Lukì 1
1
Lukì rè kìtaabuà sɛbɛn kuàn
1-3Mòdzìn sɔbɛn Tèwofilì, Ŋaabla goo niì reè fau ɲe re mìin, à goo rèè fau mòò giri jaa ra, è sen fɔ à dzunjɔn bwey rɔ̀n. Nìì reè bàu à goo rèè shɛɛrɛ, Ŋaablà re goomaa jaa dèè yè bà ni twɛy suun, twɛy y'à lakɛrɔun mùn na. Y'à lakɛrɔun mùn na nìi tsuru, mòò giri sɛbɛn faunà à tsɛ tà tsuru nòn. Tɔ̀ rii y'à to, twɛy goo nìì reè fau, è sen fɔ à dzunjɔn bwey rɔ̀n, mun sa twɛy jaa taki takì gaaŋnà. Mun to y'à jaɔ̀, ci à wù, mun y'à jaa dè wo ra mòdzìn sɔbɛn Tèwofilì, è bà sɛbɛn gbaɔn e si ra. 4A jà mun tɔ̀ faa, mun sào ni à re, wo y'à tɔ̀, ci twɛy goo nìì reè kàraun wo ra, ci à sààben taki rii.
Mɛ̀rɛ̀kɛɛ̀ mòdzìn jààràfoobaa Yùxanà kere goo dèu min niì
5 #
Mbk1 24.10. À goo rèè dzii kuàn waatsi riì bwèy, Erodzì rìì na ni Yude mar'la màsàbee tsɛ. Tà waatsi rɔn, saakagoojaabobaa sɔn na ni, ci Jakàrìya. À na Arunà raa tsua mòdzian sɔn, nìi Saaka Jɔundzin blaa. À na saaka goojaabo kur'lìi mòdzin, tɔ̀ na kir'là Abiyà raa kur'la. À re tààn tsoo na ci Elizabɛtsì. Elizabɛtsì, tɔ̀ yeè bà na Arunà raa tsua mòdzian sɔn. 6Jakàrìya, ko e re tààn Elizabɛtsì, è fiɛ̀ sa na tereòn Ŋaablà jaa ra. È na mùn Tsìfaà dzugooma xɔù rèè ko à re shi kpadèunma rèè sapɛ shi jiɛ, arì jààma kiɲaanin naà ni è ra waa. 7Dzin naà ni è re waa, kàtsu Elizabɛtsì naà dzin ker'là waa. Tɔ̀ nìn yè bo à ra, à ko e re kpir'la sa na bɔrɔɔ nòn.
8Sii sɔn see, Jakàrìya na ni e re faagoò rà Ŋaablà re, nìi saaka goojaaboo. À na ni tɔ̀ ra, kàtsu faagoò dzii na suuŋna à ko e raa saaka goojaabo kur'là rìì là. 9È bè saaka goojaabo reè rè làndà shia tsɛ, wò rii na boo, ci è dɔ̀n Ŋaablà re gbà blàa doùn, è bè wushunaà wɔ gàne fɛnɛɛ doùn. 10Jakàrìya ni wushuna wɔɔ rà waatsi riì bwèy, tɔ̀ y'a tàrà, jàmaà sapɛ tsìiŋnà da rɔ̀n, yè bà Ŋaablà mafyɛ̀ɛn. 11Tɔ̀un, Jakàrìya ni mɔn, mùn Tsìfaà rè mɛ̀rɛ̀kɛ sɔn yeè nà e yɛrɛ kpadè à ra. Wushunaà wɔɔ̀ gè nìi tsɛ, mɛ̀rɛ̀kɛɛ̀ na tsìiŋnà tɔ̀ sirama si jaa rìì lè. 12Jakàrìya mɛ̀rɛ̀kɛɛ̀ jàu min niì, à akir'là na tsuù waa, shiɲaanbe y'à kun.
13Tɔ̀ ɲan, mɛ̀rɛ̀kɛɛ̀ yè dzin à ra ci: «Maà shi waa, Jakàrìya. Ŋaablà wo re màfyɛɛ̀n myɛ̀un. Wo re tààn Elizabɛtsì nà dzin kpiri soo kere wo re. A naà à tsoo wɔ ci Yùxanà. 14Dziin nèe goò nà bà taamadzibe brìsi rìì wo re, mòò giri sa taama to nà dzibe à kere goo rà. 15#Dɛk 6.3.À nà bà mùn Tsìfaà rè mòdzin bla rii. À fa bà dɔ̀ɔ̀ mìan kuraa, yè nà dzin mììnge ɲaùn kpɛrɛ. Ŋaablà re Dzi Fɛnɛɛ nà dɔ̀n ji à ɲan, fɔ à kere bwèy rɔ̀n. 16À nà à fa Isirayɛlì mòdzin neè giri yè sèè na e Tsifa Ŋaablà kpɛyn. 17#Mak 3.23,24.À nà nà, è nà Ŋaablà jɔun lamɔ̀nɔ̀n tsùù. Ŋaablà re Dzia fàan yè bà ni à ɲan, jàci Ŋaablà re kɛɛra Àliì raà tsuru, è dzin ko fà kpɛ̀rɛ̀ e si ra. Nìì reè yè e nɔɔ̀n Ŋaablà re, è twɛy sa duungoo lakere, yè akiri tàrà mòdzin tereonma rèè tsuru. Tà tsuru, à nà mòdzin ì màbyɛ̀n tsùù mùn Tsìfaà jɔun.»
