लुका 15
15
राम्का भेडाको तुलना
(मत्ति १८:१२-१४)
1एखे हेन्जा तिरो ल्होपाकालाइ रो बो कुकरमिगेलाइ इसुको बिद्या हिङलि लोहि।#लुका ५:२९-३० 2कालाउ फरिसिगेलाइ रो धरममास्टरगेलाइ गनगन पातेङ दोअ्हि, “इदोइ द्याङ ते कुकरमिगेलाइ दोफा मिलिखे रो दोफाङ योम्तेङ ओबालाइदोफाङ चाखे।”
3इसु एम्बालाइहेङ एलोङ तुलनाको आकारता इसिका काथा दोअ्हि, 4“नेलाइता हासुको बुङ एसाइ भेडा हि वाला। इङको एसाइता एलोङ राम्नु भेडाको धनि हाइ पावा? वा एलोङ कम एसाइहेङ घोका थामेताङ लाअ्धितेङ राम्का भेडाहेङ मानिम्पाधाउ माभोकावा कुनु? 5वा इङको राम्का भेडाहेङ निङलाउ लेङचातेङ वासेहेङ कान्धेता फातेङ ताइको साअ्ता चुमावा। 6कालाउ ताइको सानाइतिगेलाइ रो साअ् भेर्पाको द्याङगेलाइहेङ काइतेङ दोअ्तावा, ‘काङको राम्का भेडा का निङहोइका! लोसु, लेङचाका मान्याइने।’ 7का नेलाइहेङ दोअ्ताङका, ताताइको कुकरम मानितेङ परमेस्वरपाहा घुरिपालि मागोयाङ दोअ्का द्याकुरिते क्वाहा धरम द्याङगेलाइ खान्तेङ ताताइको कुकरम मानितेङ परमेस्वरपाहा घुरिका एमि कुकरमिको भाअ्सिङ सादेलता हेन्जाङ लेङचावा।”
राम्का टाकाको तुलना
8आरोङ इसु भेनाङ एलोङ तुलना पितेङ दोअ्हि, “एमि बेबाल दोफा ते लोङ रुपाको टाका हिघाहि। कालाउ एलोङ रुपाको टाका राम्पालाउ एला वा हाइपावा? इङको राम्का टाका मानिम्पाधाउ हाइ वा गिसा जोलाइतेङ फेसारहोइ फेतेङ माभोकावा कुनु? 9जेलाउ वा राम्का रुपाको टाका निनावा कालाउ ताइको सानाइति भाया रो साअ्भेर्पाको द्याङगेलाइहेङ काइतेङ दोअ्तावा, ‘काङको राम्का रुपाको टाका निङहोइका! एला लोसु, केलाइ लेङचाका मान्याइने।’ 10का नेलाइहेङ दोअ्ताङका, एन्साङ पातेङ ताताइको कुकरम मानितेङ परमेस्वरपाहा घुरिका एमि कुकरमिको भाअ्सिङ सादेलता सादेलचरगेलाइ हेन्जाङ लेङचावा।”
राम्का चानको तुलना
11इसु आरोङ दोअ्हि, “एमि द्याङको न्हेमि चान हिघाखे। 12एनि कान्छा चान लोतेङ आबाहेङ दोअ्हि, ‘आबा, काङको भागता निङलिगोइका गोताङ टाका काउरिको अङस कासेहेङ पि।’ कालाउ आबा बुङ ताइमि दोफा हिका काउरि न्हेमि चानहेङ बाखाराइ पिहि।
13“एनि न्हेनि न्हुअ्सो कान्छा चान ताइको अङसता निङका गोताङ टाका काउरि चुमपुतेङ भेनेङ मुलुकता हानेहि। कालाउ इन्ता मोज माज्जा पातेङ गोताङ टाका काउरि दोपाहि। 14जेलाउ वा ताइदोफा हिका गोताङ टाका काउरि दोपाहि कालाउ इङको मुलुकता बारा आनिकाल परिहि। एन्सा लाउ वा चालि बुङ मानितेङ म्हितुपाङ हिलि गोइहि। 15कालाउ वा इङको मुलुकको एमि द्याङकोता काम पालि भाअ्सिङ हानेहि। इङको द्याङ वासेहेङ ताइको मिलिङता पाया घोका कामता लागाइहि। 16हेन्जा म्हितुतेङ वा पायाको आहार चातेङलाउ बुङ ताइको हेमेङ भेलपालि खाङघाहि। कालाउ हासु बुङ वासेहेङ चाकाआनेमाने मापिहि।
