मत्ती 20
20
अंगूर स्यीङगी धनीताङ खेताले कथा
1थोरूमोङ बात खिन येशूकी “परमेश्वरगी स्वर्गे राज्यदु काम खित्जीन दि कथाला साबा च्योकराङ खाला खिओ। चुक सासीन बाजिई ठाउँज्यीक्तु अंगूर खेती खित्कान्ते स्यीङगी धनीज्यीक ओतानलो। ङीमाई थे खेताला ङेत्से नाङपा ङोमुका खेताला छोल गाल्दुक्लो। 2थेमे थे बेले ङीमाज्यीक निमेक हिसाबकी चाँदी डबलज्यीक तेरच्या खाईन थेकी खेतालाओन चाल्गीन काम खिताला ताङदुक्लो। 3थे तिरीङ थे नौ बजे नाङपा गोमा गाल्से नाङपाराङ गाल्दुक्लो। थेमे थेरू छ्याःङ काम माङेत्कीन जोगे जोगे लाकीन देताते मिओनला थोङगीन थेकी 4‘ए होइबावे, ख्योकोनोङ बरू ङे स्यीङला काम खित ग्युक। ङा ख्योकोनला थोई तेरा डिगीका ताला निमेक तेरग्यो,’ सिन सानामेई 5थेबाङ काम खित गाल्दुक्लो। थोकराङ खाईन थेकी बाह्र बजे नाङपा थेमे तीन बजे नाङपाङ होथेङपाराङ गाल्गीन खेताला चाल्गीन खुलाकीन काम खित ताङदुक्लो। 6थेमे ग्वासे पाँच बजे नाङला थेपा डोजीनोङ थेकी कोई कोई मि थाराङ लाकीन देता ओता थोङगीन ‘ए मिवे, च्यि ख्योकोन थरिङ ङीन खाङ काम मिक्किता खाईन थाराङ देता ओत?’ सिन ठिदुक्लो। 7थोक सिरजीन थेबेकी ‘खै ङ्योकोनगीनी थरिङ छ्याःङ कामराङ माङेत्सुङ,’ सिन सिरजीन थेकी ‘लो थोक सासीन ख्योकोनबरीङ ङे स्यीङला काम खिताला ग्युक,’ सिन स्यीङदु ताङदुक्लो।
8थेमे नाम स्योनामेकी थे स्यीङगी धनीकी थे खोरोङ खाम्बादु पैसे काम खित्कान्ते मिला काताङगीन ‘लो था खेतालाओनला काताङला थरिङ कामगीते खोपरोङ खोपरोङ निमेक गोला बिन। थोक खित्जीन खुई गोमाचेन गाङे भन्दा तिरी काम खित गालातेबाला बिन। थेरूकी थेबा भन्दा टिक्पी गोमा काम खित गालातेबाला बिन। थेमे गाङे भन्दा तिरीचेन ङोमुका काम खित गालातेबाला बिन,’ सिन कोत्तुक्लो। 9थेमे थेकीङ मालिकतेकी साबा च्योकराङ खाईन पाँच बजे नाङपा काम खित गालातेबाला चाँदी डबल रेरे निमेक बिन्दुक्लो। थोकराङ खाईन ज्येनतेबा गाङेलाङ चाँदी डबल रेरेराङ बिन्दुक्लो। 10थेबाला चाँदी डबल रेरे बिन्दा थोङगीन ङोमुका काम खित गालाते मिओनगी था खोपरोङगीनी ल्हाक्पाराङ पैसा ङेत्कीता सिन विचार खादुक्लो। तर थेबे पालो लेप्नामेकीङ थेबेकीङ डबल रेरेकामा ङेत्तुक्लो। 11खोपरोङगीङ ज्येनतेबेकी छेतकामा ङेत्नामेई थोक खाबाते मायाङसुङ सिन गनगन खिन थे स्यीङगी धनी ओत्सादु गाल्गीन थेबेकी 12‘हजूर खुई दोगोङ च्यि खाबे? पाँच बजे नाङपा ओङकान्तेबेकीनी खालि घण्टाज्यीककामा काम खाबा ओतान। ङ्योकोनगीचेन ङीन खाङ ङीमेई छिगीनकामा ठोतकी भल थेनथेन काम खाबाप। तर हजूर खुईनी निमेकचेन ङ्योकोनलाङ थेबाला छेतकामा बिन्सुङ,’ सिन स्येदाङ खादुक्लो। 