Matsiyù 15

Yesù nìi dèu sàrìyaa shi jiɛ tsɛ

(Marikì 7.1-13)

1Àyìwà, tɔ̀ ɲan, Faridziɲɛn swey, ko Sàrìryà Kaamoo swey yè bo Yerusalɛmùn, yè nà Yesù rè, y'à tey ci: 2«Feera wo re kàràndzin neè na mùn fàbɔɔ rèè rè shi bɔrɔɔ reè jìɛ waa ? È ye ba nà ɲwɛɛ̀n ɲɔn, è na e sira foo e foòŋ'n kur'la waa.» 3Yesù sa yeè è tey ci: «Feera ye re shi bɔrɔɔ reè kamà, ye tsu na Ŋaablà dzugooma xɔù rèè shi jiɛ waa ? 4#Jdk 20.12; Sdk 5.16; Jdk 21.17; Sak 20.9.Àwà, Ŋaabla dziun ci:

"A faà ko a naà blàbe."

È bà ci kɔn:

"Mòò riì dzii ɲaan nà wɔ e naà tàmafa e faà tsɛ, tɔ wù è vu."

5Ŋà nìi ye, ye dziàn mòdzian nà, ci mòo dzia dzin e faà tàmafa e naà nà ci: "Mun na wù min nìi sìn wo ra m'a ka wo dzwɛ̀ma, tɔ Ŋaablà kɔɔ gè." 6Tɔ̀ ye de nòn, ci à na wɔɔ̀ e blàbe fa a faà rè dɛ. Tà tsuru ye Ŋaablà re goomaa mɛrɔun e re shi bɔrɔɔ kamà. 7Duungoofiitsi ì ! Kɛɛra Esayì y'à dè fyɛu ye raa goo rìì tsɛ nèe tsuru ci:

8 # Ekk 29.13. "Nèe mòdzin nee reè mun blàbee e dzii rìì ka.

È duùn nɔ̀n, è dan gbàn mun na.

9È mun blàbe niì faa, nàfa na ni tɔ̀ ɲan waa,

kàtsu è kàràn nìì reè sìan, tɔ mòdzin ì nè sàrìya tsuuŋma ì."»

Yesù ci nìi boò duùn nɔ̀n, tɔ̀ rii mòò noo

(Marikì 7.14-23)

10Àwà, Yesù yè jàmaà kiri kpɛ̀rɛ̀ e ra tɔ̀un, è dzin è ra ci: «Ye e toro wɔu'n kuru wube, ye nèe dzin sen: 11Gè niì dɔ̀ɔn mòdzin dzu è b'a duùn, tɔ̀ na à noo waa. Ŋà nìi boò à dzu, tɔ̀ rii y'à noo.» 12Tɔ̀un, kàràndzin neè yè e kpɛrɛ̀ à ra, yè dzin à ra ci: «Wo to yè bà à tɔ̀ ci wo re goomaa myɛ̀unmaà Faridziɲɛn rèè ɲìniun dɛ ?» 13Yesù ci: «Mun Fà Ŋaablà riì ni jìrànxɔ rɔ̀n, tɔ ma ba gɔ̀ɔ o gɔ̀ɔ tsiɔ̀, tɔ̀ sapɛ nà fù bo mɔn. 14#Luk 6.39.Ye è to mɔn. È jaana ì, yè bà jaana ì kuru kuɔn. Jaana to ye jaana kuru kun, è fiɛ̀ sa rii mɛɛ̀ kɔ̀ɔ̀ doùn.» 15Piyɛrì yè dzin à ra ci: «Tɔ̀ tàleèn dzuun de mùn na.» 16È dzin ci: «Arì she ye tsu akir'là na jɛ̀y fa ŋe o ? 17Ye na à tɔ̀ ci gè o ge dɔ̀ɔn mòò dzu è bè duùn nɔ̀n, tɔ̀ dàmààn bèe ji ɔ ? 18#Mat 12.34.Ŋà nìì reè boò dzu rɔ̀n, twɛy daàn duùn nɔ̀n nì, twɛy rìì to mòò noo. 19Goo nìì reè boò duùn nɔ̀n, tɔ̀ rii yɛ, kɛ̀sɛmà ɲaan neè, ko mòdzìn vua, ko ɲànmɔ̀ɔ̀bee ko kɛ̀kɛ̀ɛ̀ybeè, ko shɔnbeè, ko doò, ko tsoo bara goo reè. 20Àwà twɛy goo rèè rìì mòò noo. Ŋà a sira foo bɛɛ yè ɲwɛyn ɲɔn, tɔ̀ na mòò noo waa.»

