اعمال 2
2
رُوح القُدس دا نزُول
1جِیں ویلے عید ِ پِنتیکُست دا ڈینہہ آیا تاں او سارے ہِک جاہ تے جمع ہَن، 2جو اچانک اسمان کنُوں ایجھی اواز آئی جِینویں زور دی اندھاری چلدی ہے، تے اُوں اواز نال سارا گھر بھریج گِیا جِتھاں او بیٹھے ہَن۔ 3اُنہاں کُوں بھاہ دیاں لَمباں وانگُوں زباناں ڈِکھالی ڈِتیاں جیہڑیاں اَنج اَنج تھی تے اُنہاں ءچوں ہر ہِک اُتے آ تے کھڑ گئیاں۔ 4تے او سارے رُوح القُدس نال بھریج گئے تے مختلف زباناں بولنڑ لگے جِینویں رُوح اُنہاں کُوں قابلیت بخشی ہئی۔
5اُوں ویلے دُنیا دی ہر قوم ءچوں خُدا ترس یہُودی، یروشلیم ءچ راہندے ہَن۔ 6جِیں ویلے اُنہاں ایہ اواز سُنڑی تاں بِھیڑ جمع تھی گئی تے لوک ہکے بکے رہ گئے کیوں جو ہر ہِک کُوں اِیہو سُنڑدا ہا جو ایہ میڈی ای بولی بُولیندے پئے ہِن۔ 7سارے بہُوں حیران تھی تے آکھنڑ لگے ”کیا ایہ بولنڑ آلے یکے گلیل دے راہوݨ آلے نئیں؟ 8وَل ایہ کِینویں تھی سگدے جو ہر ہِک آپنڑے آپنڑے وطن دی بولی سُنڑدا پِیا ہے؟ 9اساں تاں پارتھی، مادی، عِیلامی، مسوپتامیہ، یہُودیہ، کپَدُکیہ، پُنطُس، آسِیہ، 10فروگیہ، پمفِیلیہ، مِصر تے لِبیا دے اُوں علاقے دے راہنڑ آلے ہیں جیہڑا کُرینے دے نیڑے ہے۔ تے اِتھاں رومی مسافر 11بھانویں پیدائشی یہُودی بھانویں اُنہاں دے مُرید، تے کریتی تے عرب ہِن۔ پر اساں آپنڑی آپنڑی بولی ءچ اُنہاں کنُوں خُدا دے عظیم کماں دا بیان سُنڑدے ہیں۔“ 12سبھ حیران تھئے تے پریشان تھی تے ہِک بئے کُوں آکھنڑ لگے، ”ایہ کیا تھیندا پئے؟“
13پر کُجھ ٹھٹّھا کر تے آکھیا، ”ایہ تاں شراب دے نشے ءچ ہِن۔“
پطرس دا پیغام
14پر پطرس باقی یارہاں دے نال کھڑا تھیّا تے اُچی اواز ءچ لوکاں کُوں آکھیا، ”یہُودی بِھراؤ تے یروشلیم دے سارے راہنڑ آلیو! ایہ جاݨ گِھنو تے میڈی گالھ توجہ نال سُنڑو۔ 15ایہ لوک نشہ ءچ نئیں جِینویں تُساں سمجھدے پئے ہیوے کیوں جو حالی تاں سویل دے نؤں وجے ہِن۔ 16بلکہ ایہ او تھیندا پئے جیہڑا یُوایل نبی دی معرفت آکھیا گئے
17’خُدا فرمیندے جو
آخری ڈینہاں ءچ اِینویں تھیسی
جو مَیں ہر بندے اُتے آپنڑا رُوح نازل کریساں
تُہاڈے پوتر تے تُہاڈیاں دِھیاں نبُوّت کریسن
تُہاڈے جوان رویا ڈیکھسن
تے تُہاڈے بُڈھے خواب۔
18مَیں اُنہاں ڈینہاں ءچ آپنڑے خادماں،
مرداں تے عورتاں اُتے آپنڑا رُوح نازل کریساں
