Lukì 6

Yesù ci wò rii ɲànwɔsiɛ̀ kùntsiɛ̀

(Matsiyù 12.1-8; Marikì 2.23-28)

1 # Sdk 23.26. Àyìwà, ɲànwɔsii sɔn ma, Yesù ko e re kàràndzin neè na dɔ̀n boò dzù swey ɲàn. È dɔ̀nkɔɔn, Yesù rè kàràndzin neè yè twɛy dzù rèè shìmàntan neè swey fùùrua, yè è dzin nèè tsyɛɛnmaa e sitaa doùn, y'à tàa. 2Tɔ̀ y'a tàrà, Faridziɲɛn rèè swey na ni mɔn. Twɛy yè dzin è ra tɔ̀un ci: «Y'a tɔ̀ ci goo rìi na dàaŋnà è fa ɲànwɔsiɛ̀ mà, feera ye tɔ̀ faa ?»

3Yesù yè goomaa sen tɔ̀un, è dzin è ra ci: «Dzuà màsà kpiri Dawudà ko e dzyeèsi rèè kuun sii rìi sèè o, à nìi fau, ye na tɔ̀ kàràn gbɛ ? 4#Sak 24.9.#Sak1 21.2-7.Tɔ̀ sii sèè, à na dɔn Ŋaablà re gbà blàa doùn, buru niì reè sìan Ŋaablà ra kwɛ̀yge, à na twɛy sen ɲɔn, è dzyeèsi rèè sa kɔ ɔ̀ ? Tɔ̀ to y'à tàrà, saaka goojaabo reè boshɔ̀ùn, à na dàaŋnà, mòò pɛn yè twɛy bur'leè ɲɔn waa.» 5Tà shɔ̀ùn Yesù yè dzin è ra kɔn ci: «Adamà dziàn nì ɲànwɔsiɛ̀ Tsìfa.»

6Àyìwà, ɲànwɔsii sɔn ma kɔn, Yesù yè bè dɔ̀n ŋaablabegbaà doùn è mòdzian kàràn. Tɔ̀ y'a tàrà kpiri sɔn ni mɔn, tɔ̀ raa sirama sia yè bà na saɔn. 7Faridziɲɛn ì, ko Sàrìyà Kaamoo ì na ni mɔn, yè bà Yesù kààwɔɔ̀, è ba nà mòò cɛrɛmabe ɲànwɔsiɛ̀ mà o ? Nìi na ni è duùn, tɔ̀ rii yɛ, yè dzi kùn tàrà, yè jààma jà à ra. 8Ŋà, Yesù na è duungoo tɔ̀. È dzin kpiri si sɔn saunmaà nà tɔ̀un, ci: «Fù, a tsiì, mòdzian fi.» Yesù tà dèu min niì, kpir'la yè fù è tsiì. 9Yesù yè dzin è ra tɔ̀un ci: «Min ye tey ɔ, ɲànwɔsiɛ̀ mà, à dàaŋnà e goowùù rii fa raà, tàà à dàaŋnà, e gooɲaan ni fa ? À dàaŋnà e mòò xɔn ni tsi ràà, tàà à dàaŋnà a bar'li ?» 10Yesù tà dèu min niì, è sa siin siin bè, è kòmànà dzin kpir'la rà ci: «A sià foro !» Kpir'la tà fau, à sià yè cɛrɛmabe e shɔùn.

11Faridziɲɛn rèè ko Sàrìyà Kaamoo reè tɔ̀ jà nìi fau, tɔ̀ yeè dɔ̀n twɛy kpɛyn fɔ è bè geren. Tɔ̀un, yè si tey tey bè, ci ye nà fee rìì fa Yesù rà ?

Yesù e jaara kɛɛradzin teeŋ fii bou min niì

(Matsiyù 10.1-4; Marikì 3.13-19)

12Àyìwà, sii sɔn see, Yesù yè bè tèyn jèn sɔn tsɛ, è Ŋaablà mafyɛ̀n. È feèn ko e kur'la sapɛ fa tɔ̀ ra. 13Jià nàu seey min niì, Yesù yè e re kàràndzin neè sapɛ kiri. È nàu wɔ, è mokun teeŋ fii ɲankɛrɛn, è twɛy kiri kɛɛradzin neè. 14À twɛy mòkun teeŋ fii nìì reè bou, twɛy rìì siin nèe: È jɔ̀naà na Shimɔ̀n, Yesù yè sɔn ba tɔ̀ raa tsoò tɛ̀y, ci Piyɛrì. Andère yeè gban tɔ̀ ra, nìi Piyɛr'laa tseèn. Yàkubà yè gban tɔ̀ ra. Yùxanà yè gban tɔ̀ ra. Fìlipù yè gban tɔ̀ ra. Batelemin yeè gban tɔ̀ ra. 15Matsiyù yè gban tɔ̀ ra. Tomà yè gban tɔ̀ ra. Àlifù raa dzin kpiri Yàkubà yè gban tɔ̀ ra. Shimɔn tsoo kpɛrɛ yè gban tɔ̀ ra, yè bà tɔ̀ kir'là ci Zhèlɔtsì nìi dzuɔn ci, fàtsiɛ kùùnkààfabaà. 16Yàkubà dzin kpiri Yudè yè gban tɔ̀ ra. Yudasì, Sikariyɔtsika kpir'là yè kòmànà gban twɛy sapɛ dzyeèmaa nà, nìi nàu bà Yesù jàànfabaà.

