Marc 16
16
Injearea al Isus
1Cum tricu Sãmbãta, Maria Magdalena shi Maria, muma al Iacovu, shi Salomea, acumpãrarã njurizmati s-nãdzea s-aundzea Isusul. 2Dimineatsa tu prota dzuã a stãmãnãljei, multu curund, eali vinirã la murmint, cãndu ma insha soarili. 3Shi dzãtsea namisa di nãsi: “Cai va nã arucuteascã cheatra di la intrarea a murmintului?” 4Ma cãndu scularã ocljilji, vidzurã cã cheatra eara arucutitã cu tutã cã eara multu mari. 5Intrarã la murmintu shi vidzurã un tinir tsi eara apunat di nandreapta, nviscut cu albi, shi armasirã aspãrati. 6Shi elu lã dzãsi a lor: “Nu v-aspãrats! Voi cãftats Isus Nazareul tsi eara crutsisitã, elu s-injie, nu easti aoa. Ia, loclu iu eara bãgatã. 7Ma imnats s-lã-dzãtsets a ucenitsilor a lui shi a Petrul cã elu ma s-dutsi dininti tu Galile, aclo va lu videts ashi cum vã dzãsi.” 8Shi eali inshirã trãoarã shi fudzirã dit murmint cã li acãtsã cutremburlu shi ciudia, shi nu lji-dzãsirã tsiva a nitsunã cãtse avea fricã.
Isus Injeat Vidzut di Niscãntsi
9[Tora Isusul dupã tsi eara injat dimineatsa tu prota dzuã a stãmãnãljei, s-fãnipsi prota ali Marii Magdalena, di la cai avea aĝiunit shapti demonji. 10Ea s-dusi shi lu spusi atsilor tsi eara deadun cu nãsã tsi vãita shi plãndzea. 11Ma aeshtsã cãndu avdzãrã cã eara yiu shi s-vidzu di ea nu lu pistipsirã. 12Dupã aesti lucri, s-fãnipsi tu unã altã formã a doilor di nãsh, tsi ma nãdzea tu hoarã. 13Shi elji s-dusirã shi lu spusirã la alantsi, ma nitsi aeshti nu lu pistipsirã.
Isusul Injeat cu Ucenitsilji
14Tu soni s-fãnipsi a unsprãdzatsilor cãndu eara la measã shi l-aurlã trã nipistipsirea a lor shi trã chitrisirea a inimãljei, cã nu avea pistipsitã la nãsh tsi lu avea vidzutã injiat. 15Dapoea lã dzãsi a lor: “Nidzets tu tutã lumea shi predicats evanghelul a tutulor, 16atselu tsi pistipseashti shi s-pãtidzãshti, va s-hibã ascãpat. Ma atselu tsi nu ari pistipsit va s-hibã giudicat. 17Shi aesti sãntu semnili tsi va s-urmeadzã atselji tsi va s-pistipseascã: tu numa a mea elji va li aĝuneascã demonjilji shi va s-greascã limbi nali, 18shi va li acatsã cu mãna nãpãrtsili, shi macã va s-bea tsiva ti muriri, nu va s-facã tsiva arãu, va s-bagã mãnjili pi lãndzitsilji shi aeshti va s-vindicã.”
Scularea al Isus tu Tser
19Domnul Isus, dupã tsi lã gri, si sculã pi tser shi s-apunã di nandreapta a Dumnidzãului. 20Dapoea elji fudzirã shi predicarã iutsido, iarã Domnul lucra deadun cu nãshi shi lu confirma zborlu cu seamnili tsi li sotsãsea. Amen.]#16:9-20 Aesti stihuri nu s-aflã tu alti manuscrisi
Currently Selected:
Marc 16: BLRR
Highlight
Share
Copy
Want to have your highlights saved across all your devices? Sign up or sign in
