमेस्वर्कोः कुरा छ्यानःओमयःकायः सात्आकानी। ङीखेइ ओउःमयःलो लेखा परमेस्वर्कोः कुरा छ्यानःओमयःकायः सात्आक्ङुसुलु’ त दाय्ह्ती नोःतेःनै। 31लौ इत तोती ‘ङीपाय् परमेस्वर्कोः कुरा छ्यानःओमयःकायः सात्ओ मान्ताकोः प्लोमःदाने मोमःदाने लेःआः ङी’ त अरुकायः घोती छ्यान्ह्तेःनानी बा। 32लौ नीङ्कोः आय्कानः तोकानःकोः रेव्ओ काम् नीङ्इमा चाङःती जाङ्ह्सा बोङःतेःनानी। 33ओउःत झ्यान्ते नीङ् कुयः युक्कोः चोःलम् ओउः लोनेः वाङ्सा खेःओ न्युम्ह्तो स्याव्सा बेलाहाङः नीङ्पाय् रेव्झ्याङ्कोः गलमा दल्तेःइली 34लौ ङाइ नीङ्कःहाङः परमेस्वर्कोः कुरा छ्यानःओमयःमा व्हाय्तो चीःओलम्मा स्यान्ओलम्मा ल्होक्नेःनाङ्सु ओउःमयःकायः नीङ्इ सात्तेःनानी यात्नीस्कायः क्ल्याय्ओ सीङःहाङःतेः योकोःती सात्तेःनानी। अरुलम्कायः नीङ्इ थनःओ कीम्हाङः लाइ स्राप्तेःनानी अरुकायः सहर् सहर्सै नीङ्इ रुनःती ल्होक्तेःनानी। 35ओउःत हायःती सबै पेओ मान्ताकोः सात्झ्याङ्कायः नीङ्पाय् न्युम्ह्तेःनानी बा। ओउः उय्ह्लेकोः पेओ मान्ता हाबेल् त तोओकोः सात्झ्याङ्कायःमा लोनेःहाङः मुओ बेरखीयाकोः चोः जखरीया त तोओकोः सात्झ्याङ्कायःमा नीङ्इलेः न्युम्ह्तेःनानी। जखरीयाकायःपाय् नीङ्लो लेखा पेमालो मान्तालम्इ मन्दीर्कोः दुङ्हाङः मुह्ओ बेदी द्याङ्तो सात्आकानी। 36दोङ्सी दाय्ह्भनाङ् ओउःमयःकोः सात्झ्याङ्कायः नीङ् तेन्छ्याङ्कोः मान्तालम्लेः जुगाङ् न्युम्ह्तेःनानी बा।
37अ नीङ् यरुसालेम्कोः मान्तालम्य परमेस्वर्कोः कुरा छ्यानःओमयःकायः नीङ्इ आनतेः सात्तेःनानी नीङ्कःताङ् ल्होक्ओ मान्तालम्कायःतेः आन बाङ्इ आप्ती थोःतेःनानी। ओउःत हायःतेःनानी बा आमा वाःइ लयःकोः चोःकायः गोत्ती ओम्पायःती गम्ओलो लेखा ङाइमा नीङ्कायः गोत्ती ओम्पायःती गम्सा झाक्ङोतो नीङ्तेः ङाकःताङ् वाङ्सा ग्यातेःइली। 38ओउःत हायःती नीङ्कोः मन्दीर्लेः लोनेः ओस्तोक्रोङ्त हाःतो स्याव्लेःनाः। 39लौ द्याह्हाङःसै ङाकायःतेः च्यवःतेःनानाङ्सल। परमेस्वर्इ ल्होक्ओ मान्ताकायः ‘लौ भालातेः वाङ्तेःआ नाङ् परमेस्वर्कःसै वाङ्ओ चाक्तेःआः’ त नीङ् दाय्ह्ती नोःआक्तीको ह ङाकायः फेरी च्यवःसा दोःतेःनै” त येसु दाय्ह्ती दाय्ह्आ।
Currently Selected:
मत्ती 23: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
