Kɛɛradzin neè faadziɛ 9
9
Sɔlì bàù'n kur'la Yesù rè kàràndzin
(Kɛɛradzin neè faadziɛ 22.6-16; 26.12-18)
1Àyìwà, tà bwèy, Sɔlì kpɛ̀ynto na ni Tsìfa Yesù rè kàràndzin neè kpɛyn nìi tsuru, à na ni è kpɛyn tɔ̀ rii tsuru, à ci wò ye nìi kun, wo tɔ̀ vua rìì. Àwà, è nà bè Saaka Jɔundzin blaa rè. 2À y'à gaa tɔ̀ re, ci è sɛbɛn ì fa, nìì reè dzia à to mòdzian gè o ge gbaɔn Tsìfa Yesù raa shia kpɛyn, Dàmasì wɔ̀ rɔ̀n, kpiri sen ɲɛn tàan tsɛ, twɛy yè shì na Yerusalɛmùn. Tɔ̀ tsuru, twɛy sɛbɛn neè dzia bè sìn sìn be ŋaablabegba rèè doùn Dàmasì wɔ̀ rɔ̀n.
3Àyìwà, Sɔlì ni Dàmasì wɔ̀ùn shià tsɛ, à bèu tsyɛnbe wɔ̀ɔ̀ rà, vyevyee sɔn yeè bàràma den bo jìran nɔ̀n, tɔ̀ yeè nà à laguru. 4Tɔ fau, Sɔlì yè bo mɛɛy dzɔn nɔ̀n, è vu sɔn myɛn, tɔ dziàn à ra ci: «Sɔlì, Sɔlì, feera, wo yè bà mun byɛɛn ?» 5Sɔlì yè tey fa ci: «Wo tsì rii, Tsìfaà ?» Vu rèe yè dzin ci: «Mun Yesù rìì, wo to mun nì byɛɛn. 6Dòònuùn fù, e dɔ̀n wɔ̀ɔ̀ doùn, nìi wo faa raà, è nà tɔ̀ dè wo ra mɔn.»
7Sɔlì jììfàsi rèè ɲɛyn shɛn ɲaanfaa suun, è tsìiŋma yè to e shɔùn, arì gooma pɛn na dzi bo è dzu waa. È kpɛ̀yn toro na ni vu rèe ɲan, ŋà, è jaa naà ni mòò pɛn na waa. 8Sɔlì yè fù bo dzɔn nɔ̀n tɔ̀ rii ɲàn, à jaa rèè dzii sauna, ŋà, à na jɛ̀y faa waa. Àwà, y'à kun e si ra tɔ̀ rii ɲàn, yè bè à ka Dàmasì wɔ̀ɔ̀ doùn. 9È to tsùù jaana tɔ̀ tsuru, è bè tàrà fɔ bwèy zhììgi, à na ɲwɛyn ɲɔɔ̀n, à to na yu mìan.
10Tɔ̀ y'a tàrà, Yesù rè kàràndzin sɔn na ni Dàmasì wɔ̀ rɔ̀n, tɔ̀ tsoo yè bà ci Ananiyasì. Àyìwà, Tsìfa Yesù yè e yɛrɛ kpadè Ananiyasì rà jɛ̀y ɲan, à kiri ci: «Ananiyasì !» Ananiyasì yè kir'là latsi, è dzin ci: «Mun yɛ nèe Tsìfaà.» 11Tsìfaà yè dzin à ra ci: «Fù dòonen ɲan, wɔ̀ɔ̀ doùn shi niì kir'là ci shi tereonmaà, e tɔ̀ sen, e bè kpiri sɔn ne tsii, tɔ̀ tsoo yè bà ci Yudà. E be wɔ mɔn, e dzin ci yè kpiri sɔn kpadè a ra, nìi tsoo ci Sɔlì, è bà wɔ̀ sɔn modzin, nìi kir'là ci Tarisì. Nèe waatsi ree yɛ̀r'la ɲàn, à ni Ŋaablà mafyɛ̀ɛ̀n nà. 12Tɔ̀ Ŋaabla mafyɛɛ̀n doùn, à jɛ̀y faɔ̀ goo sɔn tsɛ nìi wo Ananiyasì. À y'à jaɔ̀ wo nàu dɔ̀n gbàà doùn, wo y'à si rèè tsùù wò tsɛ, sànko wò jaa rèè yè dzi jɛ̀y fa e shɔùn.»