18Àwà, mɛ̀rɛ̀kɛɛ̀ tà goomaa dè dòu min niì, Jakàrìya y'a tey ci: «Mun to nà à tɔ̀ fee rìì là, ci à sààben ? Mun bɔrɔɔ nòn, mun ne tààn sìà sa to wɔɔ sɔn ma.»
19 #
Dkk 8.16; 9.21. Mɛ̀rɛ̀kɛɛ̀ yè dzin Jakàrìya ra ci: «Mun nì Jìbirì. Mun nì ni Ŋaablà tɛyn, min bà à re goo rèè shi jiɛ. Wò rii mun ka naɔ̀, ci min nà gooma wo ka, min nèe kùnàgoo dziù rèe dè wo ra. 20Wo to na ɲɛn niì fa mun dzugoomaa nà waa, wo nà bà bobo. Wo fa dzi gooma dɛ, fɔ jisee riì, mun yɛ nìi dèu wo ra dòonen ɲan tɔ nà bo e shi tsɛ. À goo rèè to fa e fa waatsia to waa.»
21Tɔ̀ sapɛ ɲan, jàmaà tsìiŋnà da rɔn, è Jakàrìya mashua. Jakàrìya na ciɔ̀n nìi fa Ŋaablà re gbà blàa doùn, tɔ̀ na è duungoo doonà. 22Jakàrìya nàu bo waatsi riì bwèy, à na dzi gooma è ka waa. Àwà, twɛy sa y'a tɔ̀ tɔ̀un, ci à goò sɔn ni jaɔ̀ gbà blàa doùn mɔn. À na e duùn naà dèe è ra ko e si rèè rìì ka sa, à bàu bobo.
23Waatsi riì na ni Jakàrìya re, à y'à fa faagoò rà Ŋaablà re gbà blàa doùn, tɔ nàu tsyɛn, è kpɛyn sèè e re tsii. 24Àyìwà, twɛy goo rèè shɔ̀ùn, à na cin waa, à re tààn Elizabɛtsì yè bà fwɛynma. À yè e san nà kpɛ̀rɛ̀ tɔ̀un è bè tàrà fɔ kuu nùn. À ci: 25«Nèe mùn Tsìfaà rìì lè faagoo. Dzin kerebɛybeè seè na nìi boò mun tsɛ mòdzian jaa ra, à yɛ tɔ̀ rii jaɔ̀ nèe dòònuùn, è fɛɛ shi à ra.»
Mɛ̀rɛ̀kɛɛ̀ Yesù kere goo dèu min niì
26Àyìwà, Elizabɛtsì doòn kuu tsùnmɛ̀naa, Ŋaablà yeè mɛ̀rɛ̀kɛ Jìbirì ka bè Galile mar'la wɔ̀ sɔn ɲan, ci Nazarɛtsì. 27#Mat 1.18.Ci è bè canguru sɔn ne, nìi ma kuɔn kpiri sɔn ne, ci Yusufù. Yusufù, tɔ̀ yeè bà na màsà kpiri Dawudà raa tsua mòdzian sɔn. Cangur'la tsoo na Mariyamùn. 28Tɔ̀un, mɛ̀rɛ̀kɛɛ̀ bèu wɔ Mariyamùn tsɛ, è dzin à ra ci: «Mariyamùn, a ko à taamadzibe. Mùn Tsìfa Ŋaabla ni wo re. À re dzwɛ ni wo kpɛyn, fɔ è bè geren.»
29Mariyamùn twɛy gooma reè myɛ̀un mɛ̀rɛ̀kɛɛ̀ dzu min niì, à akiri na tsuù kuraa. È yɛrɛ tey tɔ̀ rii ɲàn, ci nèe tswɛ̀y ree dzuɔn to yè bà fee ?
30Tɔ̀un, mɛ̀rɛ̀kɛɛ̀ yè dzin à ra ci: «Mariyamùn, maà shi waa ! Ŋaabla wo kɛ̀niɔ̀n kɛ̀n'n kur'la nìi na ni à ci dzyee rèè waa. 31#Mat 1.21.Wo nà don sen, wo yè dzin kpiri soo kere. È kere, a tsoo wɔ, ci Yesù. 32#Sak2 7.12,13,16; Ekk 9.6.À tsoò nà blàbe, è bà kir'là Jìran nɔ̀n Ŋaablàa Dzin Kpir'la. Mùn Tsìfa Ŋaablà nà Dziin nèe bà màsa, jàci à fàbɔɔ Dawudà na ni nìi tsuru. 33À nà màsàbee fa Yàkubà tsua dzin nèè tsɛ kudɛyn. Dò fa bà ni à re màsàbee mà waa.»
34Mariyamùn yè mɛ̀rɛ̀kɛɛ̀ tey ci: «Tɔ nà fa dzùrù ? Mun na kpiri goo tɔ jà ŋe waa.»
35Mɛ̀rɛ̀kɛɛ̀ ci: «Jìran nɔ̀n Ŋaablàa rè Dzi Fɛnɛɛ nà nà jàà wo tsɛ, Dzi ree yè wo kuu jàci cin. Tɔ̀ rii y'à to, wo nà tɔ̀ dzin nìi kere, à nà bà mòdzìn fɛnɛ, è bà kir'là, ci Ŋaablà Dzin Kpir'la. 36Àwà, nìi wo neema taan Elizabɛtsì, à bɔrɔunmaà ko e raà sa, don ni tɔ̀ sa ɲan, nìi nà bà dzin kpiri. È na dziàn, ci à na naà dzi dzin kere waa. Dòònuùn, à doòn kuu tsunmɛna ni yɛ nèe. 37#Gok 18.14.Ŋaablà na gbaa goo sɔn pɛn na waa.»
