Lukì 19
19
Yesù ko Zakè raa goò
1Àwà, Yesù bèu wɔ Yerikò wɔ̀ɔ̀ doùn, è maa, è wɔ̀ɔ̀ fi shɛɛ̀n. 2Kpiri sɔn na ni tà wɔ̀ rɔ̀n, tɔ̀ tsoo yè bà na ci Zakè. Àwà, Zakè na xɔnsɔɔn tsi reè kùntsii rìì, è bà na gètsi sa. 3Zakè sàò na n'a re, wò jaadzin yeè ɲɛn Yesù mà, wò y'a tɔ̀ à mòò riì. Ŋà, è bà ni Yesù jà, tɔ̀ naà dzia fa waa, kàtsu jàmaà na blà, wò yeè bà na kuru. 4Yesù nà dɔ̀n bo min niì, gɔ̀ɔ̀ku sɔn na ni mɔn shi dziɛ rè, a ci fyɛ̀ɛ̀ku. Tɔ̀un, Zakè yè vwɛ̀yn dɔ̀n be jàmaà jɔun, è bè tèyn tɔ̀ gɔ̀ɔ rɔ̀n, sànko Yesù ye ba dɔ̀n boò mɔn, wò yeè dzi à jà. 5Àwà, Yesù bèu wɔ à gàneè ka sɛ̀rɛ̀n, è jaà ɲansen, è dzin Zakè rà ci: «Zakè, a tabe jaà bo gɔ̀ɔ rèe ɲan, fɔ min bè n jaà wo re tsii she.» 6Zakè tɔ̀ myɛ̀un min niì, è tabe jaà bo gɔ̀ɔ rɔ̀n. Tɔ̀un, à taama dzibeuma brìsi yè dɔ̀n be Yesù ka e re tsii rɔ̀n. 7Gè o ge jaadzin ɲɛun tɔ̀ goò mà, tɔ̀ na byɛn è pɛn mà waa. Y'à ŋùnùnŋun'na e si toro doùn nèe tsuru ci: «Gooɲaan tsìɛ̀ ni mòò riì vu ra, à siin bèu e jaà tɔ̀ rii lè !»
8Àwà, Zakè yè fù tɔ̀ rii ɲàn è tsiì, è dzin Tsìfa Yesù rà ci: «Tsìfaà, mun nà n suun ge reè sapɛ sen, m'a tar'la sìn gbakɔɔn reè rà. Mun to ye ba mòò rè ɲɛyn nanmaraɔ, mun nà ɲɛyn nee tsuru nààlen sèè sìn à tsìfa ra.» 9Yesù yè dzin à ra ci: «Wo ko a re fɔɔn re dzin neè sapɛ tsiu she, kàtsu, wo sa Ibraximà tsua dziàn sɔn ni. 10#Mat 18.11.Nìì reè fìriɔ̀, Adamà dziàn naɔ̀ twɛy rìì gaa, à yè è tsi.»
Warifyɛɛ kuun'n kur'la tàleèn
(Matsiyù 25.14-30)
11Àwà, è mòdzian to twɛy gooma reè lamyɛɛ̀n nà, Yesù yè geren goomaa rè ko gooma bɔɔ soo ka. È tsyɛnbeumaà Yerusalɛmùn wɔ̀ɔ̀ rà, mòdzian na à siɛ̀n tɔ̀ ɲan, ci Ŋaablà re Màsàbee nàkɔɔn ni yɛ e yɛrɛ kpadè tà nɔ̀nkɔɔrɔn. 12Tɔ̀ kamà, Yesù yè dzin è ra ci: «Màsàdzin sɔn ni bou, ci wo bèe jàmaan gbààn sɔn ɲan, wò yeè bè màsàbee shi gaa mɔn, wò yeè kòmànà sèè na, wò yeè nà e tsuù e re jàmaàn kùùn. 13À ci e ye bè, è re jòn neè mòkun tsyeùn kiri, è nà ɲɛyn xɛkɛ soo sin twɛy soo sookɔɔn sapɛ ra. Tɔ̀un, è dzin è ra ci: "Ye nèe ka duru faa, fɔ min bè sèè na. 14Àwà, à goo na xɔ e re jàmààndzin neè mà, fɔ è bè geren. Tɔ̀un, à dɔ̀n bèumaà shɔ̀ùn, twɛy sa yeè siin yè kɛɛra ì fù à kpɛyn, ci yè bè dzin tɔ̀ jàmaan gbaan màsà kpir'là rà, ci ye na gaa à ra, è bà yè re màsa waa."
