यूहन्ना 5
5
येशूकी पोखरी खादु मिज्यीक ठाक्पा खाबाते
1टिक्पी दिन तिरी यहूदीओनते चाडज्यीक ओतेकी येशूङ थे चाड माने खिताला यरूशलेमने गाल्सुङ। 2यरूशलेमदु लुई गो सिरसादु पोखरीज्यीक ओतान। थे फेरोला रिङ्गै पाटी ङा ओतान। हिब्रू बातला थे पोखरी मिन बेथस्दा सिन ओतान। 3थे पाटीदु नाबाते मि थुप्रो गुला देत्कीन ओतान। थेबाचेन अन्धतेबा, कुज्येतेबा थेमे लाक्पा काम्बा चले मिक्किकान्तेबा ओतान। थेबा गाङेराङ थे पोखरी छ्यु नाम चले खिका सिन गुलाराङ देत्कीन ओतान। 4च्यिला सासीन परमेश्वर दूतज्यीगी बेला बेलाला वाला थे पोखरी छ्यु चले खिन ओतान। थोक खानामेकी जुन नाबाते मि थोङला गाल्ला थे पोखरीदु स्यूइदुक थेला जस्तोराङ मेलेबाज्यीक रोग खोबा ओत्सीनोङ थे दाक ठाइन ओतान। 5थेरू थोक खाला गुला देत्कान्तेबे नाङ लो खालज्यीकताङ च्याप्केत गोमामेकी नाकीन ख्याम्बा मुथुप्च्या गालाते ख्योओ मिज्यीगोङ ओतान। 6थे मि थोक खाईन ङ्याल्गीन देता ओता थोङगीन थेमे थे काल्बेई गोमामेई नाबाते दुका सिन छ्या स्येकीन येशूकी थेला “खोल्ला ठाक्पा सेम लाङगीदुक?” सिन ठिसुङ। 7थोक सिरजीन थे मिकी “खोइ च्यि खित्च्ये हजूर। दि पोखरी छ्यु चले खिते बेलाला ङाला जुम्ला थेमा लुकान्ते मि सुङ मेत। छ्यु चले खिते बेलाला ङा थेमा स्यूक्पा छोल्केला ज्येन मि गाल्ला दाक स्यूइदुक,” सिन सासुङ। 8थेमे येशूकी थेला “खो खोक ल्वा। थेमे खोरोङ खोन्च्या दिङच्या खुरला दुरूकी लाला ख्योम,” सिन सिदुक। 9थोक सिरासात्तुराङ थे मि दाक ख्याम्बा थुप्च्या गाल्सुङ। थेमे थे खोन्च्या दिङच्या खुरगीन थेरूई दाक ख्याम्सुङ।
येशूकी थे मिला ख्याम्बा थुप्च्या जोबाते सन्चारी छोमु ओतान। 10थे मिला थोङगीन यहूदीओनते छ्ये छ्ये मिकी “ए थरिङ सन्चारी ईन सिन खोल्ला छ्या मेत? परमेश्वर नियमला सन्चारी छोमु छ्याःङ काम खिता मेङगो सिन साबा ओतेकी खुई दोक खाला दिङच्या खोन्च्या खुरला ख्याम्बा मेङगो,” सिन सिदुक। 11थोक सिरजीन थेकी “ङाला ठाक्पा खित्कान्ते मिकीराङ दिबा खुरला ख्योम सिन सिदुक,” सिन सिदुक। 12थेमे थेबेकी “खोल्ला दिबा खुरला ख्योम सिरकान्ते थे मि सु ईन्दे?” सिन ठिसुङ। 13थे बेलासाकला येशू मि हूलगी नाङ स्यूकीन सिन्दा ओतेकी थे ख्याम्बा थुप्च्या गालाते मिकी थे मि दिराङ ईन सिन छ्याःङ सिरा माथुप्सुङ। 14टिक्पी तिरी येशूकी थेला याङराङ परमेश्वर मन्दिरदु ठेत्कीन “थोङसुङ खो चुक लेमु खाईन ठाक्सुङा? थाचेन लोक्ला थोङला च्योक मेलेबा काम माकेत। याङराङ थोक खासीन खोल्ला झन मेलेबा ओङगो,” सिन सिदुक। 15थेरूई थेकी गाल्गीन थे खोरोङला ठाक्पा खित्कान्ते येशू दुका सिन यहूदीओनते छ्ये छ्ये मिला लाःप्सुङ।
16थोक खाईन सन्चारी छोमु काम खाबेकी थे छोमुमेईराङ यहूदीओनते छ्ये छ्ये मिकी येशूला खेदापानी खिताला स्यूसुङ। 17थोक खिताला स्यूनामेई येशूकी थेबाला “ङे आबाचेन थरिङोलाङ मिओनला लेमु ओङच्येते काम खिनराङ ओत। थेमे ङाङ दोकराङ खिओ,” सिन सिदुक। 18थेकी थोक सानामेईनी थेबेकी झन थेला सेताराङ चाल्सुङ। च्यिला सासीन थेकी परमेश्वर नियमला सन्चारी छोमु काम खिता मेङगो साबाते बात माङेन्दातेकामा मेन्देकी परमेश्वरला थे खोरोङ आबा ईन साकीन थे खोरोङोङ परमेश्वर छेतराङ ईन सिन साबा ओतान।
