मर्कस् 6
6
1एत तोआक्तीको येसु कीम्सै ग्ल्युङ्ह्ती आल्ती लयःकोः देस्ताङ् पाय्ह्ती वाङ्आ। ओउःकुस् वाह्ओमयःमा ओहाङः वाङ्आकाय्। 2लयःकोः देस्ताङ् वाङ्आक्तीको ओउः यहुदीकोः धोओ दीन्हाङः येसु ओउःमयःकोः थनःओ कीम्हाङः पोक्ती ओहाङः हुम्ती मुओलम्कायः स्यान्आथास। स्यान्ती मुतोक्हाङः ओउः हुम्ती सायःओलम् आन ग्याङ्ह्आकाय् “इजा इलो व्हाय्तो नोःसा चीःओ गाःसै दोःआ रैस। गत हायःती इइ आन ताङ्ह्ओ काम्लम् जाङ्ह्सा खाय्नौ। 3इपाय् ओउः सीकर्मी लेःआः माःर। इकोः आमा मरीयम् लेःआः हौचोङ्पाय् याकुब् युसेफ् सीमोन् त तोओलेःइ इकोः हौद्याङ्लम् ङीकुस् सबै मुलेःनै। ङाकःगनसै वाङ्ओ मान्ताजा इत हायःसा गाःसै दोःओआः रैस” त दाय्ह्ती ओउः हुम्ओलम् नोःकाय्ती येसुकः ल्हुङ् मल्ह्तो स्याव्आकाय्। 4“लौ परमेस्वर्कोः कुरा छ्यानःओमयःकायःपाय् गाःहाङःमा मान्तालम्इ ताङ्ह्ताक्थातो लयःकोः देस्कोः मान्तालम्मा लयःकोः कीम्कोः मान्तालम् ह ओउःकः झाक्इली” त दाय्ह्ती येसुइ तोआथास। 5-6ओहाङःसैको येसुकोः लयःकोः मान्तालम्इ “ङाःकायः ङ्हाम्ताङःल” त चीःती येसु ग्याङ्ह्तो स्याव्ती ओहाङः ताङ्ह्ओ काम् जाङ्ह्उलु यात्नीस् जीक्ओलम्कायः ह स्याक्ताक्आकान्। ओउः बेलाहाङः येसु गाव् गाव्ताङ् मान्ता स्यान्साकायः थोयःती वाह्आ।
7ओहाङःसैको येसुइ ओउःकोः बारजन छ्युङ्ह्ओमयःकायः गोत्ती नीस् नीस्चाक्कायः अरु अरु थाव्ताङ् ल्होक्आथास। ल्होक्तोक् बेलाहाङः ओउःइ लान् ल्हेस्ताक्सा ग्वम् बयःआथास। 8-9“लौ वाह्ती आल्तोक्हाङः दोह्मातेः लात्तेःचानी। जेःगा थैलो पैसा दोह्मा लात्लाम् दङ्ग ह लात्नु दा। फेरी नीस् क्रमःनाय् लावलाम् चप्पल् लावनीङ्सी। 10गाव्खेलोकोः कीम्कोः मान्तालम्इ नीङ्कायः रोम्ती कीम्हाङः एनःसा दोःताक्तेःनै ओउः थाव्सै फेती आल्माधाङ्च्युक्कायः ओउः यातै कीम्हाङःलेः फेमाःत मुन। 11ओहाङःसैको गाव्खेलोकोः मान्तालम्इ रोम्तेःइली ओहाङः फेतोक्हाङः ‘लौ इमयःइपाय् पेतो हायःनीली’ त छ्यानःसाकायः ओहाङःकोः फुत्साःपाय् नीङ्कोः दोम्सै काह्ती वाय्नु दा। दोङ्सी दाय्ह्भनाङ् ओउः वाङ्सा खेःओ तय्छनःती योसा दीन्हाङः ओउः थाव्कोः मान्तालम्पाय् सोदोम् गोमोरा त तोओ नीस् रेव्ओ सहर्कोः मान्तालम्सै न्हाङ्तोलेः न्युम्ह्ताक्नाःथास बा” त दाय्ह्ती येसुइ स्यान्ती तोआथास। 12एत स्यान्ती तोआक्तीको ओउः बारजन छ्युङ्ह्ओमयः आल्ती “लौ नीङ्कोः रेव्तो हायःओ काम्लम् फेती ल्हुङ् द्यान्ह्तो स्याव्ती परमेस्वर्कोः काम् पेतो जाङ्ह्नु” त दाय्ह्ती थोल्ह्ती तोआकानी 13लान्कायःमा ल्हेस्ताक्आकानी जीक्ओलम्कायःमा सातीइ ल्यानःती स्याक्ताक्आकानी।