15Twɛy goo rèè sapɛ faumaà ko e raà sa, kpir'la yè màsàbee tàrà, è sèè na e re jàmaàn doùn. À nàu wɔ, à na ɲɛɛn siɔ̀n e re jòn niì reè rà, è twɛy kiri, è nà è tey, yè ba nìi tàrau tɔ̀nɔ̀n. 16Jɔ̀naà yè nà, tɔ̀ yeè nà dzin ci: "Kùntsiɛ̀, wo ɲɛyn xɛkɛ rìi sìun mun na, mun faagoò fau à ka, mun y'à tsuru tsyeùn tàrà." 17Màsà kpir'là yè dzin à ra ci: "Tɔ wùbeu, wo jòn wùù. Mun ɲɛn niì fau wo ra nèe goo kiɲaanin nèe kuun'n kur'la doùn wo re, àwà, mun wo tsùuŋ wɔ̀ tsyeùn kùùn, wo yè bà twɛy jàmààntsi."
18Tà shɔ̀ùn, fiiraa yè nà, tɔ̀ yeè nà dzin ci: "Kùntsiɛ̀, wo ɲɛyn xɛkɛ rìi sìun mun na, mun faagoò fau à ka, mun y'à tsuru nùn tàrà." 19Màsà kpir'là yè dzin tɔ̀ ra ci: "Àwà, mun wo sa tsuuŋ wɔ̀ nùn kùùn, wo yè bà twɛy jàmààntsi."
20Tà shɔ̀ùn kɔn soo kpɛrɛ yè nà, tɔ̀ yeè nà dzin ci: "Kùntsiɛ̀, wo ɲɛyn xɛkɛ rìi sìun mun na, à yɛ nèe. Mun y'à shìu vya doùn, m'a lamɔnɔ̀n tsùù. 21Àwà, mun na shiɔ̀ wo rìì jɔun, kàtsu m'a jàu, ci wo re goò xɔ. Wo nìi tsuru mòdzin, wo na gè niì tsùuŋnà waa, wo tɔ rii seen. Wo to na shìmàn niì siɔ̀ waa, wo tɔ̀ shìmàndzian nì gaa." 22Màsà kpir'là yè dzin à ra ci: "Jòn ɲan, mun nà kun wo dèvuà yɛ̀r'la rìì mà, min sàrìyaa vwɛ̀yn wo tsɛ. Wo na à tɔ̀ ci mun ne goò xɔ kɛ̀ ? Ci mun gè seen mun na nìi tsùuŋnà, min bà shìmàndzin gaa, mun na nìi siɔ̀ waa. 23Wo to tɔ̀ tɔ̀ ɔ, feera wo na be mun ne ɲɛɛn màrà nàfòrò màrà gba doùn ? Tɔ̀ tsuru, à na dzia tɔ̀nɔ̀n ji e tsɛ mɔn, min nà à ko tɔ̀ tɔ̀n'nà sen."
24Àwà, nìì reè na ni màsà kpir'là tɛyn, è dzin twɛy rà ci: "Nìi yè e raa ɲɛɛn tsuru tsyeùn tàrau, y'a raa soo tsi sìn tɔ̀ ra." 25Twɛy yè dzin à ra ci: "Kùntsiɛ̀, tɔ̀ raà tsuru tsyeùn ni tɔ̀ re nòn ɔn !" 26#Mat 13.12; Mar 4.25; Luk 8.18.Màsà kpir'là yè dzin ci: "Àwà, mun nì ci e ra, sɔn ni nìi rè, ge nà bà tɔ̀ raà tɛ̀y. Ŋà, pɛn na ni nìi rè, kiɲaanin nìi ni à re, tɔ̀ sa nà tsi à ra. 27#Mat 25.14-30.Àwà dòònuùn, mun ɲan nìì reè sào naà ni à re min tsùù ye kùùn màsàbee rà, ye nà twɛy sapɛ ka mìin, ye nà è vu n jaa ra."»