परमेश्वर फुज्युङ अधिकार बात
19थेबेकी थोक खिता चाल्नामेकी येशूकी थेबाला “ख्योकोन दि बात ङेन। च्यि सासीन आबेकी चुक खिका सिन माथोङथुप थे फुज्युङगी थे खोरोङगीकामा छ्याःङ मिक्किओ। आबेकी जे खिदुक थे फुज्युङगीङ थेराङ खिओ। 20आबेकी थे खोरोङ फुज्युङला ङिङज्ये खिओ। थेमे थे खोरोङगी खिन ओताते गाङे काम फुज्युङतेला तेन्ग्यो। दोस्यिककामा मेन, थेकी खाबाते काम थोङला ख्योकोन छक्क परे खित्स्यीत सिन आबेकी थेला झन दि भन्दाङ छ्ये छ्येतेन्दे काम तेन्ग्यो। 21च्यिला सासीन जस्तो खाला आबेकी स्याप्ते मिओनला सोम्बो लोक्ला नोमुङ मिसिन्च्येते जुनी तेरगीदुक, थोकराङ खाला थे फुज्युङगीङ थे खोरोङगी नोमुङ मिसिन्च्येते जुनी तेरा चालाते मिओनला थे जुनी तेरग्यो। 22दोस्यिककामा मेन, मिओनला न्याय खित्च्येते कामोङ आबेकी थे खोरोङगी मिक्किओ। दि काम थेकी थे खोरोङ फुज्युङ लाःक्तुराङ बिन्दा ओत। 23आबेकी थोक खाबातेचेन मिओनगी जस्तो खाला थे खोरोङला मान खिदुक, थोकराङ खाला थे फुज्युङलाङ मान खित्स्यीत सिनराङ ईन। थोक ईन्देकी थे फुज्युङला मान मिक्किकान्ते मिकीचेन थेला दुरू तोङकान्तेलाङ मान माक्याबाते ईन। 24ङा ख्योकोनला दि बात सिओ। च्यि सासीन सुइँदेकी ङे साबाते बात ङेन्ला ङाला तोङकान्तेला विश्वास खिदुक सासीन थेकी नोमुङ मिसिन्च्येते जुनी ङेत्कीन सिन्दा ओत। थोक्ते मिला दोषी ईन सिन सजाय मेतेरो। थोक्ते मि स्यिला सजाय ङेत्सादुकी थारगीन नोमुङ मिसिन्च्येते जुनी ङेत्कीन सिन्दा ओङगो।
25दि बात ङेन। च्यि सासीन था समयज्यीक ओङगो। सिइ सासीन थे समयचेन थरिङोलाराङ ईन। परमेश्वर छ्य्वापेई ठाल्गीन थे लाईदु स्याप छेतराङ गालाते मिओनगी था परमेश्वर फुज्युङ ङोरो थोक्यो। थे ङोरो थोला थेकी साबाते ङेन्कान्ते मिओनगीचेन नोमुङ मिसिन्च्येते जुनी ङेत्क्यो। 26मिओनला जुनी तेरकान्तेचेन आबा ईन। थे खोरोङगी च्योकराङ खाला मिओनला जुनी तेरच्येते अधिकार थेकी थे खोरोङ फुज्युङलाङ बिन्दा ओत। 27थेमे परमेश्वर फुज्युङराङ परमेश्वर ओत्सादुई वाबाते मि ईन्देकी मि गाङे न्याय खित्च्येते अधिकारोङ परमेश्वरगी थेलाराङ बिन्दा ओत। 28दि बात थोला ख्योकोन छक्क परे माकेत। च्यि सासीन था समयज्यीक ओङगीन ओत। थेजीन स्यिइन सिन्दाते मि गाङेकी परमेश्वर फुज्युङ ङोरो थोक्यो। 29थेमे थुर्सादुकी थेन्ला ओङगो। थोक खाला सोम्बो लोक्कान्तेबे नाङ लेमु काम खाबा ओताते मिओनगी नोमुङ मिसिन्च्येते जुनी ङेत्क्यो। थेमे मेलेबा काम खाबा ओतातेबेकीचेन दोषी ईन सिन सजाय ङेत्क्यो। 30ङा ङाराङगीकामा छ्याःङ खिता मुथुबो। मिओन न्याय खित्जीन ङा आबेकी ङाराङला खि साबा साबाच्योक खालाकामा खिओ। ङा लेमु खाला न्याय खिओ। च्यिला सासीन ङाराङला खिता सेम लाबाच्योक खाला मेन्देकी ङाराङला दुरू तोङकान्तेला खुशी ज्वाप्ला ङा दोक खाला काम खिओ।
येशू विषयला साबाते बात
