ACTS 4

Yuda Tarha" Kongsi Moo- Petru Yo' Yohan Ti: myed: Ca: Yu" Khyoo:

1Petru yo' Yohan eig yug gi byu yi ri hougsu" dakho" kyo" nyid shi" uri khainjung yi dayham" gi noku yhoem: moo" mo goemloem pyada: zoug: yi yo' Saduke ju" re" lo boem. 2Lagyo: eig yug gi byu yi ri Yesu gi shid: jang" mo doem dei, to loo: bye: khyoo: ri jhoug" byid: nyid. Hougsu" shid: bye: mo, doem dei to' loo wa ga: dang- deung da" khyoo: sagsi: kham byid: zi bui" yoomo nyangnu" nheig zheung: yo: ago". 3Houg: yoomo nyangnu" gi lagyo: eig yug ri myheug yu boem. Nghoid loug we' moug" coid lo nyid bye: yoomo-thang: nyid" nabsoin: ju" sho' lagyo: eig yug ri thung: moo lhoung to" boem. 4Nghoid loug we' mungdang: ri tam" gyoo: bang: myoo" sho' bang: gi loem" jeung" lo boem bye. Houg: yoomo loem" jeing" mo, gi wim: khyeing" koo: je myo: loung: lo nyid boem bye.

5Thang: nyid" ri Yuda vhu" jhung: yi-ludaid' yi yo' tarha" sara: yi gi Yerusalem voomoo" moo zeung" foem: boem bye. 6Nyangnu" gi khainjung zeing Anna yo' kayapha- Yohan Alesandaru yo' goo tu: da" khainjung yi phung moo boo mo, yo' zheung: sham: go" nyid boem bye. 7Nyangnu" gi lagyo: eig yug ri nyangnu" da" shid khoin" moo yab, jo, nhang: lho: nya: eig yug ri-re" eig yug gi-hidsu" cenoem koid go" ce: ja: yoem: vhoo" khyo" hang" amyeing" yo' hidsu" koid go" lha". - ga: zheung: myed boem.

8Houg: lang" Petru gi gyeungshang: da" Venyi byeung" jo, yoomo nyangnu" ri mung" byu yi da" vhu" jhung: yi yo' ludaid yi we' 9Khyid: yoin" su: ri ge loo nhang: ziyo' nyang: khasu" ge yang" lo da" khyoo: yo' sen: lho: wigi-nga" eig yug ri myed: ca: yu" zi shau" nghoid rigi 10Nanu" gi Nyang: ri pyang" zeing moo jen" said' pyam lho: Mangso wigi shid: jang" mo doem dei to' loo nhang: da-hau: Nazared mo yesu khristu da" myeing khyang" yoem: so' khyo" hau: khyid: yoin" su: gi nyeing" za: ge yang" loem" lo wigi he: khyi, nanu" da" shid khoin" moo yab, jo, ziri-nanu" dangain" bang: yo' Israela byumyu" yi dangain" mo, se yu loo: ge'. 11Yesu gi nanu" lugyhoem: zhug mo, khyen: she: lhei" pyam da- lugloem: nghoid. Hau: zigi je" akhyag da" yhoem: jhoin: lug bui" bye- ga: jhoem: mungdang: moo tid too" su: nyang: nghoid bye.

12Khyoid yu khyoo: gi nyang: mo za: yo" kham: yu nyid ngoonu" ri yo" khyoid yu da" Mangsoo byid: khyoid khyi: yu su: gi moug: myed gyab, goin" jang" moo gootu: dayug we' aboo loo.

13Yuda tarha" yab, do, moo nyid mo, gi-Petru yo' yohan eig youg da" voem" nheigloem: ri zheung: myang boem yoomo nya: eigyug gi phajhi" abo da" yu" maya" byu nghoid ziri se' boem yoomo mau" hang" to" boem ago". Hau: thang: ri nyangnu" gi Petru yo' yohan eig yug gi shid phyang" Yesu da" luzoem" cang" yi nghoid ziri se' boem. 14Nghoid loug we' khyid: ge loo" su: gi Petru eig yug Yohan yo' dage" houg: moo bo yab, jo, ziri nyangnu" myang boem yoomo ce" dakhoin" we' ayo" tid lo: boem nghoid ago". 15Houg: yoomo nyangnu" gi nya: eig yug ri tarha" yab, do, mo thu' loo" nhang: lho: wigi nyangnu" nyang: cang" byen, phyoo" sham: go" nyid boem. 16He eig yug ri ngoonu" khasu" koid boem wa lha". Nya: eig youg wigi mau" pho" alhoo: again gyi" sho' bue" lo ziri Yerusalem voomoo" bang: gi yug khang" moo" se' boem abye: go. Ngoonu" gi hau: ziri ayo" he pyam' lo: boem- ga: tid go" nyid ago". 17Nghoid loug we' mung" byu yi jhang khyoo: he da" ludang: aje: loo" wa shid re" hau: eig yug ri Yessu da" myeing ri lang: lho: khanham we-hang" ri we' adoem tid loo: shid mo-tid poin" too" shang" - ga: sham: go" to.

