Kejadian 21
21
Sarah arye, Isak deibuk yupu
1Ura, Allah el si Yahweh arye Sarah biti, bico tenyamukce, “Na mikip deice arye melipkineba, sal mi deipnalame,” nyalilamuk touk, Sarah ati teleb kipdeibukba, mi bobuk. 2Mi bomuka ani, Allah arye, “Atalak, awala arye sal mi deipnamle,” nyamuk talak uk, Sarah arye sal mi deibuk. Abraham ara, pia wisi akunum danamuk talak bukni, sal mi deibuk.
3Sarah arye, sal mi deibukura, Abraham arye, “Ami el si ara Isak,” nyabuka sisibuk. 4Si sipmoka ani, Isak bira, like pin sum akunum mabukura, Abraham birye, el sal mi den bol mouse ning sekuk. Ara, Allah arye, “Winipnalyame,” nyamuk touk winibuk. 5Sarah arye, sik sal mi Isak deibuk talak ara, Abraham ara keting tamun yupa weik, 100 tahun akunum wisi dayuke.
6Sarah arye nyabuk. “Allah melipnuka deice arye, na kanye teleb deipnile. Aning atonun, yata ninye do nirya, na sal mi deipman ara, yuk nang arye laka nyabikiba, kekebicopura, sik babye, teleb kanye delinamake,” nyabuk. 7Nyabukce, ayupu ton nyabuk. “Tonda, yatanye birye kanye kil-kil uptuba, na akanye Abraham biti, ‘An kil Sarah arye winiryuk mi moum arenamle,’ nyaptu do? Kume, aning tenebuka kum nyapniting bukni, Abraham pia wisi deipmal talak arye, el sal mi akunum deipmale,” nyabuk.
Hagar ap, el mi Ismael ap ati, “Birurume,” nyaprikba, birik yupu
8Ura, Isak akunum deiprikba, nepnin balamuka ani, el moum dakibuk talak ara, Abraham arye, weik kwalina kwalipdeibuk. 9Kwalina kwalibuka lukuka deipmekce, din dinmek talak ara, Mesir mutuku kil Hagar ap, Abraham ap arye deiamdik mi Ismael arye, Isak ati nalinmokce, akutunmokba, Sarah arye eibuk.
10Eibukce, malye kanye bobuka, Abraham biti nyabuk. “Akil Hagar ap, el mi Ismael ap ati, na lik upnila ati, ance ‘Birurume,’ nyapminba, sun batakuka yukak bindopnamrake. Deiyok ara, an dipminyopura, narye deipse mi Isak arye, an taleamlum ning nirya dobuka talinamle bukni, ami Ismael arye, mitik ning babye, kum talipnamle. Aning ara, na lik atia,” nyabuk. 11Nyabukura, Abraham kekebukce, ‘Se, ara narye deipse mi ati, malye nyapmale’ tenen, lik kanye bobuk.
12Lik kanye bobuk bukni, Allah arye, Abraham biti nyabuk. “Abrahamo, an pil melin kil Hagar ap, anggunce deiprum mi Ismael ati, lik kanye bona kume. Sarah arye nyapmakil yupu ara, kekepnulyame. Ara, an mi Isak arye deipliba, dadeipdanin balamica ani, unamak ninye ara, “Aninye sik apu koproba Abraham” nyanamake. Ismael arye deipnamle nang ati, aning kum nyanamaka ati nyapkine. 13Bukni, narye melipniba, Ismael birye deipliba, dadeipdanin balamica ani, ninye yala-yala weik ton unamake. Winipnamne deiyok ara, Ismael babye, ance deipluma atia,” Allah arye Abraham biti, nyabuk.
14Nyabukba, mapmeka berekukopura, Abraham arye din ning ap, mek ap, kwebuka kintinibukce, Hagar dam binuka arebuk. Arebukura, bikukce, Hagar ap, el mi Ismael ap, bisik panabuka banmarik. Bisik banmarika ani, Bersyeba mutuku noutamak bukni, ninye una kumak, talye banmarik. 15Banauk unmareka ani, Abraham arye, sik mek makau pum bisik kwebuka arepmok mek diprikce, kum dayuk. Mek kum dayukura, Hagar arye Ismael dobuka, talye palamle ning, mitikto yo bok deice deibuk.
16Deibukura, mitik anun otam binuka bukukce, ‘Se, na mi dipnamala ara, kum eipnamne’ tenen, imun kanye bobuka engenmok. 17Elce engenmok touk, el mi babye engenmokba, Allah kekebukce, nyapdeibukba, Allah el im deice pil melinanye, malaikat tonok arye, Hagar biti im deice arye yukubukce ayupu nyabuk.
“Ka kilo, yata deiyok ati engenmalam do? An ilil una meme. An mi ormapmalce engenmala ara, Allah arye akunum kekepmale. 18Ance an mi ati dobuka tikeipmince, el taruk talibuka bobinulyame. Ara, Allah arye ami ati melipliba, elce deipliba, dadeipdanin balamica ani, aminyan talak unamak ninye ara, yala-yala weik ubikirye, mikip ninye unamake,” nyabuk.
