मर्कस् 1
1
1येसु ख्रीस् त तोओकोः पेओ समचार्कोः तुङः इलेःआः। ओउः येसु ख्रीस् त तोओपाय् परमेस्वर्कोः गोय्चोःचोःलेः खेःनाः बा। 2आन ज्याङःतोहाङः यात्चाक् एसाया त तोओ परमेस्वर्कोः कुरा छ्यानःओ मान्ताइ इ कुरा लेखआकान् “ ‘लौ नाङ् वाङ्धाङ्माखाहाङः ङ्हालेः ङाकोः कुरा तोसा मान्ताकायः ङाइ ल्होक्आक्नाङः बा। नाङ्कोः वाङ्साकायः ओउः ल्होक्ओ मान्ताइ अरुलम्कायः त्याक्ताक्नौ’ त दाय्ह्ती परमेस्वर्इ लयःकोः गोय्चोःकायः तोआकान्। 3फेरी मान्ता याक्गार्सीःमालो बेलाङ्हाङः यात्चाक्इ कुरा तोती गोःती मुनाः ‘लौ प्रभु वाङ्धाङ्माःखाहाङः ओउःकोः वाह्सा खेःओ ल्याम् ओउःकायः पेतो रोम्साकायः ङ्हालेः जाङ्ह्आक्नु दा’ त दाय्ह्ती ओउःपाय् दाय्ह्आ” इतलेः उय्ह्लेकोः एसाया त तोओइ परमेस्वर्कोः आखरःहाङः लेखआकान्। 4ओहाङःसैको लोन्ते यात्चाक् युहना त तोआ एसायाइ तोओ कुरा ताप्ताक्ती याक्गार्सीःमालो बेलाङ्हाङः वाङ्आ। ओहाङः दाह्ती वाङ्आक्तीको “लौ नीङ्इपाय् लःलयःकोः रेव्ओ काम्लम् फेती परमेस्वर्कःताङ् द्यान्ह्ती ओउःकोः कुरा ङ्हाम्ती सायःनु दा। ओउःत हायःआक्तीको नीङ्कः परमेस्वर्कोः ल्हुङ् मल्ह्ओ स्याक्नाः। ओहाङःसै नीङ्इ एत हायःओ त अरुकायः छ्यानःसाकायः तीःइ जोःती जेस्ओ बाप्तीस्मा त्याक्नु” त दाय्ह्ती युहनाइ सबैकायः थोल्ह्ती तोआथास। 5ओउःत तोतोक्हाङः यहुदीया अन्चल्सैमा यरुसालेम् सहर्सैमा सबै मान्तालम् ग्ल्युङ्ह्ती युहनाकःताङ् सायःलाङ् वाङ्आकाय्। सायःलाङ् वाङ्आक्तीको लःलयःकोः रेव्तो हायःओ घोती तोआक्तीको ओउःमयःकायः युहनाइ योर्दन् खोलाहाङः बाप्तीस्मा जाङ्ह्आथास। 6ओउः बेलाहाङः युहना त तोओ उत्स्याःकोः मेनःइ क्याह्ओ क्रमःनाय्मा पाम्हाङः छालाकोः पेतीमा तोङःसतो जेःसाकायः बन्कोः तुमः खुदुमा राय्क्न्यामःमा जेःओ खेःतो। 7ओहाङःसैको मान्तालम् सायःलाङ् हुम्ती वाङ्तोक्हाङः “लौ लोन्तेसै ङासै आन ताङ्ह्ओ मान्ता चाक्आः वाङ्नाः बा। ओउःकायःपाय् ङाच्युक् मीओ मान्तापाय् ओउःकोः जुत्तामा फास्सा स्याव्ङल। 8ङाखेइ तीःइ बाप्तीस्मा बयःनेःनाङ्सतो ओउःखेइ परमेस्वर्कोः ग्वालामःइ बाप्तीस्मा त तोओ बयःतेःनै” त दाय्ह्ती युहनाइ स्यान्ती तोआथास।