Yesù dɔ̀ùn'n kur'la Yerusalɛmùn
(Matsiyù 21.1-11; Marikì 11.1-11; Yùxanà 12.9-19)
28Àyìwà, Yesù nàu twɛy gooma reè sapɛ de dò waatsi riì bwèy, è ji jàmaà jɔun, yè bèe Yerusalɛmùn. 29È bèkɔɔn shia rè, è bèu tsyɛnbe Bɛtsifaazhì ko Betanìn wɔ̀ rèè rà jèn sɔn tɛyn, nìi kir'là oliviku rèè jèèn, Yesù yè e re kàràndzin neè fii ka. 30À ci: «Wɔ̀ rìi yɛ mùn jaaterema, ye bè mɔn. Ye ye be dɔ̀n, ye nà shùkwɛ̀yn kpèr'niin sɔn shiuma jà, mòò na teyn jà nìi tsɛ ŋe waa. Y'a foro, ye nà à ka. 31Mòò to ye e tey, ci y'a for'là feera, ye dzin à tsìfa ra ci: "Tsìfaà rìì màgoo ni à ra."»
32Àwà, kɛɛra reè yè dɔ̀n be. È bèu wɔ, y'à jà jàci Yesù na à deò è ra nìi tsuru. 33È ni shùkwɛ̀yn kpèr'niɛn for'là rà waatsi riì bwèy, à tsìfa rèè yè è tey ci: «Y'a for'là feera ?» 34Yè dzin ci: «Tsìfaà rìì màgoo n'a na.»
35Tɔ̀un, y'à forou, yè nà à ka Yesù kpà. È nàu wɔ Yesù tsɛ min niì, yè e re mɛ̀yɛ bla reè bo bà shùkwɛ̀ɛn tsɛ, yè kòmànà Yesù tèyn à tsɛ. 36À bèkɔɔn, mòdzian yè e re vya rèè bà beè à jɔun shia tsɛ. 37Àwà, oliviku rèè jèèn tenteèn jàà bekɔɔn è re, yè e kpɛrɛ̀ beè Yerusalɛmùn nà. Tɔ̀un, Yesù kabagoo goo niì reè sapɛ fau e re kàràndzìn kur'là jaa ra, twɛy goo rèè kamà, è taama dzibeuma brìsi yè e maa, yè tsoo dzi ɲɛn beè Ŋaablà tsɛ fààn na. 38#Zab 118.26.Yè dziàn ci:
«Màsa riì nàa mùn Tsìfa Ŋaablà tsoo ra,
dzwɛ yè bà ni tɔ̀ kpɛyn !
Jaancin yè bà ni jìran nɔ̀n,
tsoo dzi yeè ɲɛn Ŋaa tsɛ fɔ jìrànxɔɔ̀ doùn doùn mɔn !»
39Àwà, Faridziɲɛn rèè swey na ni jàmaà ɲàn mɔn. Twɛy yè dzin Yesù rà tɔ̀un ci: «Kàrànfaà, à dè a re kàràndzin neè rà, ci yè e mɛnshɛ̀n.»
40Yesù yè dzin è ra ci: «Mun nì ci e ra, è ye e mɛnshɛ̀n, Ŋaablà nà à fa kpàà reè yè e vu bo !»
Yerusalɛmùn wɔ̀ɔ̀ ɲììɲii Yesù kuun min niì
41Àwà, Yesù nàu wɔ Yerusalɛmùn wɔ̀ɔ̀ tsɛ waatsi riì bwèy, à y'à jàu min niì, è gɛyn à goò rà. 42È dzin ci: «Yerusalɛmunka reè goo nìi nà dzi ye jaan cin, è ba na ni a ci ye tɔ tɔ̀ she, ùùn ! Ŋà, à to yɛ nèe sa, tɔ̀ goò mɛnɛɔn ye mà, ye fa dzi à jà ! 43Àwà, jisee ì nàa, nìì reè doùn gooɲaan brisi nà mɛɛy ye tsɛ. Ye ɲan rèè nà nà ye tsyee twɛy jisee reè doùn, yè gbàmàkuru gbààn gbaan ì tsùù tsùù be ye re wɔ̀ɔ̀ sian min niì sapɛ ra, yè ye laguru, yè ye xɔn biì tsùù kàjaa sapɛ tsɛ. 44È nà ye re wɔ̀ɔ̀ ci mɔn, mɔn, mɔn, y'à doùn tsùùbaà sapɛ bara. È na naà à kpàà dzin soo to soo tsɛ waa. Tɔ̀ sapɛ nà fa, kàtsu Ŋaablà na naɔ̀ wɔ ye ra waatsi riì bwèy, ye na e ba à jaa tà bwèy waa !»
