Marc 9
9
1Dapoea Isusul lã dzãsi a lor: “Dealihea vã-dzãc cã namisa di voi tsi hits aoa sãntu niscãntsã tsi nu-va u gusteadzã moartea nãinti s-veadã cã va s-yinã cu puteari amirãriljea al Dumnidzãu.”
Fãnipsirea al Isus
2Dupã shasi dzãli Isusul lo pri nãsu Petrul, Iacovul shi Ioanul sh-li adusi dinãparti, singur atselji pri un munti analtu. Shi s-alãxi nãintea a lor. 3Shi stranjili a lui si strãlutsirã shi s-featsirã albi ca neaua, ashã cum nu poati s-li alãgheasca nitsiun alghitor pri loc. 4Shi a lor lã si fãnipsi Ilia cu Moise tsi ma zbura cu Isusul. 5Atumtsea lu lo sborlu Petrul sh-lji dzãsi al Isus: “Nvitsãtore, trã noi easti ghini s-him aoa, s-adãrãm trei cãlivi, unã trã tini, unã trã Moise shi unã trã Ilia!” 6Shi elu nu-shtiea tsi dzãtsea, cã elji eara aspãrats.
7Dapoea vini unã nior tsi lã amvãli cu aumbra a lui, sh-dit nior inshi unã boatsã tsi dzãsi: “Aestu easti Hiljilu a meu vrut! Ascultats-lu!” 8Shi trãoarã elji vidzurã avãrliga, ma nu vidzurã vãrã, dicãt singur Isus cu nãshi. 9Tora cãndu ma dipuna dit munti, Isusul lã-ordinã si nu spunã a vãrui lucrili tsi avea vidzut, pãnã-cãndu Hiljilu a-omlui s-injeadzã dit mortsã. 10Elji lu tsãnurã sborlu shi s-ntriba un cu alantã cã tsi va s-dzãtsea s-injeadzã dit mortsã. 11Dapoea lu ntribarã dzãcãnda: “Cãtse scriblji dzãc cã ma nãinti prindi s-yinã Ilia?” 12Sh-elu, apãndisinda, lã dzãsi a lor: “Ilia dealihea prindi s-yinã ma nãinti shi s-adarã itsido. Ma ashã cum easti scriatã trã Hiljilu a-omlui, elu prindi s-hibã pidipsit shi s-dispretsuit. 13Ma mini ma vã-dzãc cã Ilia vini sh-cu nãs featsirã tsi vrurã, ashã cum easti scriatã ti nãsu.”
Ficiorlu Epileptic
14Cãndu s-turnã la ucenitsilji a lui, vidzu unã multsãmi marã avãrliga di nãshi sh-niscãnts scribi tsi ma si-ncãcea cu nãshi. 15Shi dinãoarã tuta multsãmea, cãndu lu vidzu, s-ciudisi shi vini trãoarã la nãsu ti salutari. 16Sh-elu lã ntribã scribilji: “Trã tse ma vã ncãceats cu nãshi?” 17Shi un dit multsãmea apãndisinda, dzãsi: “Nvitsãtore, ts-adush ficiorlu a meu tsi ari un duh mut, 18shi u-acatsi iutsido, lu-plãscãneashti shi elu spumeadzã, cãrtsãneashti dintsilji shi lji ngljeatsã cicioarili. Shi u dzãsh a ucenitsilor a tãlji su-aĝuneascã, ma elji nu puturã s-lu facã.” 19Shi elu apãndisinda, dzãsi: “Gheneratã tsi nu-pistipseshti, pãnã-cãndu va s-hiu cu voi? Pãnã-cãndu va s-vã aravdã? Adutsets-lu aoa!” 20Sh-elji lu-adusirã. Macãt duhlu lu vidzu, lu-plãscãni cu fuchiã cilimeanlu tsi avea cãdzut mpadi, shi s-arucutea spumãnda. 21Sh-Isusul lu-ntribã tat-su a lui: “Cãt chiro ari tsi s-fatsi aestã?” Sh-elu dzãsi: “Di cu njic. 22Di multi ori lu ari arucatã tu foc sh-tu apã tra s-lu cheardã, ma s-pots s-fats tsiva, s-ai njilã trã noi shi nã agiutã!” 23Sh-Isusul lji-dzãsi: “Macã tini pots s-pistipseshtã, itsido easti puptut trã atselu tsi pistipseashti.” 24Dinãoarã tatlu a-ficiorlui, aurlãnda cu lãcri, dzãsi: “Mini pistipsescu, Doamne, agiutã ni-pistipsirea a mea!”