9ओहाङःसैको युहनाइ योर्दन् खोलाहाङः बाप्तीस्मा बयःतोक्हाङः येसुलेः गालीलकोः नासरेत् गाव्सै युहनाकःताङ् वाङ्आ। वाङ्आक्तीको येसुकायः युहनाइ योर्दन् खोलाहाङः बाप्तीस्मा बयःआथै। 10बयःआक्तीको तीःसै ग्ल्युङ्ह्तोक्हाङः येसुइ फेल्बाङ् वाक्ती फोल्ओ च्यवःआकान् फेरी परमेस्वर्कोः ग्वालामः धुकुर्वाःकोः रुप्लो थाङ्ती ओउःकोः अलवःहाङः ग्ल्युङ्ह्ती वाङ्आ। 11ग्ल्युङ्ह्ती वाङ्तोक्हाङः “लौ नाङ्पाय् ङाकोः आन राप्ओ ल्हुङ्गोरे चोःलेःतेः खेःतेःनाः बा। नाङ्कः ङा आन म्रोनाङः” त दाय्ह्ती लाङ्कासै यात्ज्योः हाव्नयः वाङ्आ। 12ओहाङःसैको बाप्तीस्मा त्याक्आक्तीको येसुकायः परमेस्वर्कोः ग्वालामःइ मान्ता याक्गार्सीःमालो बेलाङ्ताङ् ल्होक्आथै। 13ओहाङः येसुपाय् चालीस् दीन्च्युक्कायः मुआ। मुतोक्हाङः सैतान् त तोओ अरुसै ताङ्ह्ओ लान्इ येसुकायः थ्योन्ह्ती होम्सा बोङःआथै। ओहाङःसैको ओउः थाव्हाङः जाःलम् दोह्लम् मुओ खेःतो परमेस्वर्कोः लाङ्कासै ल्होक्ओमयःइ येसुकःताङ् वाङ्ती ओउःकायः स्यास्तीलेः योआथै।
14ओहाङःसैको यात्दीन्हाङः बाप्तीस्मा बयःओ युहनाकः हेरोद् राजा ल्हुङ् मल्ह्तो स्याव्ती झ्यान्ते ओउःकायः चुम्ती थुनआकान्। ओहाङःसै युहनाकायः थुनआक्तीको ओउः बेलाहाङः येसु गालील अन्चल्ताङ् वाङ्ती परमेस्वर्कोः पेओ समचार्लेः मान्तालम्कायः थोल्ह्ती तोओ मुओ खेःतो 15“लौ परमेस्वर्इ ङ्हा तोती गम्ओ बेलापाय् द्याह् दाह्आ ओउःकोः राजीलेः द्याह् दाङ्खेःनाः। लौ लःलयःकोः रेव्आ काम्खे फेती परमेस्वर्कोः पेओ कुराखे ङ्हाम्ती जाङ्ह्नु दा” त दाय्ह्ती येसुइ तोओलेः खेःतो। 16ओहाङःसैको येसु गालील त तोओ ताङ्ह्ओ दुम्हान्कोः छेव्हाङः वाह्ती नीस्चाक् काम् धुःती जाङ्ह्ओ ङाः सात्ओ पुःचाःनीस् च्यवःआकान्। ओउःनीस्पाय् सीमोन् अन्द्रीयस् त मय्ङ्चतो। येसु वाङ्तोक्हाङः ओउःनीस् पुःचाःपाय् तीःहाङः लाङः वार्ओ खेःचतो। 17ओहाङःसैको च्यवःआक्तीको “लौ नीङ्जी ङाकुस् वाङ्ज। ङाकुस् वाङ्आक्तीको नीङ्जीइ लाङःलम्खे वार्ओ फेती ङाइ तोओ पेओ समचार्खे वार्ती ङाकःताङ् मान्तालम् वानःतेःनाःजु” त दाय्ह्ती येसुइ तोथाचतो 18ओउःइ तोओ सायःआक्तीको ओउःनीस् पुःचाःइ लाङः फेती येसुकुस् वाह्आकाच। 19ओहाङःसैको आल्ती बलचोः द्याङ्तोहाङः दाह्ती जबदी त तोओकोः गोय्चोःनीस्इमा लाङः ताक्ओ च्यवःआकान्। ओउःनीस् पुःचाःपाय् याकुब् युहना त मय्ङ्ओ खेःचतो। 20ओउःनीस्कायः च्यवःआक्तीको येसुइ गोत्थाचतो गोत्तोक्हाङः ओउः पुःचाःनीस्इ आपामा ओउःकोः केलःओ काम् जाङ्ह्ओ मान्तालम्कायःमा दोङ्गाहाङः फेती येसुकुस्लेः वाह्आकाय्।