Yesù gwɛy fa reè kaa bou Ŋaablà re gbà blàa fɔɔn doùn min niì
(Matsiyù 21.12-17; Marikì 11.15-19; Yùxanà 2.13-22)
45Tà shɔ̀ùn, Yesù yè bè wɔ wɔ̀ɔ̀ doùn. À wɔu mɔn, è bè dɔ̀n Ŋaablà re gbà blàa doùn, è maa è gwɛy fa reè kaa boò. 46#Ekk 56.7; Ykk 7.11.È dziàn è ra ci: «À sɛbɛɔ̀n Ŋaablà re Goomaa doùn nèe tsuru ci:
"Mun ne gbàà nà bà Ŋaabla mafyɛnma nì."
À sɛbɛɔ̀n Ŋaablà re Goomaa doùn tɔ̀ tsuru, ŋà, ye y'à baɔ̀ gookoron fa reè mɛnɛnmà !»
47 #
Luk 21.37. Tɔ̀un, jisee sapɛ, Yesù na mòdzian kàr'na Ŋaablà re gbà blàa fɔɔn doùn. Saaka Jɔundzin neè, ko Sàrìyà Kaamoo reè, ko wɔ̀ɔ̀ jɔundzin neè na à vu jaa gaa. 48Ŋà, è nà à goò fa nìi tsuru, è naà tɔ̀ tɔ̀ waa, kàtsu, Yesù rè goomaa na mòdzian ɲɛyn seòn fɔ è bè geren, è sapɛ toro yè bà na wɔɔ à re.
Currently Selected:
Lukì 19: BDZU
Highlight
Share
Copy
Want to have your highlights saved across all your devices? Sign up or sign in
© 2024 Église Évangélique Mennonite du Burkina Faso (EEMBF) et SIL International
Lukì 19
19
Yesù ko Zakè raa goò
1Àwà, Yesù bèu wɔ Yerikò wɔ̀ɔ̀ doùn, è maa, è wɔ̀ɔ̀ fi shɛɛ̀n. 2Kpiri sɔn na ni tà wɔ̀ rɔ̀n, tɔ̀ tsoo yè bà na ci Zakè. Àwà, Zakè na xɔnsɔɔn tsi reè kùntsii rìì, è bà na gètsi sa. 3Zakè sàò na n'a re, wò jaadzin yeè ɲɛn Yesù mà, wò y'a tɔ̀ à mòò riì. Ŋà, è bà ni Yesù jà, tɔ̀ naà dzia fa waa, kàtsu jàmaà na blà, wò yeè bà na kuru. 4Yesù nà dɔ̀n bo min niì, gɔ̀ɔ̀ku sɔn na ni mɔn shi dziɛ rè, a ci fyɛ̀ɛ̀ku. Tɔ̀un, Zakè yè vwɛ̀yn dɔ̀n be jàmaà jɔun, è bè tèyn tɔ̀ gɔ̀ɔ rɔ̀n, sànko Yesù ye ba dɔ̀n boò mɔn, wò yeè dzi à jà. 5Àwà, Yesù bèu wɔ à gàneè ka sɛ̀rɛ̀n, è jaà ɲansen, è dzin Zakè rà ci: «Zakè, a tabe jaà bo gɔ̀ɔ rèe ɲan, fɔ min bè n jaà wo re tsii she.» 6Zakè tɔ̀ myɛ̀un min niì, è tabe jaà bo gɔ̀ɔ rɔ̀n. Tɔ̀un, à taama dzibeuma brìsi yè dɔ̀n be Yesù ka e re tsii rɔ̀n. 7Gè o ge jaadzin ɲɛun tɔ̀ goò mà, tɔ̀ na byɛn è pɛn mà waa. Y'à ŋùnùnŋun'na e si toro doùn nèe tsuru ci: «Gooɲaan tsìɛ̀ ni mòò riì vu ra, à siin bèu e jaà tɔ̀ rii lè !»