13Tsìfa Yesù rè goomaa shɔ̀ùn, Ananiyasì yè dzin ci: «Ee Tsìfaà, mun to gooma giri myɛɔ̀n kpir'lee tsɛ dɛ ! À gooɲaan niì sapɛ fau wo re kàràndzin neè rà Yerusalɛmùn, mòò giri tɔ̀ lakɛrɔun mun na. 14Tɔ̀ nìn yè bo à ra, mòò o moò màfyɛɛ̀n faa wo tsoò ka, Saaka Jɔundzin neè y'à shi wɔ naɔ à suun mìin, ci è twɛy sapɛ kun.» 15Ŋà, Tsìfa Yesù yè dzin à ra ci: «Bè, kàtsu mun kpir'lee boo rìì n magoo ra. Mun nà à ka bè jàmàan kpɛrɛ mòdzin ì ko è re màsa reè rè, sànko mun mòò riì, yè tɔ̀ tɔ̀. À y'à to Isirayɛlì mòdzin neè sa yeè mun tɔ̀. 16À nà byɛnbe ge o ge rìì fa mun kamà, mun yɛ̀r'la nà tɔ̀ sapɛ kpadè à ra.»
17Àwà, Tsìfaà tɔ̀ dè dòu min niì, Ananiyasì yè dɔ̀n be. À bèu wɔ, è dɔ̀n gbàà doùn. À dɔ̀un, è si rèè tsùù Sɔlì tsɛ, è dzin à ra ci: «N neema kpiri Sɔlì, Tsìfa Yesù nìi yè e yɛrɛ kpadèu wo ra shia rè, wo yè bà na nàa mìin, tɔ̀ rii mun ka naɔ wo re, sànko wo yè dzi jɛ̀y fa e shɔùn. È mun ka na sa, sànko wo ɲan yeè tsyɛn Ŋaablà re Dzi Fɛnɛɛ rà.» 18Tɔ̀ nɔ̀nkɔɔrɔn, è bà jàci kaa swey tɔrɔn tɔrɔn bou Sɔlì jaa rèè tsɛ, è dzi è jɛ̀y fa e shɔùn kɔn yeu. Àwà, è fù tɔ̀un, y'à jaara foò yuà ka Ŋaablà re shia goo rèè rà. 19Tà shɔ̀ùn, è ɲwɛyn ɲɔn, è fààn tarà.
Sɔlì waajibi faa dzii kuun min niì
Àyìwà, Yesù rè kàràndzin niì reè ni Dàmasì, Sɔlì yè to twɛy ka mɔn, è bwèy dan fa. 20Tɔ̀un, è maa suu, è waajibia fa beè Dàmasì ŋaablabegba rèè doùn, è dziàn, ci Yesù rìì Ŋaablà Dzin kpir'la. 21Nìì reè sapɛ na à re goomaa lamyɛɛ̀n, à goò na jiɔ̀ twɛy sapɛ dzii tsɛ, yè dziàn ci: «Nìì reè sapɛ na màfyɛɛ̀n faa Yesù tsoò ka Yerusalɛmùn, kpir'liì na fù jiɔ̀ twɛy kpɛyn è byɛɛn, à na nèe gbɛ ! À naà naɔ̀ mìin, è nà twɛy kun shì be Saaka Jɔundzin neè rè rìì ɔ̀ ?»
