युहन्ना 14
14
इसु दामा, सत रो जिबन
1इसु चात्यागेलाइहेङ दोअ्हि, “नेलाइको सुर्ता मापासु। नेलाइ परमेस्वरहेङ खान्धुर पासुखेना, कासेहेङ बुङ खान्धुर पासु। 2काङको आबाको साअ्ता हिका थामेगेलाइ हेन्जाङ हि। एन्सा माकोनु, नेलाइको भाअ्सिङ थामे त्यार पालि का हानेदोङखा दोअ्तेङ नेलाइहेङ दोअ्धाङका कुनु? 3कालाउ हानेतेङ नेलाइको भाअ्सिङ थामे त्यार पाकान्हुअ्सो का आरोङ ल्वाङका रो नेलाइहेङ काता चुमप्वाङका। कोलाउ जेता का हिघा, इन्ता नेलाइ बुङ हिस्वाना। 4जेता का हानेदोङखा, नेलाइ इन्ता हानेका दामा नाल्सुखेना।”
5थोमा वासेहेङ दोअ्हि, “प्रभु, ना हिसो हानेदोङखेना, केलाइ मागिन्हाखे, कोलाउ केलाइ दामा हेसापा नाल्लि?”
6इसु इङकोहेङ दोअ्हि, “दामा, सत रो जिबन का दोङ हिघा। कासो बिना हासु बुङ आबाकोता लोलि माद्वावा। 7नेलाइ कासेहेङ नाल्का हिनु, काङको आबाहेङ बुङ नाल्सुधाना। एलासो ओसो वासेहेङ नालस्वाना रो वासेहेङ तिङका हिसुन्हा।”
8फिलिप इसुहेङ दोअ्हि, “प्रभु, केलाइहेङ आबा तिम्पापि। इङको जेङनु केलाइहेङ थेमाङ।”
9इसु इङकोहेङ दोअ्हि, “फिलिप, इदोइ पहरथिकापा का नेलाइदोफा हिघा, कोलाउबुङ ना कासेहेङ मानाल्खेना? जाइ कासेहेङ तिङका हि, इङको आबाहेङ तिङका हि। ना ‘केलाइहेङ आबा तिम्पापि’ दोअ्तेङ हेसापा दोअ्लि द्वाना? 10का आबाता हिघा रो आबा काता हि दोअ्तेङ हाइ ना खान्धुर मापाखेना? जेदोङ कथन का नेलाइहेङ दोअ्खा, इङको का काङको ताइकोङ खाबराता धुइका माको, कुलाउ काता बासा हिका आबा ताइको काम पाखे। 11कासेहेङ खान्धुर पा, का आबाता हिघा रो आबा काता हि। माकोनु इदोइ कामगेलाइको खातिर खान्धुर पा।
12“जातिङको, का नेलाइहेङ दोअ्खा, जाइ कासेहेङ खान्धुर पाखे, इङको काङको पाका काम बुङ पावा। इङकोखान्तेङ बाराका काम पावा, हाइदोनु का आबाकोता हानेदोङखा। 13नेलाइ काङको मिङता जेदोङसुदाङ र्हेलाउ बुङ चानता आबाको प्रताप ज्याको दोअ्तेङ का इङको पाङका। 14नेलाइ काङको मिङता हिदिङ थोक र्हेसुन्हा पानु का पाप्याङका।
पुनित हाङसाको कबोल
15“नेलाइ कासेहेङ इन्ताना पासुन्हा पानु काङको हुकुमगेलाइ साअ्स्वाना। 16का आबादोफा पुकार पाङका रो वा नेलाइहेङ भेनेङ साल्हापिका प्यावा रो वा नेलाइदोफाङ दिनादिनाङ हितेङह्यावा। 17या सतको हाङसा हि, जाइहेङ दुनिया र्हुलि माद्वावा, हाइदोनु दुनिया वासेहेङ ना ते तिङखे ना नाल्खे। नेलाइ वासेहेङ नाल्सुखेना, वा नेलाइदोफा बासा हिखे रो वा नेलाइता हितेङह्यावा। 