SEEMTIRNAK 4
4
Kain Le Abel
1Cun Adam le a nupi Evi cu an pawl-aw ih Evi cu nau a keng. Fapa a nei ih, “Bawipa ih bomnak in fapa ka nei #4.1 Ka nei ti le Kain ti cu Hebru ṭong in an aw suahdan a bang aw. a si,” ti ah a ti. Cuhrangah a hmin ah Kain a sak. 2Cuih hnuah a naupa Abel a hring sal. Abel cu tuukhal a si ih Kain cu lothlo a si. 3Caan a hung rei deuh tikah Kain cun a lo sungih a suakmi rawl pawl kha Bawipa a pek. 4Cuih hnuah Abel khal in a tuu faate suak hmaisa bik pawl a that ih a sa ṭhatnak bik Bawipa a pek ve. Abel tlun le a pekmi parah Bawipa cu a lung a kimzet; 5asinain Kain le a pekmi parah Bawipa cu a lung a kim lo. Cutikah Kain cu a thin a heng ih a mithmai a sia. 6Cutikah Bawipa in Kain hnenah, “Ziangah so na thin a heng? Ziangah so na mithmai a siat? 7A ṭhami tuah cila cohlan na si ko ding; sikhalsehla a ṭha lomi na tuah ruangah sualnak in nangmah neh dingah sahrang bangin sangka in a lo bawh; uk a lo tum; asinain na neh hrimhrim a ṭul ding,” ti ah a ti.
8Cule Kain in a naupa Abel hnenah, “Hramlak ah feh uhsi,” #4.8 Hramlak ah feh uhsi: timi hi Hebru Baibal sungah a um lo; asinain khuahlan ih nganmi Grik Baibal sungah a um. ti ah a ti. Hramlak an thlen tikah Kain in Abel cu a zon ih a thah.
9Cutikah Kain cu Bawipa in, “Na nau Abel khui-ah so a si?” ti ah a sut. Kain in, “Ka thei lo. Ka nau kilkhawitu-ah zo in so i tuah?” ti ah a let. 10Cun Bawipa in, “Zianghrangah hivek ṭihnungza thil hi na tuah? Phuhlam duh ih a aumi aw bangin na naupa ih thisen in leilung ihsin i hun ko rero a si. 11Atu-ah nang cu camsiat na si ih hi na umnak hmun ihsin dawihlo na si ding; ziangahtile na kut ih na suahmi na nau ih thisen cu kaa ang tahratih donmi vekin leilung in a hawp zo a si. 12Rawl na ciin khalle leilung in zianghman a suah lo ding ih umnak inn nei loin mivakvai na si ding,” ti ah a ti. 13Cutikah Kain in Bawipa hnenah, “Hremnak i pekmi cu a na tuk. 14Hi ram le na hmaika in i dawihlo ih tlunah lei parah hin inn nei lo le mivakvai ka si ding ih i hmutu pohpoh in in that ding,” ti ah a ti. 15Asinain Bawipa in, “Cutin a si lo; nangmah a lo thattu cu a letsarih ih phulak a si ding,” ti ah a ti. Cuhrangah Kain cu a hmutu pohpoh ih an thah lonak dingah Bawipa in a parah hminsinnak a ret. 16Cuih hnuah Kain cu Bawipa ih hmaika in a tlan ih Eden hmuan ih nisuahnak lam Nod,#4.16 Nod: timi cu Vahvaihnak tican a si. (Seem 4:12, tla ah a um.) timi ramah a um.
Kain Ih Tesinfa Pawl
17Kain le a nupi an pawl-aw ih a nupi cu nau a keng. Fapa a hring ih a hminah Enok a sak. Cule Kain cun khawpi pakhat a toh ih a fapa hmin suangin Enok a sak. 18Cun Enok in fapa a nei ih a hminah Irad a sak; Irad ih fapa cu Mehujael a si; Mehujael ih fapa cu Methushael a si; Methushael ih fapa cu Lamek a si. 19Lamek cun nupi pahnih a nei; pakhat cu Adah a si ih pakhat cu Zillah a si. 20Cun Adah in fapa a nei ih Jabal ti ah a ko. Jabal cu cawkhal pawl le puanthlam ih a ummi pawl cithlahtu a si. 21A naupa cu Jubal a si ih tingrisit le phirivau tumtu pawl cithlahtu a si. 22Cule Zillah in fapa a nei ih Tubal-Kain a si. Tubal-Kain cu thir le dar soser pawl cithlahtu a si. Tubal-Kain ih farnu cu Naamah a si.
23Cun Lamek in a nupi pawl ih hnenah,
“Ka nupi Adah le Zillah,
i ngaihnik uh,
I thawi ruangah
tleirawl pakhat ka that;
I tuahmawh ruangah
mi ka that a si.
24Kain a thattu parah
letsarih ih phuhlam a si ahcun,
Kei i tuahmawhtu cu
let sawmsarih let sarih in
phulak a si ding,” ti ah a ti.
Seth Le Enosh
25Cun Adam le a nupi cu an pawl-aw sal ih fapa pakhat an nei. “Kain in Abel a that ih a ai-ah Pathian in fapa i pe a si,” ti ah Evi in a ti ih a hminah Seth a sak. 26Seth in fapa a run nei ih Enosh ti ah an ko. A cuih thokin minung pawl in Bawipa cu a hmin ko in an biak.
Currently Selected:
SEEMTIRNAK 4: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
