साल्तेङ दिङगिल्का 4
4
पत्रुस रो युहन्ना बारासभाता
1पत्रुस रो युहन्ना द्याङगेलाइदोफा काथा पाकाताङ पालाउ धामिगेलाइ, थानको काप्तानगेलाइ रो सदुकिगेलाइ एम्बालाइकोता लोहि। 2ओबालाइ चेरताम्पाका हिघाखे, हाइपानु इसुता सिकासो सिन्हुलि दोखे दोअ्का काथा एम्बालाइ द्याङगेलाइहेङ धिरपादोङ घाखे रो हुकुम पादोङघाखे। 3कोलाउ एम्बालाइ पत्रुस रो युहन्नाहेङ रिम्हि रो बेल्हानाङ जुम्नि र्हिमाथिकापाको भाअ्सिङ थुनाता ताअ्हि। 4कुलाउ कथन हिङकालाइता हेन्जाङ खान्धुर पाहि। खान्धुर पाका द्याङगेलाइ ना हाजार झोको जेङहि।
5जुम्निदिना एबालाइको हाकिमगेलाइ, धरममास्टरगेलाइ रो आगुवागेलाइ यरुसलेमता जोम्का हिघाखे। 6मुल धामि हन्नास, कैयाफा, युहन्ना, अलेक्जेन्डर रो मुल धामिको जाहानगेलाइ झाराङ इन्ता हिघाखे। 7एम्बालाइ पत्रुस रो युहन्नाहेङ माझाता जाअ्पातेङ हिअ्हि, “हिदोइ सरबङसो, हासुको मिङता नेलाइ इदोइ पाका एइ?”
8कोलाउ पुनित हाङसाहोइ पोङघातेङ पत्रुस एम्बालाइहेङ दोअ्हि, “द्याङको हाकिम रो धरम मास्टर एइ, 9नानि केलाइ एमि नेङगारा द्याङहेङ एलोङ रेम्का काम पाका बारेता इङको हिदोइ जुक्तिहोइ एल्पासुन्हा दोअ्तेङ हिअ्सुन्हा पानु, 10नेलाइ झाराङहेङ रो इस्राएलको द्याङगेलाइ ग्याको, नेलाइ कुरुसता टाङगाइका रो परमेस्वर सिकासो सिन्हुपाका वाआङ नासरतको इसु ख्रिस्टको मिङता इदोइ द्याङ नेलाइको आगाता एल्तेङ जाअ्का हि। 11धरमकिताबको इदोइ काथा वाकोङ बारेता इसिका लेखेका हि:
‘जेदोङ उन्ठुइहेङ साअ्धामकालाइ खारिज पाहि,
इङकोचाहिँ कोन्हाको मुल उन्ठुइ जेङहि।’#ले ११८:२२
12“बो हासुङता मुक्ति मान्थु, हाइपानु केलाइ मुक्ति निङलि सादेललेता द्याङगेलाइता भेनेङ हिदिङ मिङ पिका मान्थु।”
13जेलाउ एम्बालाइ पत्रुस रो युहन्नाको आट तिङहि, एबालाइ मापर्हेका मामुलि द्याङ हिघाखे दोअ्तेङ गेहि। कोलाउ एम्बालाइ भारभुसाइहि रो एबालाइ इसुदोफाङ हिघाखे दोअ्का एम्बालाइ गेहि। 14कुलाउ एल्का द्याङहेङ पत्रुस रो युहन्नादोफा जाअ्तेङहिका तिङतेङ एम्बालाइ हाइदोङ दोअ्लि मादोहि। 15एसाङ एबालाइहेङ कचहरिसो बाहार हानेलि हुकुम पितेङ एम्बालाइ एसा दोअ्तेङ ताताइमिता मतो पाहि, 16“इदोइ द्याङगेलाइहेङ एला केलाइ हाइ पाङ? हाइदोनु यरुसलेमको झाराङ द्याङगेलाइ एबालाइको पाका इदोइ भारभुसाइका काम गेलि दोहोइ। एला केलाइ इदोइ काथाहेङ माको दोअ्लि माद्वाङ। 17कुलाउ इदोइ काथा राइतिता माचारचारायाको दोअ्तेङ ‘आरोङ इदोइ मिङता हिदिङ द्याङदोफा नेलाइ हाइदोङ माधुइसु’ दोअ्तेङ केलाइ एबालाइहेङ चेतानि पिलि गोयाङ।”
18कालाउ एबालाइहेङ काइतेङ एला उसो इसुको मिङता माधुइलि रो हाइदोङ माधिरपालि दोअ्तेङ एम्बालाइ हुकुम पिहि। 19कुलाउ पत्रुस रो युहन्ना एम्बालाइहेङ दोअ्हि, “परमेस्वरको काथा हिङकाखान्तेङ नेलाइको काथा हिङलि परमेस्वरको नजरता मुनासिप एइ ना माको नेलाइ ताइमिङ ठहर पासु। 20हाइपानु केलाइ तिङका रो हिङका काथागेलाइ माधुइसिङ केलाइ हिलि मामाद्वाङ।”
