लूका 15
15
तोराते लुगी कथा
(मत्ती १८:१२-१४)
1कर लिन्कान्तेबा थेमे ज्येनगी पापी साबाते मि गाङेराङ येशूकी लोप्च्येते परमेश्वर बात ङेन्दाला झन झन थे ओत्सादु डुइन ओतान। 2थोक ओङा थोङगीन फरिसी पाटी मिओनताङ धर्मे गुरूओनगी “तोना, दि चुकस्यिक ईन्दाका। पापीओनताङका ङ्योम्बुराङ देत्ला बात खिदुक। थेमे थेबाताङराङ साङ खाला साप सेइदुक,” सिनकामा येशूला मोताला स्यूसुङ। 3थेबेकी मोता थोङगीन थेकी दोक सिन थेबाताङ बात खिताला स्यूसुङ। 4थेकी चुक सिका सासीन “लो दोक सिइना। च्यि सासीन ख्योकोन नाङ सुइँदेते लुक सयज्यीक ओत। सयज्यीक नाङ दोक्पोई तोरसीन ख्योकोन थे लुक छोल्गीताना मोछोल्ते? ज्येन लुकबरी दिङमादुराङ चरनला ज्याक्ला ख्योकोन थे तोराते लुक छोलाला दाक ख्याम्ग्यो। थेमे माङेतथुप छोल्गीनराङ देत्क्यो, मेन? 5थेमे ङेत्नामेकी आउदी गा खिन ख्योकोनगी थे लुकला पुङबे लाक्तु जेत्ला खाम्बापा खुलाङगो। 6थेमे खेराङ र्वाओनला, युल्बाओनला काताङला ‘ङ्योकोनते आनाङका तोराते लुक ङेत्सुङ। था ङुरूङ गाङेराङ गा खिइ,’ सिन सिओ। 7थोगी ङा ख्योकोनला च्यि सिते सासीन थे तोराते लुक ङेत्नामेकी ख्योकोन गा खाबा च्योकराङ पापीज्यीगीकामा थे खोरोङ पापी दुका सिन छ्या स्येकीन परमेश्वर छ्य्वापा लै खासीन स्वर्गने परमेश्वरताङ थे दूतओनोङ गा खिओ। परमेश्वरलानी धर्मतीते मि आउदी काल्बेई भन्दाङ थे खोरोङ छ्य्वापा लै खित्कान्ते पापीज्यीकका काल्बेई ईन्दाच्योक लाङगो।
तोराते चाँदी डबल कथा
8थेमे सुइँदा फेम्मे मिते चाँदी डबल च्युताम्बे नाङ दोक्पोई तोरसीन थेकी च्यि खिते सिन ख्योकोनला छ्या ओत मेन? बत्ती पारला खाम्बे नाङ गाङेपा जेक च्याला माङेतथुप थेकी थे छोल्गीनराङ देत्क्यो। 9ङेत्नामेकी गा खिन थेकी थे मोरोङ र्वाओनताङ युल्बाओनला काताङला ‘ङेते तोराते चाँदी डबल ङेत्सुङ। था ङुरूङ गाङेराङ गा खिइ,’ सिन सिओ। 10ङा ख्योकोनला च्यि सिते सासीन तोराते डबल ङेत्नामेई थे फेम्मे मि गा खाबा च्योकराङ खाला सुइँदा पापीज्यीककामा थे खोरोङ पापी दुका सिन छ्या स्येकीन परमेश्वर छ्य्वापा लै खासीन परमेश्वर दूतओनोङ आउदी खाला गा खिओ,” सिन सिदुक।
तोराते ख्योओ फिजे कथा
11दि बात बातलाराङ येशूकी थेबाला दि कथाङ लाःपाला स्यूसुङ। थेकी च्यि सिका सासीन “बाजिई ठाउँज्यीक्तु मिज्यीक ओताक्वालो। थेते फुज्युङ ङि ओताक्वालो। 12खाम्बादु देता सेम माक्याकीन ङीमाई कान्छातेकी ‘आबा, ङे अंशे बो था ङाला टाल्ला नाङ,’ सिन सादुक्लो। थेमे आबातेकीङ फुज्युङतेबा ङिकारते अंश गोकीन बिन्दुक्लो। 13टिक्पी दिन तिरी कान्छातेकी च्यि खाकालो सासीन थे खोरोङ अंशबरी गाङे च्वाकीन आउदी थारी लुङबाज्यीक्तु गाल्दुक्लो। थेमे ओताते पैसाबरी मनपरी खाईन पुरदुक्लो। 14थेरूई च्यि ओङकालो सासीन थे लुङबा खाङ आउदी मेलेबाज्यीक अनिकाल लादुक्लो। थेमे थे लाःक्तु पैसे कौरीज्यीगोङ मेतेकी थे तुक्पाराङ देता फाप्तुक्लो। 15थेमे थे खइँदा काम ङेत्कीता सिन थेरू मिज्यीक खाम्बादु गाल्दुक्लो। थेमे थे मिकी थेला फाक्पा छोच्येते काम बिन्दुक्लो। 16सुङगीङ थेला छ्याःङ सा माबिन्दुक्लो। त्वाबेकी ग्युमाकराङ छ्येदोङ सिराच्योक गाल्गीन थेला बरू फाक्पे दानाराङ गाम्बा ङेत्सीनोङ ओङच्या ओतान सिराच्योक लादुक्लो। ईन्सीनोङ थेकीनी थे फाक्पे दानाङ द्वा माङेत्तुक्लो। 