लूका 18
18
परमेश्वरला प्रार्थना खिन देता तोङा मेङगो
1थेमे चेलातेबेकी सेम मेसेता खाला परमेश्वरला प्रार्थना खिनराङ देत्स्यीत सिन येशूकी दोक सिन थेबाला कथा लाःपाला स्यूसुङ। 2थेकी च्यि सिका सासीन “पालोई सारज्यीक्तु न्यायाधीशज्यीक ओताक्वालो। थेचेन परमेश्वरगी छ्येन विचार खिओ सिन छ्याःङ ज्यीबा खिन मेतानलो। थेमे मि दुक्पा छ्याःङ मोखोबा खाला मनपरी खाला न्याय खिन ओतानलो। 3थे सारदुराङ ख्योबो स्याप्ते फेम्मे मिज्यीक ओताक्वालो। थेला सुइँदा मिकी अन्याय खाबा ओताक्वालो। थेमे होथे न्यायाधीश ओत्सादु याङ याङ गाल्ला थे फेम्मे मिकी थे मोरोङ न्याय खाला नाङ सिरच्याक्वालो। 4थे फेम्मे मिकी थोक खासीनोङ काल्बेई दिनसाक थेकी नामज्योकराङ मासेत्तुक्लो। ईन्सीनोङ थे फेम्मे मि थे ओत्सादु डुइनराङ देत्कीन दिक्क वाक्क जोनामेई ङीमाई थेकी ङा परमेश्वरगी छ्येन विचार खिओ सिन ज्यीबा मिक्किओ। थेमे मिओनगी च्यि सारोङा सिनोङ ङाला छ्याःङ वास्ता मेत। 5तर दि फेम्मे मिकीनी ङाला छोउ छोउराङ जोकीन सिन्सुङ। दिकी ङेता फाप्च्ये न्याय खाईन माबिन्सीन ङे स्या रूबाराङ सोओङ सिराच्योक दुक सिन थे न्याय खाईन बिन्दुक्लो,” सिन सिदुक।
6दोक साकीन प्रभु येशूकी चेलातेबाला “थे खोरोङला छोउ छोउ जोनामेईकामा थे घूस साकान्ते न्यायाधीशकी दि फेम्मे मि न्याय खाला तेराराङ फाप्सुङ सिन न्याय खाईन बिन्सुङ। 7थोक्ते न्यायाधीशकीनी न्याय खाईन बिन्सुङ सासीन च्यि थे खोरोङगी छाने खाबाते मिओनगी दुक्पादुकी टाल्ला नाङ सिन ङीन नुप प्रार्थना खित्जीन परमेश्वर नामज्योकराङ मेसेता खाला देत्क्योतरो? ना थेकी गु च्युत्ला च्युत्लाकामा थेबेकी खाबाते बिन्ती ङेन्ग्यो सिराच्योक लाङगीका? 8दि बात ङेन। परमेश्वरगीनी थेबाला दुक्पा तेरकान्तेबे लाःक्तुकी होत्ताराङ टाल्ला तेरग्यो। थोक ईन्सीनोङ परमेश्वर ओत्सादुई वाबाते मि ङा पृथ्वीमा ग्युरला ओङ ओङसाकराङ परमेश्वरगी प्रार्थना ङेन्ला दुक्पादुकी डेल्ग्यो सिन थेला विश्वास खिनराङ देत्कान्तेबा मेरा थोईजो ओङोङा? दि बात ख्योकोनगी सेमगी नाङ गुने खि,” सिन सिदुक।
फरिसी पाटी मिताङ कर लिन्कान्ते मि बात