8Àwà, Zakè yè fù tɔ̀ rii ɲàn è tsiì, è dzin Tsìfa Yesù rà ci: «Tsìfaà, mun nà n suun ge reè sapɛ sen, m'a tar'la sìn gbakɔɔn reè rà. Mun to ye ba mòò rè ɲɛyn nanmaraɔ, mun nà ɲɛyn nee tsuru nààlen sèè sìn à tsìfa ra.» 9Yesù yè dzin à ra ci: «Wo ko a re fɔɔn re dzin neè sapɛ tsiu she, kàtsu, wo sa Ibraximà tsua dziàn sɔn ni. 10#Mat 18.11.Nìì reè fìriɔ̀, Adamà dziàn naɔ̀ twɛy rìì gaa, à yè è tsi.»
Warifyɛɛ kuun'n kur'la tàleèn
(Matsiyù 25.14-30)
11Àwà, è mòdzian to twɛy gooma reè lamyɛɛ̀n nà, Yesù yè geren goomaa rè ko gooma bɔɔ soo ka. È tsyɛnbeumaà Yerusalɛmùn wɔ̀ɔ̀ rà, mòdzian na à siɛ̀n tɔ̀ ɲan, ci Ŋaablà re Màsàbee nàkɔɔn ni yɛ e yɛrɛ kpadè tà nɔ̀nkɔɔrɔn. 12Tɔ̀ kamà, Yesù yè dzin è ra ci: «Màsàdzin sɔn ni bou, ci wo bèe jàmaan gbààn sɔn ɲan, wò yeè bè màsàbee shi gaa mɔn, wò yeè kòmànà sèè na, wò yeè nà e tsuù e re jàmaàn kùùn. 13À ci e ye bè, è re jòn neè mòkun tsyeùn kiri, è nà ɲɛyn xɛkɛ soo sin twɛy soo sookɔɔn sapɛ ra. Tɔ̀un, è dzin è ra ci: "Ye nèe ka duru faa, fɔ min bè sèè na. 14Àwà, à goo na xɔ e re jàmààndzin neè mà, fɔ è bè geren. Tɔ̀un, à dɔ̀n bèumaà shɔ̀ùn, twɛy sa yeè siin yè kɛɛra ì fù à kpɛyn, ci yè bè dzin tɔ̀ jàmaan gbaan màsà kpir'là rà, ci ye na gaa à ra, è bà yè re màsa waa."
15Twɛy goo rèè sapɛ faumaà ko e raà sa, kpir'la yè màsàbee tàrà, è sèè na e re jàmaàn doùn. À nàu wɔ, à na ɲɛɛn siɔ̀n e re jòn niì reè rà, è twɛy kiri, è nà è tey, yè ba nìi tàrau tɔ̀nɔ̀n. 16Jɔ̀naà yè nà, tɔ̀ yeè nà dzin ci: "Kùntsiɛ̀, wo ɲɛyn xɛkɛ rìi sìun mun na, mun faagoò fau à ka, mun y'à tsuru tsyeùn tàrà." 17Màsà kpir'là yè dzin à ra ci: "Tɔ wùbeu, wo jòn wùù. Mun ɲɛn niì fau wo ra nèe goo kiɲaanin nèe kuun'n kur'la doùn wo re, àwà, mun wo tsùuŋ wɔ̀ tsyeùn kùùn, wo yè bà twɛy jàmààntsi."
18Tà shɔ̀ùn, fiiraa yè nà, tɔ̀ yeè nà dzin ci: "Kùntsiɛ̀, wo ɲɛyn xɛkɛ rìi sìun mun na, mun faagoò fau à ka, mun y'à tsuru nùn tàrà." 19Màsà kpir'là yè dzin tɔ̀ ra ci: "Àwà, mun wo sa tsuuŋ wɔ̀ nùn kùùn, wo yè bà twɛy jàmààntsi."
