Lukas 16

Tonoknye birye, ‘Na pil kum dopnilyopura, aminyan talak yata wiripnamne do?’ tenebukce, winibuk ning ati, nyabuk yupu

1Yesus arye, el yupu kekebuka neika balamik nang ati winipmanto yupu nyabuk. Tonok sum ara, bona weik talinanye, el yo bok moubuka delina deiyoknye, pil malye-malye ubuka dolamuk deice arye, yo bok weik tunim alamuk. Tunim alamukura, yuk nang arye, ‘Abona talinanye ati duknubuka,’ tenepce, nyalyayik. “An yo bok moubuka delina deiyoknye birye, pil malye dolya deice arye, an yo bok weika arye kum ulule,” nyalyayik.

2Nyabikopura, bona weik talinanye birye, el yo bok delina deiyoknye yukubuk ati, yayukopura, ayupu nyabuk. “Yuk nang arye, ‘El pil malye ubuka dolya deice arye, an yo bok kum ulule,’ nyakinyak ara, yata wiriplum deice arye na yo bok kum danalul do? Anda na yo bok moubuka delina deiyoknye tuba kum unamlama ati, na yo bok deice pil dolamlum ning nirya ara, ‘Winibuka, winibuka pil dolamse,’ nyabuka, laka nyapnunilyame,” nyabuk.

3Nyabukopura, ayo bok moubuka delina deiyoknye birye, utenebuk. ‘Se, na deiyoknye birye, na donye pil ara, el bidamnye birye doproplirye, na bataknamnila ati, yata wirinamne do? Nara, mikip kumnye ati ara, tuku palibuka wilamak wa ara, pil kum doptinye.’ Tonda, ‘Na alye upnilyak’ tenen, yuk nang ati, “Talya arepnululume,” nyabuka, ‘Kum moronamne,’ tenenmok. 4Winibuka tenenmoka ani, ‘E, aning ara, winipnune,’ tenebukopura, nyabuk. “Na deiyoknye arye, na donye pil dopropnilyopura, yuk nang arye nati melibuka yukupnamniak ati, winipnun ning ara, akunum tenepne,” nyabuk.

5Utenebukce nyabuka ati, el li kopropa ning tia domik nang ati, yukubukura, tonok-tonok yanganmek. Yanganmekopura, anang ati atonun yupu nyabuk. Minopce yayuknye biti, asipdeyuk. “Na ni birye arepkukura, tia dopromlum ning ara, yata barye do?” nyabuka asipdeyuk. Asipdeyukura, anye birye tamubuka nyabuk.

6“An deiyoknye birye, pia weik mekwen makau si, tampayan ara, 100 liter minyak zaitun kwebuka arepnukura, tia dopromse,” nyabuk. Nyabukura, ayo bok moubuka delina deiyoknye birye nyabuk. “Ati, ‘Winibuka dopropse,’ nyabuka, nukuka si sekuka areamlumura, na ni birye deiamuk kertas ara, dopropmince, minopce 100 weik mau, liter sekuk ning kilibuka, lima puluh (50) literuk sekuka deiplyame. Ara, diba doproplum atonun kum bukni, noutam aupmalye ninguk sekuka deiplyame,” nyabuk.

7Aning nyabuk touk, bitinanye yayukura, ayupu nyabuk. “Na ni birye arepkukura, tia dopromlum ning ara, yata barye do?” nyabuka asipdeyuk. Asipdeyukura, anye birye tamubuka nyabuk. “An deiyoknye birye, roti dana deiyok ning el si ara, gandum yamubuka lipdongobukce, weik karung, yupa weike, tiga ratus, sembilan puluh liter (390) gandum anyak arepnukura, dopromse,” nyabuk. Nyabukura, ayo bok moubuka delina deiyoknye birye nyabuk. “Ati, ‘Winibuka, winibuka dopropse,’ nyabuka, nukuka, si sekuka areamlum ati, na ni birye deiamuk kertas ara, dopropmince, minopce 390 liter kilibuka, 80 literuk sekuka deiplyame,” nyabuk.