22Ŋà, màan ji o ji seroun, Sɔlì kpɛ̀yn na fààn ni tàrà beè e re waajibi faa doùn, à y'à dè kpàdèe mòdzian nà, ci Yesù rìì Ŋaablà Jaara Modzìàn. Tɔ̀ waajibia baraka blàbe ɲaanfaa suun, Dzyèèsìbee mòdzin niì reè ni Dàmasì wɔ̀ rɔ̀n, twɛy naà dèràma tsu rii tɔɔ̀ à ra dɛ waa. 23#Kor2 11.32,33.Àwà, bwèy dànman dɔn bouma shɔ̀ùn, Dzyèèsìbee mòdzin niì reè ni Dàmasì wɔ̀ɔ̀ doùn, twɛy swey yè byɛ̀n à mà, ci ye nà Sɔlì vu. 24Ŋà, Sɔlì yè bo tɔ̀ goò dzuun ma è re. Arì nìi wɔ̀ɔ̀ boma dzii reè, feèn ko bwèè sa, è na twɛy sa sɛr'na nì, gè niì ni à to ye yè dzi à tàrà vu. 25Ŋà, sii sɔn see fene, kàràndzin niì reè na ni Sɔlì ka, twɛy y'à sen ji sèè doùn, yè fɛɛdzin shi sèè rèe ra, y'à jàà wɔ̀ɔ̀ sian bònè ko tɔ̀ ka.
26Tɔ̀un, Sɔlì yè dɔ̀n be Yerusalɛmùn. À bèu wɔ mɔn, à sàò na ni, wo yeè e ba kàràndzin neè tɛ̀y. Ŋà, twɛy sapɛ na shiɔ̀ à jɔun, kàtsu è naà ɲɛɔ̀n à ra, ci à baɔ̀ kàràndzin sààben na waa. 27Àwà, kàràndzin niì tsoo na ci 'Barinabasì', tɔ̀ yeè Sɔlì kiri gban e ra, è bè à ka kɛɛradzin neè rè. È bèu wɔ mɔn, Sɔlì Tsìfaà jàu nìi tsuru Dàmasì wɔ̀ùn shià tsɛ, ko Tsìfaà goomau à ka nìi tsuru, Barinabasì yè bo tɔ̀ jaa mà à dè kɛɛradzin neè rà. Sɔlì to mòdzian waajibiu nìi tsuru kùùnxɔ̀be doùn Yesù tsoò ka Dàmasì wɔ̀ rɔ̀n, è tɔ̀ sa jaa dè è ra.
28Àwà, è sen tɔ̀ jisee rà, Sɔlì sa yeè to kɛɛradzin neè ka. Yè bèe e si re Yerusalɛmùn wɔ̀ɔ̀ min niì sapɛ. À na waajibia faa Yesù tsoò ka, arì à na shi siɛ̀n tsu. 29Dzyèèsìbee mòdzin niì reè na Gɛ̀rɛ̀kì goòmàà dèe, Sɔlì na goomaa twɛy sa ka, è bà goo giri sɔ̀swɛy faa è ka. Ŋà, twɛy sa na à vuma gaa. 30Àwà, kàràndzìn dzyee reè tɔ̀ goomaa myɛ̀un min niì, yè bè Sɔlì ka Sezare. Tà shɔ̀ùn, y'à bàji be Tarisì wɔ̀ rɔ̀n.
Piyɛrì nìi fau Lidà ko Yɔpɛ̀ wɔ̀ rɔ̀n
31Àwà, tɔ̀ waatsi rɔn, ɲɛynamoo kuru nìì reè ni Yude mar'la ɲàn ko nìì reè ni Galile mar'la ɲàn ko nìì reè ni Samari mar'la ɲàn, jaancin na ni è kuru soo soo sapɛ tsɛ. È na jɔun ni tàrà beè kudɛyn, è re blàbe yeè bà na ni Ŋaablà tsɛ. Ŋaablà re Dzi Fɛnɛɛ na è dzwɛ̀maa nìi fa, tɔ̀ baraka rɔ̀n, è na giribe beè.
32Àyìwà, Piyɛrì na e ɲantsyeere beè jàmaàn min niì sapɛ, è kàràndzin neè siin siin bèe. Tà doùn, è nà bè wɔ̀ sɔn ɲan, nìi tsoo ci Lidà, è bè bo twɛy kàràndzin neè kpà. 33Kpiri sɔn na ni tɔ̀ wɔ̀ɔ̀ doùn, tɔ̀ tsoo yè bà ci Enè. Tɔ̀ kpir'la na mùrùkuɔ̀. È bè tàrà fɔ jii ŋaalòn, à naà dziɔ̀ fù bo e re ɲaangee tsɛ ŋe waa. Àwà, Piyɛrì bèu Lidà, è bè tɔ̀ jà mɔn. 34Piyɛrì y'à jàu, è dzin à ra ci: «Enè, Ŋaablà Jaara Moo Yesù wo cɛrɛmabeu, fù a re ɲaangee lamɔnɔ̀n a yɛrɛ !» Tɔ̀ nɔ̀nkɔɔrɔn ko e sa, Enè yè fù. 35Gàne sɔn na ni Lidà wɔ̀ɔ̀ tɛyn, ci Saarɔnìn. Àwà, Lidà wɔ̀ùndzin neè, ko tɔ̀ gànèdzin neè Enè jà nìi fau, è sapɛ yeè e tsiì Tsìfaà rà.