تے او نبُوّت کریسن۔
19مَیں اسمان اُتے عجیب کم
تے تلے زمین اُتے نشانیاں ڈِکھیساں
یعنی خون تے بھاہ تے گھاٹا دُھواں۔
20سِجھ تاریک تھی ویسی
چَن خون وانگُوں تھی ویسی
اِیں کنُوں پہلے جو رب دا عظیم
تے جلال آلا ڈینہہ آوے۔
21تے اِینویں تھیسی جو
جیہڑا وی خُداوند دا ناں گِھنسی،
نجات پیسی#یُوایل 2:28-32۔ ۔‘
22اِسرائیلیو! سُنڑو، یسُوع ناصری ایجھا بندہ ہا جیندے ذریعے خُدا تُہاڈے وچال معجزے، عجیب کم تے نشان ڈِکھا تے ثابت کیتا جو او خُدا دی طرفوں ہا۔ تُساں آپ ای ایہ گالھ جانڑدے ہیوے۔ 23جِیں ویلے او خُدا دے پہلے کنُوں بنڑائے منصوبے تے علم دے مطابق پکڑوایا گِیا تاں تُساں اُونکُوں بدکار لوکاں دے ہتُھوں صلیب اُتے چڑھا تے قتل کر ڈِتا۔ 24پر خُدا اُونکُوں زندہ کر ڈِتا تے موت دے قبضے تُوں چُھڑایا کیوں جو ایہ ممکن نہ ہا جو او موت دے قبضہ ءچ راہندا۔ 25کیوں جو داؤد اُوندے بارے ءچ آدھا ہے جو
’مَیں#2:25 یعنی یسُوع۔ رب کُوں ہمیشاں آپنڑے سامنڑے ڈیدھا ریہا
کیوں جو او میڈے سجے پاسُوں ہے
تاں جو مَیں ہلایا نہ وَنجاں۔
26اِیں سببّوں میڈا دل خوش تھیّا
تے میڈی زبان خوشی منائی،
بلکہ میڈا جِسم وی اُمید ءچ قائم راہسی۔
27اِیں واسطے جو تُوں میڈی جان کُوں عالم ِ ارواح ءچ نہ چُھوڑیسیں
تے نہ آپنڑے قدُّوس دے سڑن دی نوبت آوݨ ڈیسیں۔
28تُوں میکُوں زندگی دے رستے ڈِکھائے،
تُوں میکُوں آپنڑی حضُوری ءچ خوشی نال بھر ڈیسیں#زبُور 16:8-11۔۔‘
29بِھراؤ! مَیں قوم دے بزُرگ داؤد دے حق ءچ تُہاکُوں دلیری نال آکھ سگدا ہاں جو او مر گِیا تے دفن وی تھیّا تے اُوندی قبر اَج تئیں ساڈے ءچ موجود ہے۔ 30پر او نبی ہا تے ایہ جانڑدا ہا جو خُدا میڈے نال قَسم کھادی ہے جو مَیں تیڈی نسل ءچوں ہِک بندے کُوں تیڈے تخت اُتے بِلھیساں۔ 31اُوں پیشن گوئی کریندے ہوئے المسیح دے زندہ تھیوݨ دا ذِکر کیتا جو نہ او عالم ِ ارواح ءچ چھوڑیا گِیا تے نہ اُوندے جِسم کُوں سڑن ڈِتا گِیا۔ 32خُدا یسُوع کُوں زندہ کیتا تے اساں سارے اِیں گالھ دے گواہ ہیں۔ 33ہُنڑ اُونکُوں سرفراز کر تے خُدا دے سجے ہتھ بِلھایا گِیا ہے، تے اُوں باپ کنُوں وعدہ کیتا ہویا رُوح القُدس حاصل کر تے نازل کیتا جِیندا اثر تُساں ڈیدھے تے سُنڑدے ہیوے۔ 34کیوں جو داؤد تاں اسمان اُتے نئیں چڑھیا پر او آپ آدھے جو
’رب میڈے خُداوند کُوں آکھیا،