21ओहाङःसैको वाह्ती आल्ती कफर्नाहुम् सहर्ताङ् दाह्आकाय्। कफर्नाहुम् सहर्ताङ् दाह्ती वाङ्ती येसु सन्चर्बार्कोः धोती न्यास्ओ दीन्हाङः यहुदी मान्तालम्कोः थनःओ कीम्ताङ् पोक्ती ओहाङः हुम्ओ मान्तालम्कायः स्यान्आथास। 22ओउःत स्यान्तोक्हाङः “लौ इ येसुपाय् आन पेतो व्हाय्ती नोःसा चीःलेःनौ बा। अरुइ स्यान्माःत ओउःइ धर्मा स्यान्ओमयःसै लयः चीःती तोसा खाय्लेःनौ” त दाय्ह्ती ओउः हुम्ओलम् ग्याङ्ह्ती नोःकाय्आकाय्। 23ओहाङःसैको ओउः स्यान्तोक्हाङः यात्चाक् लान्इ ङायःओ मान्ता ओउः थनःआ कीम्हाङः मुओ खेःतो। 24ओउःखेइ गोःती “अ नाङ् नासरेत्कोः येसुय। नाङ्इ ङीकायः दोह् हायःलाङ् वाङ्तेःआ। ङीकायः ह्र्योङःताक्लाङ् वाङ्ओतेःआः यादो। लौ नाङ्कायः ङाइ तय्ह्लेःआनाङः बा। नाङ्जा परमेस्वर्कोः जय्कुमःत मुओ चाक् लेःतेःआः बा” त दाय्ह्ती तोथातो। 25“अ ङैमाःत मुअ। ओउः मान्ताकायः ल्हेस्ती फेउ” त दाय्ह्ती येसुइ गानाक्ती लान्कायः जान्तीलेः तोआकान्। 26ओउःत तोतोक्हाङः ओउः मान्ताकायः रीङ्ह्ताक्ओ गोःताक्ओकुस् ब्रक्तलेः ओउः लान्इ मान्ताकायः फेआथै। 27इत हायःओ च्यवःआक्तीको सबै हुम्ओलम् ग्याङ्ह्ती “लौ इपाय् दोह् दोह् कुरालो ती। जुगाङ् नया कुरा लेःआः रैस। इलो लेखा ताङ्ह्ओ ग्वम् दोःती ओउःइ गानाक्ती तोओपाय् लान्लम्इमा सायःनानी रैस बा” त दाय्ह्ती नोःकाय्आकाय्। 28फेरी येसुइ जाङ्ह्ओ कुरापाय् सबै गालील देस्हाङः मान्तालम्इ तोमःती ल्हाक्ती छ्यानःकाय्आकाय्।
29ओहाङःसैको ओउः थनःओ कीम्सै ग्ल्युङ्ह्ती सीमोन् अन्द्रीयस्त तोओ नीस् पुःचाःकोः कीम्ताङ् आल्आ। येसुकुस् याकुब् युहना नीस्पुःचाःमा आल्आकाय्। 30ओहाङः आल्ती दाह्तोक्हाङः सीमोन्कोः आय् आन अय्ती जीक्ती झ्यान्ते एङ्ती मुओ खेःतो। ओउःत झ्यान्ते येसु दाह्ती ओहाङः पोक्ती वाङ्तोक्हाङः कीम्कोः मान्तालम् येसुकःताङ् काःहाल्लाङ् वाङ्आकाय्। 31ओहाङःसैको ओउः जीक्ओ मोमःचोःकःताङ् वाङ्ती येसुइ ओउःकोः क्रुत् चुम्ती ओउःकायः च्योक्ताक्आथै। ओउः मोमःचोः च्योक्ताक्आक्तीको ओउःकोः अय्ओ समःआथै। अय्ओ समःआक्तीको सीमोन्कोः आय्पाय् चीङ्ती सबैकायः जेःगालम् दोल्कावःती बयःआथास। 32ओहाङःसैको जेःती भ्याआक्तीको राम्हसैलो न्याम् ब्लक्खेःओ बेलाहाङः सबै जीक्ओलम्कायःमा लान्इ ङायःओलम्कायःमा येसुकःताङ् वानःआथास। 33ओउःमयः वानःतोक्हाङः ओउः कफर्नाहुम् सहर्कोः मान्तालम् सीमोन्कोः कीम्कोः दय्ह्लौहाङः हुम्ती वाङ्आकाय्। 34ओहाङःसैको येसुइ नाःतो खाल्कोः जीक्ओलम्कायःमा स्याक्ताक्आथास फेरी नाःतो लान्लम्कायःमा मान्ताकःसै ल्हेस्ती वाय्आकान्। ओउः लान्लम्इ येसुकायः तय्ह्ती झ्यान्ते येसुइ ओउःमयःकायः नोःसा ताक्उसुलु।
