ACTS 22

1Myhi, phoo mang: nhung" yi we" - nanu" da" shid' khoin" moo tid shed, yu" bye: da" dang: ri doem tam" gyo" yu" ge' ga: tid. 2Nyang: nu" gi Hebre" myeing" khyo" nyangnu" ri tid da" dang: ri shau" gyo: boem lang" gi je" tam lo" boem bye- houg: lang" Polu gi xo' lho: wigi 3Ngoo gi Kiliki mung" Tarshu voogung moo khu: lo da" - Yuda byu dayug nghoid. Nghoid loug we' he: da" Yerusalem voomoo" mo Gamale da" jung nu" dayug khyo" nyid gyi: loo su: nghoid- nanu" da" phoug" phyid" yi da" tarha" khoug: moo thain: khyo" jhoug" byid: ziri we' - ngoo kham: yu lo yu" bye. Akhid" nyid" hid: moo nyid boem da" nanu" dangain" mo, yo' dakhyoo" ti" ngoo we' Mangso shid' moo kang: lung bu lo yu" su: nghoid bye. 4Ngoo gi khyoo: he: khaid cang mo, ri ashid: sho' shen" yhen lo yu" da" byu dayug nghoid. Ngoo gi yug gi myiyi: yi ri myheug yu lho: thung: lhoung lo yu" su: nghoid. 5Ngoo tid nyid da" dang: khoin" joem gi deung: khyoo: ri Khainjung agyi phoo yo' tarha" yab, do, goin" mo mo, gi sagsi: yo" kham, boem wa zi nghoid. Ngoo gi nyangnu" da" lo, mo Damasku voogung moo zheung: nyid da- Yuda mang: nhung" yi ri lhid" foin: kaid' da- mougsoug" ri lhoem: yu ci: lho: houg: moo nyid mo, ri yoobo dam byid: wa shid re" myheug yu lho: Yerusalem voomoo" khyoo: tei" she: yhi: wa shid mo ngoo gi Damasku voogung khyoo: do, loo" bye.

Polu Nyang: Yesu Ri: Loem" Jeung" Lo Da" Khyoo: Ri: tid Kyo.

6Ngoo gi houg: su" do, lo" nyid da" uri Damasku voogung khyoo: jhang lo" nyid ri Bid' nyid" gung tu: lo da" ayo, moo moug: khung: mo doug bang da" bidbang daloem: gi nyid' dain' tung" nga" da" ayam, aqei: moo bang lo. 7Houg: lang" ngoo gi myidjang: khyoo: leung lo" wigi sho" lu- sho" lu, Nang ngoori ce: noem koid shen" yhen nyid lha"» ga: ngoori tid da" thui: ri shaug" gyoo: bye. 8Ngoo gi Aseing: we" nang hang" nghoid lha". ein: myed: kaid' ri Nyang: tid zigi Ngoo gi nang shen" yhen nyid da" Nazared voo mo Yesu nghoid - ga: ngoori tid. 9Ngoo yo' dage" do, loo" bang: gi hau: da" bidbang ri myang boem nghoid loug we' ngoori dang: tid nyid su: da" thui: rigi ashug" gyo: boem nghoid ago". 10Houg: lang" ngoo gi Aseing: we" - ngoo khasu" koid' loo: wa lha". ein: myed: kaid' lang" Aseing: gi to" lho: Damasku voo, khoug: khyoo: vang yhe: loo" we' nang koid wa shid re" Mangsoo nyheung to" da" moozoo" dangain" ri hau: voo, moo nang tid kyoo" wa nghoid- ga: tid. 11Houg: su" doug bang da" bidbang wigi ngoo gi myo, jed, lo" byug lho: nga" byen, cang" yi gi ngoori lo, mo she: wigi Damasku voo khoug: khyoo: shu" vang lo" ago". 12Ngoonu" da" tarha" ri phau" cang nyid su: nghoid ziyo' Mangso khyoo: ri kang: lung bu su: nghoid wigi-Hau: voogung moo nyid da" Yuda byumyu" yi dangain" mo, we' - coem phau" myang: nyid da" - Anania ga: su: byu dayug gi nga" jang" moo ju" re. 13Nyang: gi nga" nam, moo re" yab, jo, lho: wigi mang: nhung" phoo Sholu we"- Re" da" myo, doem myang loo ja" o"- ga: tid da. Houg: lang" nga" myo, doem myang lo wigi nyang: ri yu" kaid' ri 14Anania tid zigi nang gi ngoonu" phoug" phyid" yi Mangsoo nyang: vho: da" khyoo: ri si' wa shid re" we' Mangso da" deingmain" da" deizoo: ri shau" myang wa shid re" we' Mangsoo gi nang ri khyen: yu bye. 15Khasu" wim gari Nang gi nanyang: shau" myang bye: da" khyoo: yo' nanyang: shaug" gyoo: bye: da" dang: ri byu yug khang" moo" ri tid kyoo" byid: wa shid mo hau: Aseung: da" sagsi: bue" loo" wa. 16Nang akhid" cenoem, wim, wigi nhe" nyid kha? to lho: Babtisma kham: yu re' - re" yooboo ced" shang: pyam' zi shau" wa shid' re" Aseing: ri Akyu" mho' we' ga: ngoori tid.