36Àyìwà, wɔ̀ sɔn na ni, ci Yɔpɛ̀. Tàan sɔn na ni tɔ̀ wɔ̀ rɔ̀n, tɔ̀ sa yeè bà na Yesù rè kàràndzin. Tɔ̀ taàn tsoo na ci Tàbità. Gɛ̀rɛ̀kì goòmà nɔ̀n, ci 'Dɔrɔkasì', nìi dzuɔn ci Dagbɛ. Tɔ̀ taàn na goowùɔ faa kudɛyn, è bà wɔɔ̀ gbakɔɔn reè rà. 37Tɔ̀un, tàan rèe yè nà ɲìnìn, è san, tɔ̀ y'a tàrà Piyɛrì ni Lidà wɔ̀ rɔ̀n. Àwà, à saun, y'à fùàn fòò tɔ̀ rii ɲàn, yè bè à ɲɛn gbà sɔn doùn sangasoò jìran nɔ̀n. 38Àwà, Lidà wɔ̀ɔ̀ ko Yɔpɛ̀ wɔ̀ɔ̀ sa ni e si tɛyn, Yɔpɛ̀ kàràndzin neè yè bà na à myɛɔ̀n, ci Piyɛrì ni Lidà. Tɔ̀un, yè mòkun fii ka Piyɛrì kpɛyn, ci yè b'a kiri. Twɛy bèu wɔ, yè dzin à ra ci: «Ɲe wo màfyɛ̀ɛn, a y'a tabe na mùn ne dòonen ɲan.»
39Tɔ̀un, Piyɛrì yè fù, è gban è kpɛyn suu. Àwà, Piyɛrì bèu wɔ mɔn, taàn fùàn ɲɛɔ̀n gbà nìi doùn sangasoò jìran nɔ̀n, yè bè à ka mɔn. Fùnshɔ̀ùntaan rèè sapɛ yeè e kpɛrɛ̀ Piyɛr'là tɔ̀un, yè bà gɛɛ. Tàbità na ni jaamabee rà è ka waatsi riì bwèy, à mɛ̀yɛ̀rii niì reè ko mɛ̀yɛ bla niì reè lamɔnɔun, yè twɛy kpàdèe Piyɛr'là. 40Tɔ̀un, Piyɛrì yè mòdzian sapɛ bo gbàà doùn, è kunun gban, è Ŋaablà mafyɛ̀n. Tà shɔ̀ùn, Piyɛrì yè e jaa kere fùàn nà, è dzin ci: «Tàbità, fù !» Taàn yè e jaa dzii san, à Piyɛrì jàu, è fù, è tsuù. 41Piyɛrì y'à si kun, è wɔ à ra, è fù. Tà shɔ̀ùn, è kòmànà kàràndzin neè ko fùnshɔ̀ùntaan rèè sèè kiri e shɔùn, è taàn jaama kpadè è ra. 42Tɔ̀ nɔ̀nkɔɔrɔn, à goò goomaa yè jee ji Yɔpɛ̀ wɔ̀ɔ̀ min niì sapɛ, mòò giri yè ɲɛn Tsìfaà rà. 43Piyɛrì yè to Yɔpɛ̀ wɔ̀ɔ̀ doùn tɔ̀ rii ɲàn, è waatsi fa mɔn. À na jàaŋnà kpiri sɔn ne tsii, ci Shimɔ̀n, tɔ̀ yeè bà tsùn làmɔnɔnbaa.