38Mariyamùn yè dzin tɔ̀ ɲan ci: «Mun ni Tsìfaà rè goo rèè rìì ɲan tsuù ɲàn. Ŋaa y'à fa n ne, jàci wo yɛ à dèu mun na nìi tsuru.» Tà shɔ̀ùn, mɛ̀rɛ̀kɛɛ̀ yè bo Mariyamùn tɛyn, è dɔ̀n be.
Mariyamùn bèu bo Elizabɛtsì kpà min niì
39Àyìwà, tɔ̀ bwèy fii rɔ̀n ko e sa, Mariyamùn yè fù, è shia kun è tabe be Yude mar'la jèn gane reè wɔ̀ sɔn ɲan. 40À bèu wɔ mɔn, è bè dɔ̀n Jakàrìya re gbàà doùn, è neema taan Elizabɛtsì tswà. 41Àwà, Elizabɛtsì Mariyamùn tswɛ̀y fà vuà myɛ̀un nìi tsuru, Elizabɛtsì dziàn yè e ɲankwey à duùn. Ŋaablà re Dzi Fɛnɛɛ yè nà jàà Elizabɛtsì tsɛ.
42Tɔ̀un, è vu bo fààn na ci: «Ŋaablà dzwɛ kuun wo mà, è geren tààn dzyee reè sapɛ tsɛ. Wo to nà dzin nìi kere, à re dzwɛ ni tɔ̀ sa kpɛyn ! 43Mun tsì rii tɔ̀ tsuru sa, mun Tsìfaà yɛ̀r'la naà yè bà naɔ̀ bo mun kpà ? 44Wo na jarà ɔ̀, fɔ mun dziu wo tswɛ̀y fà vuà myɛ̀n min niì, mun ne dziɛ̀n taamadzibekɔɔn yeè e ɲankwey mun duùn. 45Mariyamùn, dzwɛ ni wo kpɛyn. Dzwɛ ni wo kpɛyn, kàtsu Tsìfa Ŋaablà re gooma niì nàu dè wo ra, wo ɲɛun à ra, ci tɔ nà bo e shi tsɛ !»
Mariyamùn tsoo dzi ɲɛun Ŋaablà tsɛ ye niì ka
46Àyìwà, Mariyamùn yè dzin tɔ̀ rii ɲàn ci:
«Mùn Tsìfa Ŋaablà blabee nìi boò,
mun tsoo dzi ɲɛɛn à tsɛ, è ɲɛn tɔ̀ tsɛ. 47Mun duùnà dzibeuma brìsi rìì to ni,
à saabuà yè bà mun Tsibaa Ŋaablà.
48 #
Sak1 1.11. À bàu à sào è re jòn taan mà jàaŋmaà siin e jaa dzuun,
nìi yɛ a ci mun.
Àwà, è sen dòònuùn nà, waatsia sapɛ modzin nà dziàn,
ci Ŋaabla dzwɛ kuun mun mà.
49Tɔ nà dè, kàtsu, Dzitsi Ŋaabla goo blà bla ì fau mun ne.
À fɛnɛɔ̀.
50Waatsia sapɛ doùn, nìì reè rè blàbe ni Ŋaablà tsɛ,
à màtsur'la twɛy rà.
51À dzi ra goo ì fau ko e faan sapɛ ka.
Nìì reè kɛ̀sɛmàà beò yɛ̀rɛ̀blàbeè tsɛ, è twɛy jee.
52 #
Yɔb 5.11; 12.19. À màsa ì jàà bou e re màsà gbaaniin neè tsɛ,
è mòdzin ma jàaŋma rèè ɲansen.
53À gè wùù giri sìun dzukɔɔn reè rà,
fɔ twɛy jaa yè bè cɛn.
Gètsi rèè, è twɛy sixɔɔma baji be.
54-55 #
Gok 17.7. #
Sak1 2.1-10. À wɔu Isirayɛlì mòdzin neè rà,
nìì reè goo faa à re.
À na e taa myɛn à kpàdè kuraa, ci wo màtsur'la Ibraximà,
ko e tsua dzin nèè rà kudɛyn,
jàci à y'à làyiri seun ɲe fàbɔɔ bɔɔ rèè rè nìi tsuru.»
56Mariyamùn yè to Elizabɛtsì kpà mɔn, è bè tàrà fɔ kuu zhììgi tsuru, è kòmànà sèè be e re tsii.
Mòdzìn jààràfoobaa Yùxanà kere goo
57Àyìwà, Elizabɛtsì kere waatsi nàu wɔ, dziɛ̀n yè bà dzin kpiri.
58Tà goo blàa y'à kpàdèu Elizabɛtsì rà, ci mùn Tsìfa Ŋaabla wù à ka. Tɔ̀un, Elizabɛtsì tsùùsi rèè, ko à neema reè dziu tɔ̀ myɛ̀n min niì, yè e ba à tɛ̀y y'à taamadzibe fa.
59 #
Sak 12.3. Dziɛ̀n kereomaà nàu bwèy ŋaalòn tsyɛn waatsi riì bwèy, yè nà, ci ye nàa à shɛn. È sàò na ni y'à tsoò wɔ, è bà e faà tsooma, ci Jakàrìya.
