Lukì 4

Sùtana Yesù dzuun bo gbau min niì

(Matsiyù 4.1-11; Marikì 1.12-13)

1Àwà, Yesù ɲan tsyɛunmaà Ŋaablà re Dzi Fɛnɛɛ rà, è bo Yuridɛn baa dzii ra. Tɔ̀un, Dzi ree y'à jaa ji be jènjàà kor'nà doùn. 2À bèu wɔ mɔn, Sànwɔbaà y'à dzuun bo siin bwèy dzyèè doùn. Tɔ̀ bwèy dzyèè doùn, Yesù na ɲwɛyn pɛn ɲɔn waa. Tɔ̀ dɔ̀n boumaà nì shɔ̀ùn, dzu yè kòmànà à kun. 3Sànwɔbaà yè dzin à ra tɔ̀un ci: «Wo rìì ye ba Ŋaablà Dzin Kpir'la taki, dzin nèe kpàà ree ra, ci è lakere ba buru.»

4 # Sdk 8.3. Yesù yè dzin à ra ci: «À sɛbɛɔ̀n Ŋaablà re Goomaa doùn ci: "Mòdzin ne jaamabee na ni ɲwɛyn goo bàsɔùn suun waa."»

5Tà goomaa shɔ̀ùn, Sànwɔbaà yè b'a ka gàne sɔn ɲan kɔn, nìi ni jìran. È ni mɔn, è dziɲaan màsà gane reè sapɛ kpadè à ra jaa soo. 6Tɔ̀un, Sànwɔbaà yè dzin à ra ci: «Nèe gàne rèe rèè sapɛ faan ko à nɔɔrɔɔ̀ sapɛ siɔ̀n mun nì nà. Mòò riì ye mun dzibe mun dzia à sìn tɔ̀ tsìfa ra. 7Tà doùn, wo y'a tsiì w'a kuu mun bììn, w'e mun blàbe, mun nà à sapɛ sin wo ra, è bà wo raa.»

8 # Sdk 6.13. Yesù yè dzin à ra ci: «À sɛbɛɔ̀n Ŋaablà re Goomaa doùn nèe tsuru ci:

"A Tsifa Ŋaablà rii blàbe,

e goo fa tɔ̀ soo pe re."»

9Àyìwà, tà shɔ̀ùn Sànwɔbaà yè bè Yesù ka Yerusalɛmùn, è b'a tèyn tsìì Ŋaablà re gbà blàa sènfi. È dzin à ra ci: «Wo rìì ye ba Ŋaablà Dzin Kpir'la taki, a tsyɛn ji dzɔn nɔ̀n, 10#Zab 91.11,12.kàtsu à sɛbɛɔ̀n Ŋaablà re Goomaa doùn nèe tsuru ci:

"Ŋaabla nà à ji e re mɛ̀rɛ̀kɛ rèè jɔun wo kàjaa tsɛ, ci yè wo kààwɔ cɛyn.

11Tà ko è nà wo sen e suun, wo sàn mà nà to zhɛ kpàa sɔn na."»

12 # Sdk 6.16. Yesù yè dzin à ra ci: «À deò nèe tsuru Ŋaablà re Goomaa doùn ci:

"Maà dzin ci a y'a Tsifa Ŋaablà dzuun boò waa."»

13Àyìwà, Sànwɔbaà nàu Yesù dzuun bo gba tà tsuru kosokoro waatsi riì bwèy, è ma bo à ra, ci wo nà waatsi kpɛrɛ shù.

Yesù rè faagoò dzii kunmàà Galile mar'la ɲàn

(Matsiyù 4.12-17; Marikì 1.14-15)

14Tà sapɛ shɔùn, Yesù yè sèè na Galile mar'lɔùn, Ŋaablà re Dzia fàan yè bà ni à ɲan. À tsoò na boo tɔ̀ gàneè màr'là min niì sapɛ. 15Tɔ̀ gàne rɔ̀n, à na mòdzian kàr'na è re ŋaablabegba rèè doùn. È sapɛ na à blàbee min niì sapɛ.

Nazarɛtsika reè nɔnmaà Yesù rè

(Matsiyù 13.53-58; Marikì 6.1-6)

16Àwà, Yesù yè nà bè Nazarɛtsì, y'à lamɔnɔun wɔ̀ nìi ɲàn. Tɔ̀un, Dzyèèsìbee mòdzin neè rè ɲànwɔsiɛ̀ wɔu, è bè ŋaablabegbaà doùn, jàci à dɛ̀rɔɔ̀n à y'à faa nìi tsuru bɔrɔɔ. È na tɔ̀ ɲànwɔsiɛ̀ kir'là ci Sàba. Yesù yè nà fù tɔ̀un, ci wo nà Ŋaablà re Goomaa kàràn. 17Àwà yè Ŋaablà re kɛɛra Esayì raa kìtaabuà sen sin à ra. À sàò na ni à re wò yeè sɛbɛɛn kàjaa riì kàràn, à y'à dzii san, è bè wɔ tɔ̀ kàjaa tsɛ. À na sɛbɛɔ̀n tɔ̀ gàne rɔ̀n nèe tsuru ci:

18 # Ekk 61.1,2. «Mùn Tsìfa Ŋaablà re Dzia ni mun ɲan.

