ACTS 11

Petru Da" Ludang: Yerusalem Mo Phung Byu Yiri tid kyo.

1Tungbau byumyu" yi we' Mangso mungdang: ri kham: yu boem bye. ga: da" khyoo: ri lagyoo: yi yo' Yuda meing: goin" jang" moo nyid da" loem" jeing" mo, gi shau" gyo: lo" boem bye. 2Petru gi Yerusalem voogung moo ju" loo" lang" tungbau byumyu" yi a thang: yham" da" thung" Ri: kham: yu ca" ga- myed ngei nyid mo, gi Petru ri hid su" ga: ngeug: tid boem. 3Nang gi athang: ayham" da" tung: boug: yi da" yhoem: moo lam" yhe: lho: nyangnu" yo' lang" dage" zo: shug nyid da- ga: yooboo foin: ago". 4Houg: yoomo Petru gi bue" lo da" khyoo: ri ayang: aphyoo" ju" sho' goolhoo: za: tid kyoo" bye.

5" Ngoo gi Yopa voogung moo akyu" mho' nyid uri yoeb, myang da ja: ri shau" myang bye. myed: khyau: jang" moo zei: ci: da" mi, join' yo' dei, zi da ja: moug: khung: khyo" yhoin" khyo' kaid' ziri ngoo myang- Hau: zigi nga" nam, moo re" theung: jo.

6Hau: akhoug: moo ngoo nyeing" za: yu" kaid' ri me" ziyo' kyang: zi myed: khyid: dab, ja: gougnyhoug joem- do: yu: yen" se' da" gougnyhoug joem- ngho' zoo: yen" zoo: acang: joeb sho' ri ngoo myang. 7Hau: thang: ri Petru we" - too we' , , said' zoo: we' ga: tid da" thui: ri ngoo shau" gyo. 8Nghoid sho' loug we' ngoo gi " Aseing: we" da jhi, we' age bui"- hau: aco' ajhoid ja: anghoid lang" gi agyeing" ashang: da" zoo: noem, ri ngoo khanham we' azo: yu" - ein: phoug tu. 9Hau: thang: rigi Mangso wigi gyeungshang: nhang: bye: gu: rigi agyeing" ashang: ein: nang atid- ga: moug: khung: khyo" doem tid thu lo. 10Soem" lheing: hougsu" bue" thang: ri houg: su" nyang: moug: khung: khyoo: doem, to' pyam' bye.

11Hau: uri nyang- kesare voogung mo nga" jhang nhang: kaid' da- byu soem" yug gi ngoo nyid joyoo moo ju" re" ago". 12Gyeungshang: da" Venyi gi da jhi, we' a - ug vhoo" loo: za: nyangnu" da" thang: khyoo: cang yhe: loo" wa zi ngoori tid. Yopa voogung mo loem" jeung" da" byu khyug yug we' ngoo yo' dage" kesare voogung khyoo: bo cang re" boem. Ngoonu" dangain" bang: gi koneli da" yhoem: moo vang lo" boem bye. 13Koneli gi nya: yhoem: khoug: moo Mouglagyoo: dayug re" yab, jo, ziri myang khyoo: ri we' - Hau: Mouglagyoo: gi Yopa voogung khyoo: byu nhang: kaid' lho: wigi Simun Petru ga: su: ri yhe: khe: shu" loo we' - 14Hau: yug gi nang yo' re" yhoem: bang: khyoid yu zi shau" wa shid re" Mungdang: ri kho" kyoo" wa nghoid- ga: nyang: ri tid da" khyoo: ri we' ngoonu" ri tid khyoo" bye. 15Houg: su" ngoo dang: tid shed" loo" yo' su- gyeungshang: Venyi gi shid' phyang" ngoonu" tho" moo ju" gyoo" re" ziyo' dakhyoo" ti" nyangnu" da" tho' moo we' ju" gyoo" re. 16Houg: lang" Yohan gi gyid moo babtisma byid: bye- Nghoid loug we' - nyangnu" gi gyeungshang: da" Venyi mo babtisma kham: yu boem wa ga: Aseing: tid to" dang: ri ngoo myed boin: lo. 17Aseing Yesu ri ngoonu" loem" jeing" lang" gi Mangsoo ngoonu" ri byid: da" jhung: shug gi hau: tungbau byumyu" ri byid: ziri we' di: bang" nyang: myang bye. Houg: yoomo ngoo gi khayang: te" yug nghoid lho: Mangsoo ri yo" toem too" wa la".- ga: tid.