60À naà yè dzin tɔ̀ rii ɲàn ci: «Ɔ̀ɔɔn, mùn nà à tsoo wɔ, ci Yùxanà.»
61Yè dzin à ra ci: «Mòò pɛn to na ni wo re mòdzìnbee ɲàn, tà tsoò ni nìi rà do !»
62Yè fàmaa tey tɔ̀un bobo goòmàà ɲàn, ci à sàò ni y'à dziàn tsoo wɔ dzùrù. 63Àwà, Jakàrìya yeè dzin è ra bobo goòmàà ɲàn, ci yè nà sɛbɛn faa wàla ka wò kɔ̀. È nàu wàlaà ka, Jakàrìya y'a sɛbɛn à tsɛ nèe tsuru ci: «À tsoo rìì ci Yùxanà.» È ji è sapɛ dzii tsɛ. 64Tà nɔ̀nkɔɔrɔn ko e sa, Jakàrìya dziɛ̀ yè foro, è dzi gooma e shɔùn. Tɔ̀un, è maa è tsoo dzi ɲɛɛn Ŋaablà tsɛ. 65Tà goò faumaà yè è tsùùsi rèè sapɛ shi. Tɔ̀un, mòdzian y'à goò lakɛɛ̀y beè e si ra Yude mar'la jèn gane reè sapɛ ɲan. 66Mòò o moò toro ye ji à goomaa ɲàn, tɔ̀ yeè e maa à kɛ̀sɛɛ̀, è dziàn e duùn ci: «Nèe dziin nèe yè bà nà bà fee ?» Àwà, è sapɛ jaa na ni à ra, ci mùn Tsìfa Ŋaablà rii tsìiŋnà à ka. 67Àyìwà, Ŋaablà re Dzi Fɛnɛɛ yè nà jàà dziɛ̀n fà Jakàrìya tsɛ. Tɔ̀un, Ŋaablà yeè e re gooma ì wɔ Jakàrìya dzu ci:
68«Tsoo dzi wù è ɲɛn mùn Tsìfa Ŋaablà tsɛ,
nìi Isirayɛlì Ŋaablà.
À wù tɔ̀ yeè fa, kàtsu à nàu wɔ e re mòò rèè rà, è tsi.
69À ɲe kɔ̀u e tsibaa barakama na,
nìi Ŋaablà re faagoofadzin màsà kpiri Dawudà raa tsua mòdzian sɔn.
70Fɔ jisee gbaan, à na tɔ̀ rii dèunà,
è bo à re kɛɛra fɛnɛ reè dzu.
71À na à làyiri seunà, è bo twɛy kɛɛra reè dzu,
ci wo nà ɲe tsi bo e ɲan rèè suun.
Ɲe goo to xɔ nìì reè mà, è ɲe tsi twɛy raa fàan sa ra.
72À y'à kpàdèu ɲe fàbɔɔ bɔɔ rèè rà,
ci wo màtsur'la è ra, à to na e taa myɛn à re waa,
ci wo tsììn min tsuru dzyèèsìbe wɔɔ è ka.
73À na tà goò kɛ̀ɛ̀ rìì faɔ̀ ɲe fàbɔɔ Ibraximà rè.
74À ci wo nà ɲe tsi bo e ɲan rèè suun.
Tà tsuru, ɲe nà dzi goo fa wò Ŋaablà re, ɲe fa bà shiɔ̀ waa.
75Tà doùn, ɲe re sii sa see jaamabee doùn,
ɲe nà bà fɛnɛunà, ɲe yè bà tereonà à jaa ra.»
76 #
Mak 3.1. Tà shɔ̀ùn, Jakàrìya ci kɔn:
«Nìi to wo, mun dzin kpir'la, wo nà kiri,
ci Jìran nɔ̀n Ŋaablàa rè kɛɛraa.
Tɔ nà fa, kàtsu wo nà a ji mùn Tsìfa Ŋaablà jɔun,
wo y'à dɔ̀n shià lamɔnɔ̀n tsùù.
77Tà tsuru à re mòò rèè nà à tɔ̀, ci à nà ye tsi,
è ye re gooɲaan tsìɛ̀ mɛɛy bo ye vu ra.
78Àwà, ɲe re Ŋaabla ni nìi tsuru,
à màtsur'la, wùù yeè bà ni à ɲan, fɔ è bè geren.
Tɔ̀ rii kamà, à nà vyevyee sìn ɲe ra, è bo jìran nɔ̀n,
a ci gbishɛɛ̀mà nɔ̀n bwèè boò nìi tsuru.
79 #
Ekk 9.1. Tɔ nà fa, sànko nìì reè ni tsitsiì rɔ̀n,
ko nìì reè ni saàn shiɲaanbeè ɲàn, twɛy yè dzi jɛ̀y fa.
À nà ɲe jaa ji jaanciàn shia rà.»
80Àwà, dziɛ̀n yè bɔɔ bèe tɔ̀un, à akir'là sa yeè blàbe beè. Fur'lu, è nà bè to jènjàà kor'nà doùn, fɔ jisee riì à nàu e yɛrɛ kpadè Isirayɛlì mòdzin neè rà.