Yesù rè jàma giri kàrànmaà è ɲìnìnkɔɔn reè cɛrɛmabe

(Matsiyù 4.23-25; Marikì 3.7-11)

17Àyìwà, Yesù yè jàà bo jèèn tsɛ tɔ̀un, ko e re kɛɛradzin neè ka, è nà e tsiì gàne vɛ̀ɛ̀ sɔn ɲan. À re kàràndzin neè giri na ni mɔn, ko mòò giri kpɛrɛkuru ì. Twɛy mòdzin neè swey na boo Yerusalɛmùn, swey yè bo Yude mar'la gàne rèè swey ɲàn, swey yè bo kòòyù dziɛ tɛyn wɔ̀ rèè ɲàn, nìì reè kir'là ci Tsiirì, ko Sidɔ̀n. 18Twɛy mòdzin neè na naɔ̀ nì, yè nà e toro wɔ Yesù rè gooma reè rè, è ye re ɲìn'nèè jan fa, ye yè cɛrɛmabe. Kwey rèè na ni nìì reè kpɛyn, twɛy sa yeè cɛrɛmabe. 19Mòdzian sapɛ na à gaa ye yè e dzyɛn Yesù rà. Dzi na ni à ɲan. Tɔ̀ rii na à toò gè o ge ye ba na e dzyɛun à ra, tɔ̀ dzi ree na dɔ̀ɔn à tsìfa ɲan, à y'à cɛrɛmabe.

Taamadzibeè ko byɛnbee raa kàjaa

(Matsiyù 5.1-12)

20Tɔ̀ ɲan, Yesù yè e jaà ɲansen, è re kàràndzin neè siin, è dzin è ra ci:

«Ye nìì reè gbakɔɔn reè, ye raa wùbeu, kàtsu, ye nìn ni Ŋaablà re màsàbee ɲàn.

21Dzuà ni ye nìì reè rà dòònuùn, ye raa wùbeu, kàtsu, ye nà ɲwɛɛ̀n jà, y'a ɲɔn yeè cɛn.

Ye nìì reè ni gɛɛ rà dòònuùn, ye raa wùbeu, kàtsu, ye nà jiran.

22 # Piy1 4.14. Mòdzian ye ba ye kpɛynbee, yè e nɔn ye re, yè ye ɲɛ̀ɛn, yè ye tsoo ɲaan kir'là Adamà dziàn tsoò kamà, ye raa wùbeu.

23 # Mbk2 36.16; Kɛf 7.52. Twɛy goo rèè sapɛ ye ba faa ye ra waatsi riì bwèy, ye e taama dzibe, ye tsyɛn tsyɛn, kàtsu, ye nà bàràji bla tarà Ŋaablà re. È fà rèè sa twɛy goo soo rìì fau Ŋaablà re kɛɛra reè rà.

24Ye nìì reè to gètsi ì dòònuùn, byɛnbe ye nìn, kàtsu, ye yè e re xɛɛrɛɛ̀ tàrau nòn.

25Ye nìì reè cɛɔn dòònuùn, byɛnbe ye nìn, kàtsu dzuà nà ye kun sii sɔn see.

Ye nìì reè ni jirangoo rà dòònuùn, byɛnbe ye nìn, kàtsu, jisee ni jisee ra, ye taama nà bà ŋunun, ye yè gɛyn jaayu she fiɛ̀ rà.

26Mòdzian ye ba ye saan doò tsɛ, byɛnbe ye nìn, kàtsu twɛy fà rèè sa kɛɛra doo de reè saan tɔ̀ rii tsuru.»

