مرقس 12

انگُوراں دے باغ دے ٹھیکیداراں دی مثال

1وَل یسُوع اُنہاں نال مثالاں ءچ گالھیں کرݨ لگا جو ”ہِک بندے انگُوراں دا باغ رہایا تے اُوندے چودھارُوں واڑ ڈِتی تے انگُوراں دا رَس کڈھنڑ کیتے ہِک حوض کھٹیا تے چوکیداری کیتے ہِک بُرج بنڑایا۔ وَل او انگُوراں دا باغ ٹھیکیداراں کُوں کاشتکاری کیتے ڈے تے خود پردیس چلیا گِیا۔ 2وَل پھل دے موسم ءچ اُوں ہِک نوکر کُوں ٹھیکیداراں دے کولھ پھل دا آپنڑا حصہ گِھننڑ کیتے بھیجیا۔ 3پر اُنہاں اُونکُوں پکڑ تے کُٹیا تے خالی ہتھ بھیج ڈِتا۔ 4وَل اُوں ہِک بئے نوکر کُوں بھیجیا پر اُنہاں اُوندا سر پھاڑ ڈِتا تے بے عزت کیتا۔ 5وَل اُوں ہِک بئے کُوں بھیجیا تے اُنہاں اُونکُوں قتل کر ڈِتا۔ اِینویں ای بہُوں بندے بھیجے۔ ٹھیکیداراں اُنہاں ءچوں کُجھ کُوں کُٹیا تے کُجھ کُوں قتل کر ڈِتا۔

6ہُنڑ ہِکو راہندا ہا جیہڑا اُوندا پیارا پوتر ہا۔ آخر ءچ اُوں آپنڑے پوتر کُوں ایہ سوچ تے اُنہاں دے کولھ بھیجیا جو او میڈے پوتر دا تاں لحاظ کریسن۔

7پر ٹھیکیدار آپس ءچ آکھنڑ لگے جو ’اِیہو وارث ہے۔ آؤ اِینکُوں قتل کرُوں۔ جائیداد ساڈی تھی ویسی۔‘ 8بس اُنہاں اُونکُوں پکڑ تے قتل کر ڈِتا تے انگُوراں دے باغ کنُوں باہر سَٹ ڈِتا۔

9ہُنڑ باغ دا مالک کیا کریسی؟ او آ تے اُنہاں ٹھیکیداراں کُوں ہلاک کریسی تے انگُوراں دا باغ ڈُوجھیاں دے حوالے کر ڈیسی۔ 10کیا تُساں ایہ نوِشتہ وی نئیں پڑھیا جو

’جِیں پتھر کُوں مِستریاں رَد کر ڈِتا

اُوہو کونے دے سرے دا پتھر تھی گِیا۔

11ایہ رب العالمین دی طرفوں تھیّا،

تے ساڈی نظر ءچ حیران کُن ہے#زبُور 118‏:22‏،23۔‘؟“

12اِیں تے یہُودی راہنما یسُوع کُوں پکڑن دی کوشش کرݨ لگے کیوں جو او سمجھ گئے ہَن جو ایہ مثال اُنہاں دے خلاف آکھی گئی ہے پر لوکاں دے ڈر دی وجہ کنُوں اُونکُوں چھوڑ تے چلے گئے۔

ٹیکس ڈیوݨ دے بارے ءچ سوال

13وَل اُنہاں کُجھ فریسیاں تے ہیرودیس دے پیروکاراں کُوں اُوندے کولھ بھیجیا تاں جو اُوندی کوئی گالھ پکڑ سگن۔ 14اُنہاں آ تے یسُوع کُوں آکھیا، ”اُستاد، اساں جانڑدے ہیں جو تُساں سچے ہیوے، تے کہیں دی پرواہ نئیں کریندے، کیوں جو تُساں کہیں دے طرفدار نئیں بلکہ سچائی نال خُدا دی راہ ڈسیندے ہیوے۔ بس رومی بادشاہ قیصر#12‏:14 یعنی بُت پرست رومی شہنشاہ۔ کُوں ٹیکس ڈیوݨ جائز ہے یا نئیں؟ اساں ڈیؤں یا نا ڈیؤں؟“

