मत्ती 16
16
फरिसीताङ सदुकी पाटी मिओनगी येशू सेम ता चालाते
(मर्कूस ८:११-१३)
1थेमे येशू सेम ताप्ला कोई कोई फरिसीताङ सदुकी पाटी मिओनगी थे ओत्सादु ख्योल्गीन “लो खोत्ताङ परमेश्वर शक्ति ओत सासीन ङ्योकोनला खइँदा अचम्बते कामज्यीक खाला तेन्ते,” सिन सिदुक। 2थोक सिरजीन थेकी “ख्योकोनगी ग्वासेला नामने ताजीन नाम छिक्पा थोङसीन था खडेरी थेन्च्याक्वा सिन सिओ। 3थेमे ङोमु नाम मुक्पेकी नाक्पो गाला थोङसीनचेन था छ्यार्बा देक्च्याक्वा सिन बात खिओ, मेन? नाम ताला ख्योकोनगी खडेरी थेन्च्येतेताङ छ्यार्बा देक्च्येते डेला थुप्कीदुक सासीन परमेश्वरगी खेराङ मिगी दोन्दुराङ खिन ओताते कामओन थोङलाङ थेकी च्यि खिन दुका सिरच्येते बातचेन ख्योकोन च्यिला छ्याःङ माखोबा च्योकराङ खाला देत्कीते? 4ख्योकोन था समय मिओननी परमेश्वरला माने खिता ताङगीन मेलेबा मेलेबा काम खित्कान ईन्देकी ङाला खालि खइँदा अचम्बते काम खाला तेन खिदुक। ङा ख्योकोनगी साबाच्योक खितराङ मिक्किओ। था ख्योकोनगी परमेश्वर बात खित्कान्ते योनाला ओङाते च्योक्ते कामज्यीककामा थोङा ङेत्क्यो,” सिन सिदुक। थोक साकीन च्याकीन थे थेरूई दाक ख्याम्सुङ।
येशूकी चेलातेबाला थापाते
(मर्कूस ८:१४-२१)
5थेमे येशू चेलातेबाताङ डुङ्गाला जेकीन गालील समुन्द्रे फारकेनपाला डुइन ओतान। चेलातेबेकी खोपरोङताङ स्योबेन खेरा टोक ज्येता ओतान। 6थोक खाला डुइन डुइनला येशूकी थेबाला “फरिसीताङ सदुकी पाटी मिओनताङ स्योबेनला लुच्येते सोडा ओत। थे सोडा खेराङला मेतेरस्यीत सिन ख्योकोन च्याङबो खिसा है,” सिन सिदुक। 7थेकी च्यि साबाते ईन्ताका सिन माखोबेकी चेलातेबेकीचेन “ङुरूङगी साच्येते खुला माबाकीका गुरूकी दोक साबा ईन्दा च्यिन्दा,” सिन खोपरोङ नाङ बात खासुङ। 8थेबे बात थोकीन थेकी “ख्योकोन च्यिला साच्येते बातकामा खाला ख्योकोनगी साप खुला माबाक्वा सिनका ङे थे बात खाबाक्वा सिन विचार खिते? ख्योकोनला गोच्येते जति तेरकान्ते ङाराङ ईन सिन ख्योकोन थोरूमोङ च्यिला पत्ते मिक्किते? 9च्यि ख्योकोनगी ङे खाबाते काम थोङगीनोङ थोरूमोङ छ्याःङ खोबा मेत? ङे स्योबेन ङेकी हजार ङा मिला सा तेरजीन थेरू लूबातेकी ख्योकोनगी तोलुम थोई काङा ओताने? 10थेमे लोक्ला स्योबेन दुईनगी हजार स्यी मिला साप तेरजीन थेरू लूबातेकी ख्योकोनगी तोलुम थोई काङा ओताने? 11होथे बाततेबा विचार खालाङ ङे फरिसीताङ सदुकी पाटी मिओनताङ ओताते स्योबेनला लुच्येते सोडा खेराङला मेतेरस्यीत सिन च्याङबो खि साबाते सापकी बात खाबाते मेन सिन ख्योकोनगी खोबा फाप्च्येतेराङ ईन,” सिन सिदुक। 12थोक सानामेईका थेबेकी बल्ल थेकी साबाते बातकी अर्थचेन फरिसीताङ सदुकी पाटी मिओनगी लोप्च्येते बातला नामज्योकराङ मासेत साबाते दुका सिन छ्या स्येसुङ।
पत्रुसकी येशूला ख्रीष्टराङ ईन साबाते
(मर्कूस ८:२७-३०; लूका ९:१८-२१)
13थेमे थेबा ख्याम्गीन सिजरिया फिलिप्पी सिरसे नाङला ख्योल्नामेई येशूकी चेलातेबाला “परमेश्वर ओत्सादुई वाबाते मि ङाला मिओनगी सु दुका खिका?” सिन ठिसुङ। 14थोक सिरजीन थेबेकी “गुरू खोल्ला लालेकी बप्तिस्मा तेरकान्ते यूहन्ना सोम्बो लोगीन वाबाते दुका खिदुक। कोईकी थाङबो परमेश्वर बात खित्कान्ते एलिया दुका खिदुक। थेमे कोईकीचेन परमेश्वर बात खित्कान्तेबे नाङ कि यर्मिया कि ज्येन दोक्पोई दुका सिन बात खिदुक,” सिन सिदुक। 15थेमे थेकी “ख्योकोनलाचेन ङा सु ईन सिराच्योक लाङगीका याङ?” सिन सिरजीन 16थेबे नाङ शिमोन पत्रुसकी “गुरू, खो सोम्बोते परमेश्वर फुज्युङ ईन। खो थेकी तोङगो साबाते ख्रीष्ट ईन,” सिन सिदुक। 