17थोक ओङगीन ठ्वा थेन्नामेई बल्ल बुद्धि स्यारगीन आबेकी लै खाबाते खेतालाओनला सुबा दुला दुला सा तेरग्यो। तर ङेनी दुरू नाक्तुकोङ दाक्पा माङेतेई स्याप खाईन सिन्सुङ सिन आबातेला सम्झे खादुक्लो। 18था ङा दुरूकी ख्याम्बा फाप्सुङ। थेमे गाल्ला आबाला ‘आबा, ङे खोत्ताङ ठाल्गीन गाल्गीन खुई इज्जत क्युराप। थोक खाईन पाप खाईन ङे परमेश्वर विरोधोङ खाबाप। 19था ङा खुई फुज्युङ च्योक ओङला खाम्बादु देता मेङेदो सिन ङाला छ्या ओत। ईन्सीनोङ ङाला खुई खेतालासम्म ओङला काम खिता नाङ,’ सिन सिरामीन सिन 20थे आबाते खाम्बापा ग्युरगीन ख्याम्दुक्लो।
ना थे ग्युरला ओङगीता सिन आबातेङ थे लामराङ ताकीन देता ओताक्वालो। फुज्युङते ओङगीन ओता थेकी आदो थारीलेईराङ थोङदुक्लो। थे थोक खाईन स्याप खाबाई गाल्गीन वाबा थोङगीन थेला आउदी ङिङज्ये लादुक्लो। थेमे गाकी लामनापाराङ छ्य्वाकीन गाल्गीन फाङबा ताप्कीन पुक खादुक्लो। 21थोक खित्जीन फुज्युङतेकीचेन ‘आबा, ङे खोत्ताङ ठाल्गीन गाल्गीन खुई इज्जत क्युराप। दोक खाईन पाप खाईन ङे परमेश्वर विरोधोङ खाबाप। था ङा खुई फुज्युङ च्योक ओङला खाम्बादु देता मेङेदो सिन ङाला छ्या ओत,’ सिन सादुक्लो। 22तर आबातेकीचेन थे खोरोङ खाम्बादु काम खित्कान्ते मिओनला काताङगीन ‘लो ख्योकोनगी छिटो छिटो दिला लेमु लेमु खोलाक खुलाला कोन्ला बिन। लाक्पाला सुङकुमाताङ काम्बाला काचापोङ कोन्ला बिन। 23थेमे भोज लै खिताला जेसुकै ठीक खि। ङुरूङ गाङेराङ भोज सोला गा खिइ। 24च्यिला सासीन दि दुरूई गाल्गीन तोरनामेई थोरूमसाक सोम्बो मेतासीन साबाप। तर दि थरिङ सोम्बोराङ ग्युरगीन वादुक,’ सिन साकीन भोज लै खिताला जेसुकै ठीक खित च्युत्तुक्लो। थोक खाईन थेरू छ्येज्यीक भोज लै खादुक्लो।
25थे बेलाला थेते छ्येते फुज्युङतेचेन स्यीङला काम खित गाला ओताक्वालो। थेमे खाम्बादु ओङजीन थेकी लु लाबातेताङ बाक चेबाते थोदुक्लो। 26थेमे थेरू च्यि खिताला स्यूबाते ईन्ताका सिन थेकी खाम्बादु काम खित्कान्ते मिज्यीकला काताङगीन ‘थरिङ दुरू च्यिला दोक खिताला स्यूबे?’ सिन ठिदुक्लो। 27थेमे थे मिकी ‘हजूर खुई न्वा ग्युरगीन वादुक। थे सन्चा सुबिस्ताराङ ग्युरगीन वाबा थोङगीन गाकी हजूर ख्योकोन आबेकी छ्येज्यीक भोज लै खिताला स्यूबाते ईन,’ सिन लाःप्तुक्लो। 28थे बात थोनामेई स्येदाङगी थेचेन खाम्बे नाङोङ मास्यूदुक्लो। छ्येते फुज्युङते स्येदाङ खाबाते छ्या स्येकीन फिनामाराङ गाल्गीन आबातेकी थेला नाङने स्योक सिन लुदुक्लो। 29थोक खाला लुजीनोङ माङेन्गीन आबातेला थेकी ‘ङा ओङराङ मेङगो। दुरू थातासाक ङेचेन खुई योक्पोकी च्योकराङ दुक्पा खाईन खाईन काम खाबा ओत। थेमे खुई खि साबाते काम ङे नोमुङ मिक्किओ सिन साबा मेत। थोक ईन्सीनोङ ङे लाईदु खुई च्यि खाबा ओते? सेत्ला र्वाओनताङ भोज लै खि सिन खुई ङाला रे रीउज्यीगोङ बिन्दा मेत। 30रन्डीताङ रूला खुई सम्पत्ति पुरकान्ते खुई फुज्युङ ग्युरला ओङजीन खुईनी खोक्पो खाईन भोजका लै खादुक। दोगोङ खुई च्यि खाबे?’ सिन सादुक्लो। 31थेमे आबातेकीचेन ‘फुज्यो, खो दोक खाला स्येदाङ माकेत। दुरू ओताते जति खुई लाःक्तुराङ ओत। च्यिला सासीन ङात्ताङ ओताते सम्पत्ति गाङे खुईतेराङ ईन। 32थरिङ ङुरूङ गाङेकी गा खाला भोज सा फाप्च्येतेराङ ईन। च्यिला सासीन खुई न्वा दुरूई गाल्गीन तोरनामेई थोरूमसाक सोम्बो मेतासीन साबाप। तर दि थरिङ सोम्बोराङ ग्युरगीन वादुक,’ सिन सादुक्लो,” सिन सिदुक।
Currently Selected:
लूका 15: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
