Matsiyù 19

Yesù nìi dèu furu goo tsɛ

(Marikì 10.1-12)

1Àyìwà, Yesù nàu dò twɛy gooma reè rà waatsi riì bwèy, è bo Galile mar'lɔùn, è dɔ̀n be Yude mar'la wòòɲan reè ɲàn, Yuridɛn baa kɛ̀yn nɔn. 2Àwà, jàma brìsi yè e gban à kpɛyn. È ɲan ɲìnìnkɔɔn reè, è twɛy cɛrɛmabe.

3Tɔ̀un, Faridziɲɛn rèè swey yè e kpɛrɛ̀ à ra, è bà na ni twɛy duùn, ye y'à dzuun bo. Y'à tey ci: «À dàaŋnà kpir'la yè e re tààn furu san è ɲɛn kùàn sapɛ tsɛ ɔ ?» 4#Gok 1.27; 5.2.Yesù yè è latsi ci: «Tà bwèy ye na à kàràn Ŋaablà re Goomaa doùn, ci dziɲaan jɔ̀n bwey gè sapɛ ɲɛnbaa Ŋaablà yeè è ɲɛun kpiri ko tàan gbɛ ?

5 # Gok 2.24. À to yè dzin ci:

"Tɔ̀ kamà, kpir'la nà e naà ko e faà bàto, è shi e re tààn nà, è fiɛ̀ yè bà gɔn kungɔ soo."

6Tà tsuru è na fii dɛ waa, ŋà è gɔn kungɔ soo rii sa. Tà doùn, Ŋaabla nìi bàu soo, mòo mà tɔ̀ bo e si ra waa.»

7 # Sdk 24.1-4; Mat 5.31. Y'à tey kɔn ci: «Feera kɛɛra Musà ci kpir'la ye ba taàn bàjia, è furu san sɛbɛ̀n sìn à ra ?» 8Yesù ci: «A y'a jà Musà yè ye re tàan rèè bàjia shi wɔ ye suun, à tɔ̀ fau ye re tantaamaxɔbeè rìì kamà. Tà boshɔ̀ùn goo rèè jɔ̀n bwey, à naà tɔ̀ tsuru waa. 9#Mat 5.32; Kor1 7.10,11.Tà doùn, mun nì ci e ra, mòò riì yè e re tààn bàjia, à mà bà kɛ̀kɛ̀ɛ̀ybe shi tsɛ fyeu, è tàan kpɛrɛ sen, tɔ ɲànmɔ̀ɔ̀be rii faa.»

10Yesù rè kàràndzin neè yè dzin à ra tɔ̀un ci: «Nèe rìì ye ba kpir'la faa raà taàn kàjaa tsɛ, tà bwèy, fur'la fabɛybe rìì fyan.» 11È dzin è ra ci: «Nèe gooma, mòdzian sapɛ na dzia nìi shi jiì waa, fɔ Ŋaablà y'a fààn siɔ̀n nìì reè rà. 12Kpir'la mà furu fa, kàjaa giri dzia dan tɔ̀ ka. Swey kereu, tɔ̀ y'a tàrà è na ni kpiribe ɲan waa. Swey raa yè bà mòdzian fyɛ̀, nìi doùn y'à bou kpiribee ɲàn. À yɛ̀rɛ̀ to yè bà swey sàò yè to nèe tsuru, Jìrànxɔɔ̀ Màsàbee#19.12 Jìrànxɔɔ̀ Màsàbee: È kòrò Dzyèèsìbee mòdzin neè rè Ŋaablà tsoò kir'là jɔun boo ka yè bà ni blà wɔ à ɲan, sani Matsiyù yè dzin Ŋaablà re Màsàbee, Dzyèèsìbee Mòdzin neè kamà, à ci Jìrànxɔɔ̀ Màsàbee e re sɛbɛɛn doùn. kamà. Mòò riì ye ba dzia e tsiì nèe gooma ree ra, è tsiì à ra.»

Yesù dziun min niì ci è mà dziin nèè jɔun shu wò tsɛ waa

(Marikì 10.13-16; Lukì 18.15-17)

13Tà shɔ̀ùn mòdzian yè nà dziin nèè swey ka Yesù rè, gè riì ni à to è sià tsùù è tsɛ, è Ŋaablà mafyɛ̀n è re. Ŋà, kàràndzin neè yè fù fù twɛy mòdzin neè kpɛyn. 14Yesù ci tɔ̀un ci: «Y'a to dziin nèè yè nà n na, e maà è jɔun shu nàà tsɛ waa. Nìì reè ni è tsuru, Jìrànxɔɔ̀ Màsàbee twɛy rìì laa.» 15Àwà Yesù yè e sià tsùù dziin nèè tsɛ tɔ̀un è dzwɛ ji è ra, tà shɔ̀ùn è bo mɔn, è dɔ̀n be.