14ओहाङःसैको ओउःत हायःतोक्हाङः येसुकोः मय्ङ्मा कुरामा सबै नोःकाय्आकाय्। 15“लौ इलो ताङ्ह्ओ काम् येसुइ गत हायःती जाङ्ह्सा खाय्नौ। दोङ्सी ओउः तेह्काल सीओ बाप्तीस्मा बयःओ युहनालेः उह्ती च्योक्ती देङी सेलः स्याव्नाः ओउःत झ्यान्ते युहनाकोः ताङ्ह्ओ काम्लम् ओउःइ जाङ्ह्सा खाय्नौ” त दाय्ह्ती कोय् नोःइतो “खेःल ओउःपाय् उय्ह्लेकोः एलीया त तोओ लेःआः” त दाय्ह्ती अरुखे नोःआकाय् “माः रैस ओउःपाय् यात्चाक् परमेस्वर्कोः कुरा छ्यानःओ मान्तालेः थाती वाङ्ओआः बा” त दाय्ह्ती अरुखे नोःआकाय्। 16-17एत नोःकाय्ओ गालील अन्चल्कोः हेरोद् त तोओ राजाइ सायःआकान्। सायःआक्तीको “लौ अनम्ह् ङाइ पाल्ती सात्ताक्ओ युहना इलेः फेरी थाती वाङ्ओआः यादो” त दाय्ह्ती हेरोद् दाय्ह्आ। अनम्ह्लो हेरोद् राजाइ बाप्तीस्मा बयःओ युहनाकायः चुम्ती पानःसाकायः ल्होक्आकान्। ओउःकायः चुम्ती पानःआक्तीको हेरोद्इ झ्याल्खानहाङः काआथै दोह् हायःती दाय्ह्सा हेरोद्इ लयःकोः फीलीप्त तोओ हौकोः बुधीकायःलेः लयःकोः बुधी जाङ्ह्लाङ् वानःआकान् ओउःकोः हौ सीधाङ्माःखाहाङः। 18ओउःत देह्मालो मोमःचोः हेरोद् राजाइ वानःआकान् त युहनाइ चीःती ओउःइ हेरोद्कायः आन जान्आकान् “लौ नाङ्कोः हौकमा वानःसा जुगाङ् स्याव्ल” त दाय्ह्ती युहनाइ तोआथै। 19एत जान्ओ कुरा सायःआक्तीको हेरोदीयस् त तोओ हौकमापाय् युहनाकः आन ल्हुङ् मल्ह्तो स्याव्ती ओउःकायः सात्सा बोङःआकान्। 20युहनाकायः सात्सापाय् बोङःउतो हेरोद् राजाइ ताक्आक्थाल। “ओउःच्युक् पेओ परमेस्वर्कायः चीःओ मान्ताकायः सात्सा जुगाङ् स्याव्ल” त दाय्ह्ती युहनाकः रैती ओउःकायः पानःती झ्याल्खानहाङः थुनती गम्ओ ह। युहनाकायः झ्याल्खानहाङः गम्तोक्हाङः बेला बेलाहाङः हेरोद् राजाइ ओउःकायः गोत्ती वानःती ओउःइ तोओ कुरा झाक्ती सायःउतो “लौ ङा दोह् हायःचाङः दोह् हायःचाङः” त दाय्ह्ती आन ग्याङ्ह्ती मुओ खेःतो। 21ओहाङःसैको लयःकोः दोःओ दीन्हाङः हेरोद्इ लयःकोः दर्बाल्कोः मान्तालम्मा पल्तन्कोः ताङ्ह्ओ मान्तालम्मा गालील अन्चल्कोः ताङ्ह्ओ मान्तालम्कायःमा भोस् जाङ्ह्आकान्। भोस् जाङ्ह्तोक्हाङः हेरोदीयस्कोः चोःद्याङ् वाङ्ती सबैकोः मीक्हाङः स्याह्लेःआ। 