Currently Selected:
Lukì 1: BDZU
Highlight
Share
Copy
Want to have your highlights saved across all your devices? Sign up or sign in
© 2024 Église Évangélique Mennonite du Burkina Faso (EEMBF) et SIL International
Lukì 1
1
Lukì rè kìtaabuà sɛbɛn kuàn
1-3Mòdzìn sɔbɛn Tèwofilì, Ŋaabla goo niì reè fau ɲe re mìin, à goo rèè fau mòò giri jaa ra, è sen fɔ à dzunjɔn bwey rɔ̀n. Nìì reè bàu à goo rèè shɛɛrɛ, Ŋaablà re goomaa jaa dèè yè bà ni twɛy suun, twɛy y'à lakɛrɔun mùn na. Y'à lakɛrɔun mùn na nìi tsuru, mòò giri sɛbɛn faunà à tsɛ tà tsuru nòn. Tɔ̀ rii y'à to, twɛy goo nìì reè fau, è sen fɔ à dzunjɔn bwey rɔ̀n, mun sa twɛy jaa taki takì gaaŋnà. Mun to y'à jaɔ̀, ci à wù, mun y'à jaa dè wo ra mòdzìn sɔbɛn Tèwofilì, è bà sɛbɛn gbaɔn e si ra. 4A jà mun tɔ̀ faa, mun sào ni à re, wo y'à tɔ̀, ci twɛy goo nìì reè kàraun wo ra, ci à sààben taki rii.
Mɛ̀rɛ̀kɛɛ̀ mòdzìn jààràfoobaa Yùxanà kere goo dèu min niì
5 #
Mbk1 24.10. À goo rèè dzii kuàn waatsi riì bwèy, Erodzì rìì na ni Yude mar'la màsàbee tsɛ. Tà waatsi rɔn, saakagoojaabobaa sɔn na ni, ci Jakàrìya. À na Arunà raa tsua mòdzian sɔn, nìi Saaka Jɔundzin blaa. À na saaka goojaabo kur'lìi mòdzin, tɔ̀ na kir'là Abiyà raa kur'la. À re tààn tsoo na ci Elizabɛtsì. Elizabɛtsì, tɔ̀ yeè bà na Arunà raa tsua mòdzian sɔn. 6Jakàrìya, ko e re tààn Elizabɛtsì, è fiɛ̀ sa na tereòn Ŋaablà jaa ra. È na mùn Tsìfaà dzugooma xɔù rèè ko à re shi kpadèunma rèè sapɛ shi jiɛ, arì jààma kiɲaanin naà ni è ra waa. 7Dzin naà ni è re waa, kàtsu Elizabɛtsì naà dzin ker'là waa. Tɔ̀ nìn yè bo à ra, à ko e re kpir'la sa na bɔrɔɔ nòn.
8Sii sɔn see, Jakàrìya na ni e re faagoò rà Ŋaablà re, nìi saaka goojaaboo. À na ni tɔ̀ ra, kàtsu faagoò dzii na suuŋna à ko e raa saaka goojaabo kur'là rìì là. 9È bè saaka goojaabo reè rè làndà shia tsɛ, wò rii na boo, ci è dɔ̀n Ŋaablà re gbà blàa doùn, è bè wushunaà wɔ gàne fɛnɛɛ doùn. 10Jakàrìya ni wushuna wɔɔ rà waatsi riì bwèy, tɔ̀ y'a tàrà, jàmaà sapɛ tsìiŋnà da rɔ̀n, yè bà Ŋaablà mafyɛ̀ɛn. 11Tɔ̀un, Jakàrìya ni mɔn, mùn Tsìfaà rè mɛ̀rɛ̀kɛ sɔn yeè nà e yɛrɛ kpadè à ra. Wushunaà wɔɔ̀ gè nìi tsɛ, mɛ̀rɛ̀kɛɛ̀ na tsìiŋnà tɔ̀ sirama si jaa rìì lè. 12Jakàrìya mɛ̀rɛ̀kɛɛ̀ jàu min niì, à akir'là na tsuù waa, shiɲaanbe y'à kun.
13Tɔ̀ ɲan, mɛ̀rɛ̀kɛɛ̀ yè dzin à ra ci: «Maà shi waa, Jakàrìya. Ŋaablà wo re màfyɛɛ̀n myɛ̀un. Wo re tààn Elizabɛtsì nà dzin kpiri soo kere wo re. A naà à tsoo wɔ ci Yùxanà. 14Dziin nèe goò nà bà taamadzibe brìsi rìì wo re, mòò giri sa taama to nà dzibe à kere goo rà. 15#Dɛk 6.3.À nà bà mùn Tsìfaà rè mòdzin bla rii. À fa bà dɔ̀ɔ̀ mìan kuraa, yè nà dzin mììnge ɲaùn kpɛrɛ. Ŋaablà re Dzi Fɛnɛɛ nà dɔ̀n ji à ɲan, fɔ à kere bwèy rɔ̀n. 16À nà à fa Isirayɛlì mòdzin neè giri yè sèè na e Tsifa Ŋaablà kpɛyn. 17#Mak 3.23,24.À nà nà, è nà Ŋaablà jɔun lamɔ̀nɔ̀n tsùù. Ŋaablà re Dzia fàan yè bà ni à ɲan, jàci Ŋaablà re kɛɛra Àliì raà tsuru, è dzin ko fà kpɛ̀rɛ̀ e si ra. Nìì reè yè e nɔɔ̀n Ŋaablà re, è twɛy sa duungoo lakere, yè akiri tàrà mòdzin tereonma rèè tsuru. Tà tsuru, à nà mòdzin ì màbyɛ̀n tsùù mùn Tsìfaà jɔun.»
