Marc 13
13
Prufitsia di Templu
1Cãndu elu ma inshea di templu, un di ucenitsilji a lui lj-dsãsi: “Nvitsãtore, vedz tsi chetri shi tsi adãrãturi!” 2Shi Isus apãndisinda lj-dsãsi: “Li videts aesti adãrãturi mãri? Nu va s-armãnã cheatrã pisti cheatrã ni dãrãmat.”
Ahurhirea a Dureriljei di Amãntari
3Shi dupã tsi elu eara apunat pri Muntili a Masnjilor nãinti a tempului, Petrul, Iacovul, Ioanul shi Andrea lu ntribarã dinãparti: 4“Dzã-nã, cãndu va s-facã aesti lucri shi cai va s-hibã semnul a chiroului tsi tuti atseali lucri va s-ascapã?” 5Isus apãndisinda a lor ahurhi sã-dzãcã: “Bãgats mintea s-nu vã-arãdã vãrã. 6Cã va-s yinã multsã pi numa a mea dzãcãnda: ‘Mini escu Hristolu.’ Shi va si s-arãdã multsã oaminj. 7Ma cãndu s-avdzãts si zburãscu di alumti shi di hãbãri di alumttã, nu vã cutrimburats, cã aesti lucri prindi si s-adarã, ma nu va s-hibã bitisita. 8Va sã scoalã natsiunea contra a natsiunãljei, amirãriljea contra a amirãriljei, va s-facã cutremburi pri multi locuri, va s-hibã jeali di pãni. Atseli lucri va s-hibã ahurihirea a durearilor di amintari. 9Cãshtigats-vã ti bana a voastrã! Cã va vã prida la giudicãtorlji shi va vã batã tu sinagogã. Va vã scoatã nãinti a guvernatorilor shi amiradzilor di itia a mea tsi s-mãrtirsits nãinti a lor. 10Ma nãinti prindi tsi s-hibã predicatã evanghelul la tuts oaminjli. 11Tora cãndu va v-aducã s-vi prida, s-nu avets gaile di manãinti trã atsea tsi prindi s-dsãtsetsã shi s-nu mintuits. Ma dsãtsets tsi vã yini tu minti tu oara atsea, cã nu hits voi tsi grits ma easti Duhlu Sãmtu. 12Tora fratili va prida fratilu a lui la moarti shi tatlãlu hiljilu, shi hiljilji va sã scoalã contra a pãrintsilor shi va lã facã s-moarã. 13Shi voi va s-hits aurats di tuts di itia a numãljei a mea, ma atselu tsi va sã aravdã pãnã tu soni, va s-hibã ascãpat.”
Mundirea Atsea Marã
14“Shi cãndu s-lu videts urãtsãmea a-aspãrgãturãljei [tsi easti spusã di prufitul Daniel], tsi sta aclo iu nu prindi s-eara [cai ghivãseashti s-lu aducheascã], atumtsea atselji tsi va s-hibã tu Iuda, a s-fugã pri muntsã. 15Shi atselu tsi easti pri citia a casãljei, s-nu dipunã, sh-nitsi s-intrã tu casã di loari tsiva di la casa-a lui. 16Shi atselu tsi va s-hibã tu cãmpu, si-nu s-toarnã nãpoi di loari stranjilu a lui. 17Tora cavai di muljerili sãrtsinati shi atseali cu njitsi tu sinã, tu atseali dzãli. 18Shi pãrãcãlsits-vã tsi fudzirea a voastrã s-nu hibã iarna. 19Cã tu atsea dzuã va s-hibã una munduiri marã, ma marlu ditu apãrnjita a adãrarãljei a omlui tsi featsi Dumnidzãlu pãnã azã, shi ahtari nu va s-aibã pute. 20Shi macã Domnulu nu va li-avea shcurtatã atseli dzãli, nitsiunã om nu va s-ascãpa, ma Domnulu li shcurtã atseali dzãli di itia a aleptsilor tsi elu lã aleapsi. 21Atumtsea macã vãrã va vã-dzãcã: ‘Ia, Hristolu easti aoa’, icã: ‘Easti aclo’, nu lu pistipsitsã. 22Cã va s-aspunã hristoshi arãdioshi shi prufits arãdioshi tsi va s-facã semnji shi thavmati tsi s-arãdã, ma s-poatã shi aleptsãlji. 23Ma voi bãgats minti! Ia, mini vã spushã ti itsido.”
Nturnarea a Hiljilui a Omului
24“Ma tu atseali dzãli, dupã atsea munduiri, soarili va sã scutidiseascã shi luna nu va s-da anghilicirea a ljei, 25stealili a tserlui va s-cadã shi puterili tu tseruri va s-trundueascã. 26Atumtsea va lu veadã Hiljilu a omlui yininda pri niori, cu puteari mari shi mãriri. 27Atumtsea elu va pitreacã anghilji a lui shi va li-adunã aleptsãlji a lui dit patruli vimturi, dit mardzina a loclui pãnã tu mardzina a tserlui.”
Parabola al Hiclu
28“Tora achicãsits nvitsãtura a hiclui: cãndu dedzili a lui s-muljeadzã shi scoatã frãndzi, voi u shtits cã veara easti aproapi. 29Ashã shi voi, cãndu va videts cã ma s-facã aesti lucri, s-lu shtits cã easti aproapi, ningã ushã. 30Dealihea ma vã dzãc: cã aestã gheneratã nu va s-treacã, pãn cãndu tuti aesti va s-hibã adrati. 31Tserlu shi loclu va s-treacã, ma zboarili a meali nu va s-treacã.”
Bagats Oarã ti Chirolu di Soni
32“Cãt di atsea dzuã shi di atsea oarã, nitsiun nu lu shti, nitsi anghilji dit tser, nitsi Hiljilu, ma mashi Tatãlu. 33Bãgats minti, s-hits dishtiptat shi pãrãcãlsits-vã, cã nu lu shtits cãndu va s-hibã oara. 34Easti cabunoarã un om tsi nchisinda ti cali, alasi casa a lui shi da puteari a huzmichearilor a lui, cathiun tu loclu a lui, shi portarlu lu urseashti s-hibã dishtiptat. 35S-hits dishtiptats, cã nu lu shtits cãndu va s-yinã domnulu ali casi, seara ma njeadzãnoapti, cãndu cãnti cucotulu, ma dimineatsa. 36Elu turnãnda niashtãptat, s-nu vã aflã tu somn. 37Tora, aestã tsi vã dzãcã a voauã, lu dzãcã a tutulor: S-hits dishtiptat!”
Currently Selected:
Marc 13: BLRR
Highlight
Share
Copy
Want to have your highlights saved across all your devices? Sign up or sign in
