SEEMTIRNAK 9
9
Noah Hnenih Pathian Thukam
1Cun Pathian in Noah le a fapa pawl cu a thluasuah ih an hnenah, “Fa tampi nei in pungzai uhla, leilung khuazakip ah nan tesinfa pawl khat hai seh. 2Lei parih a um ramsa hmuahhmuah, vate le nga pawl, lei parih a vak theimi ramsa fatebik tiangin an lo ṭih ding. Na kuthnuai ah ret thluh an si. 3Cule ramsa a nungmi hmuahhmuah le hanghnah hangrah pawl na ei ding; na rawl hrangah ka lo pe a si. 4Asinain a sa sungih a thi a um laiah cun na ei lo pei, ziangahtile thi cu nunnak a si. 5Cun mi a thattu cu thah a si ve ding. Mi a siatsuahtu ramsa cu siatsuah a si ve ding.
6Mi a thattu cu
Mi kutin a thi ve ding.
Ziangahtile milai cu
Pathian in amah bangin
a tuahmi a si.
7Cule fa tampi nan nei ding ih nan tesinfa pawl cu leitlun khuazakip ah an khat ding ih an karhzai ding,” ti ah a ti.
8Cuih hnuah Pathian in Noah le a fapa pawl hnenah, 9“Atu-ah thu ka lo kam; nanmah le nan tesinfa pawl hnenah siseh, 10nanmah thawn lawng sung ihsin a suakmi ramsa hmuahhmuah, vate le innzuat ṭilva le hramlak ramsa zate hnenah siseh, 11thukamnak ka tuah: ziangtik hmanah leilung parih nunnak a neimi hmuahhmuah tilik in a siatsuah nawn lo pei. Tilik in leilung cu a siatsuah nawn lo pei, tiin ka lo kam,” ti ah a ti.
12Cule Pathian in, “Nangmah le na hnenih a ummi ramsa hmuahhmuah hnenih kumkhua daih ka thukammi hminsinnak ah,
13Mero lakah vangro ka ret,
Ka thukammi theihternak ah a si.
14Lei parih mero a zaam tinte in,
Mero parah vangro nan hmu ding.
15Leilung ih nunnak a neimi hmuahhmuah cu tilik ih siatsuah nawn lo dingin nangmah le ramsa pawl hmuahhmuah hnenih ka thukam cu ka ciing ringring ding. 16Keimah le leilung parih a nungmi hmuahhmuah karlakih ka thukammi cu mero lakih vangro a langtinte in ka ciing ringring ding,” ti ah a ti.
17Cule Noah hnenah Pathian in, “Himi cu leilung par nunnak a neimi hmuahhmuah hnenih thu ka kammi hminsinnak a si,” ti ah a ti.
Noah Le A Fapa Pawl
18Lawng sung ihsin a suakmi Noah ih fapa pawl cu Shem, Ham le Jafet an si. (Ham cu Kanaan ih pa a si.) 19Hi Noah ih fapa pathum cu leilung milai hmuahhmuah cithlahtu an si.
20Noah cu lothlo a si ih hmaisa bik sabit hmuan tuahtu a si. 21Voikhat cu sabit a in hnuah a ri ih lawngfangkheh in a thlam sungah a it. 22Cumi cu Kanaan ih pa Ham in a hmuh tikah a unau an pahnih in a va sim. 23Cule Shem le Jafet cun puan an lak ih an liang dungah zaar tahratin an pa lawngte ih a ummi zoh ngam lo ah dungsip in thlam sungah an pan ih an pa cu an puan kenmi in an vung khuh. Kaa dang an hoi ruangah an pa lawngfangkheh ih a um cu an hmu lo. 24Cule Noah cu a ritnak in a fim sal ih a fapa nauta bik in a parih a tuahmi a theih tikah,
25“Kanaan cu camsiatmi siseh,
A unau pawl ih sal ah cang seh!
26Shem ih Pathian cu
thangṭhat si ko seh,
Kanaan cu Shem ih salah cang seh!
27Pathian in Jafet cu
ṭhangso pungzaiter seh,
A tefa pawl cu Shem ih
milai pawl thawn umtlang hai seh;
Kanaan cu Jafet ih sal siseh!”
ti ah a ti.
28Tilik hnuah Noah cu kum zathum le sawmnga a nung ih, 29kum zakua le sawmnga a ti ah a thi.
Currently Selected:
SEEMTIRNAK 9: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