9थेरू कोई कोई ङ्योकोननी परमेश्वर नियम ङेन्कान्ते ईन्देकी धर्मतीते मि ईन सिरकानोङ ओतान। थेबेकी ज्येनलाचेन खोपरोङ च्योक्ते ईनराङ मेन सिराच्योक खिन ओतान। होथोक्ते मिओनला येशूकी दि बात सिराला स्यूसुङ। 10थेकी थेबाला “पालोई मेन्दा ङि मि प्रार्थना खिताला परमेश्वर मन्दिरने गाल्दुक्लो। थेबे नाङ दोक्पोई फरिसी पाटी मि थेमे ज्येनतेचेन कर लिन्कान्ते मि ओतानलो। 11थेमे थे फरिसी पाटी मिकीचेन मन्दिर नाङ स्यूकीन लाकीन देत्कीन ‘ए परमेश्वर, ङा खोल्ला धन्यवाद तेरग्यो। च्यिला सासीन ज्येन मि च्योक खाला पापताङ लोभ खाला ङा पैसा मोजोओ, ज्येनला मेलेबाङ मिक्किओ। ङा मि फेम्मेताङ माङ्यालो। ङा उथे कर लिन्कान्ते मि च्योक्ते पापीङ मेन। 12हप्ताला ङा बाजि ङि बर्त देत्क्यो। थेमे ङाराङ कमाइते बो च्युताम्बे नाङ बोज्यीक खोल्लाराङ तेरग्यो,’ सिनकामा प्रार्थना खादुक्लो। 13कर लिन्कान्ते मिकीचेन मन्दिर नाङ कुनाज्यीक्तु गाल्गीन ङा दोक पापी मिङ चुक खाला परमेश्वरला प्रार्थना खित्च्ये सिराच्योक खाईन खुङ खुगीन ‘ए परमेश्वर, ङा पापी ईन सिन ङाला छ्या ओत। ङाला दया खाला पापदुकी टाल्ला नाङ,’ सिन प्रार्थना खादुक्लो। 14ङा ख्योकोनला च्यि सिते सासीन खाम्बाला ग्युरला डोजीन थेबा ङिबो नाङ परमेश्वरगी कर लिन्कान्ते मि पापचेन माफ बिन्दा ओतान। फरिसी पाटी मिचेन पापीकी पापीराङ ओतान। च्यिला सासीन ङा ङाराङ ईन सिरकानला परमेश्वरगी छ्ये ईन सिन मिसिरो। छ्ये मिक्किकान्ते मिलाचेन परमेश्वरगी छ्ये जोइओ,” सिन सिदुक।
येशूकी फिजाओनला आशी बिन्दाते
(मत्ती १९:१३-१५; मर्कूस १०:१३-१६)
15थेमे कोई कोईकी येशूकी खोपरोङ फिजाओनला लाक्पा ज्याक्ला आशी तेरस्यीत सिन थे ओत्सादु खुला लिच्युङ। थेरू फिजाओन खुलाङा थोङगीन चेलातेबेकीचेन “फिजाओनते दुरू छ्याःङ काम मेत। थेबाला दुरू खुला माङ,” सिन थाप्सुङ। 16तर येशूकीचेन “फिजाओनला दुरू खुला माङ सिन माङार। थेबाला ङा ओत्सादु ओङ छ्युत,” सिन साकीन फिजाओनला थे खोरोङ दोन्दु काताङसुङ। थेमे थेकी “दि फिजाओन थेमे होदिबा च्योकराङ ङा ङाराङ ईन सिराच्योक मिक्किकान्ते मिओनराङ परमेश्वर राज्यने स्यूक्पा ङेत्क्यो। 17फिजाओन च्योक मिक्किता खाला ङा ङाराङ ईन सिराच्योक खित्कान्ते मिचेन सुङ परमेश्वर राज्यदु स्यूक्पा मेङेदो। दि बात ख्योकोनगी टोक माज्येत,” सिन सिदुक।
सम्पत्तिताङ नोमुङ मिसिन्च्येते जुनी बात
(मत्ती १९:१६-३०; मर्कूस १०:१७-३१)