35ओहाङःसैको ओनम्कोः स्याङ्ह्लोहाङः न्याम् दाह्धाङ्माःच्युक्हाङः येसु च्योक्ती लयःझुङ्आले कीम्सै ग्ल्युङ्ह्ती चीङःचाङःत खेःओ मान्ता नाःमालोताङ् आल्ती परमेस्वर्कायः तोती मुआ। 36ओहाङः मुतोक्हाङः सीमोन्इ ओउःकोः साथीलम्कुस् येसुकायः बोङःलाङ् थेङा गुल्ह्आकानी। 37ओउःमयःइ बोङःती गुल्ह्दा गुल्ह्दा येसुकायः च्यवःआथै। ओहाङःसैको येसुकायः च्यवःआक्तीको “लौ नाङ्कायः सबैइ बोङःतेःनाः” त दाय्ह्ती तोथातो 38“लौ उया अरु द्याङ्तो गाव्लम्ताङ् आल्इ उया। ओहाङःकोः मान्तालम्कायःमा परमेस्वर्कोः कुरा तोसा खेःनाङः दोह् हायःती दाय्ह्सा ओउःकोः कुरा स्यान्ती तोसाकायः ङा वाङ्ओआः ङ बा” त दाय्ह्ती येसु त्याङ्आ। ओहाङःसैको त्याङ्आक्तीको आल्आकाय्। 39आल्ती गालील अन्चल्कोः थनःओ कीम् कीम्ताङ् वाङ्ती पोक्ती येसु परमेस्वर्कोः कुरा तोतीमा स्यान्तीमा लान्लम्कायः ल्हेस्ती वाय्तीमा ब्याह्ती तोमःती वाह्ओ खेःतो।
40ओहाङःसैको येसु तोमःती वाह्तोक्हाङः ओउःकःताङ् यात्चाक् कोह्र् चाओ मान्ता वाङ्आ। येसुकःताङ् वाङ्ती बाःती स्यवती “लौ नाङ्पाय् ग्यातेःनाः त खेःया ङाकायः स्याक्ताक्सा खाय्तेःनाःची बा” त दाय्ह्ती येसुकः काःहाल्ती तेआ। 41ओउःत तेतोक्हाङः येसुइ ओउःकायः आन ल्हुङ् योनःती लयःकोः क्रुत् प्योती ओउः कोह्र् चाओ मान्ताकायः दीन्ह्आथै। 42ओउःकायः दीन्ह्ती “लौ ग्यालेःनाङः स्याक्तेःपाः” त दाय्ह्ती येसु दाय्ह्लेःआ ओउःत दाय्ह्ओ कुस्ब्रक्त ओउः मान्ता सेलः स्याव्आ। 43ओउःखेपाय् सेलः स्याव्आक्तीको “लौ ‘येसुइ स्याक्ताक्आताङः’ त दाय्ह्ओ सुकायःमा छ्यानःतेःचनौ दा। 44अरुकायः छ्यानःलाम् मन्दीर्कोः पुरोहीत्कःताङ् न्यास्माःत आल्ती ओउःकायःलेः ह ‘लौ ङाकोः आङ् सेलः मुनाः’ त दाय्ह्ती लयःकोः आङ् छ्यानःउ दा। ओहाङःसैको आङ् छ्यानःआक्तीको मोसाइ गानाक्ती तोओ जवसाकायः मन्दीर्हाङः परमेस्वर्कायः वाः मेत्छ्याःकायः सात्ती ओउःकायः ल्हाउ दा। ओउःत हायःआक्तीको सबैइ नाङ्कायः सेलः मुनाः त चीःतेःनाः” त दाय्ह्ती येसुइ ओउः सेलः स्याव्ओ मान्ताकायः गानाक्ती तोआथै। 45स्याक्ताक्ओ कुरापाय् “सुकायःमातेः छ्यानःतेःचनौ दा” त दाय्ह्ती येसुखेइ गानाक्ती तोथातो ती ओउः स्याक्ओ मान्ताखे आल्ती इःहाङःमा उःहाङःमा ओउः कुरा सबैकायःमा फुती ल्हाक्ती नोःआ। ओउःत नाःआक्तीको ओउःच्युक् नाःतो मान्ता येसुकःताङ् हुम्लाङ् वाङ्ती झ्यान्ते येसु सहर्ताङ् पोक्सा दोःल अरुइ चीःमायाकायः ह पोक्सा दोःओ खेःतो। ओउःत झ्यान्ते येसु सहर् बाहीरसै मान्ता याक्गार्सीःमालोहाङः मुओ खेःतो ओहाङःमा इसै उःसैमा चार् दोवासैमा मान्तालम् ओउःकायः क्रुस्लाङ् वाङ्आकाय्।
Currently Selected:
मर्कस् 1: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