22एत स्याह्ओकः हेरोद्मा ओउःकोः पहुनालम्मा आन म्रोआकाय्। ओउःत झ्यान्ते “लौ हौद्याङ्य ङाकायः तेती नोःची दा। दोह् दोह्तेः झाक्ती तेतेःनाःची ओउःलेः ङाइ बयःनेःनाङ्। 23सत्ते ताम्बजेः ङाकोः राजीकोः ल्हाक्च्युक् बयःनेःनाङ् बा” त दाय्ह्ती हेरोद्इ चोःद्याङ्कायः तोआकान्। 24ओउःत तोआक्तीको ओउः मोमःचोः ग्ल्युङ्ह्ती लयः आमाकोः कोथाहाङः मेस्लो तोओ कुरा छ्यानःलाङ् वाङ्आ। वाङ्आक्तीको “लौ आमाय ङाइ दोह् दोह्कायः तेचाङः ती” त दाय्ह्ती आमाकायः व्हत्उतो “लौ नाङ्इजा बाप्तीस्मा बयःओ युहनाकोः तालाङ्कायः तेउ दा” त दाय्ह्ती ओउःकोः आमा स्यान्ती त्याङ्आ। 25आमाखे एत त्याङ्आक्तीको चोःद्याङ्खे रेन्ह्तोलेः आल्ती हेरोद् राजाकःताङ् द्यान्ह्ती वाङ्ती “लौ ङाकायः ओउः बाप्तीस्मा बयःओ युहनाकोः तालाङ्पाय् यात्ज्योः थाल्हाङः द्याह्लेः वानःती बयःची दा” त दाय्ह्ती आपाकायः तोआकान् 26एत तोओ सायःती हेरोद् राजा लुकु सुकु त लीह्ती मुतो ल्हुङ् क्लोय्क्सापाय् खाय्उलु ओउःइ मेस्लोहाङः पहुनालम्कुस् चोःद्याङ्कायः तोती गम्आकान् 27ओउःत झ्यान्ते यात्चाक् लयःकोः सीपाही गोत्ती वानःती “लौ बाप्तीस्मा बयःओ युहनाकायः पाल्ती ओउःकोः तालाङ् वानःची” त दाय्ह्ती हेरोद्इ सीपाहीकायः तोती ल्होक्आकान्। ल्होक्आक्तीको ओउः सीपाहीइ आल्ती युहनाकायः पाल्ती सात्आक्तीको 28ओउःकोः तालाङ् थाल्हाङः लात्ती वानःती चोःद्याङ्कायः बयःआकान्। बयःआक्तीको ओउः मोमःचोःइपाय् त्याक्ती आमाकायः ल्हाआकान्। 29ओहाङःसैको “युहनाकायः सात्आकानी” त दाय्ह्ओ सायःती युहनाकुस् वाह्ओमयःइ वाङ्ती ओउःकोः म्हाङ् लात्ती आलःती बाङ्कोः य्होङःहाङः पाम्ह्ती गम्आकान्। ओउःत झ्यान्ते इ कुरा गीलती “लौ ङाइ अनम्ह् सात्ओ युहनापाय् द्याह् उह्ती च्योक्ओआः रैस” त हेरोद् दाय्ह्ती दाय्ह्ओ खेःतो।
30ओहाङःसैको येसुइ ल्होक्ओ बारजन ओउःकःताङ् द्यान्ह्ती वाङ्ती “लौ ङीइ इत इतलेः हायःआलाङःसु इतलेः स्यान्आलाङःसु” त दाय्ह्ती ओउःमयःइ सबै जाङ्ह्ओ काम्लम् येसुकायः ल्हाक्ती छ्यानःआकानी। 31ओउःत छ्यानःतोक्हाङः ओउःमयः मुओ कीम्हाङः नोःतो मान्तालम् लुय्ती झ्यान्ते येसुमा ओउः बारजनइमा जेःसा कोरःआक्नीली। ओउःत झ्यान्ते “लौ चीङःचाङःत खेःओहाङःपाय् धोती मुलाङ् आल्इ” त दाय्ह्ती येसुइ बारजनकायः तोथासतो 32ओउःमयः दोङ्गाहाङः लन्ह्ती गालील त तोओ ताङ्ह्ओ दुम्हान्कोः उःसै आल्ती मान्ता याक्मालो थाव्हाङः आल्आकाय्। 