17“इङको पहर खिनिङ वाको चेत खुलिहि कालाउ वा ताइको मनता दोअ्हि, ‘काङको आबाकोता कामत्यागेलाइ हेमुङ भेल्पाङ चातेङ बुङ दाइघाखे। का खिनिङ इता म्हितुपाङ हितेङ सिलि तोम्होइका। 18एला का आबाकोता हानेतेङ दोअ्ताङका, आबा! का परमेस्वर रो नाङको खिलापता कुकरम पाका हिघा। 19एला ते कासेहेङ नाङको चान दोअ्लि बुङ मासोबायाङ। कालाउ कासेहेङ दाया तेङ एमि कामपाकालाइ भाइपाङ फोमपातेङ ताअ्।’ 20कालाउ इङकोन्हुअ्सो वा ताइको आबाकोता घुरितेङ लोलाउ वाको आबा वासेहेङ दुरेसोङ तिङहि। आबाको मन दायासो पोङघातेङ लोहि रो लेङचातेङ चानहेङ भेटेलि धाअ्तेङ हानेहि। कालाउ ताइको चानहेङ खोमतेङ चुमाइहि।
21“कालाउ चान आबाहेङ दोअ्हि, ‘आबा, का परमेस्वर रो नाङको खिलापता कुकरम पाका हिघा। एला का नाङको चान दोअ्लि बुङ मासोबायाङका।’ 22कालाउ आबा ताइको कामत्यागेलाइहेङ काइतेङ दोअ्हि, ‘मार्फा पातेङ झाराङ खान्तेङ रेम्का धाबा, आँउठि रो जुत्ता चुमातेङ यासिहेङ लागाइपिसु। 23कालाउ पोसेतेङ ताअ्का तोइका बासा चुमातेङ सेअ्सु। चातेङ आम्तेङ लेङचाइने। 24हाइदोनु काङको इदोइ चान सिका हिघाहि आरोङ सिन्हुतेङ लोहि। वा राम्का हिघाहि एला वासेहेङ निङन्हाहि!’ कालाउ एम्बालाइ लेङचातेङ भात्यार चालि तेङहि।
25“इङको पहर वाको जेठा चान मिलिङ भारि हिघाहि। जेलाउ घुरितेङ साअ् भेर्पा थुकालि लोलाउ वा न्हाका लेकालाइको गाला हिङहि। 26कालाउ वा एमि कामत्याहेङ काइतेङ, ‘इता हाइ जेङदोङ खे?’ दोअ्तेङ हिअ्हि। 27इङको काम पाका दोअ्हि, ‘नाङको ओने रेम्फा साअ्ता घुरितेङ लोकाहि। नाङको आबा इदोइ खुसिता एलोङ तोइका बासा सेअ्लि लागाइतेङ भात्यार लागाइका हि।’ 28इङको हिङतेङ दादा हेन्जाङ चेर ताम्पातेङ साअ्ता दुल्लि बुङ माकिअ्हि। कालाउ वाको आबा लोतेङ वासेहेङ सम्झाइ बुझाइ पालि तेङहि।
29“कालाउ वा आबाहेङ दोअ्हि, ‘इदिझोको बाअ्सारसो दास भाइपा नाङको सेवा पातेङ लोका हिघाघा। कालाउ का नाङको हिदि बुङ हुकुमहेङ बिरोध सुदाङ पानाङ मान्थुघाघा। कालाउ ना काङको सानाइति भायागेलाइदोफा मिलितेङ चालि दोअ्तेङ एलोङ मेअ्सा सुदाङ बुङ कासेहेङ पिका मान्थुन्हा।
30“‘कालाउ नाङको टाका काउरि कासबिरिगेलाइदोसा दोपाका चान लोलाउचाहिँ ना इदोइझोको बारा भात्यार पाखेना।’ 31कालाउ आबा वासेहेङ दोअ्हि, ‘काङको चान खाङ, ना ते जेलाउ बुङ काङकोङ दोफा हिन्हा। आरोङ काङकोदोफा हिका इदोइ गोताङ टाका काउरि नाङकोङ! 32कालाउ नानि केलाइ लेङचाका जेङतेङ इदोइ हाउसा मानाइलि दोङ गोइका हिघाहि। हाइदोनु नाङको ओने जाइ सिका हिघाहि एला आरोङ वा सिन्हुतेङ लोहि। वा राम्का हिघाहि एला आरोङ यासेहेङ निङन्हाहि!’”
Currently Selected:
लुका 15: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