Tɔ̀ rii y'à to è mun bo,

ci mun yè nà gbakɔɔn reè toro kɔ̀ Kùnàgoo Dziɔ̀ rà.

À mun ka naɔ, ci min nà byɛnkɔɔn reè laba goòmà dè è ra,

min jaana reè jaa dzii san goòmà dè twɛy rà,

nìì reè xɔn bìiŋnà, min twɛy bo vi ra.

19Waatsi riì ni Ŋaablà re, è bà mòdzian tsià dzì rà,

à mun ka naɔ, min nà tɔ̀ kùnàgoo de.»

20À kìtaabuà kàràn dòun min niì, à y'à dzii tsyee à wɔ ŋaablabegbaà doùn faagoofabaà suun, è kòmànà tàrà è tsuù. Nìì reè na ni ŋaablabegbaà doùn, è sapɛ yeè e jaa rèè gban tsùù à ra, y'à siɛ̀n.

21Yesù yè dzin tɔ̀un ci: «Ye nèe gooma niì myɛɔ̀n è bo Ŋaablà re Kìtaabuà doùn, tɔ Ŋaablà re dan gooma deuma nì, nìi boo e shi tsɛ she.»

22Yesù tà dè dòu min niì, è sapɛ yeè e maa y'à mà wùù deè. À na gooma wuu niì reè dèe, tɔ̀ na jiɔ̀ è dzii tsɛ. Yè dziàn tɔ̀un ci: «Nèe na Yusufù dzin kpir'la rìì ɔ̀ ?» 23Yesù yè dzin è ra ci: «M'a tɔ̀, ci ye nà tàlen nìi ban mun ne, tɔ̀ dèù'n kur'la rìì yɛ nèe tsuru ci: "E ba janfabaa, à wù, a yɛr'la rìì cɛrɛmabe ŋe." Ye nà dzin mun na sa ci: "Wo goo o goo fau Kapɛrinaxumùn wɔ̀ɔ̀ doùn, ɲe twɛy myɛ̀un. È tsuru fa a yɛr'la tà rɔ̀n mìin nɔn sa."» 24#Yux 4.44.È dzin è ra kɔn ci: «Sààben na, mun nì ci e ra, Ŋaablà re kɛɛra pɛn kuun'n kuru na wubee e yɛr'la fàtsiɛ doùn waa.» 25#Mak1 17.1.È dzin kɔn ci: «Sààben fyan, mun nà à dè ye ra, ci Ŋaablà re kɛɛra Àliì raa waatsi rɔn, ŋaa na na Isirayɛli jamaan doùn waa, è bè tàrà fɔ jii zhiigi ko kuu tsùnmɛn. Tɔ̀ goò yè dzuà ji jàmaàn min niì sapɛ. Tà waatsi rɔn, fùnshɔ̀ùntaan rèè na giri Isirayɛli jamaan doùn. 26#Mak1 17.8-16.Tà ko e sa ra, Ŋaablà na e re kɛɛra Àliì bàji be twɛy pɛn ne, è bè wɔ è ra waa. Àliì bèu fùnshɔ̀ùntaan sɔn ni nè jàmaan kpɛrɛ. Tɔ̀ taàn na tsùuŋnà Sarɛpita wɔ̀ɔ̀ rìì doùn, Sidɔn mar'la ɲàn.» 27#Mak2 5.1-14.È dzin kɔn ci: «Ŋaablà re kɛɛra Elizè raa waatsi rɔn, byèèma giri sa na ni Isirayɛli jamaan doùn. Elizè to na twɛy byèèma reè pɛn cɛrɛmabe waa. À Siiriɲɛn kpiri sɔn ni cɛrɛmabeu nìi tsoo ci Naamàn.»

28Fɔ Yesù dziu tà gooma reè dè min niì, gè o ge na ni ŋaablabegbaà doùn, è sapɛ vunun yè ta à kpɛyn. 29Tɔ̀un, è sapɛ yeè fù, yè Yesù kun, y'à sɔ̀ɔ̀n yè bo à ka wɔ̀ɔ̀ doùn. Wɔ̀ɔ̀ na tsùuŋnà jèn nì tsɛ. Yè b'à ka fɔ tɔ̀ jèèn sènfi. Yè dzin, ci ye nà à tèn bo mɔn, è nà mɛɛy jèèn ku dzuun. 30Ŋà, Yesù yè dɔ̀n bo è fi, è geren.

