MATEO 10

Jesuse' cu yéeyic le doce aj canbalo'obo'

(Mc 3.13-19; Lc 6.12-16)

1Jesús túune' tu t'anaj u doce aj canbalo'obe' ca tu dzaj páajtalil ti'ob u ti'al u jóokesico'ob le kaakas pixano'obo' yéetel u ti'al u dzaquico'ob tuláacal koja'anilo'ob yéetel ki'inamilo'ob. 2U kaaba' le doce aj canbalo'obo' leti' lelo'oba': Yáaxile' Simón, máax kaaba'inta'ab xan Pedro, yéetel Andrés u yíidzin; Jacobo yéetel Juan u yíidzin, u paalalo'ob Zebedeo; 3Felipe, Bartolomé, Tomás yéetel Mateo le j kam patano'obo'; Jacobo u paal Alfeo; Lebeo máax kaba'inta'ab xan Tadeo; 4Simón, máax jun túul cananita; yéetel Judas Iscariote le máax tu kubaj Jesuso'.

Jesuse' cu túuxtic le aj canbalo'ob u ti'al u kayto'ob u ajawil Jajal Dios

(Mc 6.7-13; Lc 9.1-6)

5Jesuse' tu túuxtaj le docea' yéetel le tzol xiquino'oba': Ma' a bine'ex ti' le lu'umo'ob tu'ux caja'ano'ob le j ma' ocsaj óolo'obo', mix a wocle'ex tu caajilo'ob Samaria, 6xene'ex yáax táanil ti' u saatal j tamano'ob u caajil Israel. 7Xene'ex a tze'ecte'ex dzo'oc u náadzal u ajawil ca'an. 8Dza'ex u toj óolal ti' le máaxo'ob koja'ano'obo'; ca'a púut cuxquinte'ex le máaxo'ob quimeno'obo'; lukse'ex u koja'anil le máaxo'ob yaan jáaway ti'obo', jóokese'ex le kaakas pixano'obo'. Sibil ta kamjilaque'ex, si'ex túun.

9Ma' a bisique'ex oro, mix plata, mix cobre, 10mix sáabucan u ti'al le bejo'. Bise'ex chéen jun p'éel a nooke'ex, yéetel ma' a bisique'ex xanab mix xóolte', tumen le j meyajo' cu najmatic u dza'abal u janal.

11Le quéen kuchuque'ex ti' jun p'éel caaj wa ti' jun p'éel cajtalile', caxte'ex te'elo' jun túul máac cu najmatic a wantale'ex tu yotoch, p'áatene'ex te'elo' tac quéen lukuque'ex ti' le caajo'. 12Le quéen ocoque'ex te j najo' tziiquilnene'ex táan a dzíiboltique'ex jéedzel. 13Wa u cajnáalilo'ob le naj cu najmatico'obo', le jéedzela' cu p'áatal ti'ob; ba'ale' wa ma' tu najmatico'obe', cu suut ti' te'ex. 14Wa ma' tu kamique'exo'ob mix u káato'ob u yu'ubexo'obe', jóokene'ex túun ti' le naj wa ti' le caajo' ca a tíite'ex u lu'umil a wooque'ex. 15Tu jaajil quin wa'alic ti' te'exe', tu kiinil le xot kiino' le jaadz cun u bis le caajo' asab yaj ti' le cun u bis u cajnáalilo'ob Sodoma yéetel Gomorrao'.

Ch'a'apachtajilo'ob

16¡Ile'ex! Tene' táan in túuxtique'ex je'el bix j tamano'ob ichil loolob ba'alche'obe'. P'il a wiche'ex je'el bix le cano'obo', ba'ale' cabalchajac a wóole'ex je'el bix le sacpacalo'obo'. 17Canantaba'ex, tumen le máaco'obo' yaan u kubique'exo'ob ti' u nojchilo'ob le caajo' yéetel yaan a ja'adzale'ex sinagoga, 18bey xan bíin bisa'aque'ex tu táan jalacho'ob yéetel ajawo'ob tin wo'olal; beyo' je'el u páajtal a t'aane'ex tin wo'olal tu táano'ob yéetel tu táan j ma' ocsaj óolo'obo'. 19Ba'ale' le quéen ku'ubuque'ex ti' le jalach wíinico'obo', ma' a sen tucultique'ex ba'ax can a wa'ale'ex wa bix can a wa'ale'ex, tumen le quéen kuchuc u suutuquil a t'aane'exe' Yuum Jajal Dios cu bin u dzáa ta tuucule'ex ba'ax can a wa'ale'ex. 20Tumen ma' te'ex can t'aane'exi', ba'ale' u Quili'ich Pixan a Taataex cun t'aan ti' te'ex.