میڈے سجے پاسُوں بہہ،
35جئیں تئیں مَیں تیڈے دُشمنڑاں کُوں
تیڈے پیراں دی چوکی نہ بنڑا ڈیواں#زبُور 110:1۔۔‘
36بس اِسرائیل دا سارا خاندان جاݨ گِھنے جو خُدا اُوں یسُوع کُوں جِینکُوں تُساں صلیب چڑھایا، خُداوند وی بنڑایا تے المسیح وی۔“
37جِیں ویلے اُنہاں ایہ سُنڑیا تاں اُنہاں دے دِلاں کُوں ڈُکھ لگیا تے پطرس تے باقی رسُولاں کُوں آکھیا جو ”بِھراؤ! اساں کیا کرُوں؟“
38پطرس اُنہاں کُوں آکھیا، ”توبہ کرو تے تُہاڈے ءچوں ہر ہِک آپنڑے گُناہاں دی معافی کیتے یسُوع مسیح دے ناں ءچ بپتسمہ گِھنے تاں تُساں رُوح القُدس دی نعمت پے سو۔ 39کیوں جو ایہ وعدہ تُہاڈے کیتے تے تُہاڈی اولاد کیتے بلکہ اُنہاں ساریاں کیتے وی ہے جیہڑے دُور دے ہِن، جِنہاں کُوں خُداوند ساڈا خُدا آپنڑے کولھ سڈیسی۔“
40تے پطرس مزید بہُوں سارے گالھیں کیتیاں تے اُنہاں کُوں ایہ نصیحت کیتی جو ”آپنڑے آپ کُوں اِیں بدکار قوم کنُوں بچائی رکھو۔“ 41بس جِنہاں لوکاں اُوندا کلام قبول کیتا اُنہاں بپتسمہ گِھدا تے اُوں ڈینہہ تقریباً ترے ہزار لوک جماعت ءچ شامل تھی گئے۔ 42تے ایہ لوک رسُولاں کنُوں تعلیم گِھننڑ، رفاقت رکھنڑ، کٹھے روٹی کھاوݨ#2:42 اِیں دوران او خُداوند دے حُکم دے مطابق اُوندی قُربانی کُوں یاد کریندے ہَن۔ اِیں رسم کُوں عشائے ربانی وی آکھیا ویندے۔ تے دُعا کرݨ ءچ لگے ریہے۔
اِیمان داراں دی اِجتماعی زندگی
43ہر بندے اُتے خوف چھا گِیا تے رسُولاں دے ذریعے بہُوں سارے معجزے تے عجیب کم، ظاہر تھیندے ہَن۔ 44جیہڑے اِیمان گِھن آئے ہَن او سارے کٹھے راہندے تے اُنہاں دیاں سبھ چیزاں سانجھیاں ہَن۔ 45تے آپنڑا مال اسباب ویچ تے ہر ہِک کُوں اُوندی ضرورت دے مطابق پیسے وَنڈ ڈیندے ہَن۔ 46او ہر روز ہِک دل تھی تے ہیکل ءچ جمع تھیندے تے گھراں ءچ روٹی تروڑ تے#2:46 یعنی یسُوع مسیح دی قُربانی یاد کریندے ہَن۔ خوشی تے سادہ دِلی نال کٹھے کھانڑا کھاندے ہَن۔ 47تے خُدا دی حمد کریندے تے سارے لوکاں دی نظر ءچ مقبول ہَن۔ تے خُداوند ہر روز نجات پاوݨ آلیاں کُوں جماعت ءچ شامل کر ڈیندا ہا۔
Currently Selected:
اعمال 2: SKRV
Highlight
Share
Copy
Want to have your highlights saved across all your devices? Sign up or sign in
Modern Central Saraiki Bible © 2024 Strategic Resource Group