25Atumtsea Isusul, vidzãndã cã multsãmea ma yinea trãoarã, lã aurlã a duhlui nicurat, dzãcãnda: “Tini duh tsi l-fats mut shi surdã, mini ti ursescu, eshi di la nãsu shi nu intrã pute la nãsu.” 26Sh-demonul, aurlãnda shi trunduinda, inshi di la nãsu. Sh-ficiorlu armasi ca mort, ashã cãt mults oaminj dzãtsea: “Ari murit.” 27Ma Isusul lu-acãtsã di mãnã, lu-sculã shi elu shãdzu pi cicioari. 28Cãndu Isusul intrã tu casã, ucenitsilji a lui lu ntribarã dinãparti: “Cãtse noi nu putum s-lu aĝunim?” 29Shi elu lã dzãsi a lor: “Aestã soi di duhuri nu-pots si li aĝuneshti altã soiã, dicãt cu pãrãcãlsiri.”
Isus Spuni Pridarea a Lui
30Dupã tsi s-nchisirã di aclo, tricurã pri Galilei, sh-elu nu vrea s-lu shtibã vãrã. 31Elu lã-nvitsa ucenitsilji a lui shi lã dzãtsea a lor: “Trãoarã Hiljilu a-omlui va si s-prida tu mãnjili a oamnjilor shi elji va lu vatãmã, sh-dupã tsi va s-hibã vãtãmatã, elu va s-injeadzã a-treia dzuã.” 32Ma elji nu li-achicãsea atseali zboari shi avea fricã s-lu ntriba Isusul.
Ma Marlu tu Amirãriljea al Dumnidzãul
33Shi agiumsirã tu Capernaum, shi cãndu intrã n-casã, lã-ntribã: “Trã tsi vã ntribats namisa di voi pri cali?” 34Ma elji pãpsirã, cã pri cali dzãtsea cu un-alantã cã cai di elji easti ma marlu. 35Atumtsea elu shidzu, lã acljimã di doisprãdzatsilji sh-lã dzãsi a lor: “Macã vãrã va s-hibã protlu, prindi s-hibã ma nãpoi di tuts shi huzmichearlu a tutlor.” 36Shi-lo un cilimeanã sh-lu bãgã namisa a lor. Dapoea lu-lo mbratsã sh-lã dzãsi a lor: 37“Caitsido tsi aproachi un dit aeshtã cilimenji tu numa a mea, mi aproachi mini, shi caitsido tsi mi aproachi mini, nu mi aproachi mini, ma atselu tsi mi ari pitricut.”
Cai Easti cu Isus
38Atumtsea Ioanul lo sborlu sh-dzãsi: “Nvitsãtore, noi vidzum un om tsi nu nã-urmeadzã, tsi li aĝunea demonjli tu numa a ta, sh-noi lu chidicãm cã elu nu yinea dupã noi.” 39Ma Isusul dzãsi: “Nu lu chidicatsã cã nu ari om tsi poati s-facã thavmã tu numea a mea, sh-ma napoiã s-greascã arãu trã mini. 40Cã cai nu easti contra a noi, easti cu noi. 41Caitsido tsi va vã da unã cupã cu apã tu numa a mea, cã hits a Hristolu, dealihea va vã-dzãcã cu sigurantsã cã nu va s-chearã plãtirea a lui.
Scãndãljili
42Shi cai va si scandalizeadzã un di aeshti njitsilji tsi pistipseascã la mini, va eara ma ghini ti nãsu s-lji spindzira tu zvercã unã cheatrã marã di moarã sh-si s-arucã tu amari. 43Tora, macã mãna a ta ti scandalizeadzi ti amãrtii, taljiu, easti ma ghini trã tini s-intsãr tu bana eternã cu mãna tsungã, dicãt s-ai dau manji shi s-ti duts tu Gehena, tu foclu tsi nu s-astindzi pute. 44[Aclo iu iermul a lor nu moari sh-foclu nu s-astindzi.]#9:44,46 Aesti douã stihuri nu s-aflã tu alti manuscrisi. 45Macã ciciorlu a tãu ti scandalizeadzi ti amãrtii, taljiu, easti ma ghini trã tini s-intsrã tu banã shcljiop, dicãt s-ai doau cicioari shi s-ti arucã tu Gehena, tu foclu tsi nu s-astindzi pute. 46[Aclo iu iermul a lor nu moari sh-foclu nu s-astindzi pute.] 47Sh-macã ocljiul a tãu ti adutsi tu amãrtii, scoat-lu. Easti ma ghini trã tini s-intsrã tu banã cu un ocljiu, dicãt s-ai doi oclji shi s-ti arucã tu Gehena, 48aclo iu iermul a lor nu moari sh-foclu nu s-astindzi pute. 49Cã caitsido prindi s-sãreadzã tu foc shi itsi curban prindi s-sãreadzã cu sari. 50Sarea easti bunã, macã sarea cheari njurizma, cu tsi va lu turnats njiurizma? S-avets sari pri voi shi bãnats tu pace namisa di voi.”
Currently Selected:
Marc 9: BLRR
Highlight
Share
Copy
Want to have your highlights saved across all your devices? Sign up or sign in