8Nyabuk ati, aning ara, ayo bok moubuka delinanye, el weik deiyoknye birye nyabuk. “Sik ti a domik ning ati, kilibuka yuk sekuk ning ara, malye bukni, anye birye ‘Aminyan talak, na pil kum dopnilyopura, yata winipnamne do? Narye sik tia domrik nang ati, melipnyopura, aminyan talak ara, tia domrik nang arye nati, yukupnamniyake,’ tenebuk ning ara, teleb uka. Weik deiyoknye birye nyabuk.” Yesus arye winipmanto yupu deice arye, nyabuk.#16:8 winipmanto yupu – Yesus arye winipmanto yupu nyabuk ning deiyok ara, ani. Ara, ‘Tilila yupu nyana ara telebuka, tenepnamak’ tenen, kum bukni, ‘Aminyan talak yata wiripnamsil do?’ tenebikirye, sik weik ninye deiyoknye Allah tenelye ninguk tenebuka, diksukumuk ubicopura, ‘Aminyan talak Allah arye anggunti, kanye deipnamsile tenen, kel bikinamke,’ tenebukce nyabuk.

Yesus arye winipmanto yupu nyabukopura, ayupu dukdongobuka nyabuk. “Na dipkoprop nyapsine. Allah dirina deice arye unyak nang ara, sik pil ati yupu talibikirye, wibuka delinyaka ara, atalak un ninguk tenenyake. Sikda aminyan talak upnamle ning ati, kum tenenyake. Ati, diba tenebuka dirina noutam unyak nang ara, mitikto kel arye wininyake, nyapne.

Bukni, sik dib tenena kum ninye arye, ‘Aminyan talak bona utotoa talin ninye unamap’ tenen, sik kayapu nang ak, ‘Yata wiriptibya arye, nun kayapu nang melipsikca deice arye, bona utotowa talin ninye unamap do?’ tenenyake. Tonda, sik pil ati, yupu talibikirye, wibuka deilinyaka ara, weik kel arye wininyake. Ara sikce, ‘Amenyan talak yata wiripnamsil do? Ikin unamap do, telebuk unamap do?’ tenen, moubuka tenenyaka ati, nyapsine,” Yesus arye nyabuk.

9“Ati, yata ning do nirya, Allah arye arisilye ning nirya, yo bok ap, talye tukwak ning nirya ap, yuk nang ati bico tenebuka, melibuka talye arildamunya deice arye, anggun kayapu nang koprop kilinamlulume. Awinilamunyeura, aminyan talak talye tukwak ning nirya kum uplyopura, anggunce yuk ninye ati melildamunya ning ati, ara Allah arye anggun im deice binalum talak ara, teleb nyabuka yukupnamsile.” Yesus arye nyabuk.

10Yesus arye ayupu nyabukopura, ayupu tonap dukdongobuka nyabuk. “Yata nang do nirya, sik deiyok nang arye, ‘Winibuka, winibuka pil dopnamlume,’ nyabuka mitikto ning dobuka aribiceura, aning dobuka pil bita teleb ubuka donyak nang ara, sik deiyok nang arye weik mambul ning weika arye areptingopura, aning dobuka pia telebuk pil donamake. Bukni, yata nang do nirya, sik deiyok nang arye mitik ninguk aribiceura, aning dobuka duknubikirye, tilila yupu nyabikirye ubula dopdopbiceura, anang ara sik deiyok nang arye weik mambul ning ababye, weika arye areptingopura dungnubikirye tilila yupu nyaltakanauk unamake. Ara sik kanye malye nang arya.

11Aning ati ara, anggun babye, atonun, tukwak dekna ninguk arepsikceura, bita teleb ubuka kum pil dopmunce ubula dopmunyopura, aminyan ara yatanye birye dipkoprop weik mambul ning im deice ning arepnamsil do? Ara kum winipmanto. Anggunda kanye malye nang ati ara im deice arye weik mambul ning ara Allah arye kum arepnamsile. 12Tonda, aning atonun anggunce yuk nang bona moubuka kum talipmunce diksukumuk kum umunyeura, yatanye birye, anggun ning kopropa arepnamsil do? Ara kum winipmanto. Anggun malye winimunye nang anya arye, kum arenamsile” Yesus arye nyabuk.

13Nyabukce ayupu ton nyabuk. “Tonok pil donanye birye, el deiyok nang bitinye nang utiringopura, tonoknye birye abitinye nang pil kum doptue. El deiyok nang bitinye nang ati, kanye deibuka, tonye pil dobuka, tonye pil dobuka, kum winiptue. Ato pil don nang ara, ton deiyoknye biti, kanye deibuka, ton deiyoknye biti, lik tenebuka unamake. Tonda, sik deiyok nang bitinye kibikce, ton deiyoknye biti, pia talibuka unamake.