Jaamabe dziù dòbɛɛ tàràù'n kur'la

(Marikì 10.17-31; Lukì 18.18-30)

16Tà doùn, kpiri sɔn yeè e kpɛrɛ̀ Yesù rà à y'a tey ci: «Kàrànfaà, mun nà fee wùù rii soo fa, min bà ni jaamabe dziù dòbɛɛ tàrà ?» 17Yesù ci à ra ci: «Feera wo yè bà mun teè wùɔ goojaa mà ? Ŋaablà soo pe rii wù. Tà doùn, e ba ni à re e jaamabe dziù dòbɛɛ tàrà, à dzugooma xɔù rèè shi jiì.» 18#Jdk 20.13; Sdk 5.17; Jdk 20.14; Sdk 5.18; Jdk 20.15; Sdk 5.19; Jdk 20.16; Sdk 5.20.È Yesù tey ci: «Kɛ̀nma ì ?» Yesù ci: «Nìi yɛ, maà a modzìnsi vu waa, maà ɲànmɔ̀ɔ̀be fa waa, maà shɔnbe fa, maà doò wɔ a modzìnsi ra, 19#Jdk 20.12; Sdk 5.16; Sak 19.18.a naà ko a faà blàbe, a modzìnsia kɛ̀n jàci a yɛr'la.»

20Dzunwɛɛn yè dzin Yesù rà ci: «Mun tɔ̀ sapɛ shi jiiŋ nòn. Fee rìì mun fɔɔn kɔn ?» 21Yesù yè dzin à ra ci: «E ba ni à re a dzii yè tsyɛn taki, b'à suun ge reè sapɛ gɔɔ, a ɲɛɛn sìn gbakɔɔn reè rà. Tɔ̀ tsuru, nàforo bla nà bà ni wo re jìrànxɔɔ̀ doùn. Tà shɔ̀ùn, e nà a gban mun kpɛyn.» 22Dzunwɛɛn dziu twɛy gooma reè myɛ̀n min niì, à taama ŋununbeuma yè geren, kàtsu à na gètsi blà.

23Tà doùn, Yesù yè dzin e re kàràndzin neè rà ci: «Sààben na, mun nì ci e ra, gètsià dɔn ɲan Jìrànxɔɔ̀ Màsàbee doùn. 24Min bà ci e ra kɔn, ci ɲɔ̀ɔ̀nmɛɛ̀n yè dɔ̀n mɔnsɛyn kɔɔ rè, tɔ̀ fa dzi gètsià dɔ̀ɔ̀n mà Ŋaablà re Màsàbee doùn.» 25Àwà kàràndzin neè tɔ̀ goomaa myɛ̀un min niì, è ji è dzii tsɛ fɔ è bè geren. È ci: «È ba tɔ̀ tsuru, tsì rii soo dzia tsi sa ?» 26Yesù yè è siin to tɔ̀un, è dzin è ra ci: «Adamàdzin nèè rè, à na dzia fa waa, ŋà Ŋaablà, goo sɔn pɛn na tɔ̀ jaan waa.» 27Piyɛrì y'à latsi tɔ̀un ci: «Àwà ɲe do ? Ɲe kaariu gèè sapɛ shɔun, ɲe yè e gban wo kpɛyn. Ɲe raà to nà kun dzùrù ?» 28#Mat 25.31; Luk 22.30.Yesù yè dzin è ra ci: «Sààben na, mun nì ci e ra, goò sapɛ ye na bà yeu waatsi riì bwèy, Adamà dziàn yè e tsuù e re màsà gbaaniɛn tsɛ, nɔɔrɔɔ̀ màsà gbaaniɛn, ye nìì reè yè e gbaun mun kpɛyn, ye sa nà e tsuù màsà gbaaniin teeŋ fii tsɛ, ye yè kitsia kùnùn Isirayɛlì mòdzian kun teeŋ fii rèè tsɛ. 29Àwà, mòò o moò to nà kaari e re gbà rèè shɔ̀ùn, è kaari e tseyn nèè, tàmafa e tsinà rèè, tàmafa e naà, tàmafa e faà, tàmafa e dzin nèè, tàmafa e re dzù rèè shɔ̀ùn mun tsoò kamà, tɔ nà twɛy tsuru càànmoò tàrà, è sèè kɔn è jaamabe dziù dòbɛɛ tàrà shɛn. 30#Mat 20.16; Luk 13.30.Àwà jɔundzin neè giri nà bà bònèdzin, bònèdzin neè giri yè bà jɔundzin.»

Currently Selected:

Matsiyù 19: BDZU

Highlight

Copy

Want to have your highlights saved across all your devices? Sign up or sign in

Learn More About Bible Dzùùngoo Unicode