Yesù ci ɲan rèè yè kɛ̀n

(Matsiyù 5.38-48; 7.12)

27Tà shɔ̀ùn, Yesù yè dzin ci: «Ye nìì reè yɛ e toro wɔɔ mun ne, mun ci ye e ɲan rèè kɛ̀n. E goò xɔ nìì reè mà, ye goowùù fa twɛy rà. 28Nìì reè gooɲaan ka ye kɛ̀ɛn, ye dzwɛ ji twɛy rà. Nìì reè sɔ̀n ɲaan wɔɔ̀ ye ra, ye Ŋaablà mafyɛ̀n twɛy rè. 29Mòò ye sitaa zhɛ a taàkun soo ɲàn, e soo sa tsuù à re. Mòò y'a re mɛ̀yɛ blaa tsi a ra, dzuun naa mɛ̀yɛ̀riɛ sa to à re. 30Mòò o moò y'a fyɛn gè rà, a kɔ̀. Mòò to y'a suun ge sen, maà dzin à tsìfa ra, ci à y'à sèè sìn a ra waa. 31#Mat 7.12.Ye sào ni mòdzian yè nìi fa ye re, e sa yeè tɔ̀ soo fa mòdzian rè.

32Ye ye e kɛnbaa rèè bàsɔùn nì goo dzibee e yɛr'la kɔn, ye nà kɛ̀n tsuru blàbe rii tàrà tɔ̀ doùn ? Arì Ŋaablà ɲan rèè sa ni tɔ̀ rii tsuru ! Nìì reè yè kɛ̀niɔ̀n, è sa twɛy rìì kɛ̀ɛn. 33Nìì reè goowùɔ faa ye ra, ye sa ye ba goowùɔ faa twɛy bàsɔùn nì nà ɔn, ye nà kɛ̀n tsuru blàbe rii tàrà tɔ̀ doùn kɔn ? Arì Ŋaablà ɲan rèè sa na tɔ̀ goo soo rìì faa gbɛ ? 34Y'a tɔ̀ ci nìì reè dzia tsìɛ̀ sàrà, ye ye ba tsìɛ̀ wɔɔ̀ twɛy bàsɔùn nì nà ɔn, ye nà kɛ̀n tsuru blàbe rii tàrà tɔ̀ doùn kɔn ? Arì Ŋaablà ɲan rèè, nìì reè dzia tsìɛ̀ sàrà è re, è sa tsìɛ̀ wɔɔ̀ twɛy rìì là.

35È ba ye, ye e ɲan rèè kɛ̀n, ye goowùɔ fa. Ye tsìì wɔ mòò rà, e maà e ɲɛyn ji tsuù tɔ̀ tsɛ waa. E ye tɔ̀ fa, e naà bàràji bla tarà. Tɔ nà à kpàdè mòdzian nà sa, ci Ŋaablà riì ni jìran nɔ̀n, ye tɔ̀ dzin ì. Wò rii wù mùn sapɛ dzyeèmaa ka, goowuu tɔ bɛy sen ɲɛn mòdzìn ɲan tsɛ.

36Ye Fà Ŋaabla màtsur'la nìi tsuru, e sa yeè màtsuru tà tsuru.»

Yesù ci mòo mà e yɛrɛ ba kitsikununbaa dzyee rèè tsɛ waa

(Matsiyù 7.1-5)

37Tà shɔ̀ùn, Yesù yè dzin kɔn ci: «E maà kitsi kunun dzyee rèè tsɛ waa. Tɔ̀ ye fa, mòò fa kitsi kunùn e tsu tsɛ waa. E maà kitsi mɛɛy dzyee rèè tsɛ waa. Tɔ̀ ye fa, mòò fa kitsi mɛɛy e tsu tsɛ waa. Ye yɛrɛ to dzyee rèè rè, Ŋaablà sa nà e yɛrɛ to ye re.

38Ye dzyee rèè kɔ̀, Ŋaablà sa nà ye kɔ̀. À nà ye kɔ̀, jàci moo mòò kɔ̀ɔ nìi tsuru giri shìman na. À y'à jia gèè doùn, à y'à yuuyuu, à y'à ɲinan ɲinan, à yè kòmànà sɔn ji à tsɛ kɔn, fɔ è bè koòn. È ɲɛn à tsɛ, ye dzyee rèè raà gɔ̀ɔn gè niì ka, tɔ̀ rii nà ka ye raà sa gɔn e shɔùn.»

39 # Mat 15.14. Tà shɔ̀ùn, Yesù yè tàlen soo ban è re kɔn nèe tsuru ci: «Jaanaa sɔn dzia e jaanasi kuru kun è jìì à ka ɔ ? Tɔ̀ ye fa, è fiɛ̀ sa fa mɛɛy kɔ̀ɔ̀ doùn fyeu ɔ̀ ? 40#Mat 10.24,25; Yux 13.16; 15.20.Kàràndzian na ni e karànfaà kùùn waa. Ŋà, kàràndzin niì kàràùn'n kuru ye wube, tɔ nà bà jàci e karànfaà.

