Lukì 15

Gè fìriuma è sèè jà, tɔ̀ kàjaa

(Matsiyù 18.12-14)

1 # Luk 5.29,30. Àyìwà, xɔnsɔɔn tsi reè, ko mòdzin faadzii ɲaan kpɛrɛ ì yè nà e kpɛrɛ̀ Yesù rà, yè e toro wɔ à re goomaa rè. 2Faridziɲɛn rèè, ko Sàrìyà Kaamoo reè ta goò jà nìi fau, tɔ̀ na byɛn è mà waa. Yè dziàn ci: «À siin, nèe kpir'lee mòdzin faadzii ɲaan neè kuun'n kuru wuu faa, fɔ è bè ɲwɛyn sa ɲɔɔ̀n è ka !»

3Tɔ̀un, Yesù yè nèe gooma bɔɔ rèe ka tàlen ban è re nèe tsuru ci: 4«Sàà dzin caànmoò yè bà ni ye sɔn ne, soo yeè fìrì bo è ra, à dzyee yè to sàà dzin cɛɛ̀n ko dzin teeŋ kyeèron, à tsìfa fa twɛy to mɔn jènjàà kor'nà doùn, è bè soo ree gaa, fɔ à y'à jà ɔ̀ ? 5È na à jà waatsi riì bwèy, à taama dzibeuma nì y'à seen e fyɛkun tsɛ, è nà à ka. 6È na wɔ tsii tɔ̀un, è dzunwɛynsi reè, ko e tsuùsi rèè kir'là, è dzin è ra ci: "Ye nà wɔ n na, min n ne taamadzibeè fa, mun ne sàà dzin soo na fìriunà mun to y'à gaa jau." 7Àwà, tɔ̀ fau'n kuru soo rà, mun nì ci e ra, mòò sɔn dzin soo ye seè bo e re gooɲaan kpɛyn, è re jaamabee fau'n kur'la lakere, taamadzibe brìsi rìì faa tɔ̀ tsìfa soo tsoo ra Ŋaablà re mɔn jìran nɔ̀n. Mòkun cɛɛ̀n ko teeŋ kyeèron nìi ni, twɛy yè bà à jàa, ci ye tereòn, è taa na ni à mà, ye yè sèè bo e re gooɲaan kpɛyn, yè e re jaamabee fau'n kur'la lakere waa, tɔ̀ tsuru taamadzibe na faa twɛy tsoo ra waa.»

8Tà shɔ̀ùn, Yesù yè dzin kɔn ci: «Tɔ̀ nìn yè bo à ra ɔ, warifyɛ tsyeùn yè bà ni taàn sɔn ne, warifyɛ soo yeè fìrì gbàà doùn, taan rèe fa fìtsina dzu wɔ, è gbàà min niì sapɛ fla, è warifyɛ soo ree gaa e dzii re, fɔ è b'a jà ɔ̀ ? 9È na à jà waatsi riì bwèy, è cangurusi reè ko e tsuùsi rèè kir'là è dzin è ra ci: "Ye nà wɔ n na, min n ne taamadzibeè fa, mun ne warifyɛ na fìriunà, mun to y'à gaa jau." 10Àwà, tɔ̀ fau'n kuru soo rà, mun nì ci e ra, mòò sɔn dzin soo ye seè bo e re gooɲaan kpɛyn, è re jaamabee fau'n kur'la lakere, Ŋaablà re mɛ̀rɛ̀kɛ rèè taamadzibe brìsi rìì faa tà tsìfa tsoo ra.»

Dzin kpiri firiuma è sèè jà, tɔ̀ gooma bɔɔ̀

11Yesù yè dzin kɔn kpɛrɛ ci: «Dzin kpiri fii na ni kpiri sɔn ne. 12Tseyn kpirimaa yè dzin e faà rà ci: "Bàa, nìì nà nà bà mun nìn wo shɛɛ̀n ɲàn, tɔ̀ sìn n na dòònuùn."

Tɔ̀un, bɔɔ̀ yè e suun ge reè sen tanan e dzin kpiri fii rèè rà. 13À na cin waa, tseyn kpirimaa yè e raa nìn ge reè sapɛ sen, è gɔɔ. È gɔrɔun, à y'à ɲɛɛn sen, è fù, è dɔ̀n be jìì rà wɔ̀ gbààn sɔn ɲan. À bèu wɔ mɔn, è bè to dzunwɛyn bɔɔbeè rà, è suun ɲɛɛn sapɛ bara bara do. 14À re ɲɛɛn sapɛ bara bara doumaà shɔ̀ùn, dzu brìsi yè ji twɛy jàmàan dzin neè rè. Tɔ̀un, goo rèè yè e maa yè xɔbee à re. 15À na na wùbe, è nà bè tɔ̀ jàmaàn kpiri sɔn ne, ci wo nà faagoo faa tɔ̀ re. Tɔ̀ kpir'la sa y'a sen, tɔ̀ y'a bàji be jènjaà doùn, ci è bè wò re bɛy rèè kplatsuɔ. 16Dzuà ta ɲaanfaa suun à ra, è gɔ̀ɔ̀dzin niì sìan bɛy rèè rà ɲwɛyn, è ba na tɔ̀ sɔn tarau, à na nà à ɲɔn cɛn. Mòò pɛn to yɛ̀rɛ̀ naà tɔ̀ sɔn tsu siàn à ra tsu. 17Tɔ̀un, goo nìi ni à tsɛ, è nà e maa, è akiri yaa bo faa tɔ̀ tsɛ. Tɔ̀ akiri yaa boo doùn, à ci: "Faagoofadzin ge o ge ni mun fàà rè, è sapɛ ɲwɛɛ̀n ɲɔɔ̀n e cɛn danma, dzuà to nàkɔɔn yɛ mun vu mìin. 18Mun nà sèè be n faà rà, min bè dzin à ra ci: Aa, bàa, mun fìriu Ŋaablà re, mun na shimagoo fa wo ka waa. 19À na wù min kiri wo dzin dɛ waa. N ba a re faagoofadzian sɔn."