19Nyabukura, Allah arye Hagar biti, ‘Amek pu eiplirye biknamle’ tenen, asing lapdeibukba, mek pu eibuk. Eibukaura, sik mek makau dobuka, orbinuka mek kwebukopura, el mi ak arenmok. 20Aminyan talak nirya, Ismael nepnin balamuk noutamak nirya ara, Allah arye weik melilamuke. Ninye kumakuk ulamukce, yin talina kel weiknye kibukce, ulamuk.
21Aminyan yuk talak ara, el lin ap, el ap, ninye mitik anun ulamik. Mutuku si Paran mutuku, ulamdik talak ara, el lin birye, yuk nang ap yupu sisikukce, Mesir mutuku kil arebikba, Ismael birye dobuk.
Abraham ap, weik deiyoknye Abimelek ap, “Nun malye winilana kumce, telebuk ulanamabe,” nyabuka, nyalin yupu nyapdarik yupu
22Ura, atalak noutamuk, ninye deiyoknye, el si ara Abimelek ap, el yin talin nang sik deiyoknye, el si ara Pikol ap arye, Abraham biti nyapdik. “An winilyam ning ara, kel bikamnume. Yata winin ning do nirya, an winiminye ning nirya ara, Allah arye melikulule,” nyapdik. 23Nyapdikura, Abimelek birye nyabuk. “Winira, ance nyalin yupu nyapdeipnilyame. Allah arye dinmasilba, ‘Na Abraham birye, an ap, ance deiplum mapu ap, sikce dadeipdanin binamak ninye nirya ap ati, teleb ubuka diksukumuk wininamne. Tilila yupu nyana ap, malye winina ap nirya, pia kum wininamsine,’ nyabuka, nyalin yupu nyapdeipnulume. Tonda, narye an Abraham biti, teleb ubuka meliamkise touk, ance nati, tonda anda ninye asik nang atonun unamlam mutuku noutam unamak ninye ap ati, teleb ubuka melinalyame. Ance, ‘Dipkoprop anyapmalam touk wininamne,’ nyabuka, nyalin yupu nyapdeipnilyame.” Abimelek birye, Abraham biti nyabuk.
24-25Nyabukura, Abraham birye tamubuka nyabuk. “Dipkoprop aning nyapmanilam touk wininamsine,” nyapdeibuk. Nyabukce, ayupu ton dukdongopbuka nyabuk. “Se, Abimeleko, an pil melin nang arye, na mek lukna ara, mikip arye ubula dopropnike. Aning arando?” nyabuka laka nyabuk. 26Laka nyabuk bukni, Abimelek birye tamubuka nyabuk. “Se, aning ara, winiryuk nyapmanilama ati, atalak aryuk kel bikne. An mek lukna ara, ubula dopropkik nang, sik si ara min kum kekepse anya arye, na walwale,” Abimelek birye, Abraham biti nyabuk.
27Ayupu sisikmarika ani, Abraham birye el domba basam ap, sapi basam ap, tonok-tonok dobuka boyayikce, Abimelek biti arebukba, sik nyanmarik yupu ati, ‘Nong dipkoprob upnamle, nun nyapmanam touk wininaname’ tenen, tonok kanye tenepdik. 28Tonda, Abraham birye boyayuk domba basam noutam bokuka, kil domba tekbarye wibuka, mitik anun yukak deibuk.
29Winibukopura, Abimelek birye, “Kao, kil domba mitik ning, tekbarye wibuka yukak deipmanilama ara, yata deiyok ati winipmanilam do?” nyabuka asipdeyuk. 30Asipdeyukura, Abraham birye, “Kume, ‘Abraham bira, amek kwepnamane, tenebukce, amek lukna ara, el taruk aryuk palibuk’ tenen, ‘Diba tenepnamnilam’ tenen, tekbarye domba basam kil arepmakine,” nyabuk.
31Ura, abitinye nang arye, amutuku noutamak yupu talipdarik ati, amutuku si ara, Bersyeba mutuku nyalamika ani, tuba wini babye nyanyake. 32Sik nyalin yupu akunum nyapdarikce, sirya dakrikopura, Abimelek ap, el yin talin nang, sik deiyoknye Pikol ap, Pilistin ninye ulamik tam, sik mutuku koproba tamubuka birik.
33Abraham bira, asukum Bersyeba mutuku dam, yo si tamaris yo koubukce, ‘Na ni koproba Allah, el si Yahweh, Pia Kam Ulul Allah tonok’ tenen, Yahweh el si erebuka morolamuk. 34Abraham bira, asukumuk sik Pilistin ninye ulamik mutuku noutam ara, keting tamun weik ulamuk.
Currently Selected:
Kejadian 21: EIPA
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