Ton deiyoknye biti, lik uplibuk, bataknamake. El pil deiyok nang bitinye nang utiringopura, tonye biti lik tenebuka bataklirye, tonye biti kanye deiplirye, meliplyopura pil donamle. Tonye bira, bataknamle, tonye bira, pia talinamle. Ayupu nyapmasin touk, Allah ap, yo bok do, talye tukwak ning nirya ap ati, neika talibuka kum pil doptume. Tonok ning ara wibuka talinamlulume,” Yesus arye nyabuk.

14Yesus arye ayupu nyanmok talak ara, sik Farisi nang kekenmek. Kekenmek bukni, sikda, yo bok pia patalamuk arye, yo bok ati pia kanye delilamik nang anya arye, Yesus arye ayupu nyanmokura, ‘Anyapmasil yupu ara, talye nyanmasile,’ tenenmekce, Yesus ati akutunmek akarye, malye yupu nyanmek.

15Wininmekura, Yesus arye aFarisi nang ati ayupu nyabuk. “Anggun Farisi nang ara, ‘Yuk nang arye malye nang tenepsicak’ tenen, anggun malye winimunye ning duknumunce, nong bol deiceuk teleb pil dolulum bukni, anggun kanye talima noutamak tenebuka duknulum ning ara, malye ning weik tuba aupmalye ning ara, Allah arye kel biksulule. Tuku ak ninye arye, ‘Aning ara mambul’ tenen, pataplibuk kanye delinyak ning ara, Allah aning ati, el kanye ara, ‘Aning ara pia malye, tenebuka like,’ tenelule.

Yesus arye, “Na nyasinye yupu nirya ara, tonok ning babye min kum danamle,” nyabuk yupu

16Minop talak arye dipdongobuka, anoutamak talak nirya ara, Allah arye, ‘Aning ara wininamlulume, aning ara kum wininamlulume,’ nyapdeibukura, Musa arye sekamuk mem yupu ap, tonda Allah yupu lak nyalamik nang, nabi-nabi nang arye sekamik yupu ap, peterena deiyok nang arye peterelamik. Atalak nirya ara, ayupu uk peterelamik bukni, Yohanes arye el yupu peterelamuk talak arye, deiyok kouprongobuka wini talak nirya ara, min arye, peterelamik ning akunum sirya dakmake. Wini talak ara, Allah el kai teleb yupu peterenyabe. Ayupu ara, Allah ninye nirya lyeplirye, sik kanye talima talinamsil yupu ati nyapne. Ayupu peterebibye, ninye weike kekebikirye, ‘Nun ton diba tenebibyeura, Allah arye lyepsutue’ tenen, fia, pi dobuka mikip deice arye pirildenyake.

17Im noutamak ulul ning nirya ap, tukwak mutuku ulul ning nirya ap ara, kum danana ara, mitik caknam uka. Bukni, Allah yupu noutam arye, pia mitik yupu waplye ning babye, kum danana ara pia ikine. Ara kum winipmanto atia. Musa sekamuk yupu mem yupu noutam arye, tonok huruf babye, pia mitik sekna ning ababye, kume kum danamle.

18Na dipkoprop nyapsine. Yata nang do nirya, sik kilapu koprop batakikirye, yuk kilapu doprobiceura, ninye arye yuk kilapu ubula dalubuka talya yolamak atouk winiluluma ati, winina ara, pia meme. Tonda, yatanye do nirya, yuk nang arye domica ani, batakice kil dobuka doplyopura, ara yuk nang arye talye ubula yolamak kil atonun ulule.” Yesus arye Farisi nang ati nyabuk.

Yesus arye, Lazarus ap, bona weik talinanye ap ati, nyabuk yupu

19Yesus arye ayupu nyabukopura, ayupu dukdongobuka nyabuk.

Tonok talak ara, bona weik talinanye ulamukce, atalak-atalak nirya ara, dupsice ubuka ulamukce, sik pia weik bona talinanye nang mirin baju ap, pia teleb ongon cang baju ap, ongolamik touk, el babye, aongon baju, el si juba ongolamuk. 20Tonda, tonok pia bona utotoa talina kumnye, el si ara Lazarus, el nong nirya ara, suse pia weik uamuk.

