MARKA 16

Jesuh A Thosal

(Mat 28.1-8; Luk 24.1-12; Joh 20.1-10)

1Sabbath ni a cem hnuah Mari Magdalene, Jeim nu Mari le Salome in Jesuh ruak va culh dingah zihmui an lei. 2Nipi zing, nisuak zawng ah thlaan ah an va feh. 3Lamzin an feh phah ah, “Thlankhar lungphengpi teh zo in so in ṭhawn sak ding?” tiah pakhat le pakhat an sut aw. 4Cuih lung cu lungpheng hlaipi a si. Cule an hun zoh tikah lungphengpi cu a rak ṭhawn aw zo kha an hmu. 5Thlan sungah an vung lut ih tlangval pakhat puan rang sin in vorhlam kapih a to kha an hmu ih an phang ngaingai.

6Anih in, “Nan thin phang hlah uh! Thinglamtah ih an thahmi Nazareth Jesuh nan hawl ti ka thei. Hinah a um nawn lo, a thosal zo. An retnak hmun hi ra zoh hman uh. 7Va feh uhla a dungthluntu pawl le Piter kha ‘Nan hmaiah Galilee ah a feh ding. Cutawkah a lo sim cia vekin nan hmu ding,’ tiah va sim uh,” tiah a ti.

8Cutiin an suak ih thlaan ihsi cun thinphang le tuksum in an tlan. An ṭih tuk ruangah zo hnen hmanah ziang hman an sim lo.#16.8 Marka Thuthang ṭha hmaisa biklam nganmi kut ngan cazual sungah cun 16:8 hi a netnak a si. Nehhnu-ih run nganmi sungah 16.9-20 tiang a um.

MARKA THUTHANGṬHA NETNAK SAU

Mari Magdalene Hnenah Jesuh A Lang

(Mat 28.9-10; Joh 20.11-18)

9Nipi ni ah thihnak ihsin Jesuh a thawh hnuah a hmaisa bik ah Mari Magdalene hnenah a lang; Mari Magdalene cu a sung ihsin khuavang pasarih a dawisuahmi nunau kha a si. 10Mari Magdalene cu a feh ih a rualpi pawl a va sim. Cupawl cu Jesuh a thih ruangah mithi ngai in an ṭap rero. 11“Jesuh a nungsal zo, ka hmu a si!” tiah a sim tikah an zum lo.

Dungthluntu Pahnih Hnenah Jesuh A Lang

(Luk 24.13-35)

12Cuih hnuah Jesuh cu dungthluntu pahnih khawte lamih an feh laiah phun dangin an hnenah a lang. 13An kir ih midang pawl tla an sim, asinain annih khal in an zum lo.

Dungthluntu Hleikhat Hnenah Jesuh A Lang

(Mat 28.16-20; Luk 24.36-49; Joh 20.19-23; Dung 1.6-8)

14Neta bikah Jesuh cu dungthluntu hleikhat rawl an ei laiah an hnenah a lang. Zumnak an neih lo ruangah le amah a nungin a hmutu pawl an zum lo ih thinlung ruh an neih ruangah a kawk hai. 15Cule an hnenah, “Leilung khuazakip ah va feh uhla mi hmuahhmuah hnenah Thuthang ṭha va sim uh. 16Zokhal sisehla a zum ih baptisma a co ahcun rundam a si ding. Asinain a zum lotu cu hnon a si ding. 17A zumtu pawl cu mangbangza tuah theinak huham pek an si ding; ka hmin in ramhuai an dawi thei ding; ṭong thar in an ṭong ding; 18rul an kaih ah siseh, thihsii an in hmanah siseh, an zianghman a poi lo ding; mina parah an kut an suang ding ih mina cu an dam ding,” tiah a ti.

Vancung ah Jesuh A Kai

(Luk 24.50-53; Dung 1.9-11)

[19Bawipa Jesuh cu an hnenih thu a sim ṭheh hnuah vancungah laakso in a um ih Pathian vorhlam kapah a to. 20Cule dungthluntu pawl cu an feh ih khuazakip ah thu an sim; Bawipa cu an hnenah hna a ṭuan ih mangbangza an tuahmi in an thusim mi a dik a si, ti kha a langter.]

MARKA THUTHANGṬHA NETNAK TAWI

[9Nunau pawl cu Piter le a rualpi pawl hnenah an feh ih an theihmi thuhla cu a tawinak in an sim. 10Cuih hnuah Jesuh amah rori in kumkhua rundamnak thu, thu nung le thu thianghlim cu nisuahnak ihsin nitlaknak tiang a dungthluntu pawl hmangin a than a si.]

Currently Selected:

MARKA 16: FCL

Highlight

Copy