Mateu 6
6
Nvitsãturã ti Dicunji, Rugãciunea sh-Pãreasinji
1Isusul dzãsi: “Bãgats mintea s-nu fãtsets ghini nãintea a oaminjlor, tsi elji s-vã alavdã a voauã, altã soi nu va vã arãsplãtits di la Tatãl a vostru tsi easti tu tseruri.
2Cãndu s-dai dicunji, nu bati trumpeta nãintea a ta, ashã cum fac ipucritslji tu sinagogã sh-pri cãljuri, tra s-hibã tinjisits di oaminjlji. Dealihea vã dzãc ca elji tora u-au loatã arãsplata a lor. 3Cãndu fatsi ghini, astãnga a ta s-nu shtii tsi fatsi a andrepta a ta. 4Cãndu u fats buneatsa a ta, s-facã pri ascumtu. Sh-Tatãl a tãu tsi veadi pri ascumtu, elu va-ti arãsplãteascã a tsãia nãintea a tutulor.
5Sh-cãndu vã rugats, nu vã fãtsets ca ipucritslji cã a lor lã arãseashti s-roagã mproshtsã tu sinagogã, sh-tu pãdzili a cãljurilor tra s-hibã vidzut di oaminjlji. Dealihea vã dzãc cã elji tora u au loat arãsplata a lor. 6Ma tini cãndu ti rodzi intrã tu udãlu a tãu, ncljidi usha sh-roagã-ti a Tatãlui a tãu pri ascumtu. Sh-Tatãl a tãu tsi veadi pri ascumtu va ti arãsplãteascã nãintea a tutulor. 7Cãndu vã rugats s-nu folosits idyili zboari ca pãngãnjlji, cã elji minduescu cã va si-mplineascã rugãciunea cã au dzãsã multi zboari. 8Nu vã fãtsets ca atselji, cã Tatãl a vostru li shtii tuti di tsi avets ananghi, ma nãinti tsi voi s-li cãftats.
9Ma voi rugats-vã ashã:
‘Tatãl a nostru tsi eshti tu tseruri,
si sãmtseascã numa a ta.
10S-yinã amirãriljea a ta. Si s-facã vrearea a ta tu loc, ashã di cum tu tser.
11Pãnea a noastrã di cathi dzuã, dã-nã-u a noauã azã.
12Sh-ljeartã-nã amãrtiili a noastri, ashã di-cum sh-noi lã ljirtãm a amãrtioshilor a noshtri.
13Sh-nu nã alasã s-cãdem tu cãrteari, ma nã ascapã di atsel arãu. [Cã a ta easti amirãriljea, putearea, sh-mãrirea di totãna]#6:13 Tu alti manuscrituri nu sã aflã atseli zboari.. Amen.’
14Cã macã voi lã ljirtats a oaminjlor amãrtiili a lor, Tatãl a vostru dit tser va vã li ljeartã sh-a voauã. 15Ma, macã voi nu lã ljirtats a oaminjlor amãrtiili a lor, nitsi Tatãl a vostru nu va li ljeartã amãrtiili a voastri.
16Sh-cãndu s-tsãnets pãreasinji s-nu vã spunets nvirinats ca ipucritslji. Cã elji aspargã fãtsili tsi s-aspunã a oaminjlor cã tsãnã pãreasinji. Dealihea vã dzãc cã elji tora u-au loatã arãsplata a lor. 17Iarã tini, cãndu s-tsãnji pãreasinji, aundzi caplu sh-aspealã fatsa a ta, 18tra s-nu lã aspunji a oaminjlor cã tini ma tsãnji pãreasinji, ma a Tatãlui a tãu pri ascumtu sh-Tatãl a tãu cai mutreashti pri ascumtu, va ti arãsplãteascã nãintea a tutulor.”
Ayishtearea Tsereascã
19“Nu adunats trã voi ayishteari pri loc, iu li aspargã molitsa sh-arudzina, sh-iu furlji sapã shi furã. 20Ma adunats trã voi ayishteari tu tser, iu nitsi molitsa, nitsi arudzina nu li aspargu, sh-iu furlji nu sapã shi nu furã. 21Cã iu easti ayishtearea a voastrã, aclo va hibã sh-inima a voastrã.
22Lunjina a truplui easti ocljiu. Macã ocljiul a tãu easti curat, tut truplu va hibã lunjinat. 23Macã ocljiul a tãu easti arãu, tut truplu a tãu va hibã tu scutidi. Macã lunjina tsi easti la tini easti scutidi, cãt ma mari va hibã scutidlu!
24Vãrã nu poati s-huzmitipseascã la doi domnji. Cã icã va s-lu aurascã unlu sh-alantu va lu va, icã va armãnã pistimen la unlu, sh-va dispretsueascã alantu. Nu pots s-huzmitipseshti a Dumnidzãlui sh-a pãradzlor.”
S-nu Avets Gaile
25“Trã atsea ma vã dzãc: Nu minduits ti bana a voastrã, tsi va mãcats shi tsi va bets, nitsi ti truplu a vostru trã atsea tsi va nvishtets. Vahi nu easti bana ma scumpã di cãt hrana, sh-truplu ma scumpu di nvishtearea? 26Mutrits puljilji a tserlui, elji nu seaminã, nitsi seatsirã, nu adunã tu hãmbãri, cu tut atsea Tatãl a vostru dit tser lji hrãneashti. Nu custusits voi ma multu di cãt atselji? 27Sh-cai di voi cu tut cãshtiga a lui poati s-adavgã la stãtura a lui macari un cubit singur?
28Cãtse vã cãrtits di nvishtearea a voastrã? Mutrits cum creascã zãmbãtslji a cãmpului, nu lucreadzã sh-nitsi torcu. 29Sh-ma vã dzãc cã nitsi Solomonul, cu tutã mãrirea a lui, nu eara nviscutã ca vãrã di elji. 30Tora macã Dumnidzãlu u-nveashti ashã iarba a cãmpului tsi azã easti sh-mãni va si s-arucã tu cireapu, vahi nu va vã-nveascã a voauã ma multu, oaminji pisti-putsãn? 31Nu vã cãrtits dzãcãnda: ‘Tsi va mãcãm icã tsi va bem, icã cu tsi va nã nvishtem?’ 32Cã suntu pãngãnjlji tsi caftã tuti aesti lucri. Tatãl a vostru di tser shti ghini cã voi avets ananghi trã tuti aesti lucri. 33Ma, nãinti di tuti cãftats amirãriljea a Dumnidzãlui shi ndriptatea a lui sh-tuti aesti ananghi va s-vã adavgã a voauã. 34S-nu avets gaile trã dzua di mãni. Cã dzua di mãni va si s-cãshtigheadzã di nãsã. Lj-agiundzi a dzuãljei cãshtiga a ljei.”
Currently Selected:
Mateu 6: BLRR
Highlight
Share
Copy
Want to have your highlights saved across all your devices? Sign up or sign in
