Matsiyù 21

Yesù dɔ̀ùn'n kur'la Yerusalɛmùn wɔ̀ rɔ̀n

(Marikì 11.1-11; Lukì 19.28-40; Yùxanà 12.12-19)

1Àyìwà Yesù ko e kpɛyndzin neè bèu tsyɛnbe Yerusalɛmùn wɔ̀ɔ̀ rà waatsi riì bwèy, à yè è to oliviku rèè jèèn tɛyn, Bɛtsifaazhì wɔ̀ɔ̀ mà gba, è re kàràndzin neè fii ka bè e jɔun tɔ̀ wɔ̀ rɔ̀n. 2À ci è ra ci: «Wɔ̀ rìi yɛ ye jɔun, ye bè mɔn. Ye ye be wɔ nìi tsuru, ye nà shùkwɛ̀yna sɔn shiuma jà, à dziàn ni à tɛyn. Ye è foro, ye nà è ka n kɔ. 3Mòò ye e tey, ye dzin ci Tsìfaà rìì màgoo ni à ra. Tɔ̀ nɔ̀nkɔɔrɔn, à nà à to yè bè.» 4Tà goò fau nì, sànko kɛɛraa rè gooma de dɔ̀unma bɔrɔɔ sɔn yeè bo e shi tsɛ, nìi yɛ ci: 5#Jkk 9.9.«Y'a dè Siyɔ̀n gàneè dzin taan nà, Yerusalɛmunka reè rà ci:

"Ye re màsà kpir'là nàkɔɔn siin ye re. À vunun ma dzi, è bà tèroòn shùkwɛ̀yna bòùn.

Shùkwɛ̀yn kpèr'niin boùn, faagoo faa dzwɛka dzin."»

6Kàràndzin neè yè bè, y'à fa a ci Yesù y'à dèu è ra nìi tsuru. 7Yè nà shùkwɛ̀ynaà ko e dziàn ka. Yè e re vya rèè bà è tsɛ, Yesù yè tèyn. 8Jàma brìsià mòdzian yè e re vya rèè bà beè à jɔun shia tsɛ. Swey yè bè gɔ̀ɔ̀saan ì kɛɛ̀, yè nà tɔ̀ ji beè à jɔun. 9#Zab 118.25,26.Jàma nìi na ni à jɔun ko bònè sa, twɛy yè e vu boò fààn na ci:

«Tsoo dzi yeè ɲɛn màsà kpiri Dawudà tsua dziàn tsɛ.

Nìi nàkɔɔn yɛ Tsìfaà tsoo ra, dzwɛ yè bà ni tɔ̀ kpɛyn.

Tsoo dzi yeè ɲɛn Ŋaa tsɛ fɔ jìrànxɔɔ̀ doùn doùn mɔn.»

10Àwà Yesù dɔ̀un Yerusalɛmùn wɔ̀ɔ̀ doùn waatsi riì bwèy, wɔ̀ɔ̀ sapɛ yeè fù tsìì e saàn, mòdzian yè e si tey bèe ci: «Nèe yè bà tsì rii ?» 11Jàmaà ci: «À kɛɛra Yesù rìì, è bo Nazarɛtsì wɔ̀ rɔ̀n, Galile mar'la ɲàn.»

Yesù gwɛy fa reè kaa bou min niì Ŋaablà re gbà blàa doùn

(Marikì 11.15-19; Lukì 19.45-48; Yùxanà 2.13-22)

12Àyìwà, Yesù yè bè dɔ̀n Ŋaablà re gbà blàa doùn tɔ̀un. À dɔ̀un mɔn, nìì reè sapɛ ni gwɛɛ̀ ko fìɛ rà, è twɛy sapɛ kaa bo da rɔ̀n. È ɲɛyn ɲancinan reè raa tàbàr'leè, ko màsàkèrè gɔɔ reè raa tsùùràge reè kùnàgblen. 13#Ekk 56.7; Ykk 7.11.È dzin è ra ci: «À sɛbɛɔ̀n ci:

"Mun ne gbàà nà kiri Ŋaabla mafyɛn gba, ŋà ye, ye y'à baɔ̀ gookoron fa reè mɛnɛnmà."»

14Àwà jaana reè ko sànsɔun nèè yè e kpɛrɛ̀ à ra Ŋaablà re gbà blàa fɔɔn doùn, à yè è cɛrɛmabe. 15Tɔ̀un, Saaka Jɔundzin neè ko Sàrìryà Kaamoo reè Yesù rè kabagoo goo fakɔɔn reè jà nìi fau, tà ko dziin nèè yè bà dziàn fààna Ŋaablà re gbà blàa fɔɔn doùn ci: «Tsoo dzi yeè ɲɛn màsà kpiri Dawudà tsua dziàn tsɛ», tɔ̀ yeè è vunun ta fɔ è bè geren. 16#Zab 8.3.Yè dzin à ra ci: «Nèe rèè nìi dèe, w'a myɛ̀na ɔn ?» À ci è ra ci: «Ɔ̀ɔn kɛ̀ ! Tà bwèy nèe gooma niì yɛ, ye na tɔ̀ kàràn jà ŋe gbɛ ? À dèu ci:

"Ye niì reè tsoo dzi ɲɛɛn wo tsɛ, wo twɛy wɔu dziiniin nèè, ko cɛnmina reè dzu."»