18का नेलाइहेङ माउर्या भाइपा मालाअ्ताङका। का आरोङ नेलाइकोता ल्वाङका। 19एला आधे पहरन्हुअ्सो दुनिया कासेहेङ हेअ्लाउ मातिनावा, कुलाउ नेलाइ कासेहेङ तिङस्वाना। का सिन्हुका जेङका हिनाङ, नेलाइ बुङ सिन्हुतेङ हिस्वाना। 20इङको दिना नेलाइ गेस्वाना, का काङको आबाता हिघा, नेलाइ काता रो का नेलाइता हिघा। 21कासेहेङ इन्ताना पाका इङकोङ एइ, जाइदोफा काङको हुकुम हि रो इङको साअ्खे। कालाउ कासेहेङ इन्ताना पाकाहेङ काङको आबा इन्ताना पाखे। का इङकोहेङ इन्ताना पाङका रो का ताइमिङहेङ इङकोता देखाल प्याङका।”
22यहुदा (इस्करियोतचाहिँ माको) इसुहेङ दोअ्हि, “प्रभु, ना हाइ दोअ्खेना, ना ताइमिङहेङ केलाइता देखाल प्याना रो दुनियाहेङ चाहिँ माको?”
23इसु इङकोहेङ दोअ्हि, “जाइ कासेहेङ इन्ताना पाखे, इङको काङको कथन साअ्तावा। काङको आबा इङकोहेङ इन्ताना पावा, केलाइ इङकोता ल्वाङ रो इङकोदोफा बासा ह्याङ। 24कासेहेङ इन्ताना मापाकालाइ काङको कथन मासाअ्खे। जेदोङ कथन नेलाइ हिङसुखेना, इङको काङको माको, कुलाउ कासेहेङ दिङगिल्का आबाको एइ।
25“इदोइ काथा नेलाइदोफा हिलाउ का नेलाइहेङ दोअ्का एइ। 26कुलाउ साल्हापिका, माकोनु पुनित हाङसा, जाइहेङ आबा काङको मिङता दिङगिलावा। वा नेलाइहेङ गोताङ काथा धिरपावा। का नेलाइहेङ दोअ्का गोताङ काथा नेलाइहेङ फोम पापावा।
27“सान्ति का नेलाइदोफा लाअ्ध्याङका। का ताइको सान्ति नेलाइहेङ प्याङका, कुलाउ दुनियाको पिकाभाइपा माको। नेलाइको कोन्धाङ बिकल माज्याको रो थिलिगोइका माज्याको।
28“का नेलाइहेङ ‘का हानेदोङखा रो नेलाइकोता ल्वाङका’ दोअ्का नेलाइ हिङसुन्हा। नेलाइ कासेहेङ इन्ताना पाका हिनु का आबाकोता हानेदोङखा दोअ्का हिङतेङ नेलाइ लेन्चासुधाना, हाइपानु आबा काखान्तेङ बाराका हि। 29एला इदोइ जेङका लाम्फा दोङ का नेलाइहेङ दोअ्पिका हिघा। जेलाउ इदोइ जेङलि ल्वावा नेलाइ खान्धुर पालि दोसु। 30का नेलाइदोफा एला हेन्जा माधुयाङका, हाइदोनु इदोइ दुनियाको राजपाका#१४:३० दुनियाको राजपाका दियाबलसहेङ दुनियाको राजपाका बुङ दोअ्खे। लोदोङखे। इङको कार्हुता हाइदोङ सरबङ मान्थु। 31कुलाउ का आबाहेङ इन्ताना पाखा रो जेसापा आबा कासेहेङ हुकुम पाका हि इङकोङमाफिक पाखा दोअ्तेङ दुनिया ग्याको। ल्होसु, केलाइ इतासो हानाइने।”
Currently Selected:
युहन्ना 14: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