18Nyangnu" gi hau: da" dang: ri shau" gyo: boem lang" gi Petru ri nyangnu" yooboo foin: nyid khyoo: zheung: theung: pyam' lho: Mangsoo ri coung" nghei byid: wigi Mangsoo gi tungbau byumyu" yi ri we' nheing loem: thed' lho: kang: yo" dei nyid wa khyoo: ri akhang" byid: too" bye: nhung- ga: tid nyid boem.

Antioki Voogung Mo Phung

19Loem" jeing" bang: gi Stephan said pyam' jang" mo bue" lo da- shen" yhen lo da" jang" mo phang: byo lo" boem bye. Nyang: nu" dayham" gi phonisha- Kupru, yo' Antioki voogung cang phang: byo lo" boem wigi hau: mungdang: gi Yuda byumyu" yi ri za: tid kyo" ago". 20Nghoid loug we' hau: loem" jeung" loo bang: mo Kupru yo' kureni mung" moo nyid mo, dayham" gi Antioki voogung khyoo: ju" lo" wigi tung: boug ri we' Aseing Yesu' da": ngei bu: ludang: ri yhe: kho" kyo" boem ago". 21Aseing: da" yoem: gi nyangnu" yo' dage" nghoid yoomo byu myoo" sho' mo, loem" jeung" lho: Aseing: jhang khyoo: phug lo ago". 22He: ludang: ri Yerusalem voo mo phung byu yi shau" gyo: ri nyangnu" gi Barnaba ri Antioki voo khyoo: nhang: kaid' ago". 23Barnaba gi Antioki voogung khyoo: ju" yhe: lho: mung" byu yi ri Mangsoo gi khasu" ga: mainkaid byid: to" da" khyoo: ri yhe: myang lang" yu" gau, lho: wigi Aseing: ri nyangnu" da" nheigloem: khoug: moo teing" teing zei: ci: lho: wigi voin: tang: za: phau" cang nyid boem wa shid mo nyangnu" dangain" mo, ri yoem: byid: joug jhoin" 24Barnaba gi byugi, nghoid ziyo' gyeungshang: nheigloem: yo' loem" jeung" da" nheigloem: byeung" su: nghoid wigi byu myoo" sho' mo, ri Aseing: jhang khyoo: yo" phoug lheung: loo nhang: su: nghoid. 25Hau: thang: ri barnaba gi Tarshu" voogung khyoo: sholu ri yhe: sho.

26Nyang: gi Sholu ri yhe: shau" myang lang" Antioki voogung khyoo shu" lo" wigi nya: eig yug gi da zain, goin" houg: moo phung: byu yi yo' zoem" khau: nyid lho-byu myoo" sho' ri yo" jhoug" byid: ago". Hougsu" loem" jeing" mo, ri khristan yi ga- xang: shed" myheung shid" byid: zigi-Antioki voogung moo nghoid.

27Hau: ayo, gyoo: moo lapi: yi dayham" bang: gi Yerusalem voomoo" mo zi Antioki voogung khyoo: do, yhe: lo" ago". 28Nyang: nu" mo Agabu ga: su: gi to' yab, lho: gyeungshang: da" Venyi yoem: so' khyo" wigi moug: myed gyab, goin" moo phang" khoug gyo" loo wa zi nghoid- ga: wigi lapi: pe da. (Hau: da" phang" khoug moo" zeing gi Roma khosen: kolodi da" apyaid' moo gyeing" nyang: bue" loo bye.) 29Cangzoo: yi gi nyangnu" yo" ge, bue" yhi'- Yuda mung" moo nyid da- nyangnu" da" loem" jeung" mang: nhung" yi ri bo pang" thoug wa da" Alu: foin: kaid' byid: wa shid mo myed phyed' to" boem bye. 30Hau: thang: ri nyangnu" gi pang" thoug da" ngei ri Barnaba yo' sholu da" lo, khyo" wigi phung: ludaid' yi da" lo, khoug: khyoo: foin: kaid boem ago".

Currently Selected:

ACTS 11: LCL

Highlight

Copy