Yesù Kanaaninka taàn rè dziɛ̀n cɛrɛmabeu min niì

(Marikì 7.24-30)

21Àyìwà, Yesù yè bo mɔn tɔ̀un, è dɔ̀n be Tsiirì ko Sidɔ̀n màr'lèè ɲàn. 22Tɔ̀ y'a tàrà, tàan sɔn sa na tsùuŋnà twɛy màr'lèè ɲàn, tɔ Kanaaninka. Tɔ̀ taàn yè nà Yesù rè, è vu bo fààn na ci: «Tsìfaà, màsà kpiri Dawudà tsua dziàn, màtsuru n na, kwey ni mun dzin taan kpɛyn, è bà à byɛɛn fɔ è bè geren.» 23Yesù na à latsi gooma pɛn ka. À re kàràndzin neè yè e kpɛrɛ̀ à ra tɔ̀un, yè dzin à ra ci: «Tàan rèe ni gɛyn boo rà ɲe kpɛyn, a fa dzin ci è bèra ɔ ?» 24Yesù ci: «Mun na ka naɔ mòò pɛn ne, fɔ Isirayɛlidzin neè, twɛy nìì reè fìriɔ̀ a ci saa ì.» 25Tɔ̀un, taàn yè nà e kunun gban Yesù bììn, è dzin ci: «Tsìfaà, cinan n ma !» 26Yesù ci à ra ci: «À na wù dziin nèè rè ɲwɛɛ̀n yè sen maa vììrìì reè rè waa.» 27Taàn ci: «Tɔ sààben Tsìfaà. Ŋà ɲwɛyn bubui niì reè tɔr'nà vììrìì tsifa rèè rè ɲwɛyn ɲɔnma nɔ̀n, vììrìì reè twɛy sen ɲɔɔ̀n.» 28Yesù y'à latsi tɔ̀un ci: «Aa tàan, wo ɲan ɲɛynaà blà taki ! A nìi gaa, è fa a re a ci wo ci è fa nìi tsuru.» Àwà, è taàn dzin taan cɛrɛmabe tɔ̀ nɔ̀nkɔɔrɔn.

Yesù ɲìnìnkɔɔn giri cɛrɛmabeu min niì

(Marikì 7.31)

29Tà shɔ̀ùn Yesù yè bo tà gàne rɔ̀n, è dɔ̀n be Galile yu blàa dzii ra, è bè tèyn jèèn tsɛ, è tsuù mɔn. 30Jàma brìsi yè nà Yesù rè mɔn, ko ɲìnìnkɔɔn giri ka. Sànsɔun ì ni, jaana ì ni, nɔ̀ɔ̀rɔ̀kɔɔn ì ni, bobo ì ni, ko ɲìnìnkɔɔn giri kpɛ̀rɛ̀kuru ì. Yè nà è sapɛ ji Yesù sàn dzuun. Tɔ̀un, Yesù yè è sapɛ cɛrɛmabe. 31Àwà bobo reè goomakɔɔn, nɔ̀ɔ̀rɔ̀kɔɔn reè yè bà mòdzin dziitsyɛunma, ko sànsɔun nèè jìì terenkɔɔn, jaana reè yè bà jɛ̀y faa, tɔ̀ jàkɔɔn na jiɔ̀ jàmaà dzii tsɛ fɔ è bè geren. Tɔ̀un, yè tsoo dzi ɲɛɛn Isirayɛlì Ŋaablà tsɛ.

Yesù ɲwɛyn sìun kpiri gbaa nààlen na min niì

(Marikì 8.1-10)

32Àwà, Yesù yè e re kàràndzin neè kiri kpɛ̀rɛ̀ e ra tɔ̀un, è dzin è ra ci: «Jàma rèe màtsuru mun kuɔn fɔ è bè geren. È bwèy zhììgi rii yɛ nèe mun ka, ɲwɛyn to na ni y'à ɲɔn. Min bà ni è dzukɔɔn bàji be nèe tsuru, tɔ̀ na mun sàò waa, kàtsu, è dzia gba shia rè.» 33Kàràndzin neè yè dzin à ra ci: «Ɲe nà dzi nèe jàma brìsi rèe cɛɛ̀n ɲwɛyn jà mìin nèe jènjàà kor'nèe doùn ɔ̀n ?» 34Yesù yè è tey ci: «Buru kunun fɛrɛn ni ye re ?» È ci: «Buru kunun ɲɛɛ̀nun, ko ji myɛyn danman.» 35Tɔ̀un, à y'à gaa jàmaà rè, ci yè e tsuù dzɔn nɔ̀n. 36Àwà è buru kunun ɲɛɛ̀nuàn ko ji rèè tsi, è baraka sìn Ŋaablà ra, à yè è tara tara, à yè è wɔ kàràndzin neè suun, twɛy y'à tanan jàmaà nà. 37Mòdzian sapɛ yeè ɲwɛɛ̀n ɲɔn yè cɛn kpan. Y'à dzyee kùnkwììn touma rèè ka sèè ɲɛ̀ɛ̀nun tsyɛn. 38Nìì reè tɔ̀ ɲwɛɛ̀n ɲɔun, kpir'leè na mòkun gbaa nààlen. Tàan rèè ko dziin nèè dzii na ni waa. 39Àwà ɲwɛɛ̀n shɔ̀ùn, Yesù yè shi sin jàmaà nà. À shi siun, è dɔ̀n konkor'na doùn, è bè gàne sɔn ɲan, nìi kir'là Màgàdàn mar'la.

Currently Selected:

Matsiyù 15: BDZU

Highlight

Copy