21Le máaco'obo' yaan u kubico'ob u sucu'uno'ob u ti'al ca quiimsa'aco'ob, le taatatzilo'obo' yaan u kubico'ob u paalal; le paalalo'obo' yaan u suticuba'ob tu y óokol u taataob yéetel yaan u beetico'ob u quíimsa'alo'ob. 22Yaan a p'ecta'ale'ex tumen tuláacal yóokolcaab tin wo'olal; ba'ale' le máax cu p'áatal ti' ten tac tu xuule', leti' bíin to'ococ. 23Le quéen ch'a'apachta'aque'ex ti' jun p'éel caaje', xene'ex táanxel caaj; tumen tu jaajil quin wa'alic ti' te'exe', u Paal Máaque' yaan u taal ma'ili' dzo'ococ a xíimbaltique'ex tuláacal u caajilo'ob Israel.

24Mix jun túul aj canbal asab ma'alob ti' ti' u aj ca'anbesaj, bey xan mix jun túul palitzil asab nojoch ti' ti' u dzuulil. 25Le aj canbalo'obo' unaj u qui'imactal u yóol u kuchul béeytal je'el bix u aj ca'anbesajo', bey xan le palitzilo' je'el bix u dzuulile'. Wa u nojochil le naj cu ya'ala'al Belzebú#10.25 Belzebú, jun p'éel u kaaba' kasiba'al wa u j nojoch le kaakas pixano'obo'. ti'o', ¿ba'ax ma' je'el u ya'ala'al ti' u láaktzilo'obe'?

Ti' máax unaj u ch'a'abal sajaquil

(Lc 12.2-7)

26Le o'olale', ma' a ch'a'ique'ex sajaquil ti' máaco'ob. Tumen mina'an mix jun p'éel ba'al muculta'an ca p'áatac ma' u yojéelta'al, bey xan mina'an mix ba'al ta'aca'an ca p'áatac ma' u caxta'al. 27Le ba'ax quin wa'alic ti' te'ex ich éekjoch'e'enile', a'ale'ex tu sáasilil kiin; le ba'ax ca x mucul u'uyique'exo', awte'ex tu ca'anlil le najo'obo'. 28Ma' a ch'a'ique'ex sajaquil ti' le máaxo'ob cu quíimsico'ob le wíinclilo', ba'ale' ma' táan u páajtal u quíimsico'ob le pixano'; ch'a'ex sajaquil ti' le máax cu páajtal u xu'ulsic le wíinclilo' bey xan le pixano' ich metnal.

29¿Ma' wa tu co'onol ca'a túul mejen ch'íich'o'ob tu yo'olal jun p'éel chan taakini'? Ba'ale' mix jun túul ti' leti'ob cu lúubul lu'um wa ma' tu yóoltic a Taataex. 30Tumen tac u tzo'otzel a poole'exe' láaj xoca'an tu jujun cúulil. 31Ma' a ch'a'ique'ex sajaquil túun: te'exe' mas yaan a tojole'ex ti' ya'ab mejen ch'íich'o'ob.

Le máax cu dzáicuba tu tzéel Jesucristoo'

(Lc 12.8-9)

32Tuláacal máax cu dzáicuba tin tzéel tu táan máaco'obe', bey xan teen yaan in dzáiquinba tu tzéel tu táan in Taata yaan te j ca'ano'; 33ba'ale' le máax cu ya'alic tu táan máaco'ob ma' u kaj óolene', bey xan teen yaan in wa'alic tu táan in Taata yaan te j ca'ano' ma' in kaj óoli'.

Jesuse' cu beetic u yaantal jatztáanba'il

(Lc 12.51-53; 14.26-27)

34Ma' a tucultique'ex wa taalaja'anen u ti'al in taas jéedzel way lu'ume', tumen ma' taalaja'anen in taas jéedzeli' ba'ale' ba'atelil. 35J taalen u ti'al in beet u bin máac tu yóokol taata, le x ch'úupalo' tu yóokol u maama, yéetel le x ilibtzilo' tu yóokol u suegra; 36beyo' jun túul máaque' yaan u p'ecta'al tumen u láaktzilo'ob.

37Le máax cu yaabiltic u taata wa u maama asab ti' tene', ma' táan u najmatic in ti'alintic. Yéetel le máax cu yaabiltic u xiibil paal wa u x ch'upul paal asab ti' tene', ma' táan u najmatic in ti'alintic, 38bey xan le máax ma' tu cuchic u cruz u ti'al u taal tin paache', ma' táan u najmatic in ti'alintic. 39Le máax u káat u toc u cuxtale', bíin u sate; ba'ale' le máax cu satic u cuxtal tin wo'olale', bíin u toque.

Sibalo'ob

(Mc 9.41)

40Le máax cu kamique'exe', teen cu kamiquen; le máax cu kamiquene' cu kamic le máax túuxteno'. 41Le máax cu kamic jun túul aj bóobat tumen aj bóobate', bíin u kam jun p'éel bo'olal je'el bix le cu dza'abal ti' jun túul aj bóobate'. Le máax cu kamic jun túul utzil máac tumen utzil máaque', bíin u kam jun p'éel bo'olal je'el bix le cu dza'abal ti' jun túul utzil máaque'. 42Bey xan je'el máaxac ca u dzáa quex chéen jun luuch síis ja' ti' jun túul ti' le mejen paalalo'ob tumen táan u tzaypachtiquene', tu jaajile' bíin u kam u bo'olal.

Currently Selected:

MATEO 10: YUA04

Highlight

Copy