Currently Selected:
Kɛɛradzin neè faadziɛ 9: BDZU
Highlight
Share
Copy
Want to have your highlights saved across all your devices? Sign up or sign in
© 2024 Église Évangélique Mennonite du Burkina Faso (EEMBF) et SIL International
Kɛɛradzin neè faadziɛ 9
9
Sɔlì bàù'n kur'la Yesù rè kàràndzin
(Kɛɛradzin neè faadziɛ 22.6-16; 26.12-18)
1Àyìwà, tà bwèy, Sɔlì kpɛ̀ynto na ni Tsìfa Yesù rè kàràndzin neè kpɛyn nìi tsuru, à na ni è kpɛyn tɔ̀ rii tsuru, à ci wò ye nìi kun, wo tɔ̀ vua rìì. Àwà, è nà bè Saaka Jɔundzin blaa rè. 2À y'à gaa tɔ̀ re, ci è sɛbɛn ì fa, nìì reè dzia à to mòdzian gè o ge gbaɔn Tsìfa Yesù raa shia kpɛyn, Dàmasì wɔ̀ rɔ̀n, kpiri sen ɲɛn tàan tsɛ, twɛy yè shì na Yerusalɛmùn. Tɔ̀ tsuru, twɛy sɛbɛn neè dzia bè sìn sìn be ŋaablabegba rèè doùn Dàmasì wɔ̀ rɔ̀n.
3Àyìwà, Sɔlì ni Dàmasì wɔ̀ùn shià tsɛ, à bèu tsyɛnbe wɔ̀ɔ̀ rà, vyevyee sɔn yeè bàràma den bo jìran nɔ̀n, tɔ̀ yeè nà à laguru. 4Tɔ fau, Sɔlì yè bo mɛɛy dzɔn nɔ̀n, è vu sɔn myɛn, tɔ dziàn à ra ci: «Sɔlì, Sɔlì, feera, wo yè bà mun byɛɛn ?» 5Sɔlì yè tey fa ci: «Wo tsì rii, Tsìfaà ?» Vu rèe yè dzin ci: «Mun Yesù rìì, wo to mun nì byɛɛn. 6Dòònuùn fù, e dɔ̀n wɔ̀ɔ̀ doùn, nìi wo faa raà, è nà tɔ̀ dè wo ra mɔn.»
7Sɔlì jììfàsi rèè ɲɛyn shɛn ɲaanfaa suun, è tsìiŋma yè to e shɔùn, arì gooma pɛn na dzi bo è dzu waa. È kpɛ̀yn toro na ni vu rèe ɲan, ŋà, è jaa naà ni mòò pɛn na waa. 8Sɔlì yè fù bo dzɔn nɔ̀n tɔ̀ rii ɲàn, à jaa rèè dzii sauna, ŋà, à na jɛ̀y faa waa. Àwà, y'à kun e si ra tɔ̀ rii ɲàn, yè bè à ka Dàmasì wɔ̀ɔ̀ doùn. 9È to tsùù jaana tɔ̀ tsuru, è bè tàrà fɔ bwèy zhììgi, à na ɲwɛyn ɲɔɔ̀n, à to na yu mìan.
10Tɔ̀ y'a tàrà, Yesù rè kàràndzin sɔn na ni Dàmasì wɔ̀ rɔ̀n, tɔ̀ tsoo yè bà ci Ananiyasì. Àyìwà, Tsìfa Yesù yè e yɛrɛ kpadè Ananiyasì rà jɛ̀y ɲan, à kiri ci: «Ananiyasì !» Ananiyasì yè kir'là latsi, è dzin ci: «Mun yɛ nèe Tsìfaà.» 11Tsìfaà yè dzin à ra ci: «Fù dòonen ɲan, wɔ̀ɔ̀ doùn shi niì kir'là ci shi tereonmaà, e tɔ̀ sen, e bè kpiri sɔn ne tsii, tɔ̀ tsoo yè bà ci Yudà. E be wɔ mɔn, e dzin ci yè kpiri sɔn kpadè a ra, nìi tsoo ci Sɔlì, è bà wɔ̀ sɔn modzin, nìi kir'là ci Tarisì. Nèe waatsi ree yɛ̀r'la ɲàn, à ni Ŋaablà mafyɛ̀ɛ̀n nà. 12Tɔ̀ Ŋaabla mafyɛɛ̀n doùn, à jɛ̀y faɔ̀ goo sɔn tsɛ nìi wo Ananiyasì. À y'à jaɔ̀ wo nàu dɔ̀n gbàà doùn, wo y'à si rèè tsùù wò tsɛ, sànko wò jaa rèè yè dzi jɛ̀y fa e shɔùn.»