18Àwà, mɛ̀rɛ̀kɛɛ̀ tà goomaa dè dòu min niì, Jakàrìya y'a tey ci: «Mun to nà à tɔ̀ fee rìì là, ci à sààben ? Mun bɔrɔɔ nòn, mun ne tààn sìà sa to wɔɔ sɔn ma.»
19 #
Dkk 8.16; 9.21. Mɛ̀rɛ̀kɛɛ̀ yè dzin Jakàrìya ra ci: «Mun nì Jìbirì. Mun nì ni Ŋaablà tɛyn, min bà à re goo rèè shi jiɛ. Wò rii mun ka naɔ̀, ci min nà gooma wo ka, min nèe kùnàgoo dziù rèe dè wo ra. 20Wo to na ɲɛn niì fa mun dzugoomaa nà waa, wo nà bà bobo. Wo fa dzi gooma dɛ, fɔ jisee riì, mun yɛ nìi dèu wo ra dòonen ɲan tɔ nà bo e shi tsɛ. À goo rèè to fa e fa waatsia to waa.»
21Tɔ̀ sapɛ ɲan, jàmaà tsìiŋnà da rɔn, è Jakàrìya mashua. Jakàrìya na ciɔ̀n nìi fa Ŋaablà re gbà blàa doùn, tɔ̀ na è duungoo doonà. 22Jakàrìya nàu bo waatsi riì bwèy, à na dzi gooma è ka waa. Àwà, twɛy sa y'a tɔ̀ tɔ̀un, ci à goò sɔn ni jaɔ̀ gbà blàa doùn mɔn. À na e duùn naà dèe è ra ko e si rèè rìì ka sa, à bàu bobo.
23Waatsi riì na ni Jakàrìya re, à y'à fa faagoò rà Ŋaablà re gbà blàa doùn, tɔ nàu tsyɛn, è kpɛyn sèè e re tsii. 24Àyìwà, twɛy goo rèè shɔ̀ùn, à na cin waa, à re tààn Elizabɛtsì yè bà fwɛynma. À yè e san nà kpɛ̀rɛ̀ tɔ̀un è bè tàrà fɔ kuu nùn. À ci: 25«Nèe mùn Tsìfaà rìì lè faagoo. Dzin kerebɛybeè seè na nìi boò mun tsɛ mòdzian jaa ra, à yɛ tɔ̀ rii jaɔ̀ nèe dòònuùn, è fɛɛ shi à ra.»
Mɛ̀rɛ̀kɛɛ̀ Yesù kere goo dèu min niì
26Àyìwà, Elizabɛtsì doòn kuu tsùnmɛ̀naa, Ŋaablà yeè mɛ̀rɛ̀kɛ Jìbirì ka bè Galile mar'la wɔ̀ sɔn ɲan, ci Nazarɛtsì. 27#Mat 1.18.Ci è bè canguru sɔn ne, nìi ma kuɔn kpiri sɔn ne, ci Yusufù. Yusufù, tɔ̀ yeè bà na màsà kpiri Dawudà raa tsua mòdzian sɔn. Cangur'la tsoo na Mariyamùn. 28Tɔ̀un, mɛ̀rɛ̀kɛɛ̀ bèu wɔ Mariyamùn tsɛ, è dzin à ra ci: «Mariyamùn, a ko à taamadzibe. Mùn Tsìfa Ŋaabla ni wo re. À re dzwɛ ni wo kpɛyn, fɔ è bè geren.»
29Mariyamùn twɛy gooma reè myɛ̀un mɛ̀rɛ̀kɛɛ̀ dzu min niì, à akiri na tsuù kuraa. È yɛrɛ tey tɔ̀ rii ɲàn, ci nèe tswɛ̀y ree dzuɔn to yè bà fee ?
30Tɔ̀un, mɛ̀rɛ̀kɛɛ̀ yè dzin à ra ci: «Mariyamùn, maà shi waa ! Ŋaabla wo kɛ̀niɔ̀n kɛ̀n'n kur'la nìi na ni à ci dzyee rèè waa. 31#Mat 1.21.Wo nà don sen, wo yè dzin kpiri soo kere. È kere, a tsoo wɔ, ci Yesù. 32#Sak2 7.12,13,16; Ekk 9.6.À tsoò nà blàbe, è bà kir'là Jìran nɔ̀n Ŋaablàa Dzin Kpir'la. Mùn Tsìfa Ŋaablà nà Dziin nèe bà màsa, jàci à fàbɔɔ Dawudà na ni nìi tsuru. 33À nà màsàbee fa Yàkubà tsua dzin nèè tsɛ kudɛyn. Dò fa bà ni à re màsàbee mà waa.»
34Mariyamùn yè mɛ̀rɛ̀kɛɛ̀ tey ci: «Tɔ nà fa dzùrù ? Mun na kpiri goo tɔ jà ŋe waa.»
35Mɛ̀rɛ̀kɛɛ̀ ci: «Jìran nɔ̀n Ŋaablàa rè Dzi Fɛnɛɛ nà nà jàà wo tsɛ, Dzi ree yè wo kuu jàci cin. Tɔ̀ rii y'à to, wo nà tɔ̀ dzin nìi kere, à nà bà mòdzìn fɛnɛ, è bà kir'là, ci Ŋaablà Dzin Kpir'la. 36Àwà, nìi wo neema taan Elizabɛtsì, à bɔrɔunmaà ko e raà sa, don ni tɔ̀ sa ɲan, nìi nà bà dzin kpiri. È na dziàn, ci à na naà dzi dzin kere waa. Dòònuùn, à doòn kuu tsunmɛna ni yɛ nèe. 37#Gok 18.14.Ŋaablà na gbaa goo sɔn pɛn na waa.»
