युहन्ना 10
10
इसु रेम्का घोका
1इसु दोअ्हि, “जातिङको, का नेलाइहेङ दोअ्खा, जाइ भेरा खोतारको फिनुसो लिअ्ता मादुल्सिङ भेनेङपाहासो ताङतेङ दुल्खे, इङकोचाहिँ खुका रो डाका एइ। 2कालाउ बुङ फिनुसो लिअ्ता दुल्काचाहिँ भेरा घोका एइ। 3द्वारपाल वाको भाअ्सिङ फिनु हेपिखे। भेरागेलाइ वाको गाला हिङखे रो वा ताइको भेरागेलाइहेङ मिङ ल्होपितेङ काइखे, कालाउ एम्बालाइहेङ बाहार चुम्पुखे। 4जेलाउ वा गोताङ भेरागेलाइहेङ बाहार ओल्हेपालिदोखे, वा एम्बालाइको आगाआगा तेखे रो भेरागेलाइ वासेहेङ पिताइखे, हाइदोनु एम्बालाइ वाको गाला नाल्खे। 5कुलाउ मानाल्का खामालहेङ एम्बालाइ मापिताइखे, भुरुङ इङकोसो खाअ्खे। हाइदोनु मानाल्का खामालको गाला एम्बालाइ मानाल्खे।” 6इसु एम्बालाइहेङ इदोइ तुलनाको आकारता दोअ्हि, कुलाउ वा एम्बालाइहेङ दोअ्का काथा एम्बालाइ मागेहि।
इसु जातिङको फिनु
7इदोइखातिर इसु आरोङ एम्बालाइहेङ दोअ्हि, “जातिङको, का नेलाइहेङ दोअ्खा, भेरागेलाइको फिनु काआङ एइ। 8काखान्तेङ लाम्फा लोका झाराङ खुका रो डाकागेलाइ एइ, कुलाउ भेरागेलाइ एम्बालाइको काथा माहिङहि। 9फिनु का दोङ एइ, एदि हासुङ द्याङ कासो लिअ्ता दुल्हि पानु इङको सिन्हुपान्हावा, कालाउ लिअ्ता बाहार लोलि हानेलि पावा रो चरनता चारेलि निनावा। 10खुका ते खुलि, सेअ्लि रो मुअ् पालि खिनिङ लोखे। का ते नेलाइलाइ ज्यान निनाको रो इङको हेन्जा आकारता निनाको दोअ्का खातिरहोइ लोघा।
इसु रेम्का घोका
11“का रेम्का घोका एइ। रेम्का घोका ताइको भेरागेलाइको भाअ्सिङ ताइको बायु चार्हाइखे। 12किराइको द्याङचाहिँ ताइकोङ घोकाभाइका माको। इङको ते झारखियाहेङ लोका तिङतेङ भेडागेलाइहेङ लाअ्तेङ खाअ्खे। इङकोन्हुअ्सो झारखिया भेरागेलाइहेङ झाअ्मेरेतेङ चुम्पुखे रो इसोउसो पापिखे। 13इङको खाअ्खे, हाइदोनु इङको किराइको द्याङ एइ, इङको भेराहेङ हाइदोङ वास्ता मापाखे।
14“का रेम्का घोका एइ, का ताइको भेरागेलाइहेङ नाल्खा रो काङको भेरागेलाइ कासेहेङ नाल्खे। 15जेसापा आबा कासेहेङ नाल्खे, का आबाहेङ नाल्खा। कालाउ का भेरागेलाइको भाअ्सिङ ताइको बायु चार्हाइखा।#मत्ति ११:२७; लुका १०:२२
16“काङको बो भेरा हि, जाइ इदोइ खोतारको माको। एम्बालाइहेङ बुङ का चुमालिगोइका हि। एम्बालाइ काङको गाला हिन्हावा रो एम्बालाइ एलोङदोङ जेर ज्यावा रो एलोङदोङ घोका ज्यावा। 17आबा कासेहेङ इदोङखातिर इन्ताना पाखे, हाइपानु का ताइको बायु आरोङ घुरि पाका खातिर चार्हाइखा। 18हासुङ कासो काङको बायु र्हुलि माद्वावा, कुलाउ का ताइकोङ लाल्साहोइ ताइको बायु चार्हाइखा। ताइको बायु चार्हाइका खाबरा कादोसा हि, कालाउ आरोङ र्हुका खाबारा बुङ कादोसा हि। इदोइ हुकुम का काङको आबासो निङका हिघा।”
19इदोइ कथनको खातिर यहुदिगेलाइको माझाता आरोङ बिभेद जेङहि। 20एम्बालाइता हेअ्मि दोअ्घाखे, “यासेहेङ मासान खोअ्का हि रो या ते पागालाजेङका हि। नेलाइ याको काथा हाइपालि हिङसुखेना?”