13Tsìfa Yesù rè goomaa shɔ̀ùn, Ananiyasì yè dzin ci: «Ee Tsìfaà, mun to gooma giri myɛɔ̀n kpir'lee tsɛ dɛ ! À gooɲaan niì sapɛ fau wo re kàràndzin neè rà Yerusalɛmùn, mòò giri tɔ̀ lakɛrɔun mun na. 14Tɔ̀ nìn yè bo à ra, mòò o moò màfyɛɛ̀n faa wo tsoò ka, Saaka Jɔundzin neè y'à shi wɔ naɔ à suun mìin, ci è twɛy sapɛ kun.» 15Ŋà, Tsìfa Yesù yè dzin à ra ci: «Bè, kàtsu mun kpir'lee boo rìì n magoo ra. Mun nà à ka bè jàmàan kpɛrɛ mòdzin ì ko è re màsa reè rè, sànko mun mòò riì, yè tɔ̀ tɔ̀. À y'à to Isirayɛlì mòdzin neè sa yeè mun tɔ̀. 16À nà byɛnbe ge o ge rìì fa mun kamà, mun yɛ̀r'la nà tɔ̀ sapɛ kpadè à ra.»
17Àwà, Tsìfaà tɔ̀ dè dòu min niì, Ananiyasì yè dɔ̀n be. À bèu wɔ, è dɔ̀n gbàà doùn. À dɔ̀un, è si rèè tsùù Sɔlì tsɛ, è dzin à ra ci: «N neema kpiri Sɔlì, Tsìfa Yesù nìi yè e yɛrɛ kpadèu wo ra shia rè, wo yè bà na nàa mìin, tɔ̀ rii mun ka naɔ wo re, sànko wo yè dzi jɛ̀y fa e shɔùn. È mun ka na sa, sànko wo ɲan yeè tsyɛn Ŋaablà re Dzi Fɛnɛɛ rà.» 18Tɔ̀ nɔ̀nkɔɔrɔn, è bà jàci kaa swey tɔrɔn tɔrɔn bou Sɔlì jaa rèè tsɛ, è dzi è jɛ̀y fa e shɔùn kɔn yeu. Àwà, è fù tɔ̀un, y'à jaara foò yuà ka Ŋaablà re shia goo rèè rà. 19Tà shɔ̀ùn, è ɲwɛyn ɲɔn, è fààn tarà.
Sɔlì waajibi faa dzii kuun min niì
Àyìwà, Yesù rè kàràndzin niì reè ni Dàmasì, Sɔlì yè to twɛy ka mɔn, è bwèy dan fa. 20Tɔ̀un, è maa suu, è waajibia fa beè Dàmasì ŋaablabegba rèè doùn, è dziàn, ci Yesù rìì Ŋaablà Dzin kpir'la. 21Nìì reè sapɛ na à re goomaa lamyɛɛ̀n, à goò na jiɔ̀ twɛy sapɛ dzii tsɛ, yè dziàn ci: «Nìì reè sapɛ na màfyɛɛ̀n faa Yesù tsoò ka Yerusalɛmùn, kpir'liì na fù jiɔ̀ twɛy kpɛyn è byɛɛn, à na nèe gbɛ ! À naà naɔ̀ mìin, è nà twɛy kun shì be Saaka Jɔundzin neè rè rìì ɔ̀ ?»