33आल्तोक् बेलाहाङः “येसु उनोकोताङ् आल्ती मुओ” च्यवःती मान्तालम् गाव् गाव्सै ग्ल्युङ्ह्ती तन्ती येसु आल्सा खेःओ थाव्ताङ् ङ्हा दाह्आकाय्। 34ओहाङःसैको येसु ग्ल्युङ्ह्ती वाङ्ती नाःतो हुम्ओ मान्तालम् च्यवःती “इमयःपाय् ह्रामःओ मान्ता नाःमालो भेदामेत्छ्याःलो लेखा ‘गाःहाङः आल्सा दोह् हायःसा खेःतो’ त चीःनीली” त म्हर्ती ओउःमयःकायः योनःती योती येसुइ नाःतो कुरा स्यान्आथास। 35ओहाङःसैको ओउःत हायःदा हायःदापाय् न्याम् याह्आथास। न्याम् याह्ती झ्यान्ते येसुकुस् वाह्ओमयः ओउःकःताङ् वाङ्ती “लौ देङे न्याम् याह्आतय्ही। इहाङःपाय् कीम्पाय् दोह्मा नाःमालो थाव् लेःआः जेःगामा दोह्मा नाःल बा। 36इ सायःती हुम्ओ मान्तालम्कायः द्याङ्तो द्याङ्तो गाव्ताङ् जेःगा बोङःलाङ् ल्होक्पाःथास” त दाय्ह्ती तोथातो 37“खेःल नीङ्इलेः जेःगा बयःनुसु दा” त दाय्ह्ती येसु त्याङ्आ। “गत हायःचाङःसु दै ङी नीस् सै चान्दी रुपीयाकोः जेःगा लेःलाङ् आल्चाङीया इमयःकायः बयःसाकायः” त दाय्ह्ती येसुकायः व्हत्आकानी 38“लौ योनु दा नीङ्कःहाङः गुच्युक्केरः लाङ् मुनाः” त दाय्ह्ती येसुइ तोआथास। ओहाङःसैको थेङ्ती योआक्तीको “पोङाकेरः लाङ्मा नीस्ज्योः र्युम्ह्ङाः मुनाः” त दाय्ह्ती त्याङ्आकाय्। 39ओउःमयः एत त्याङ्आक्तीको “लौ ओउः हुम्ओ मान्तालम् थेथे फाक्ती फाक्ती लाङ्गनःहाङः च्युङःती मुपनै” त दाय्ह्ती येसुइ तोआथास। 40ओहाङःसैको ओउः हुम्ती मुओलम् पचास् पचास्जनकोःमा सै सैजनकोः दन्काल्हाङः हारा हरी च्युङःआकाय्। 41ओउःमयः च्युङःआक्तीको येसुइ ओउः पोङाकेरः लाङ्मा नीस्ज्योः ङाःमा त्याक्ती लाङ्काताङ् त्याव्ती योती परमेस्वर्कायः “च्युता” त तोआकान्। एत तोआक्तीको येसुइ लाङ् फन्ह्ती वेःती ओउःकुस् वाह्ओमयःकायः ल्हाती दोल्कावःसाकायः बयःआकान्। ओउः नीस्ज्योः ङाःमा ओउःतलेः फन्ह्ती वेःती ल्हाआथास। 42ओहाङःसैको ओउः लाङ्मा ङाःमा सबै हुम्ओ मान्तालम्कायः दोल्कावःआक्तीको ओउः मान्तालम्इ ओउः जेःगा त्याक्ती कोस्तोलेः जेःआकानी। 43जेःच्युक् जेःआक्बतीको लाङ्कोःमा ङाःकोःमा वेओ य्हुन्ह्लम् सेक्ती हुम्ह्ती बारगोता धाकर्हाङः काती ब्लीङ्ताक्आकानी। 44ओउः जेःगा जेःओलम्पाय् पास् हजार्च्युक् गोय्चोःलम् खेःइतो।