38Mariyamùn yè dzin tɔ̀ ɲan ci: «Mun ni Tsìfaà rè goo rèè rìì ɲan tsuù ɲàn. Ŋaa y'à fa n ne, jàci wo yɛ à dèu mun na nìi tsuru.» Tà shɔ̀ùn, mɛ̀rɛ̀kɛɛ̀ yè bo Mariyamùn tɛyn, è dɔ̀n be.
Mariyamùn bèu bo Elizabɛtsì kpà min niì
39Àyìwà, tɔ̀ bwèy fii rɔ̀n ko e sa, Mariyamùn yè fù, è shia kun è tabe be Yude mar'la jèn gane reè wɔ̀ sɔn ɲan. 40À bèu wɔ mɔn, è bè dɔ̀n Jakàrìya re gbàà doùn, è neema taan Elizabɛtsì tswà. 41Àwà, Elizabɛtsì Mariyamùn tswɛ̀y fà vuà myɛ̀un nìi tsuru, Elizabɛtsì dziàn yè e ɲankwey à duùn. Ŋaablà re Dzi Fɛnɛɛ yè nà jàà Elizabɛtsì tsɛ.
42Tɔ̀un, è vu bo fààn na ci: «Ŋaablà dzwɛ kuun wo mà, è geren tààn dzyee reè sapɛ tsɛ. Wo to nà dzin nìi kere, à re dzwɛ ni tɔ̀ sa kpɛyn ! 43Mun tsì rii tɔ̀ tsuru sa, mun Tsìfaà yɛ̀r'la naà yè bà naɔ̀ bo mun kpà ? 44Wo na jarà ɔ̀, fɔ mun dziu wo tswɛ̀y fà vuà myɛ̀n min niì, mun ne dziɛ̀n taamadzibekɔɔn yeè e ɲankwey mun duùn. 45Mariyamùn, dzwɛ ni wo kpɛyn. Dzwɛ ni wo kpɛyn, kàtsu Tsìfa Ŋaablà re gooma niì nàu dè wo ra, wo ɲɛun à ra, ci tɔ nà bo e shi tsɛ !»
Mariyamùn tsoo dzi ɲɛun Ŋaablà tsɛ ye niì ka
46Àyìwà, Mariyamùn yè dzin tɔ̀ rii ɲàn ci:
«Mùn Tsìfa Ŋaablà blabee nìi boò,
mun tsoo dzi ɲɛɛn à tsɛ, è ɲɛn tɔ̀ tsɛ. 47Mun duùnà dzibeuma brìsi rìì to ni,
à saabuà yè bà mun Tsibaa Ŋaablà.
48 #
Sak1 1.11. À bàu à sào è re jòn taan mà jàaŋmaà siin e jaa dzuun,
nìi yɛ a ci mun.
Àwà, è sen dòònuùn nà, waatsia sapɛ modzin nà dziàn,
ci Ŋaabla dzwɛ kuun mun mà.
49Tɔ nà dè, kàtsu, Dzitsi Ŋaabla goo blà bla ì fau mun ne.
À fɛnɛɔ̀.
50Waatsia sapɛ doùn, nìì reè rè blàbe ni Ŋaablà tsɛ,
à màtsur'la twɛy rà.
51À dzi ra goo ì fau ko e faan sapɛ ka.
Nìì reè kɛ̀sɛmàà beò yɛ̀rɛ̀blàbeè tsɛ, è twɛy jee.
52 #
Yɔb 5.11; 12.19. À màsa ì jàà bou e re màsà gbaaniin neè tsɛ,
è mòdzin ma jàaŋma rèè ɲansen.
53À gè wùù giri sìun dzukɔɔn reè rà,
fɔ twɛy jaa yè bè cɛn.
Gètsi rèè, è twɛy sixɔɔma baji be.
54-55 #
Gok 17.7. #
Sak1 2.1-10. À wɔu Isirayɛlì mòdzin neè rà,
nìì reè goo faa à re.
À na e taa myɛn à kpàdè kuraa, ci wo màtsur'la Ibraximà,
ko e tsua dzin nèè rà kudɛyn,
jàci à y'à làyiri seun ɲe fàbɔɔ bɔɔ rèè rè nìi tsuru.»
56Mariyamùn yè to Elizabɛtsì kpà mɔn, è bè tàrà fɔ kuu zhììgi tsuru, è kòmànà sèè be e re tsii.
Mòdzìn jààràfoobaa Yùxanà kere goo
57Àyìwà, Elizabɛtsì kere waatsi nàu wɔ, dziɛ̀n yè bà dzin kpiri.
58Tà goo blàa y'à kpàdèu Elizabɛtsì rà, ci mùn Tsìfa Ŋaabla wù à ka. Tɔ̀un, Elizabɛtsì tsùùsi rèè, ko à neema reè dziu tɔ̀ myɛ̀n min niì, yè e ba à tɛ̀y y'à taamadzibe fa.