22Ŋà, màan ji o ji seroun, Sɔlì kpɛ̀yn na fààn ni tàrà beè e re waajibi faa doùn, à y'à dè kpàdèe mòdzian nà, ci Yesù rìì Ŋaablà Jaara Modzìàn. Tɔ̀ waajibia baraka blàbe ɲaanfaa suun, Dzyèèsìbee mòdzin niì reè ni Dàmasì wɔ̀ rɔ̀n, twɛy naà dèràma tsu rii tɔɔ̀ à ra dɛ waa. 23#Kor2 11.32,33.Àwà, bwèy dànman dɔn bouma shɔ̀ùn, Dzyèèsìbee mòdzin niì reè ni Dàmasì wɔ̀ɔ̀ doùn, twɛy swey yè byɛ̀n à mà, ci ye nà Sɔlì vu. 24Ŋà, Sɔlì yè bo tɔ̀ goò dzuun ma è re. Arì nìi wɔ̀ɔ̀ boma dzii reè, feèn ko bwèè sa, è na twɛy sa sɛr'na nì, gè niì ni à to ye yè dzi à tàrà vu. 25Ŋà, sii sɔn see fene, kàràndzin niì reè na ni Sɔlì ka, twɛy y'à sen ji sèè doùn, yè fɛɛdzin shi sèè rèe ra, y'à jàà wɔ̀ɔ̀ sian bònè ko tɔ̀ ka.
26Tɔ̀un, Sɔlì yè dɔ̀n be Yerusalɛmùn. À bèu wɔ mɔn, à sàò na ni, wo yeè e ba kàràndzin neè tɛ̀y. Ŋà, twɛy sapɛ na shiɔ̀ à jɔun, kàtsu è naà ɲɛɔ̀n à ra, ci à baɔ̀ kàràndzin sààben na waa. 27Àwà, kàràndzin niì tsoo na ci 'Barinabasì', tɔ̀ yeè Sɔlì kiri gban e ra, è bè à ka kɛɛradzin neè rè. È bèu wɔ mɔn, Sɔlì Tsìfaà jàu nìi tsuru Dàmasì wɔ̀ùn shià tsɛ, ko Tsìfaà goomau à ka nìi tsuru, Barinabasì yè bo tɔ̀ jaa mà à dè kɛɛradzin neè rà. Sɔlì to mòdzian waajibiu nìi tsuru kùùnxɔ̀be doùn Yesù tsoò ka Dàmasì wɔ̀ rɔ̀n, è tɔ̀ sa jaa dè è ra.
28Àwà, è sen tɔ̀ jisee rà, Sɔlì sa yeè to kɛɛradzin neè ka. Yè bèe e si re Yerusalɛmùn wɔ̀ɔ̀ min niì sapɛ. À na waajibia faa Yesù tsoò ka, arì à na shi siɛ̀n tsu. 29Dzyèèsìbee mòdzin niì reè na Gɛ̀rɛ̀kì goòmàà dèe, Sɔlì na goomaa twɛy sa ka, è bà goo giri sɔ̀swɛy faa è ka. Ŋà, twɛy sa na à vuma gaa. 30Àwà, kàràndzìn dzyee reè tɔ̀ goomaa myɛ̀un min niì, yè bè Sɔlì ka Sezare. Tà shɔ̀ùn, y'à bàji be Tarisì wɔ̀ rɔ̀n.
Piyɛrì nìi fau Lidà ko Yɔpɛ̀ wɔ̀ rɔ̀n
31Àwà, tɔ̀ waatsi rɔn, ɲɛynamoo kuru nìì reè ni Yude mar'la ɲàn ko nìì reè ni Galile mar'la ɲàn ko nìì reè ni Samari mar'la ɲàn, jaancin na ni è kuru soo soo sapɛ tsɛ. È na jɔun ni tàrà beè kudɛyn, è re blàbe yeè bà na ni Ŋaablà tsɛ. Ŋaablà re Dzi Fɛnɛɛ na è dzwɛ̀maa nìi fa, tɔ̀ baraka rɔ̀n, è na giribe beè.
32Àyìwà, Piyɛrì na e ɲantsyeere beè jàmaàn min niì sapɛ, è kàràndzin neè siin siin bèe. Tà doùn, è nà bè wɔ̀ sɔn ɲan, nìi tsoo ci Lidà, è bè bo twɛy kàràndzin neè kpà. 33Kpiri sɔn na ni tɔ̀ wɔ̀ɔ̀ doùn, tɔ̀ tsoo yè bà ci Enè. Tɔ̀ kpir'la na mùrùkuɔ̀. È bè tàrà fɔ jii ŋaalòn, à naà dziɔ̀ fù bo e re ɲaangee tsɛ ŋe waa. Àwà, Piyɛrì bèu Lidà, è bè tɔ̀ jà mɔn. 34Piyɛrì y'à jàu, è dzin à ra ci: «Enè, Ŋaablà Jaara Moo Yesù wo cɛrɛmabeu, fù a re ɲaangee lamɔnɔ̀n a yɛrɛ !» Tɔ̀ nɔ̀nkɔɔrɔn ko e sa, Enè yè fù. 35Gàne sɔn na ni Lidà wɔ̀ɔ̀ tɛyn, ci Saarɔnìn. Àwà, Lidà wɔ̀ùndzin neè, ko tɔ̀ gànèdzin neè Enè jà nìi fau, è sapɛ yeè e tsiì Tsìfaà rà.