13थेबेकी थोक खित्जीन थे स्यीङगी धनीकी थेबे नाङ दोक्पोईताङ बात खिन ‘त्वा बाबुवे, ङे ख्योकोनला तेरग्यो साबा छेत निमेक दाक बिन्दा ओत। ख्योकोन खेराङराङ थोस्यिकलाराङ काम खिओ सिन ङेन्दाते ईन, मेनरो? च्यि ङे ख्योकोनला खइँदा अन्याय खासुङ ओना? 14थोगी था खेराङ दाक्पोन दाक्पोनगी ङेताते खुरला दाक्पोन लामला ग्युक। पाँच बजे नाङलाकामा काम खित गालातेबालाङ ङा ख्योकोनला छेतराङ तेरग्यो। 15च्यि ङाराङ सम्पत्ति ङे ङाराङ खुशीकी चले खिता मेङेदोतरो? ङे थे मिओनला थाराङ ख्योकोनला छेतराङ बिन्सुङ सिन ख्योकोन च्यिला स्येदाङ खिते?’ सादुक्लो,” सिन सिदुक। 16दोक साकीन च्याकीन थेकी चेलातेबाला “दि कथाला साबा च्योकराङ मिओनगी विचार खाबा च्योकचेन तिरी मेङगो। थरिङोला ज्येनगी दिङ सु ईन्देरो सिराच्योक ठाने खाबाते मिओन तिरी छ्ये ओङगो। थरिङोला छ्ये ओतातेबाचेन तिरी छ्ये मेङगो,” सिन सिदुक।
येशूकी थे खोरोङ स्यिच्येते बात याङराङ खाबाते
(मर्कूस १०:३२-३४; लूका १८:३१-३४)
17थेमे यरूशलेमपा डुइन ओते बेलाला येशूकी थे खोरोङ चेला च्युन्ङीला मि नाङदुकी टिक्पी फजेकपा खेरगीन 18“लो दि बात ङेन। ङुरूङ यरूशलेमने डुइनराङ ओत। थेने लेप्नामेकी परमेश्वर ओत्सादुई वाबाते मि ङाला मिज्यीगी धोका बिन्ला छ्ये छ्ये पूजारीताङ धर्मे गुरूओन लाःक्तु सोम्पे खिओ। थेबेकीचेन ङाला सजाय बिन्ला सेता फाप्क्यो सिन 19लोक्ला ज्येन ज्येन जातकी मि लाःक्तु सोम्पे खिओ। थेमे थेबेकीचेन ङाला हेपे खाला ईन्दा मेन्दा सिओ, कोर्रा लै खिओ थेमे स्यिङगी थामला टाँए खाला सेत्क्योदोङ। तर सेताते ङीमा सुमगी छोमु परमेश्वरगी ङाला सोम्बो लोइओ,” सिन सिदुक।
छ्ये ओङा छोल्कानगी चुक खिता फाप्कीते
(मर्कूस १०:३५-४५)
20थेमे थे तिरी जब्दी फेम्मेकी थे मोरोङ फुज्युङतेबा ङिबोला थे दोन्दुराङ क्याल्गीन येशूला से खिन “गुरू, ङा खोल्ला बातज्यीक खितामीन,” सिन सासुङ। 21थेमे थेकी “खुई च्यि सिरा चाले? ङे खुई लाईदु च्यि खिता फाप्सुङ?” सिन सिरजीन थेकी “था तिरी गुरू खो गेल्बो ओङला राज्य खित्जीन ङेते दि फुज्युङ ङिबोचेन खुई फारताङ छुरला देता ङेत्स्यीत,” सिन सिदुक। 22थोक सिरजीन येशूकी थेबा पुन ङिबोला “ख्योकोनचेन स्वर्गे राज्यने मान ङेत्ला देता छोल्गीदुक। थेने छ्ये ओङला देत्च्येते चुक ईन्दे सिन ख्योकोनला छ्या मिन्दुक। च्यि ङे भोगे खिता फाप्च्येते दुक्पा ख्योकोनगीङ भोगे खिता थुप्क्यो?” सिन सिरजीन थेबेकी “थुप्क्यो,” सिन सिदुक। 23याङराङ थेकी “ईन्दाका ख्योकोनगीङ ङे च्योकराङ दुक्पा भोगे खिता फाप्क्यो। ईन्सीनोङ तिरी सु सुला थोक छ्येज्यीक मान बिन्ला ङाराङ फारताङ छुरला ज्य्वाच्ये सिरच्येते अधिकारचेन ङात्ताङ मेत। आबेकी ङे फारताङ छुरला देताला छाने खाबाते मिओनराङ थोक खाला ङात्ताङ देत्क्यो,” सिन सिदुक।