18थेमे पालोई यहूदीओनते छ्येते मिज्यीगी येशूला “गुरू, खो लेमु मि ईन सिन ङाला छ्या ओत। थोगी नोमुङ मिसिन्च्येते जुनी ङेताला ङे च्यि खिता फाप्कीते, लाप्ला नाङना,” सिन सिदुक। 19थोक सिरजीन येशूकी “खो ङाला लेमु मि सिन मासेर। परमेश्वरकामा लेमु ईन सिन सिरा फाप्क्यो। 20परमेश्वरगी बिन्दाते छ्ये छ्ये नियमला च्यि च्यि साबा ओते सिन खोल्ला छ्याराङ ओतासीन। थे नियमलाचेन ‘रन्डीबाजी खिता मेङगो, मि सेता मेङगो, क्वा मेङगो, मेन्दे बातला सुङलाङ दोष लै खिता मेङगो, आबा आमाला मान खिता फाप्क्यो,’ सिन साबा ओत। खुई होदि नियमओनराङ ङेन,” सिन सिदुक। 21थोक सिरजीन थेकी “गुरू, दि नियमओननी ङे ङा च्याक फिजा ओत्जीनमेईराङ गाङे ङेन्गीन ओत,” सिन सिदुक। 22थेमे येशूकी थेला “नोमुङ मिसिन्च्येते जुनी ङेता सेम लासीन थोरूमोङ खुई खिता फाप्च्येते कामज्यीक ओत। था खुई गाल्ला खोरोङते ओताते जति जेसुकै च्वाला पैसाचेन दुक्पा ङेताते मिओनला गोला बिन। थोक खासीन खुई मिनला स्वर्गने नोमुङ सिन्ला तोरला मोन्डोच्येते स्वर्गे सम्पत्ति जम्मा ओङला देत्क्यो। ङे थाल्ला साबाच्योक खाला खोरोङचेन ङात्ताङ ख्योम,” सिन सिदुक। 23येशूकी थोक सानामेई थे मिकी छ्येतराङ सेत्सुङ। च्यिला सासीन थे आउदी छ्युक्पु ओतान।
24थे मिकी थोक खाईन छ्येत सेता थोङगीन येशूकी थे खोरोङताङ ओताते मिओनला “छ्युक्पुते मिओनला परमेश्वर राज्यने स्यूक्पाला आउदी दुक्पा ओङगो। 25थेबाला परमेश्वर राज्यने स्यूक्पा भन्दानी बरू ऊँट जोदाई ओत्सीनोङ थेला खापकी मिकनापेकी ज्युरा सजिलो ओङोङ,” सिन सिदुक। 26थेकी थोक सिरजीन मिओनगी “थोक ईन्सीनका परमेश्वर राज्यने सु स्यूक्पा थुप्कीते ओना?” सिन ठिसुङ। 27ठिजीन थेकी “दि बात छ्या स्येबा खि। मिकी खिता मुथुप्च्येते काम परमेश्वरगी सजिलो खाला खिओ,” सिन सिदुक।
28दि बाततेबा थोनामेई पत्रुसकी “गुरू, खुई चेला ओङला ख्याम्बे लाईदु ङ्योकोनगीनी ङेराङ खाम्बा गोटे समेदोङ ताङाप। दि बात खोल्ला छ्याराङ ओत,” सिन सिदुक। 29थेकी थोक सिरजीन येशूकी चेलातेबा गाङेला “ईन ईन, ख्योकोनगी च्यि खाबा ओते सिन ङाला गाङे छ्या ओत। ङा ख्योकोनला चुक सिते सासीन परमेश्वर राज्य काम खिते लाईदु खाम्बा कि आबा आमा कि फेम्मे कि आज्यो न्वा कि फुज्युङ फुमु तोङकान्तेबाला 30परमेश्वरगी दि जुनीलाङ आबा आमा, आज्यो न्वा, आज्यी नुमु, फुज्युङ फुमु च्योक्तेताङ ज्येनोङ झन काल्बेई तेरग्यो। था ओङच्येते सत्य जुग वानामेई थेबेकी नोमुङ मिसिन्च्येते जुनीङ ङेत्क्यो,” सिन सिदुक।
येशूकी थे खोरोङ स्यिच्येते बात याङराङ खाबाते
(मत्ती २०:१७-१९; मर्कूस १०:३२-३४)