Ati yuk ninye arye, ‘Abona talinanye birye, Lazarus talye arepnamal do?’ tenen, yuk nang arye Lazarus bico tenebikce, el dobuka bona talinanye el asik dam bukni, bura tam poka buplan dam delilyanamikura, bulamuk. 21Anyakuk bulamukce, ‘Se, bona talinanye el din ning deibuka dinmaliba bun saklye ning ara, na bubuka diptinye’ tenen, patalamuk. Tonda, Lazarus el suse dilamukak ara, kam weik yanakarye, mutulamik.

22Atouk ubuka bulamuka ani, sirya talak ara, Lazarus dibukura, Allah el im deice pil don nang malaikat arye, Lazarus dobuka im deice Abraham dam boulilbiyik. Tonda, abona talinanye dibukura, tuku lukik. 23Tuku lukikura, el kanya ara uku din mutuku biyuk karen ara, uku dilamuk ati, pia malye nyalamukce dinmokbuk, Abraham im deice yukak unmokak eibuk. Eibuk talak ara, Lazarus babye, Abraham dam tikmokak eibuk.

24Eibukopura, bona talinanye weik yupu arye Abraham ati nyabuk. “Se, na ni Abrahamo, bico tenepnimince, Lazarus biti nyaptumopura, Lazarus taruk duk arye ikip mek burupdongobuka, na sitang deice deililyanutue. Ara, uku dinmanil ak, uk weik dinmanil arye, donmana ati, moropkine,” nyabuk.

25Nyabukura, Abraham arye abona talinanye ati nyabuk.

Amio, anda teneplyame. An tukwak tuba kam ulamlum talak nirya ara, an patalamkuk ning nirya ara, talilamlum akarye dupsiceto ulamlume. Lazarus ara, ikin weik ulamuk ati, pia imun kanyeuk bobuka ulamuk. Wini talak ara, Lazarus im deice aunmal talak ara, Allah arye el kanye imun un ning kum danibukura, telebuk ulul bukni, anuk ara, uku dinmakil ati, imun kanye bobuka unmalame.

26Aninguk kume, tonda, an unmalamak utam babye, nun unmapak im deice mutuku bukni, danoutam babye, Allah arye weik kot sekukce weik lo ati, anyaka arye utam kum uku din tam kum binmanto, utam arye anyaka im deice kum yanmanto. Aning ati ara im deice nang arye, ‘Se, utam nang melilil bitibye,’ tenenyak nang ara, uku din mutuku kum bitinge. Atouk uku din mutuku unyak nang arye, ‘Se im deice weleptibye,’ tenenyak nang arye kum weleptinge. Ara kum winipmanto. Abraham arye abona talinanye ati nyabuk.

27Nyabukura, bona weik talinanye birye tamubuka nyabuk. “Aning ati ara, na pia weik arye moropkine. Ance nyaptumura, Lazarus arye na ni aik bitu akarye, na du yape ap, na weit yape ap ati, laka nyalbitue. 28Na weit yape ap, na du yape ap ara, pamubarye nang unyaka anya arye, na unye mutuku, uku din mutuku anya arye, uk weik disulule. Na weit, ap na du yapu ara mangkau kanye bobuka talye amutuku yakcak ati, ‘Lazarus arye anang dam yupu laka nyapturye, yupu sekelbitu’ tenen, moropkine,” nyabuk.

29Nyabukura, Abraham arye tamubuka nyabuk. “Kume, Allah arye, ‘Wininamlume, aning ara kum wininamlume,’ nyabukba, Musa arye sekamuk yupu ap, Allah yupu laka nyalamik nang, nabi-nabi nang arye sekamik yupu ap, aupmal ati, ayupu uk kekeptinge,” Abraham arye nyabuk.

30Nyabukura, bona weik talinanye birye tamubuka, “Kume nai Abrahamo, akunum diamtunye, kam bukturye, sik dam laka nyalbituopura, ayupu kekeptingce, sik malye winin ning batakuka dib teneptinge,” nyabuk. 31Abona talinanye birye nyabuk bukni, Abraham arye tamubuka nyabuk. “Kume, Allah arye, ‘Wininamlume, aning ara kum wininamlume,’ nyabukba, Musa arye sekamuk yupu ap, Allah yupu laka nyalamik nang, nabi nang arye sekamik yupu ap, kum kekebikcopura, dipmatunye kam bukturye, sik dam binuka nyaptu babye, dib kum tenepnamting,” nyabuk. Ara Abraham arye abona talinanye ati nyabuk, nyapne. Yesus arye nyabuk.

Currently Selected:

Lukas 16: EIPA

Highlight

Copy