24थेबा ङिबोकी थोक साबा थोनामेई ज्येन चेलातेबा च्युताम्बाचेन थेबा पुन ङिबोताङ स्येदाङ खासुङ। 25चेलातेबा गाङेकी खालि छ्ये ओङा छोल्च्येते बातकामा खिता थोङगीन येशूकी थेबा गाङेला दोन्दु काताङगीन “दि बात ङेन। च्यि सासीन लुङबा लुङबे गेल्बोओनगी जनताला लेमु मेलेबा चुक ओङगीते सिन विचार मिक्किता खाला खोपरोङ खुशीकीकामा राज्य खिओ। गेल्बो चावादु छ्ये छ्ये मिकीङ गेल्बोओनगी खाबा च्योकराङ खिओ, मेनरो? 26तर ख्योकोनगीचेन थे गेल्बोओनगी खिताच्योक माकेत। ख्योकोन नाङ छ्ये ओङा छोल्कान्ते मिकीचेन छ्ये खिता साटोला सुइँदे खाम्बादु काम खित्कान्ते मि च्योक ओङला काम खिता फाप्क्यो। 27झन ज्येन ज्येनला कोत्कान्ते मि ओङा छोल्कान्तेकीनी ज्येनला दुक्पा मेतेरा खाला थे खोरोङराङ ज्येनगी कोताते ङेन्कान्ते योक्पो च्योक ओङा फाप्क्यो। 28परमेश्वर ओत्सादुई वाबाते मि ङाङ छ्ये मि च्योक खाला गाङेला दि खि, थे खि सिन कोताला वाबाते मेन। बरू मि नरककुण्डमा स्यूक्पा माफाप्स्यीत सिन थेबेकी ङेता फाप्च्येते पापकी सजाय ङाराङगीराङ भोगे खाला स्याप्ला दुरू वाबाते ईन,” सिन सिदुक।
येशूकी अन्ध मेन्दा ङिला थोङा थुप्च्या जोबाते
(मर्कूस १०:४६-५२; लूका १८:३५-४३)
29थोक खाला डुइन डुइनला येशूताङ थे चेलातेबा यरीहो सार योल्ला ड्वा खाईन सिन्दा खाबा ओतान। थेबे तिरी तिरी आउदी काल्बेई मि ख्याम्बा ओतान। 30थेमे थेरू लामगी खादुराङ अन्ध मेन्दा ङि देता ओतान। येशू थेपेई खाला ओङगीन दुक्लो सिरा थोकीन थेबा ङिबोकी “ए दाऊद सन्तान प्रभु, ङ्योकोन दुक्पा थोङला नाङ,” सिन आउदी खाईन छेरा खिताला स्यूसुङ। 31थोक खित्जीन येशूताङ ख्याम्बा ओताते मिओनगी थेबा ङिबोला “ख्योकोन दोक खाला छेरा माकेत, खाराक्पा देत,” सिन ङारसुङ। थेबेकी ङारसीनोङ थेबा ङिबो “ए दाऊद सन्तान प्रभु, ङ्योकोन दुक्पा थोङला नाङ,” सिन झन कस्स्ये खाईन छेरा खासुङ। 32थेबा छेरा खाबाते थोकीन येशू रकस्यिक थेरूराङ गुकीन थेबा ङिबोला काताङगीन च्याकीन “ङाला च्यिला काताङे? ङे च्यि खिता फाप्सुङा?” सिन ठिसुङ। 33थेमे थेबा ङिकारगी “ङ्योकोनगी मिगी थोङा ङेत्स्यीत प्रभु,” सिन सासुङ। 34थेबेकी थोक खाबा थोङगीन येशूला ङिङज्ये लासुङ। थोगी थेकी थेबे मिगी थोङस्यीत सिन लाक्पेकी थेबे मिक दोकीन बिन्सुङ। थोक खिताईताङ थेबे मिक दाक थोङच्या गाल्सुङ। थोक ओङनामेई थेबा ङिबोङ येशूताङराङ ख्याम्सुङ।
Currently Selected:
मत्ती 20: JUL
Highlight
Share
Copy
Want to have your highlights saved across all your devices? Sign up or sign in
© 1992 Wycliffe Bible Translators Inc. All rights reserved.