31थेमे येशूकी थे खोरोङ चेला च्युन्ङीला मि नाङदुकी टिक्पी फजेकपा खेरगीन “लो दि बात ङेन। ङुरूङ यरूशलेमने डुइन ओत। थेने लेप्नामेकी परमेश्वर बात खित्कान्तेबेकी परमेश्वर ओत्सादुई वाबाते मि ङाला चुक चुक ओङगीते सिन टिबाते गाङे बात साबा च्योकराङ ओङगो। 32च्यि सासीन था ङाला मिओनगी ज्येन ज्येन जातकी मि लाःक्तु सोम्पे खिओ। थेमे थेबेकी ङाला हेपे खाला ईन्दा मेन्दा सिओ, इज्जत बेइज्जत खिओ, छ्यिम्तोर देइओ, 33कोर्रा लै खिओ थेमे सेत्क्योदोङ। तर सेताते ङीमा सुमगी छोमु ङा सोम्बो लोइओ,” सिन सासुङ। 34तर चेलातेबेकी दि बात छ्याःङ माखोसुङ, थेकी च्यि साबाते ईन्ताका सिन छ्याःङ छ्या मास्येसुङ। च्यिला सासीन परमेश्वरगीराङ थेबाला थे बात खो माच्युत्सुङ।
येशूकी अन्धला थोङा थुप्च्या जोबाते
(मत्ती २०:२९-३४; मर्कूस १०:४६-५२)
35थेमे ख्याम्गीन ख्याम्गीन येशूबा यरीहो सारदु लेपा खाबा ओतान। थेरू लामगी खादुराङ अन्धज्यीक देता ओतान। थेचेन थे लाम ख्याम्कान्ते मिओनला नाङ खिन ओतान। 36लामला मि काल्बेई ख्याम्बाते छ्या स्येकीन थेकी “थरिङ च्यि ओङसुङा? च्यिला दोक काल्बेई मि ख्याम्गीन दुका?” सिन ठिसुङ। 37थेमे येशूताङ ख्याम्गीन ओताते मिओनगी थेला “नासरतपे येशू ओङगीन दुक,” सिन लाःप्सुङ। 38येशू ओङगीन दुक सिरा थोकीन थेकी “ए दाऊद सन्तान येशू, ङे दुक्पा थोङला नाङ,” सिन आउदी खाईन छेरा खिताला स्यूसुङ। 39थोक खित्जीन येशूताङराङ गोमा गोमा ख्याम्बा ओताते मिओनगी थेला “खो दोक खाला छेरा माकेत, खाराक्पा देत,” सिन ङारसुङ। थेबेकी ङारसीनोङ थेकी “ए दाऊद सन्तान येशू, ङे दुक्पा थोङला नाङ,” सिन झन कस्स्ये खाईन छेरा खासुङ। 40थेकी छेरा खाबाते थोकीन येशू रकस्यिक थेरूराङ गुकीन “थे मिला ङा ओत्सादु खोरच्योक,” सिन लिन ताङसुङ। थेला दोन्दु क्याल्नामेकी येशूकी 41“खुई ङाला च्यिला काताङे? ङे च्यि खिता फाप्सुङा,” सिन ठिसुङ। थेमे थेकी “ङे मिगी थोङा ङेत्स्यीत प्रभु,” सिन सासुङ। 42थेमे येशूकी थेला “लो खुई थोङा थुप्स्यीत ओना। ङे खोल्ला थोङा थुप्च्या जोइओ सिन खुई ङाला विश्वास खाबेकी खो थोङच्या गालाते ईन,” सिन सिदुक। 43येशूकी थोक सिराईताङ थे मिक दाक थोङच्या गाल्सुङ। थोक ओङनामेई थे परमेश्वरते जय जय खिन येशूताङराङ ख्याम्सुङ। थोक अचम्बते काम ओङा थोङगीन थेरू ओताते मि गाङेकीङ परमेश्वरते जय जय खासुङ।
Currently Selected:
लूका 18: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