20Tà shɔ̀ùn kɔn soo kpɛrɛ yè nà, tɔ̀ yeè nà dzin ci: "Kùntsiɛ̀, wo ɲɛyn xɛkɛ rìi sìun mun na, à yɛ nèe. Mun y'à shìu vya doùn, m'a lamɔnɔ̀n tsùù. 21Àwà, mun na shiɔ̀ wo rìì jɔun, kàtsu m'a jàu, ci wo re goò xɔ. Wo nìi tsuru mòdzin, wo na gè niì tsùuŋnà waa, wo tɔ rii seen. Wo to na shìmàn niì siɔ̀ waa, wo tɔ̀ shìmàndzian nì gaa." 22Màsà kpir'là yè dzin à ra ci: "Jòn ɲan, mun nà kun wo dèvuà yɛ̀r'la rìì mà, min sàrìyaa vwɛ̀yn wo tsɛ. Wo na à tɔ̀ ci mun ne goò xɔ kɛ̀ ? Ci mun gè seen mun na nìi tsùuŋnà, min bà shìmàndzin gaa, mun na nìi siɔ̀ waa. 23Wo to tɔ̀ tɔ̀ ɔ, feera wo na be mun ne ɲɛɛn màrà nàfòrò màrà gba doùn ? Tɔ̀ tsuru, à na dzia tɔ̀nɔ̀n ji e tsɛ mɔn, min nà à ko tɔ̀ tɔ̀n'nà sen."
24Àwà, nìì reè na ni màsà kpir'là tɛyn, è dzin twɛy rà ci: "Nìi yè e raa ɲɛɛn tsuru tsyeùn tàrau, y'a raa soo tsi sìn tɔ̀ ra." 25Twɛy yè dzin à ra ci: "Kùntsiɛ̀, tɔ̀ raà tsuru tsyeùn ni tɔ̀ re nòn ɔn !" 26#Mat 13.12; Mar 4.25; Luk 8.18.Màsà kpir'là yè dzin ci: "Àwà, mun nì ci e ra, sɔn ni nìi rè, ge nà bà tɔ̀ raà tɛ̀y. Ŋà, pɛn na ni nìi rè, kiɲaanin nìi ni à re, tɔ̀ sa nà tsi à ra. 27#Mat 25.14-30.Àwà dòònuùn, mun ɲan nìì reè sào naà ni à re min tsùù ye kùùn màsàbee rà, ye nà twɛy sapɛ ka mìin, ye nà è vu n jaa ra."»
Yesù dɔ̀ùn'n kur'la Yerusalɛmùn
(Matsiyù 21.1-11; Marikì 11.1-11; Yùxanà 12.9-19)
28Àyìwà, Yesù nàu twɛy gooma reè sapɛ de dò waatsi riì bwèy, è ji jàmaà jɔun, yè bèe Yerusalɛmùn. 29È bèkɔɔn shia rè, è bèu tsyɛnbe Bɛtsifaazhì ko Betanìn wɔ̀ rèè rà jèn sɔn tɛyn, nìi kir'là oliviku rèè jèèn, Yesù yè e re kàràndzin neè fii ka. 30À ci: «Wɔ̀ rìi yɛ mùn jaaterema, ye bè mɔn. Ye ye be dɔ̀n, ye nà shùkwɛ̀yn kpèr'niin sɔn shiuma jà, mòò na teyn jà nìi tsɛ ŋe waa. Y'a foro, ye nà à ka. 31Mòò to ye e tey, ci y'a for'là feera, ye dzin à tsìfa ra ci: "Tsìfaà rìì màgoo ni à ra."»
32Àwà, kɛɛra reè yè dɔ̀n be. È bèu wɔ, y'à jà jàci Yesù na à deò è ra nìi tsuru. 33È ni shùkwɛ̀yn kpèr'niɛn for'là rà waatsi riì bwèy, à tsìfa rèè yè è tey ci: «Y'a for'là feera ?» 34Yè dzin ci: «Tsìfaà rìì màgoo n'a na.»
35Tɔ̀un, y'à forou, yè nà à ka Yesù kpà. È nàu wɔ Yesù tsɛ min niì, yè e re mɛ̀yɛ bla reè bo bà shùkwɛ̀ɛn tsɛ, yè kòmànà Yesù tèyn à tsɛ. 36À bèkɔɔn, mòdzian yè e re vya rèè bà beè à jɔun shia tsɛ. 37Àwà, oliviku rèè jèèn tenteèn jàà bekɔɔn è re, yè e kpɛrɛ̀ beè Yerusalɛmùn nà. Tɔ̀un, Yesù kabagoo goo niì reè sapɛ fau e re kàràndzìn kur'là jaa ra, twɛy goo rèè kamà, è taama dzibeuma brìsi yè e maa, yè tsoo dzi ɲɛn beè Ŋaablà tsɛ fààn na. 38#Zab 118.26.Yè dziàn ci:
«Màsa riì nàa mùn Tsìfa Ŋaablà tsoo ra,
dzwɛ yè bà ni tɔ̀ kpɛyn !