15یسُوع اُنہاں دی مکاری کُوں معلوم کر تے اُنہاں کُوں آکھیا، ”تُساں میکُوں کیوں پھساوݨ دی کوشش کریندے ہیوے؟ میڈے کولھ ہِک دینار گِھن آؤ جو مَیں ڈیکھاں۔“

16او گِھن آئے۔ اُوں اُنہاں کنُوں پُچھیا، ”اِیندے اُتے کیندی تصویر تے ناں ہے؟“

اُنہاں آکھیا، ”قیصر دا۔“

17یسُوع اُنہاں کُوں آکھیا، ”جیہڑا قیصر دا ہے او قیصر کُوں، تے جیہڑا خُدا دا ہے او خُدا کُوں ڈِتا کرو۔“

او یسُوع دی گالھ سُنڑ تے بہُوں حیران تھئے۔

مُردیاں دی قیامت دے بارے ءچ سوال

18وَل صدوقیاں جیہڑے قیامت دے مُنکر ہَن، یسُوع دے کولھ آ تے اُونکُوں ایہ سوال کیتا جو 19”اُستاد! ساڈے کیتے مُوسیٰ لِکھیا ہے جو ’جے کہیں دا بِھرا مر ونجے تے آپنڑی ذال بے اولاد چھوڑ ونجے تاں اُوندا بِھرا اُوندی ذال نال شادی کر گِھنے تاں جو آپنڑے بِھرا کیتے نسل پیدا کرے#اِستِثنا 25‏:5۔ ۔‘ 20سَت بِھرا ہَن۔ پہلے شادی کیتی تے بے اولاد مر گِیا۔ 21وَل ڈُوجھے بِھرا اُوں بیوہ نال شادی کیتی پر او وی بے اولاد مر گِیا تے اِینویں ای تریجھے کیتا۔ 22تے اِینویں ای ستّاں اُوں عورت نال شادی کیتی پر بے اولاد مر گئے، تے آخر ءچ او عورت وی مر گئی۔ 23قیامت ءچ او کیندی ذال ہوسی؟ کیوں جو او ستّاں دی ذال بنڑی ہئی۔“

24یسُوع اُنہاں کُوں آکھیا، ”کیا تُساں اِیں سبب تُوں گُمراہ نئیں جو نہ خُدا دے کلام کُوں جانڑدے ہیوے، نہ خُدا دی قُدرت کُوں؟ 25کیوں جو جِیں ویلے لوک مُردیاں ءچوں زندہ تھیسن تاں اُنہاں ءچ شادی ویاہ نہ ہوسی، بلکہ اسمان اُتے فرشتیاں وانگُوں ہوسن۔ 26پر اِیں بارے ءچ جو مُردے زندہ تھیندے ہِن، کیا تُساں مُوسیٰ دی کتاب ءچ بلدی ہوئی جھاڑی دے بیان ءچ ایہ نئیں پڑھیا جو خُدا مُوسیٰ کُوں آکھیا، ’مَیں ابرہام دا خُدا تے اِضحاق دا خُدا تے یعقُوب دا خُدا ہاں#خرُوج 3‏:6۔ ؟‘ 27او مُردیاں دا خُدا نئیں بلکہ زندیاں دا خُدا ہے۔ بس تُساں بالکل گُمراہ ہیوے؟“

سبھ کنُوں وڈا حُکم

28شریعت دے عالماں ءچوں ہِک اُنہاں کُوں تکرار کریندے سُنڑ تے جاݨ گِھدا جو یسُوع اُنہاں کُوں چنگا جواب ڈِتے۔ او کولھ آیا تے اُوں کنُوں پُچھیا جو ”سبھ حُکماں کنُوں وڈا حُکم کیہڑا ہے؟“

29یسُوع جواب ڈِتا، ”اوّل ایہ ہے، ’اِسرائیل! سُنڑ، رب العالمین ساڈا خُدا ہِک ای خُدا ہے۔ 30تُوں رب العالمین آپنڑے خُدا نال آپنڑے سارے دل تے آپنڑی ساری جان تے آپنڑی ساری عقل تے آپنڑی ساری طاقت نال محبت رکھ#اِستِثنا 6‏:4‏،5۔ ۔‘