20È fù tɔ̀ rii ɲàn, è shia kun, è dɔ̀n be e faà rà. À nàu tsyɛnbe è re fɔɔn nà waatsi riì bwèy, bɔɔ̀ yè to mɔn, tɔ̀ y'a nàkɔɔn ja. À màtsuru yeè tɔ̀ kun, fɔ è bè geren. È vwɛ̀yn bo tɔ̀ rii ɲàn, à y'à kùùntsi, è b'a kun dzwɛ̀ e yɛr'la kpan, kpan, kpan. 21Tɔ̀un, è dzin e faà rà ci: "Bàa, mun fìriu Ŋaablà re, mun na shimagoo fa wo ka waa. À na wù min kiri wo dzin dɛ waa."

22È wɔumaà tsii rɔ̀n, à fàà yè dzin e re faagoofadzin neè rà ci: "Ye e tabe, ye bè mɛ̀yɛ reè sapɛ ɲan wùɔ sen, ye nà à ji à mà. Ye dààniin wɔ à siiniɛn nà, ye seereyn wɔ à sàn nà. 23Ye nà ko nìì kpèr'niin tɔrɔ̀bɛ̀tɛ̀ɛ̀ ka, ye nà à vu. Mùn nà ɲwɛyn ɲɔn, mìn taama dzibe. 24Mun dzin nìi yɛ nèe, mun ne à na saɔn rìì, ŋà, dòònuùn, mun y'à jàu ci à sèè bàu jaama. À na fìriɔ̀, ŋà, à sèè jàu she." Tɔ̀un, è taama dzibeuma yè fù jaaravi brìsi re.

25È ni twɛy goo rèè rà, tɔ̀ y'a tàrà, bɔɔ̀ dzin kpiri bɔɔmaà ni faagoò rà jòon nɔ̀n. À sèè nakɔɔn è bo jòon nɔ̀n, à nàu tsyɛnbe fɔɔn nà waatsi riì bwèy, è beyn fa vuà ko ɲɔun ji vuà kpìniunma jà. 26Tɔ̀un, è faagoofadzian soo kiri, è tɔ̀ tey, ci à to baɔ̀ dzùrù. 27Tɔ̀ yeè dzin à ra ci: "Wo tseyn kpir'la rìì naɔ̀. Nìì kpèr'niin tɔrɔ̀bɛ̀tɛ̀ nìi na ni, wo fàà y'à vuu, kàtsu, ci wò dzin kpir'la cɛrɛma sèè nau."

28Tsìnà kpìrìmaa tɔ̀ myɛ̀un min niì, à vunun yè ta, è nɔn ci wò fa dɔ̀n fɔɔn rè waa. À fàà yè bo na tɔ̀un, tɔ̀ yeè nà à màfyɛ̀n ci è dɔ̀n fɔɔn rè. 29È dzin e faà rà ci: "Bàa, à jii gir'lì yɛ nèe, mun faagoò faa wo ka mìin nɔn, mun na n nɔn ja wo dzugooma xɔù mà jisee soo. Tɔ̀ sapɛ faumaà ko e sa, wo na arì bɛyniin jà sin mun na jisee soo, mun ko n dzunwɛynsi reè yè tɔ̀ ka e jaaravi waa. 30Nìi nàu bà wo dzin kpir'la nàumanà ɔn, tɔ̀ riì bèu wo re ɲɛɛn sapɛ bara bara ko canguru bɔɔ rèè ka, wo y'à tsiì w'e nìì kpèr'niin tɔrɔ̀bɛ̀tɛ̀ɛ̀ vu tɔ̀ rii là." 31À fàà yè dzin à ra ci: "N dzin kpiri, wo ni mun ka mìin kudɛyn, gè o ge ni mun ne, à sapɛ wo rìì laa. 32Mun kpɛ̀yn jaa ra, à wù, mùn yeè jaaravi fa she, mìn taama dzibe. Wo tseyn kpir'liì yɛ nèe, à na saɔn rìì, ŋà, dòònuùn, à sèè bàu jaama. À na fìriunà, ŋà, à sèè jàu she."»

Currently Selected:

Lukì 15: BDZU

Highlight

Copy

Want to have your highlights saved across all your devices? Sign up or sign in

Learn More About Bible Dzùùngoo Unicode