Yesù kwey rè kaa bou kpiri sɔn kpɛyn min niì

(Marikì 1.21-28)

31Tɔ̀un, Yesù yè jàà dɔn bè Kapɛrinaxumùn, nìi Galile mar'la wɔ̀ɔ̀ sɔn. È mòdzian kàr'na ɲànwɔsii rèè mà. 32#Mat 7.28,29.À re kàr'nà fau'n kur'la na mòdzian duungoo doò, kàtsu, baraka na ni à re goomaa ɲàn. Àwà, kpiri sɔn na ni ŋaablabegbaà doùn mɔn, kwey rèè yè bà na ni tɔ̀ kpɛyn. 33Yesù rè kàr'nà fakɔɔn doùn, tɔ̀ kpiri kweykɔɔn yè nà sɛ̀ɛ̀y jaa soo fààn na ci: 34«Nazarɛtsika kpiri Yesù, fee rìì ni mùn fi ? Wo naɔ̀ ɲe bar'li gbɛ ? Wo mòò riì kuru, mun y'à tɔ̀. Wo Ŋaablà re Mòdzìn fɛnɛ ka naumaà nì.» 35Kwey nìi gbaɔn kpir'lee kpɛyn, Yesù sa yeè e cerè tɔ̀ tsɛ kɔn, è dzin ci: «A dziɛ̀ tsyee, e bo kpir'la kpɛyn !»

Yesù tà dèu min niì, kwey rèe yè kpir'la sen mɛɛy dzɔn nɔ̀n è sapɛ jaa ra, è bo à kpɛyn. Ŋà, gèsɔn na fa à ra waa. 36Tɔ̀ goò yè ji mòdzin nee rèe sapɛ dzii tsɛ. Yè e maa y'à dè beè e si ra ci: «Nèe kɛ̀n tsuru gooma ni ? Kpir'lee re goomaa fàan vùn kwey rèè tsɛ, à to goomaa è ra dzi ka. À dziàn è ra ci yè bo mòdzian kpɛyn, twɛy sa yeè bo n dzi.» 37Mòdzian yè e maa yè Yesù rè goò lakɛɛ tɔ̀ gàneè màr'là min niì sapɛ.

Yesù ɲìnìnkɔɔn giri cɛrɛmabeu min niì

(Matsiyù 8.14-17; Marikì 1.29-34)

38Àwà, Yesù nàu bo ŋaablabegbaà doùn, è dɔ̀n be Shimɔ̀n rè tsii. Tɔ̀ y'a tàrà, Shimɔ̀n blantaàn màà taɔ fɔ è bè xɔbe. Y'à gooma de Yesù rà. 39Tɔ̀un, Yesù yè e kpɛrɛ̀ taàn nà, è bè e tsiì à kùùn. È tsiiŋ à kùùn, è cerè, ci màtaà y'à bàji. Tɔ̀ nɔ̀nkɔɔrɔn, màtaà y'à bàji. È fù, è ɲwɛyn goo jaa bo è re.

40Àyìwà, bwèy tɔrɔn bwey rɔ̀n, ɲìnìnkɔɔn na ni gè o ge rè, a ci à ɲìnìn kun o kun ni, è sapɛ yeè nà twɛy ɲìnìnkɔɔn reè ka Yesù rè. È sià tsùù tsùù be è sapɛ soo sookɔɔn tsɛ, è sapɛ yeè cɛrɛmabe. 41Kwey rèè na boò kweykɔɔn reè giri kpɛyn ko gɛyn bo rii ka. Tɔ̀ gɛyn bokɔɔn doùn, è na dziàn Yesù rà ci: «Wo rìì Ŋaablà Dzin Kpir'la.» Kwey rèè na tà dèe Yesù rà, kàtsu, è na à tɔ̀, ci wò rii Ŋaablà Jaara Modzìàn, nìi kir'là ci Kirisà. Ŋà, à na e jaa xe boò è ra, à dè màxɔbe è ra, ci wò ma tà myɛ̀n è dzu waa.

Yesù bèmaà Yude mar'la ɲàn, è bè mòdzian kàràn

(Marikì 1.35-39)

42Jia seroun min niì, Yesù yè bo wɔ̀ɔ̀ doùn, è dɔ̀n be jènjàà kor'nà gàne sɔn ɲan. Tɔ̀un, mòdzian yè bo giri, yè e maa y'à gàne gaa beè. È nàu bè à jà min niì, è sàò naà ni à re è bo ye tɛyn dɛ. 43Ŋà, Yesù yè dzin è ra ci: «Fɔ min bè Ŋaablà re Màsàbee Kùnàgoo Dziɔ̀ dè wɔ̀ kpɛrɛkuru ì sa ɲan, kàtsu, Ŋaablà mun ka naɔ tɔ̀ rii là.»

44Tɔ̀un Yesù yè fù, è dɔ̀n be Yude mar'la ɲàn, è mòdzian kàr'na ŋaablabegba rèè doùn.

Currently Selected:

Lukì 4: BDZU

Highlight

Copy