21कालाउ एम्बालाइको दन्ड पिका हाइदोङ जुक्ति मान्थुतेङ एबालाइहेङ हाप्काइतेङ लाअ्पिहि। हाइदोनु जे बारदात जेङका हिघाहि इङकोको भाअ्सिङ झाराङ द्याङगेलाइ परमेस्वरहेङ बाखिन्दोङ घाखे। 22हाइपानु जेदोङ द्याङ भारभुसाइका कामसो एल्पाका हिघाहि, इङकोको बोइसा न्हेकुरि बाअ्सारखान्तेङ हेन्जा हिघाहि।
आट निङलि पुकार पासु
23इन्तासो ओल्हेतेङ पत्रुस रो युहन्ना सानाइतिगेलाइकोता लोहि। मुल धामिगेलाइ रो धरम मास्टरगेलाइ दोअ्का काथागेलाइ ताइको सानाइतिगेलाइहेङ हिम्पाहि। 24जेलाउ एम्बालाइ इदोइ हिङहि, कोलाउ एम्बालाइ झाराङ परमेस्वरहेङ पुकार पालि तेङहि, “ओइ प्रभु जाइ सादेल, सुमिङ, जाहादि रो इङकोता हिका गोताङ चिज बान्हाइन्हा।#दामालाअ्का २०:११; नहेम्याह ९:६; ले १४६:६ 25जाइ पुनित हाङसासो नाङको सेबक केलाइको खाल दाउदको नुइसो धुइन्हा:
‘बोजात्यागेलाइ हाइपालि चेरताम्पाखे?
द्याङगेलाइ हाइपालि बिनासिति आस्ति थोखे?
26परमप्रभुको खिलापता रो ख्रिस्टको खिलापता सुमिङको राजागेलाइ जाअ्हि,
हाकिमगेलाइ एदोसाङ जोम्हि।’#ले २:१-२
27“हाइदोनु ना अभिसेक पाका, नाङको पुनित सेबक इसुको खिलापता हेरोद रो पन्तियस पिलातस न्हेमिङ, बोजात्या रो इस्राएलिगेलाइदोफा इदोङ पुरता जोम्का हिघाखे।#लुका २३:१; ७-११; मत्ति २७:१-२; मर्कुस १५:१; युहन्ना १८:२८-२९ 28इङकोङ पालि नाङको लाल्सा रो उपाइमाफिक लाम्फासोङ निघो पाका हिघान्हा। 29एला ओइ प्रभु, एम्बालाइको दप्किर्हुता नजर पा। नाङको बान्धाइगेलाइहेङ आट पितेङ नाङको कथन धुइलि पि। 30कालाउ ताइको सेबकगेलाइहेङ, इसुको मिङता रोगाइका, मासाअ्धेकालाइ एल्पाका रो भारभुसाइका कामगेलाइ नाङको सरबङसो ज्याको।”
31एम्बालाइ पुकार पालिदोकान्हुअ्सो एम्बालाइ जोम्का थामे हेङघालाइन्हाहि। एम्बालाइ झाराङ पुनित हाङसासो पोङघाहि रो एम्बालाइ आटसो परमेस्वरको कथन धुइहि।
गोताङ टाका काउरि साझ्या
32खान्धुर पाकालाइ झाराङ एलोङ कोन्धाङको रो एलोङ आत्माको जेङका हिघाखे। एम्बालाइता हासु बुङ ताइ टाका काउरिको हाइदोङ माल इदोइ काङको ताइको एइ दोअ्तेङ मादोअ्घाहि। एम्बालाइको गोताङ थोम माझाको हिघाखे।#साल्तेङ दिङगिल्का २:४४-४५ 33प्रभु इसु सिकासो सिन्हुका हि दोअ्तेङ साल्तेङ दिङगिल्कालाइ बारका सरबङ निङतेङ दासि निङघाखे रो परमेस्वर एम्बालाइ झाराङहेङ दायातेङ हेन्जाङ सहसाम्पा पिहि। 34एम्बालाइता हासुहेङ हाइदोङ काथाको हरजा माजेङघाहि। हाइपानु मिलिङ साअ् हिकालाइ पिअ्तेङ इङकोको दाम साल्तेङ दिङगिल्काकोता चुमाघाखे। 35कालाउ जाइ जाइहेङ जेदोङ जेदोङ काथाको हरजा जेङघाहि, इङको झाराङहेङ बाखाराइ पिघाखे।
36एखे साइप्रस पुरको लेबि खालको योसेफ मिङ हिका द्याङ हिघाखे। जाइको साल्तेङ दिङगिल्कालाइ बारनाबास दोअ्तेङ मिङ ताअ्का हिघाखे (जाइको माने हाउसालाको चान जेङखे)। 37वा ताइको मिलिङ पिअ्तेङ इङको टाका चुमातेङ साल्तेङ दिङगिल्कालाइहेङ पिहि।
Currently Selected:
साल्तेङ दिङगिल्का 4: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