17थोक सिरजीन थेकी थेला “खुई ठीक सिदुक योने फुज्युङ शिमोन, खो थोई भाग्यमानीज्यीक ओता ईन्दाका। च्यिला सासीन दि बात खुई खोरोङगीराङ छ्या स्येबाते मेन, मिकी लाप्कीन बिन्दातेङ मेन। स्वर्गने देत्कान्ते ङे आबेकी खोल्ला दि बात छ्या स्ये च्युताते ईन। 18पत्रुस, खुई मिनगी अर्थ दो साबाते ईन। थोगी ङा खोल्ला च्यि सिते सासीन दोई जगी लाक्तु खाम्बा ज्वा च्योकराङ ङाङ ङाराङ मिओन खुई छ्य्वापेकीराङ ओङ ज्युत्क्यो। थेमे थेबाला शैतानगीङ ग्याल्ला नरककुण्डमा लुबा मुथुबो। 19थेमे गोला साँचो देक्पाताङ बेताच्योक खाला ङा खोल्ला स्वर्गे राज्यदु चुक बेलाला च्यि खित्च्ये, च्यि मिक्किच्ये सिरच्येते अधिकार तेरग्यो। खुई दुरू मेङगो साबाते बातला परमेश्वरगीङ स्वर्गने मेङगोतराङ सिन सिओ। थेमे खुई दुरू ओङगो साबाते बातलाचेन थेकीङ ओङगोतराङ सिन सिओ,” सिन सिदुक। 20थोक साकीन च्याकीन थेकी चेलातेबाला थे खोरोङ ख्रीष्टराङ ईन सिन सुङलाङ मासेर, खाराक्पा देदा सिन कोत्सुङ।
येशूकी थे खोरोङ स्यिच्येते बात खाबाते
(मर्कूस ८:३१-३३; लूका ९:२२)
21थेमे दि तिरीमेकीचेन येशूकी चेलातेबाला “था ङा यरूशलेमपा ड्वा फाप्क्यो। थेपा गाल्नामेकी यहूदी छ्ये छ्ये मि, छ्ये छ्ये पूजारीताङ धर्मे गुरूओनगी ङाला आउदी दुक्पा तेरग्यो। थेमे सेदोङ ज्युत्क्यो। तर सेताते ङीमा सुमगी छोमु परमेश्वरगी ङाला सोम्बो लोइओ,” सिन थे खोरोङला च्यि ओङगीते, चुक ओङगीते सिन लाःपाला स्यूसुङ। 22थेकी थोक सिरजीन पत्रुसकीचेन थेला फजेकपा खेरगीन “प्रभु, खोल्ला थोक ओङातेचेन मिलामलाङ थोङा माफाप्स्यीत, परमेश्वरगी खोल्ला नोमुङ दोक ओङ मुज्युत्स्यीत। खुई दोक्ते बात माकेत,” सिन थापाला स्यूसुङ। 23थोक खित्जीन ख्युर ग्युरगीन थेकी थेला “शैतान, खो दुरू ङे मिगी दोन्दु मादेत। खो ङे काम ङ्ये ज्युता छोल्गीदुक। परमेश्वरगी दोक खाला काम मिक्किओ। खुई साबाते दि बातनी परमेश्वरगी खित्च्येते कामताङ डिकराङ मिडिक्च्येते ईन,” सिन ङारसुङ।
येशूताङ ख्याम्बाला चुक ओङा फाप्कीते
(मर्कूस ८:३४-३८; लूका ९:२३-२७)
24थेमे येशूकी चेलातेबा गाङेताङ बात खिन “ङात्ताङ ख्याम्बा सेम खित्कान्ते मिकीचेन दाक्पोन खुशीला ख्याम्बा तोङा फाप्क्यो। जस्तो दुक्पा ओङसीनोङ ओङस्यीत सिन थेकीचेन दाक्पोन टाँए खाला स्या फाप्च्येते स्यिङगी थाम खुरला ङे तिरी ख्याम्बा फाप्क्यो। 25च्यि सासीन तिरी बो माताबा खाला सुइँदेकी दाक्पोन ज्यानगी माया खिदुक सासीन थेकी नोमुङ मिसिन्च्येते जुनी मेङेदो। दाक्पोन फाइदा माताबा खाला ङे लाईदु दाक्पोन ज्यानगी मायाङ मारे खित्कान्ते मिकीचेन नोमुङ मिसिन्च्येते जुनी ङेत्क्यो। 26सुइँदेकी दि जुनीला दि सा लुङबादु ओतातेबरी जेसुकै ङेता ओत्सीनोङ स्यिनामेई थे मिते च्यि आश ओङगीतेरो? थोक्ते मिकी च्यि खाला याङराङ थे खोरोङ जुनी ङेत्कीतेरो? छ्याःङ खालाङ थेकी थे जुनी मेङेदो। 27था तिरी परमेश्वर ओत्सादुई वाबाते मि ङा दुरू ग्युरला वाला मि गाङेला दाक्पोन दाक्पोनगी खाबाते काम ताला कोईला सजाय तेरग्यो, कोईला इनाम तेरग्यो। थेजीन ङा आबेते छ्येज्यीक शक्ति ङेत्ला नाम्दाककी झिलिमिली गाल्ला ङे दूतओनताङ दुरू ग्युरला ओङगो। 28थेमे ङा ख्योकोनला दि बादोङ साला ज्य्वाक्यो। च्यि सासीन ख्योकोन नाङ कोई कोईचेन परमेश्वर ओत्सादुई वाबाते मि ङे दुरू राज्य खिताला स्यूबाते थोङलाकामा स्यिइओ,” सिन सिदुक।
Currently Selected:
मत्ती 16: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