17Tà goomaa shɔ̀ùn, Yesù yè bo è tɛyn. È bo wɔ̀ɔ̀ doùn, è dɔ̀n be Betanìn wɔ̀ rɔ̀n, è bè feèn fa mɔn.

Yesù fiigiku sɔn gɔrɔu min niì

(Marikì 11.12-14; 11.20-24)

18Tɔ̀ raa gbey gbishɛɛ̀mà nɔ̀n, à sèè nakɔɔn wɔ̀ɔ̀ doùn, dzu y'à kun. 19Tɔ̀un, è fiigiku sɔn ja shi dziɛ rè. È kpɛrɛ̀ tɔ̀ fiigikuà rà, ŋà, à na dzin pɛn jà à ra waa, tsira ì boshɔ̀ùn. À to yè dzin à ra tɔ̀un ci: «Wo mà dzin wɔ dɛ fyeu !» Tɔ̀ nɔ̀nkɔɔrɔn ko e sa, fiigikuà yè gɔ̀rɔ̀. 20Àwà, kàràndzin neè tɔ̀ jàu min niì, è ji è dzii tsɛ, yè dzin ci: «À bàu dzùrù, fiigikuà yè gɔ̀rɔ̀ bo sɔn ?» 21#Mat 17.20; Kor1 13.2.Yesù yè dzin è ra ci: «Sààben na, mun nì ci e ra, ɲɛyna ye ba ni ye ɲan, ye mà bà e cir'la fyeu, mun yɛ nìi fau fiigikuà ka nèe, ye sa dzia tɔ̀ fa. À yɛ̀rɛ̀ fa dàn tɔ̀ bàsɔùn mà waa. Ye dzia dzin neè jèn nèe ra ci: "Fù, e b'a ji kòòyu rɔn !" À to nà fa n dzi. 22Àwà, gè o ge, ye y'a gaa màfyɛɛ̀n doùn ko ɲɛyna ka, ye nà à tàrà.»

È Yesù teroun min niì, ci è re goo fakɔɔn reè dzi tarau min

(Marikì 11.27-33; Lukì 20.1-8)

23Àyìwà, Yesù yè bè dɔ̀n Ŋaablà re gbà blàa doùn tɔ̀un, è maa è mòdzian kàr'na. À ni tɔ̀ kàr'nà nà, Saaka Jɔundzin neè ko Dzyèèsìbee mòdzin neè rè bɔɔ rèè yè nà e kpɛrɛ̀ à ra, y'à tey ci: «Dzi kɛn ni baraka ɲan wo nèe goo rèe rèè faa ? Tàà tsì rii yè è faa dzi siun wo ra ?» 24Yesù yè dzin è ra ci: «Mun sa nà ye tey goo soo ma. Ye ye tɔ̀ jaa dè mun na, tà doùn dzi riì baraka ɲan mun nèe faa, mun sa nà tɔ̀ dè ye ra. 25Tsì rii Yùxanà kau, è nà mòdzian jaara foò Ŋaablà re shia goo rèè rà ? À Ŋaablà rii làà, à mòdzian nì ?» Tɔ̀ goomaa dèumaà, yè maa yè dziàn e si ra ci: «Ɲe ye dzin ci à Ŋaablà rii, à nà ɲe tey, ci feera ɲe na ɲɛn à ra ? 26Ɲe to ye dzin ci à mòdzian nì, ɲe shiɔ̀ jàmaà jɔun, kàtsu è sapɛ ɲɛɔ̀n à ra, ci Yùxanà kɛɛra rii.» 27Tɔ̀un yè dzin Yesù rà ci: «Ɲe na tɔ waa.» Yesù sa yeè dzin è ra ci: «Dzi riì baraka ɲan mun sa nèe faa, mun tsu fa tɔ̀ dè ye ra waa.»