31ङा ङाराङगीराङ ङा सु ईन्दे, चुक्ते ईन्दे सिन साला छ्याःङ काम लै मिक्किओ। 32ङा सु ईन्दे, चुक्ते ईन्दे सिन सिरकान्ते ज्येनज्यीक ओत। थेकी साँचोते बातकामा खिओ सिनोङ ङाला लेमु खाला छ्या ओत। 33ङा सु ईन्दे सिन ठाप्ला ख्योकोनगी बप्तिस्मा तेरकान्ते यूहन्ना ओत्सादु मिओन ताङा ओतान। थेमे थेकीङ सिरा फाप्च्येते बात जति गाङे लेमु खाईन साबा ओतान। 34ङे ङा सु ईन्दे, चुक्ते ईन्दे सिन सिरकान्ते सुइँदा मि ओङाराङ फाप्क्यो सिन साबाते मेन। बरू ख्योकोनगी पापकी सजाय मेङेत्स्यीत सिन दि बाततेबा साबाते ईन। 35यूहन्नाचेन आउदी लेमु खाईन बाराते बत्ती नाम्दाक च्योक ओतान। थेमे टिक्पी दिनकामा ख्योकोनला थेकी लापाते बातओन लेमु लासुङ। 36थेकी ङा सु ईन्दे, चुक्ते ईन्दे सिन ख्योकोनला साबा ओतान। ङा सु ईन्दे सिन थेकी साबाते भन्दाङ था ज्येन छ्येज्यीक बात ङात्ताङ ओत। थेचेन आबेकी ङाला खि साबाते थरिङोला ङे खिन ओताते कामओनराङ ईन। दि कामतेबा तालाङ ङाला आबेकीराङ ताङाते ईन सिन लेमु खाला छ्या स्येबा थुप्क्यो। 37दोस्यिककामा मेन, ङाला दुरू तोङकान्ते आबेकीङ ङा सु ईन्दे सिन लेमु खाईन साबा ओत। ख्योकोनगी नोमुङ थे ङोरो थोबा मेत, थे दोकस्यिकराङ ओताक्वा सिन थोङाङ मेत। 38थेकी साबाते बादोङ ख्योकोनगी खेराङ सेमला मोज्योदुक। च्यिला सासीन थेकी दुरू ताङाते मिला ख्योकोनगी विश्वासराङ मिक्किदुक। 39परमेश्वर बातला साबाच्योक खासीन नोमुङ मिसिन्च्येते जुनी ङेत्क्यो सिन ख्योकोन थे बाततेबा आउदी लेमु खाला पढे खिदुक। थे बातला ङा सु ईन्दे सिन लेमु खाईन टिबा ओत। 40थोक ईन्सीनोङ ख्योकोन ङे छ्य्वापा लै खित्च्येते सेम मिक्किदुक। ङे छ्य्वापा लै खाबा ईन्सीन ख्योकोनगी नोमुङ मिसिन्च्येते जुनी ङेत्च्या ओतान।
41ङे दि बातओन खाबाते मिओनगी ङाला मान खिताराङ फाप्क्यो सिन सिराला मेन। 42ख्योकोन चुक्ते मि ईन्दे सिन ङाला लेमु खाला छ्या ओत। ख्योकोन परमेश्वरला ङिङज्ये खित्कान्ते मि मेन। 43आबेकी ताङेकी ङा दुरू वाबाते ईन। ईन्सीनोङ ख्योकोन ङाला छ्याःङ वास्ता मिक्किदुक। सुइँदा खोपरोङ खुशीकी ङा ङाराङ ईन सिन वासीनचेन ख्योकोन थेला आउदी खाला मान खिदुक। 44ख्योकोन ज्येनगी खेराङला लेमु मि ईन साकीन मान खासीन गा खिदुक। परमेश्वर खेराङताङ खुशी ओङला थेकी तेरच्येते मान ङेत्स्यीत सिरच्येतेनी ख्योकोन छ्याःङ विचारराङ मिक्किदुक। दोक ईन्देकी ख्योकोनगी ङाला परमेश्वरगी ताङाते ईन सिन चुक खाला विश्वास खिता थुप्कीतेरो? 45आबे दोन्दु ङे ख्योकोन दोषी ईन सिन सितासीन सिन विचार माकेत। ङ्योकोनलानी मोशेकी परमेश्वर नियम लेमु खाला ङेन्कान ईन सिओ सिन आश खाईन देता ओत्सीनोङ आबे दोन्दुनी ङे मेन, होथे मोशेकीका ख्योकोन दोषी ईन सिन सिओ। 46मोशेकी बिन्दाते नियम ङेन्कान ईन्दा ईन्सीन ख्योकोनगी ङे बादोङ ङेन्च्या ओतान। च्यिला सासीन थेकी ङे विषयला लेमु खाईन टिबा ओतान। 47थेकी टिबाते बातराङ मेङेन्दुक सासीन ख्योकोनगी ङे बात चुक खाला ङेन्गीतेरो?” सिन सिदुक।
Currently Selected:
यूहन्ना 5: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