31ڈُوجھا ایہ ہے جو ’آپنڑے ہمسائے نال اُونویں ای محبت رکھ جِینویں آپنڑے نال رکھیندیں#احبار 19‏:18۔ ۔‘ اِنہاں کنُوں وڈا بِیا کوئی حُکم نئیں۔“

32شریعت دے عالم اُونکُوں آکھیا، ”اُستاد! بہُوں خُوب، تُساں سچ آکھیا ہیوے جو خُدا ہِک ای ہے تے اُوندے علاوہ بِیا کوئی نئیں۔ 33تے اُونکُوں سارے دل تے ساری عقل تے ساری طاقت نال محبت رکھنڑ تے آپنڑے ہمسائے کُوں آپنڑے وانگُوں پیار کرݨ سبھ ساڑے ونجنڑ آلیاں قُربانیاں تے نذراں کنُوں ودھ ہے۔“

34جِیں ویلے یسُوع ڈِٹھا جو اُوں عقلمندی نال جواب ڈِتے تاں اُونکُوں آکھیا، ”تُوں خُدا دی بادشاہی کنُوں دُور نئیں۔“

تے وَل کہیں اُوں کنُوں سوال کرݨ دی جُرأت نہ کیتی۔

مسیح دے بارے ءچ سوال

35وَل یسُوع ہیکل ءچ تعلیم ڈیندے ہوئے آکھیا جو ”شریعت دے عالم کیونکر آدھے ہِن جو المسیح داؤد دا پوتر ہے؟ 36داؤد خود رُوح القُدس دی ہدایت نال آکھیا جو

’رب میڈے مالک کُوں آکھیا

میڈے سجے پاسُوں بہہ

جئیں تئیں مَیں تیڈے دُشمنڑاں کُوں

تیڈے پیراں دے تلے نہ کر ڈیواں#زبُور 110‏:1۔۔‘

37داؤد تاں خود اُونکُوں مالک آدھے وَل او اُوندا پوتر کِینویں تھی سگدے؟“

سبھ لوک خوشی نال یسُوع دی سُنڑدے ہَن۔

یسُوع شریعت دے عالماں دے خلاف خبردار کریندے

38وَل یسُوع آپنڑی تعلیم ءچ آکھیا جو ”شریعت دے عالماں کنُوں خبردار رہوائے جیہڑے لمبے لمبے چولے پا تے پِھرݨ پسند کریندے ہِن تے چاہندے ہِن جو لوک بازاراں ءچ اُنہاں کُوں سلام کرݨ، 39تے عبادت خانیاں ءچ اُچے درجے دیاں کُرسیاں تے ضیافتاں ءچ صدارت چاہندے ہِن۔ 40او بیوہ عورتاں دے گھراں کُوں ہڑپ کر گِھندے ہِن تے ڈِکھاوے کیتے لمبیاں لمبیاں دُعاواں کریندے ہِن۔ اُنہاں کُوں زیادہ سزا مِلسی۔“

ہِک بیوہ دا نذرانہ

41وَل یسُوع ہیکل دے خزانے دے سامنڑے بہہ تے ڈیدھا پِیا ہا جو لوک ہیکل دے خزانے ءچ پیسے کِینویں سٹیندے ہِن۔ بہُوں سارے دولت مند بہُوں کُجھ سٹیندے پئے ہَن۔ 42وَل ہِک غریب بیوہ اُتھاں آئی تے اُوں تانبے دے ڈُو چھوٹے#12‏:42 متن ءچ ڈُو دمڑیاں لِکھیا ہے۔ ایہ سبھ کنُوں چھوٹے تے گھٹ قیمت آلے سِکے ہَن۔ سِکے سٹے۔ 43یسُوع شاگرداں کُوں کولھ سڈ تے آکھیا، ”مَیں تُہاکُوں سچ آدھا ہاں جو جیہڑے ہیکل دے خزانے ءچ سٹیندے پئے ہِن، اِیں غریب بیوہ اُنہاں سبھ کنُوں زیادہ سٹیا ہے۔ 44کیوں جو ساریاں آپنڑی بہُوں دولت ءچوں کُجھ حصہ سٹیا پر اِیں بیوہ آپنڑی غریبی ءچ وی جیہڑا کُجھ اُوندے کولھ گُزارے کیتے ہا، او سبھ سَٹ ڈِتا۔“

Currently Selected:

مرقس 12: SKRV

Highlight

Copy