Jaancin yè bà ni jìran nɔ̀n,
tsoo dzi yeè ɲɛn Ŋaa tsɛ fɔ jìrànxɔɔ̀ doùn doùn mɔn !»
39Àwà, Faridziɲɛn rèè swey na ni jàmaà ɲàn mɔn. Twɛy yè dzin Yesù rà tɔ̀un ci: «Kàrànfaà, à dè a re kàràndzin neè rà, ci yè e mɛnshɛ̀n.»
40Yesù yè dzin è ra ci: «Mun nì ci e ra, è ye e mɛnshɛ̀n, Ŋaablà nà à fa kpàà reè yè e vu bo !»
Yerusalɛmùn wɔ̀ɔ̀ ɲììɲii Yesù kuun min niì
41Àwà, Yesù nàu wɔ Yerusalɛmùn wɔ̀ɔ̀ tsɛ waatsi riì bwèy, à y'à jàu min niì, è gɛyn à goò rà. 42È dzin ci: «Yerusalɛmunka reè goo nìi nà dzi ye jaan cin, è ba na ni a ci ye tɔ tɔ̀ she, ùùn ! Ŋà, à to yɛ nèe sa, tɔ̀ goò mɛnɛɔn ye mà, ye fa dzi à jà ! 43Àwà, jisee ì nàa, nìì reè doùn gooɲaan brisi nà mɛɛy ye tsɛ. Ye ɲan rèè nà nà ye tsyee twɛy jisee reè doùn, yè gbàmàkuru gbààn gbaan ì tsùù tsùù be ye re wɔ̀ɔ̀ sian min niì sapɛ ra, yè ye laguru, yè ye xɔn biì tsùù kàjaa sapɛ tsɛ. 44È nà ye re wɔ̀ɔ̀ ci mɔn, mɔn, mɔn, y'à doùn tsùùbaà sapɛ bara. È na naà à kpàà dzin soo to soo tsɛ waa. Tɔ̀ sapɛ nà fa, kàtsu Ŋaablà na naɔ̀ wɔ ye ra waatsi riì bwèy, ye na e ba à jaa tà bwèy waa !»
Yesù gwɛy fa reè kaa bou Ŋaablà re gbà blàa fɔɔn doùn min niì
(Matsiyù 21.12-17; Marikì 11.15-19; Yùxanà 2.13-22)
45Tà shɔ̀ùn, Yesù yè bè wɔ wɔ̀ɔ̀ doùn. À wɔu mɔn, è bè dɔ̀n Ŋaablà re gbà blàa doùn, è maa è gwɛy fa reè kaa boò. 46#Ekk 56.7; Ykk 7.11.È dziàn è ra ci: «À sɛbɛɔ̀n Ŋaablà re Goomaa doùn nèe tsuru ci:
"Mun ne gbàà nà bà Ŋaabla mafyɛnma nì."
À sɛbɛɔ̀n Ŋaablà re Goomaa doùn tɔ̀ tsuru, ŋà, ye y'à baɔ̀ gookoron fa reè mɛnɛnmà !»
47 #
Luk 21.37. Tɔ̀un, jisee sapɛ, Yesù na mòdzian kàr'na Ŋaablà re gbà blàa fɔɔn doùn. Saaka Jɔundzin neè, ko Sàrìyà Kaamoo reè, ko wɔ̀ɔ̀ jɔundzin neè na à vu jaa gaa. 48Ŋà, è nà à goò fa nìi tsuru, è naà tɔ̀ tɔ̀ waa, kàtsu, Yesù rè goomaa na mòdzian ɲɛyn seòn fɔ è bè geren, è sapɛ toro yè bà na wɔɔ à re.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2024 Église Évangélique Mennonite du Burkina Faso (EEMBF) et SIL International