59 #
Sak 12.3. Dziɛ̀n kereomaà nàu bwèy ŋaalòn tsyɛn waatsi riì bwèy, yè nà, ci ye nàa à shɛn. È sàò na ni y'à tsoò wɔ, è bà e faà tsooma, ci Jakàrìya.
60À naà yè dzin tɔ̀ rii ɲàn ci: «Ɔ̀ɔɔn, mùn nà à tsoo wɔ, ci Yùxanà.»
61Yè dzin à ra ci: «Mòò pɛn to na ni wo re mòdzìnbee ɲàn, tà tsoò ni nìi rà do !»
62Yè fàmaa tey tɔ̀un bobo goòmàà ɲàn, ci à sàò ni y'à dziàn tsoo wɔ dzùrù. 63Àwà, Jakàrìya yeè dzin è ra bobo goòmàà ɲàn, ci yè nà sɛbɛn faa wàla ka wò kɔ̀. È nàu wàlaà ka, Jakàrìya y'a sɛbɛn à tsɛ nèe tsuru ci: «À tsoo rìì ci Yùxanà.» È ji è sapɛ dzii tsɛ. 64Tà nɔ̀nkɔɔrɔn ko e sa, Jakàrìya dziɛ̀ yè foro, è dzi gooma e shɔùn. Tɔ̀un, è maa è tsoo dzi ɲɛɛn Ŋaablà tsɛ. 65Tà goò faumaà yè è tsùùsi rèè sapɛ shi. Tɔ̀un, mòdzian y'à goò lakɛɛ̀y beè e si ra Yude mar'la jèn gane reè sapɛ ɲan. 66Mòò o moò toro ye ji à goomaa ɲàn, tɔ̀ yeè e maa à kɛ̀sɛɛ̀, è dziàn e duùn ci: «Nèe dziin nèe yè bà nà bà fee ?» Àwà, è sapɛ jaa na ni à ra, ci mùn Tsìfa Ŋaablà rii tsìiŋnà à ka. 67Àyìwà, Ŋaablà re Dzi Fɛnɛɛ yè nà jàà dziɛ̀n fà Jakàrìya tsɛ. Tɔ̀un, Ŋaablà yeè e re gooma ì wɔ Jakàrìya dzu ci:
68«Tsoo dzi wù è ɲɛn mùn Tsìfa Ŋaablà tsɛ,
nìi Isirayɛlì Ŋaablà.
À wù tɔ̀ yeè fa, kàtsu à nàu wɔ e re mòò rèè rà, è tsi.
69À ɲe kɔ̀u e tsibaa barakama na,
nìi Ŋaablà re faagoofadzin màsà kpiri Dawudà raa tsua mòdzian sɔn.
70Fɔ jisee gbaan, à na tɔ̀ rii dèunà,
è bo à re kɛɛra fɛnɛ reè dzu.
71À na à làyiri seunà, è bo twɛy kɛɛra reè dzu,
ci wo nà ɲe tsi bo e ɲan rèè suun.
Ɲe goo to xɔ nìì reè mà, è ɲe tsi twɛy raa fàan sa ra.
72À y'à kpàdèu ɲe fàbɔɔ bɔɔ rèè rà,
ci wo màtsur'la è ra, à to na e taa myɛn à re waa,
ci wo tsììn min tsuru dzyèèsìbe wɔɔ è ka.
73À na tà goò kɛ̀ɛ̀ rìì faɔ̀ ɲe fàbɔɔ Ibraximà rè.
74À ci wo nà ɲe tsi bo e ɲan rèè suun.
Tà tsuru, ɲe nà dzi goo fa wò Ŋaablà re, ɲe fa bà shiɔ̀ waa.
75Tà doùn, ɲe re sii sa see jaamabee doùn,
ɲe nà bà fɛnɛunà, ɲe yè bà tereonà à jaa ra.»
76 #
Mak 3.1. Tà shɔ̀ùn, Jakàrìya ci kɔn:
«Nìi to wo, mun dzin kpir'la, wo nà kiri,
ci Jìran nɔ̀n Ŋaablàa rè kɛɛraa.
Tɔ nà fa, kàtsu wo nà a ji mùn Tsìfa Ŋaablà jɔun,
wo y'à dɔ̀n shià lamɔnɔ̀n tsùù.
77Tà tsuru à re mòò rèè nà à tɔ̀, ci à nà ye tsi,
è ye re gooɲaan tsìɛ̀ mɛɛy bo ye vu ra.
78Àwà, ɲe re Ŋaabla ni nìi tsuru,
à màtsur'la, wùù yeè bà ni à ɲan, fɔ è bè geren.
Tɔ̀ rii kamà, à nà vyevyee sìn ɲe ra, è bo jìran nɔ̀n,
a ci gbishɛɛ̀mà nɔ̀n bwèè boò nìi tsuru.
79 #
Ekk 9.1. Tɔ nà fa, sànko nìì reè ni tsitsiì rɔ̀n,
ko nìì reè ni saàn shiɲaanbeè ɲàn, twɛy yè dzi jɛ̀y fa.
À nà ɲe jaa ji jaanciàn shia rà.»
80Àwà, dziɛ̀n yè bɔɔ bèe tɔ̀un, à akir'là sa yeè blàbe beè. Fur'lu, è nà bè to jènjàà kor'nà doùn, fɔ jisee riì à nàu e yɛrɛ kpadè Isirayɛlì mòdzin neè rà.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2024 Église Évangélique Mennonite du Burkina Faso (EEMBF) et SIL International