Tungbau Byumyu" Yiri Mungdang Kho" Kyoo" Wa Shid' mo Polu Ri: Khe.

17Ngoo gi Yerusalem voomoo" khyoo: doem ju" lo" lho: noku yhoem: moo" moo akyu" mho' nyid uri yoeb, myang daja: ri myang bye. 18Hau: yoeb, myang moo Aseing: ri ngoo shau" myang wigi nang Yerusalem voomoo" mo myab, myab, thu' loo" we' - Khasu" wim gari he: voomoo" mo bang: gi Nga" khyoo: yo' sen: lho: wigi nang sagsi: kham, da" dang: ri akham: yu goo" wa" - ga: wigi ngoori tid. 19Houg: lang" ngoo gi Aseing: we" ngoo gi tarha" jung joem moo cang vang yen" lho: wigi nang ri loem" jeung" loo bang: ri myheug yu lho: baid' said' su: nghoid ziri nyangnu" se' ago". 20Hougsu" wigi re" da" Re" da" sagsi: phoo Stephain ri said' da" uri we' ngoo nyang: we' houg: moo nyid lho: bo myid veing" ziyo' - nyang: ri said' bang: da" byimi joem ri bo zung" byed bye: ein: phoug tu" kaid. 21Houg: lang" Aseing: gi yhe: loo" we' Khasu" wim gari - ngoo nang ri tungbau byumyu" yi nyid da" Ve: da" mung" khyoo: nhang: kaid' wa. 22Meing: byu yi gi hidsu" tid nyid jang" moo ju" sho' tam" gyo: yu" nyid boem ago". Nghoid loug we' hau: thang: ri nyangnu" gi nyang: ri yu, pyam' ge" - said' pyam' ge" - nyang: gi dei nyid wa zi amoin: loo: nghoid da: - ga: wigi myhang: thang da" thui: yo' zeug yoid nyid boem ago". 23Nyang: nu" gi zeung yoid nyho: nyid boem ziyo' nyang: nya: da" byimi ri khyoid' fe: lho: pheilhoug: ri geug sain" koid nyid ago". 24Houg: lang" Roma gyizoug: moo" gi Polu ri gyidab, khoug: khyoo: shu" vang lo" lho: nyang: ri Yuda byumyu" yi gi hidsu" gyi koid lho: zeug yoid nyho: nyid boem da" khyoo: ri si' wa shid mo Polu ri baid' lho: dang: myed: wa shid mo-nya: gyizoo: yi ri amyeing" byid: kaid. 25Nyang: nu" Polu ri baid wa ga: tei" lo" boem lang" gi Polu gi ayam, moo yab, jo, da" gyizoug: phoo ri Roma mung" byu dayug ri nya: yooboo rishi" amyed: ca: yu" loo za: - baid' wa da" amyeing" jo, la"» ga: myed: kaid. 26He: da" dang: ri gyizoug: phoo shaug" gyoo: lang" nyang: gi nya: atho' moo gyizoug: mo" jhang khyoo: yhe: lo" wigi Zoug: moo" we"- nang cenoem koid zi nghoid! Byu he: yug gi Roma mung" byu dayug nghoid ga: - yhe: tid. 27Houg: su" zoug: moo" gi Polu jhang khyoo: re" lho: nyang: ri Nang gi Roma mungdain byu nghoid la". ngoori tid kyoo" we' -ga: tid. Polu gi nghoid- ga: phoug tid. 28Gyizoug: moo" gi Ngoo gi ngei myoo" sho' byid: lho: Roma mungdain byu bue" loo su: nghoid- ga: tid lang" Polu gi - ngoo gi khu: ri" mo nyang: bui" bye: ga: tid. 29Houg: lang" nyang: ri myed ca: yu" wa ga: soin' nyid mo, gi nung zoid zoid, lo" ago gyizoug: moo" gi Polu Roma mungdain byu nghoid- ga: ziri si' lang" nyang: ri jangcoo" foid shoid' bye: yoomo gyoug dain' pyam' bye.

Polu Tarha" Yabdo, Shid' Khoin" Moo Yab, jo, Khyoo:

30Gyizoug: moo" gi Yuda byumyu" yi ci: yoomo Yooboo foin: go" khyoo: ri khyag za: si noug yoomo nyang: gi thang: nyid ri Polu ri jang co" tei" to" ziri phoid: pyam' nhang: lho: khainjung agyi moo"' yi yo' Yuda tarha" yabdo, moo boo mo, dangain" ri zeung: phoung lo boem wa shid' mo amyeing" khyo' kaid' bye. Hau: thang: ri nyang: gi Polu ri shu" lo wigi nyangnu" da" shid' khoin" moo yab, jo, nhang.

Currently Selected:

ACTS 22: LCL

Highlight

Copy