41Fee bèe à to, ɲɔ̀ùniin nìi ni wo mòdzìnsia jaa tsɛ, wo jaa ni tɔ̀ ra, tɔ̀ to y'à tàrà gɔ̀ɔ blà riì ni wo yɛ̀r'la raà tsɛ, wo na tɔ̀ jàa waa. 42Tɔ ni wo jaà tsɛ ɔ, wo dzia dzin a modzìnsia rà dzùrù ci: "N neema, à to m'a jaa tsɛ ɲɔ̀ùniɛ̀n bo", tɔ̀ to y'à tàrà gɔ̀ɔ blà riì ni wo raà tsɛ, wo jaa na ni tɔ̀ ra waa. Mòdzin duungoofiitsi ! A jaa tsɛ raa gɔ̀ɔ blàa bo ŋe. Tɔ̀ ye fa, wo nà jɛ̀y fa cɛyn, wo yè dzi a modzìnsia raa ɲɔ̀ùniɛ̀n bo.»

Yesù ci gɔɔ̀ dziàn nì y'à toò mòò y'à tɔ̀

(Matsiyù 7.16-20; 12.33-35)

43Àyìwà, Yesù yè dzin kɔn ci: «Gɔ̀ɔ wùù na dzin ɲaan wɔɔ̀ waa. Gɔ̀ɔ ɲaan to na dzin wùù wɔɔ̀ waa. 44#Mat 12.33.Gɔɔ̀ sapɛ tɔ̀ɔ e dziàn nì nà. Mòò na fiigidzin ɲɔnàma boò daaku ra waa. Mòò to na ɛ̀rɛ̀nzhɛ̀ndzin ɲɔnàma boò daafyɛɛku ra waa. 45#Mat 12.34.Mòdzin wuɔ, tɔ gè wùu ì rìì boò e raa nàfòrò marama wùɔ doùn, nìi y'à duɔ̀n. Mòdzìn ɲaan, tɔ̀ yeè bà gè ɲaan ì boò e raa nàfòrò marama ɲaan doùn, à duɔ̀n. Goo nìi mòdzian duɔ̀n tsyɛɔ̀n, à dziɛ̀ tɔ̀ rii dèe.»

Yesù goomau gbà fiɛ̀ jiu'n kur'la tsɛ min niì

(Matsiyù 7.24-27)

46Tɔ̀un, Yesù yè dzin ci: «Fee kamà kudɛyn ye mun kir'là, ci Tsìfaà, Tsìfaà, mun to nìi dèe ye ra, ye na tɔ̀ faa waa ?» 47Mòò riì nàa è nà mun ne goomaa myɛ̀n, à y'à shi jiì jàci m'a dèu nìi tsuru, tɔ̀ tsìfa ko nìi dzia gɔ̀n, mun nà tɔ̀ dè ye ra. 48Mùn dzia tɔ̀ tsìfa gɔ̀n ko nèe gbàjibaa kaatsi rèe rìì ka. È re gbà jimaà kɔ̀ɔ̀ ɲɛɛ̀n fɔ è bè wɔ faà tsɛ. È re gbàà dzun ban tɔ̀ faà tsɛ. Gbàà ji doumaà shɔ̀ùn, sii sɔn see, ŋaa brìsi yè nà, tɔ̀ yeè nà doòn tsyɛn kpan. Tɔ̀un, doòn yuà yè nà fur'lu, è nà gbàà jùrù, gbàà na bo e shɔùn waa. Fee y'à to gbàà na mɛɛy ? À jiu'n kur'la wùbeu, tɔ̀ rii y'à to à na mɛɛy waa. 49Ŋà, mòò riì mun ne goomaa myɛ̀ɛn, à to na e tsiɛ à y'à shi jiì jàci mun y'à dèe nìi tsuru waa, tɔ̀ tsìfa ko mòò riì soo, tɔ̀ rii siin: Mòò riì yè e re gbà jiɔ̀ dzɔ̀nxɔɔmaà maanaa tsɛ, à mà bà à dzun baɔ̀n faà tsɛ waa, ta tɔ̀ rii. Gbàà ji doumaà shɔ̀ùn, ŋaà brìsi yè nà. Tɔ̀un, yuà nàu gbàà jùrù min niì, gbàà yè mɛɛy fɔ è ɲaanbe.

Currently Selected:

Lukì 6: BDZU

Highlight

Copy

Want to have your highlights saved across all your devices? Sign up or sign in

Learn More About Bible Dzùùngoo Unicode