मत्ति 7
7
बोमिहेङ फतुर मालागाइसु
(लुका ६:३७-३८,४१-४२)
1इसु आरोङ दोअ्काताङ हानेहि, “बोमिहेङ मादुसिसु रो नेलाइ बुङ फतुर मानिङचास्वाना। 2हाइदोनु जेसापा नेलाइ बोमिहेङ फतुर लागाइस्वाना, एन्सा दोङ नेलाइ बुङ फतुर निङचास्वाना। जेदोङ दोङकाहोइ नेलाइ दोङस्वाना, एन्साङ पातेङ नेलाइको भाअ्सिङ बुङ दोङन्हावा।#मर्कुस ४:२४ 3हाइपालि ना ताइको ओनेको मिँता हिका धुला तिङखेना, कालाउ बुङ नाङको ताइकोङ मिँता हिका ढेङगाराचाहिँ मागेखेना? 4ताइको मिँको ढेङगारा बुङ मातिङका ताइको ओनेहेङ हेसापा दोअ्लि द्वाना, ‘कासेहेङ नाङको मिँसो धुला ओल्हेपालि पि।’ 5ओइ चिम्काटागेलाइ, लाम्फा ताइकोङ मिँसो खाति ओल्हेपा, कालाउ कि नाङको ओनेको मिँसो धुला ओल्हेपालि रेम्फा तिङलि द्वाना।
6“जाइ पुनित हि इङको खियागेलाइहेङ मापिसु, माकुनु घुरितेङ नेलाइहेङ चि:लि भोकावा। नेलाइ ताइको मोतिगेलाइ पायाको आगाता माथाल्सु, माकुनु इङकोहेङ ताइको खोकोइहोइ यानावा।
पुकारको बारेता बिद्या
(लुका ११:९-१३)
7“र्हेसु ते नेलाइहेङ प्यावा, भोसु ते नेलाइ दुसुस्वाना, चालापासु ते नेलाइको भाअ्सिङ हेन्हावा। 8हाइपानु जाइ र्हेकावा इङको निनावा, जाइ भोकावा इङको दुस्वावा रो जाइ चालाप्यावा, इङकोको भाअ्सिङ फिनु हेन्हावा। 9नेलाइता हिदोइ द्याङ हि वाला, जाइ ताइको चान तोले र्हेलाउ इङकोहेङ उन्ठुइ प्यावा? 10माकुनु हाया र्हेलाउ पुह्याँ प्यावा? 11एसापा नेलाइ आसाति हितेङ बुङ चानचामिन्दिगेलाइहेङ रेम्का सामान पिलि गेसुन्हा पानु, झन सादेलता हिका नेलाइको आबा वाकोदोफा र्हेकालाइहेङ हेथे हेन्जा रेम्का सामान प्यावा।
ज्यानता थुकापाका दामा रो फिनु
(लुका ६:३१; १३:२४)
12“द्याङगेलाइ नेलाइदोफा जिसिका चालचलन पाको दोअ्का नेलाइ भोसुखेना, नेलाइ बुङ एम्बालाइदोफा इन्सिकाङ चालचलन पासु। हाइदोनु इङको दोङ नियम रो आगाधुइकाको मुल काथागेलाइ एइ।#लुका ६:३१
13“चेअ्का फिनुसो लिअ्ता दुल्सु, हाइदोनु बिगारता थुकापाका दामा फाराका रो फिनु सुकाका हिखे। इतासो लिअ्ता दुल्कालाइ हेन्जाङ हिखे। 14कालाउ बुङ ज्यानता थुकापाका दामा मासुकाका रो फिनु चेअ्का हिखे। इसिका दामा रो फिनु निङकालाइ चाहिँ आतुइसा खिनिङ हिखे।
द्याङ वाको कामसोङ नाल्खे
(लुका ६:४३-४६; १३:२५-२७)
15“का परमेस्वरसो धुइका दोअ्तेङ ढाटाइका आगाधुइका दोफा होसपातेङ हिसु। इसिका द्याङगेलाइ नेलाइकोता भेराको धाबाता लोखे, जाइ लिअ्तापाहा चाहिँ थिलिगोइका स्याइलेगेलाइ भाइका हिखे। 16नेलाइ एम्बालाइहेङ ओबालाइको कामसोङ नालस्वाना। हाइ चुइको सिङसो आङगुर माकोनु चुअ्भ्रिको सिङसो नेभारा पेन्हाखे कुनु? 17एन्साङ पातेङ गोताङ रेम्का सिङ रेम्काङ फल सेपाखे। कालाउ बुङ मारेम्का सिङ मारेम्काङ फल सेपाखे। 18रेम्का सिङ मारेम्का फल सेपालि मादोखे, ना मारेम्का सिङ रेम्का फल सेपालि दोखे। 19रेम्का फल सेपालि मादोका गोताङ सिङ पाल्तेङ उन्धिपावा रो मेता थालन्हावा।#मत्ति ३:१०; लुका ३:९ 20एसापा इङको आगाधुइकालाइहेङ एम्बालाइको पाका कामसो नालस्वाना।#मत्ति १२:३३
21“कासेहेङ ‘प्रभु’, ‘प्रभु’ दोअ्का झाराङ सादेलको सारभिता दुल्लि मानिनावा। सादेलता हिका काङको आबाको लाल्सा मानिका द्याङ खिनिङ सादेलको सारभिता दुल्लि निनावा। 22इङको दिना हेअ्मि कासेहेङ दोअ्तावा, ‘प्रभु, प्रभु, हाइ केलाइ नाङको मिङता आगाधुइका माधुइन्हाहि? हाइ नाङको मिङता मासानगेलाइ माओल्हेपान्हाहि? हाइ नाङको मिङता भारभुसाइका कामगेलाइ मापान्हाहि कुनु?’ 23कालाउ का एम्बालाइहेङ दोअ्ताङका, ‘का नेलाइहेङ हेअ्लाउ नाल्का मान्थुघा। ओइ आसाति काम पाकालाइ, कासो दुरे जेङसु।’#ले ६:८
साअ्को न्हे खालको जग
(लुका ६:४७-४९)
24“इदोइखातिर काङको कथनगेलाइ हिङका रो मानिका द्याङहेङ चाहिँ ताइको साअ् रेम्का थामेता बान्हाइका एमि आकिल हिका द्याङदोफा दाज्याङका। 25कालाउ वाइ लोहि, बाने लोहि, दुमभेर्मा लोहि रो इङको साअ्ता फेअ्न्हाहि। कालाउ बुङ इङको साअ् माउन्धिहि, हाइपानु इङको रेम्का थामेता बान्हाइका हिघाहि। 26कालाउ बुङ जाइ काङको कथन हिङतेङ बुङ मामानिका द्याङहेङ चाहिँ ताइको साअ् मारेम्का थामेता बान्हाइका एमि आकिल मान्थुका द्याङदोफा दाज्याङका। 27कालाउ वाइ लोहि, बाने लोहि, दुमभेर्मा लोहि रो इङको साअ्ता फेअ्न्हाहि रो वाको साअ् गारामगुरुम्पा उन्धिहि।”
28इसु इदोइ काथा दोअ्लि दोकान्हुअ्सो इन्ता जोम्कालाइ वाको बिद्या हिङतेङ भारभुसाइहि।#मर्कुस १:२२; लुका ४:३२ 29हाइपानु वा एम्बालाइको धरममास्टरगेलाइ भाइपा माको, कालाउ बुङ खाबारा हिका द्याङ भाइपा पातेङ धिरपाघाहि।
Currently Selected:
मत्ति 7: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