21आधेमि दोअ्घाखे, “मासान खोअ्का द्याङको काथा इसिका माजेङखे। हाइ मासान कान्हाको मि हेपिलि दोखे कुनु?”
यहुदिगेलाइको अखान्धुरि
22यरुसलेमता थान चार्हाइका पारबा हिघाहि। 23इदोइ चुङदिङको पहर हिघाहि। इसु थानलिअ्ता सोलोमनको धाअ्ता हिगिल्दोङ घाहि। 24यहुदिगेलाइ वाको चारबितिङ जोम्तेङ दोअ्हि, “हेअ्लाउथिकापा ना केलाइहेङ दोमनता ताअ्ताना? ना ख्रिस्ट हिन्हा पानु केलाइहेङ माम्होअ्सिङ दोअ्पि।”
25इसु एम्बालाइहेङ दोअ्हि, “का नेलाइहेङ दोअ्पिहोइका, कुलाउ नेलाइ खान्धुर मापासुखेना। काङको आबाको मिङता जेदोङ काम का पाखा, इङकोङ काङको दासि पिखे। 26कुलाउ नेलाइ काङको भेरामाझाको माको। 27काङको भेरागेलाइ काङको गाला हिङखे, का एम्बालाइहेङ नाल्खा रो एम्बालाइ कासेहेङ पिताइतेङ लोखे। 28का एम्बालाइहेङ असिम ज्यान प्याङका। एम्बालाइ हेअ्लाउ मुअ्तेङ मान्हावा रो हासुङ एम्बालाइहेङ काङको खुरसो घिङतेङ माचुमप्वावा। 29काङको आबा इङको पिका हि, वा झाराङखान्तेङ बाराका हि। आबाको खुरसो हासुङ नेलाइहेङ घिङतेङ चुम्पुलि माद्वावा। 30आबा रो का एलोङदोङ एइ।”
31यहुदिगेलाइ वासेहेङ तोलि दोअ्तेङ आरोङ उन्ठुइ तोल्हेहि। 32इसु एम्बालाइहेङ दोअ्हि, “का नेलाइहेङ काङको आबासो हेन्जाङ रेम्का काम तिम्पाघा। इङकोता हिदोइ कामको भाअ्सिङ नेलाइ कासेहेङ उन्ठुइ तोलि भोसुखेना?”
33यहुदिगेलाइ वासेहेङ दोअ्हि, “रेम्का कामको भाअ्सिङ केलाइ नासेहेङ उन्ठुइ मातोङ, कुलाउ परमेस्वरको बादनामि पाका खातिर, ना द्याङ जेङतेङ बुङ ताइमिहेङ परमेस्वर बान्हाइखेना।”#लेबि २४:१६
34इसु एम्बालाइहेङ दोअ्हि, “हाइ नेलाइको नियमता ‘नेलाइ दिरगेलाइ एइ’ दोअ्तेङ लेखेका मान्थु कुनु?#ले ८२:६ 35एदि जाइदोफा परमेस्वरको कथन लोहि, एम्बालाइ दिरगेलाइ दोअ्न्हावा दोअ्नु (धरमकिताब असत जेङलि मादोखे), 36आबा पुनित बान्हाइतेङ दुनियाता दिङगिल्का खामाल ‘का परमेस्वरको चान एइ’ दोअ्लाउ हेसापा परमस्वरको बादनामि ज्यावा? 37एदि का काङको आबाको काम पाका मान्थुघा पानु कासेहेङ खान्धुर मापासु। 38कुलाउ एदि का आबाको काम पाखा रो बुङ नेलाइ कासेहेङ खान्धुर मापास्वाना पानु इदोइ कामगेलाइर्हुता खान्धुर पासु। कालाउ खिनिङ नेलाइ गेलि दोस्वाना, आबा काता हि रो का आबाता हिघा।” 39एम्बालाइ आरोङ वासेहेङ रिम्लि भोहि, कुलाउ वा एम्बालाइको खुरसो पुच्काहि।
40इसु आरोङ यर्दन ओदोइपार इङको थामेता हानेहि, जेता युहन्ना लाम्फा चिभुअ्लि पिघाखे रो वा इन्ताङ हि।#युहन्ना १:२८ 41हेन्जाङ द्याङगेलाइ वाकोता लोलि तेङहि रो एम्बालाइ दोअ्हि, “युहन्ना हिदिङ चिनोगेलाइ मापाहि, कुलाउ युहन्ना याको बारेता जेदोङ जेथे दोअ्का हिघाखे इङको सत हिखाखे।” 42कालाउ इन्ता हेन्जाङ द्याङगेलाइ वासेहेङ खान्धुर पाहि।
Currently Selected:
युहन्ना 10: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