36Àyìwà, wɔ̀ sɔn na ni, ci Yɔpɛ̀. Tàan sɔn na ni tɔ̀ wɔ̀ rɔ̀n, tɔ̀ sa yeè bà na Yesù rè kàràndzin. Tɔ̀ taàn tsoo na ci Tàbità. Gɛ̀rɛ̀kì goòmà nɔ̀n, ci 'Dɔrɔkasì', nìi dzuɔn ci Dagbɛ. Tɔ̀ taàn na goowùɔ faa kudɛyn, è bà wɔɔ̀ gbakɔɔn reè rà. 37Tɔ̀un, tàan rèe yè nà ɲìnìn, è san, tɔ̀ y'a tàrà Piyɛrì ni Lidà wɔ̀ rɔ̀n. Àwà, à saun, y'à fùàn fòò tɔ̀ rii ɲàn, yè bè à ɲɛn gbà sɔn doùn sangasoò jìran nɔ̀n. 38Àwà, Lidà wɔ̀ɔ̀ ko Yɔpɛ̀ wɔ̀ɔ̀ sa ni e si tɛyn, Yɔpɛ̀ kàràndzin neè yè bà na à myɛɔ̀n, ci Piyɛrì ni Lidà. Tɔ̀un, yè mòkun fii ka Piyɛrì kpɛyn, ci yè b'a kiri. Twɛy bèu wɔ, yè dzin à ra ci: «Ɲe wo màfyɛ̀ɛn, a y'a tabe na mùn ne dòonen ɲan.»
39Tɔ̀un, Piyɛrì yè fù, è gban è kpɛyn suu. Àwà, Piyɛrì bèu wɔ mɔn, taàn fùàn ɲɛɔ̀n gbà nìi doùn sangasoò jìran nɔ̀n, yè bè à ka mɔn. Fùnshɔ̀ùntaan rèè sapɛ yeè e kpɛrɛ̀ Piyɛr'là tɔ̀un, yè bà gɛɛ. Tàbità na ni jaamabee rà è ka waatsi riì bwèy, à mɛ̀yɛ̀rii niì reè ko mɛ̀yɛ bla niì reè lamɔnɔun, yè twɛy kpàdèe Piyɛr'là. 40Tɔ̀un, Piyɛrì yè mòdzian sapɛ bo gbàà doùn, è kunun gban, è Ŋaablà mafyɛ̀n. Tà shɔ̀ùn, Piyɛrì yè e jaa kere fùàn nà, è dzin ci: «Tàbità, fù !» Taàn yè e jaa dzii san, à Piyɛrì jàu, è fù, è tsuù. 41Piyɛrì y'à si kun, è wɔ à ra, è fù. Tà shɔ̀ùn, è kòmànà kàràndzin neè ko fùnshɔ̀ùntaan rèè sèè kiri e shɔùn, è taàn jaama kpadè è ra. 42Tɔ̀ nɔ̀nkɔɔrɔn, à goò goomaa yè jee ji Yɔpɛ̀ wɔ̀ɔ̀ min niì sapɛ, mòò giri yè ɲɛn Tsìfaà rà. 43Piyɛrì yè to Yɔpɛ̀ wɔ̀ɔ̀ doùn tɔ̀ rii ɲàn, è waatsi fa mɔn. À na jàaŋnà kpiri sɔn ne tsii, ci Shimɔ̀n, tɔ̀ yeè bà tsùn làmɔnɔnbaa.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2024 Église Évangélique Mennonite du Burkina Faso (EEMBF) et SIL International