45ओहाङःसैको मान्तालम्इ जेःती खाय्आक्तीको येसुइ लयःकुस् वाह्ओमयःकायः दुम्हान्कोः उःसै दोङ्गाहाङः ओउःकोः ङ्हासै ल्होक्आथास। ओउःमयःखे दोङ्गाहाङः लन्ह्ती आल्तोक्हाङः येसुखेइ हुम्ओ मान्तालम्कायः दाम्ती ल्होक्आथास। 46सबै पाय्ह्लाङ् ल्होक्आक्तीको येसु स्यालुङ्ताङ् परमेस्वर्कायः तोलाङ् लन्ह्आ। 47ओहाङःसैको न्याम् ब्लक्ती ज्याल्ओहाङः ओउः दोङ्गाहाङः वाह्ओलम्खे दुम्हान्कोः ल्हाक्बादीङ्हाङः मुआकाय् येसुखे स्यालुङ्हाङः लयःझुङ्आले मुओ खेःतो। 48दुम्हान्हाङः जोक्तो मारुःइ ताक्माःत झ्यान्ते ओउः दोङ्गाहाङः मुओलम्इ दोङ्गाकायः वाह्ताक्सा खाय्नीली। एत च्यवःती दोङ् याह्दीङ्हाङः येसुपाय् ओउःमयःकःताङ् वाङ्आ तीःकोः माल्गहाङः वाह्तीलेः। 49ओहाङःसैको यात्चाक् तीः माल्गहाङः वाह्ओ च्यवःती ओउः दोङ्गाहाङः मुओलम्पाय् “ओउःलेः लान्या दोह्या वाङ्आनाः” त म्हर्ती आन रैती हीह्आकाय्। 50ओउःमयः हीह्माकादे येसुपाय् “लौ ल्हुङ् धोमाय्तो रैमाःत मुन। ङा लेःआः बा” त दाय्ह्ती येसुइ तोआथास। 51एत तोआक्तीको येसु दोङ्गाहाङः लन्ह्ती वाङ्आ वाङ्तोक्हाङः मारुः अम्आ। ओहाङःसैको ओउः दोङ्गाहाङः मुओ आन ल्हुङ् ग्याङ्ह्आकाय्। 52ओउःमयः “गतलाङःकोः सायःआतय्ही” त म्हर्ती मेस्लो लाङ् वेःओ ग्याङ्ह्राय् सुलोइ जाङ्ह्ओ त पेतो चीःआक्नीली ओउःमयःकोः ल्हुङ् व्हक्मालो त खेःओ चीःसा खाय्नीली। 53ओहाङःसैको ओउःमयः दोङ्गाहाङः वाह्ती दुम्हान्कोः उःसै गनेसरेत् त तोओ देस्ताङ् दाह्ती ओउः दोङ्गापाय् पोत्ओ खील्ताङ् पेन्ह्ती गम्आकानी। 54ओउः पेन्ह्ती गम्ओ दोङ्गासै ग्ल्युङ्ह्आक्तीको साःहाङः दाह्ती वाङ्तोक्हाङः ओउः देस्कोः मान्तालम्इ येसुकायः तय्ह्आथै। 55“ओउःपाय् येसु लेःआः” त तय्ह्ती चीःआक्तीको ओउः देस्हाङः गाव् गाव्ताङ् सबै ल्होक्ती जीक्ओलम्कायः गोत्ती लात्ती वानःआकानी। गाःहाङःमा “लौ येसु इहाङःलेः मुनाः” त दाय्ह्ओ सायःआकानी ओहाङःलेः जीक्ओलम्कायः वानःआकानी। 56सहर्हाङःमा गाव्हाङःमा जङ्गल्हाङःमा गाःहाङःमा येसु दाह्ती वाङ्तो ती ओहाङः जीक्ओलम्कायः वानःती ल्याम् ल्याम्कोः छेव्हाङः न्यास्ती “लौ इइपाय् नाङ्कोः नाय्कोः दोर दीन्ह्पानी ओहाङःसैको सेलः स्याव्नै” त दाय्ह्ती तेइतो सुसु जीक्ओइ येसुकोः नाय् दीन्ह्आकानी ओउःलेः जुगाङ् सेलः स्याव्आकाय्।
Currently Selected:
मर्कस् 6: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