18Houg: yoo mo nyangnu" gi lagyo: eig yug ri doem khe: fang yu lho: wigi yesu da" myeing ri, lang: lho: da jhi' we' a jhoug" byid: loo: goo" ga- nya: eig yug ri lhid' nhang: kaid' bye. 19Nghoid loug we' Petru yo' Yohan eig yug gi nyangnu" ri doem phoug tid zigi Mangso dang: ri tam" gyoo: wa la". anghoid lang" gi nanu" da" dang: ri tam" gyoo: wa la". Mangso shid' moo kha: loem: jo zigi nanu" nyang: dang: phyed' byid: ge'. 20Khasu" wim gari ngoonu" gi ngoonu" nyang: shau" myang bye: da" khyoo: joem yo' shau" gyo: da" khyoo: joem ri atid loo : ayo" nyid ga: wigi phoug tu" ago". 21Houg: yoomo Yuda tarha" yab, do, mo bang: gi-nya: eig yug ri je" thain khyo" zid" nhang: kaid' ago". Byu yi dangain" bang: gi bue" jo, da" khyoo: gang mo, Mangsoo ri coung" byid: nyid boem ago". houg: yoomo nyangnu" gi nya: eig yug ri yoobo dam ayo" byid: khyoo: Ri: yo" yu" se' yu boem ago". 22He: da" mau" pho" alhoo: again khyo" yo" ze, yang" zain loo nhang: su: da" apyaid' gi myed: xi: zain' jain" koo: boo bye: su: nghoid.

Voem" Da" Nheugloem: Ri Yo" Yu Wa Shid Mo * Loem" Jeing" bang Akyu" Mho

23Petru Yo' yohan gi nya: eig yug ri nhang: kaid' yo' su- nyangnu" da" phoung foem: khyoo: doem tau" lo" lho: khainjung zeing yi yo' ludaid' vhu" jhung: yi nya: eig yug ri tid kaid' da" dang: joem ri nyangnu" ri lo" doem tid kyo" ago". 24Loem" jeing" bang: hau: da" dang: ri shaug" gyoo: lang" gi nyangnu" nheigloem: dadeing: za: shoin" lho: wigi akyu" zheung: mho' boem zigi Moug: khung: myed jang: panglai gyid mung" yo' hau: akhoug: moo nyid moo nyid ri phain" to" da" Aseng: we"- 25Nang gi re" join, phoo nghoid da- ngoonu" da" nya: phoug" David da" nhoid khoin" thui: khyo" gyeungshang: da" Venyi wigi tid to" da" mungdang: gi

Tungbau byumyu" yi ci: wim wigi-nheig yo: nyid go" lha". byumyu" yi dangain" bang: gi ci: wim wigi akoem: moo phajhi" khyau" nyid go" lha".

26Aseing: we" nang nhang: kaid' da" Meshia ri ce: noem koid wa shid re" moug: myed khokham" yi gi soin' nyheung to" lho: Zau: ludaid' yi dage" za: foem: phoung nyid boem bye- ga: tid.

27Khasu" wim gari gyeing" gyeing" nyang- Herod yo' puntu pilaid' gi tungbau, byumyu" ri Israela byumyu" yi yo" we' nang xu: joid lho: khyen: nyheung to" da- Meshia re" gyeungshang: dei zoo: ri gyi koid wa shid re" He, voomoo" khoug: moo sham: go" nyid bye. 28Nyang: nu" gi re" da" yoem: vhoo" yo' nang vho: khyo" myed phyed' ci: gu nghoid da- bue" loo ca da" moozoo" ri koid wa shid mo hougsu" zeung: foem: nyid boem zi nghoid da. 29Asing: we" akhid" nyangnu" youg nhain, nyid da" khyoo: ri re" mungdang: ri yo" kho" kyoo" nhang: we'. 30Noo gi byid: wa shid re re" da" lo, ri yhoin" kaid' byid: we'. Re" da" gyeungshang: dei zoo: Yesu da" myeing khyo"-mau" pho" alhoo: again bue" thu' loo nhang: we' ga: mho' nyid ago".

31Nyang: nu" akyu" mho' lang" gi nyangnu" nyid da" jo yoo gi lei: nain" lo lho: nyangnu" dangain" bang: gi gyeungshang: da" Venyi yo' byeung" lo wigi Mangso mungdang: ri agyug avoem, loo: za: yo" tid fu" lo" ago".

Nyang: Nya: Da" Soid Gain Ziyoo Joem Ri: Dage" Za: Shoin" Ci: Lo" Boem.

32Loem" jeing" bang: dangain" mo, gi nheigloem: e" myed dakhaid za: nghoid ago". Hang" we' nyang: nya: da" soid gain ziyoo joem ri Hid: nga" zi nghoid ga: atid boem loo- Nyang: nu" yo" da" zi joem dangain" ri dage" soin" ci: shoin" vho, nyid boem ago". 33Lagyoo: yi gi Yesu doem dei, to lo" khyoo: ri yoem: zeing kaid lho: sagsi: kham nyid boem ago". Mangsoo gi nyangnu" dangain" bang: da" a tho' moo main, kaid, jeju" foid shoin" byid: nyid bye. 34Nyang: nu" da" phung moo ca" yo khyoo: ga: zi gi ci" we' aboo loo: nghoid ago, khasu" wim gari yoothung" yoogu, yoo" bang- yhoem: yoo, yooboin: yoo" bang: gi dangain" oung" pyam' lho: yo" ngei joem ri lagyoo: yi da" lo, khoug: moo re" ab, byed boem. 35Lagyoo: yi gi hau: da" ngei joem ri dayug yo' dayug ca" yo ziri yu" lho: wigi cang gam byid: nyid ago".

36Houg: lang" lagyoo: yi wigi Banaba ga: myeing lhid: myheung byid: da" (Banaba ga: zigi yoem: byid: su: ga: zi nghoid) kupru gugyoo: kang: moo khu: lo da" Levi byumyu" Yoseb we' 37Nyang: yo" da" moug: myed ri oung" pyam' lho: yo" yu da" ngei joem ri lagyoo: yi jang" moo re" ab, byed.

Currently Selected:

ACTS 4: LCL

Highlight

Copy