Yesù gooma bɔɔ nìi ka tàlen baun kpiri sɔn ko e dzin kpiri fii tsɛ

28Yesù yè dzin kɔn ci: «Ye fee kɛ̀sɛɛ̀ nèe goo rèe tsɛ, nìi yɛ kpiri sɔn, ko e dzin kpiri fii ? Àwà nìi jɔ̀naà, è dzin tɔ̀ ra ci: "Mun dziàn, bè ɛ̀rɛ̀nzhɛ̀ndzu rɔ̀n she, e bè faagoo fa." 29Tɔ̀ yeè dzin à ra ci: "Mun na naà bè waa." Ŋà dɛ̀ɛnin tà shɔ̀ùn, à akir'là yè nà à sɔ̀swɛy, è bè dzù rɔ̀n. 30È nà e kpɛrɛ̀ soo sa ra, à dè tɔ̀ sa ra kɔn. Tɔ̀ yeè dzin à ra ci: "Bàa, mun nà bè." Ŋà, à na na bè waa. 31Àwà è fiɛ̀ ɲàn, tsì rii fàmaa sàò fau ?» È ci à jɔ̀naà nì. Yesù yè dzin è ra tɔ̀un ci: «Sààben na, mun nì ci e ra, xɔnsɔɔn tsi reè ko ɲànmɔ̀ɔ̀taan rèè nà dɔ̀n ye jɔun Ŋaablà re Màsàbee doùn. 32#Luk 3.12; 7.29,30.Tɔ nà fa, kàtsu Yùxanà nàu ye re, è nà shi tereonmaà kpàdè ye ra, ye to na ɲɛn à ra waa. Ŋà xɔnsɔɔn tsi reè ko ɲànmɔ̀ɔ̀taan rèè, twɛy ɲɛun à ra. Tɔ̀ jàumaà ko e raà sa ye re, tɔ̀ pɛn na à to ye akir'là yè ye sɔ̀swɛy, ye yè ɲɛn à ra.»

Yesù gooma bɔɔ nìi ka tàlen baun gbàtsi sɔn, ko e re dzùà faagoofadzin neè tsɛ

(Marikì 12.1-12; Lukì 20.9-19)

33 # Ekk 5.1,2. Àyìwà Yesù yè dzin è ra kɔn ci: «Ye nèe gooma bɔɔ rèe sa lamyɛ̀n. Gbàtsi sɔn ɛ̀rɛ̀nzhɛ̀ndzu wɔu, è kɛ̀yngɛ kun à y'à laguru. È kɔ̀ɔ̀ ɲɛɛn, ɛ̀rɛ̀nzhɛɛ̀n nà vùr'la min niì, à yuà yè bo. È sangaso ji, à kplatsuubaa rèè nà bà ni min niì, y'à kààwɔɔ̀. Tɔ̀ sapɛ shɔùn, è kòmànà dzùà kɛ̀ɛ̀yfa to faagoofadzin neè swey mà, è dɔ̀n be jìì rà.

34Àwà, ɛ̀rɛ̀nzhɛ̀ndzian bo waatsi nàu wɔ, dzùtsià yè e re jòn nèè ka dzùà faagoo fa reè rè, yè bà ni wò raa nìàn sìn. 35Twɛy jòn nèè nàu wɔ tɔ̀un, ɛ̀rɛ̀nzhɛ̀ndzuà faagoo fa reè yè sɔn kun è ɲan, yè tɔ̀ ban cɛyn. Yè sɔn vu, yè sɔn dzyɛn ko kpàa ì ka. 36Tà shɔ̀ùn kɔn, è jòn kpɛrɛkuru ì bàji be, nìi reè giri jɔ̀na rèè mà. Yè twɛy sa kun tɔ̀ kuun'n kur'la rà. 37Tà sapɛ shɔùn, è dzin kpir'la yɛ̀r'la ka bè è re, è dzin ci: "È nà blà wɔ mun dzin kpir'la ɲàn." 38Ɛ̀rɛ̀nzhɛ̀ndzuà faagoo fa reè dzin kpirimaa jàu min niì, yè dzin e si ra ci: "À shɛnsenbaà rìì yɛ, y'a wa m'a vu m'a re shɛɛ̀n tàrà bà e raa." 39Y'à kun tɔ̀un, y'à sɔ̀ɔ̀n bo dzùà bònè, y'à vu maa mɔn. 40Àwà ɛ̀rɛ̀nzhɛ̀ndzùtsià ye na nà ɔn, à nà fee rìì fa twɛy faagoo fa reè rà ?» 41Yè dzin Yesù rà ci: «À nà twɛy faagoofadzin ɲan reè vu vuu'n kur'la arì à fa màtsuru è ra waa. Tà shɔ̀ùn è re dzùà kɛ̀ɛ̀yfa faagoofadzin kpɛrɛ ì mà, twɛy y'à faagoò fa, y'à raa nìn ɛ̀rɛ̀nzhɛɛ̀n sìn à ra e waatsi ɲan.» 42#Zab 118.22,23.Yesù yè dzin è ra ci: «Nìi sɛbɛɔ̀n Ŋaablà re Goomaa doùn, ye na tɔ̀ kàràn jà ŋe gbɛ ? À deò ci:

"Gbà ji reè kpàà riì maaŋ, tɔ̀ rii nàu sèè è bà gbàà nɔ̀nkɔ̀n kpaa, nìi ni kpàà dzyee reè sapɛ jɔun. Tɔ bou Tsìfaà rìì ɲàn, è bà kabagoo ɲe jaa ra !"»

43Yesù yè dzin kɔn ci: «Tɔ̀ kamà, mun nì ci e ra, Ŋaablà re Màsàbee nà bo ye suun è sìn kun na, nìi y'à ra goo faa. 44[Tà doùn, mòò o moò nà mɛɛy kpàà ree tsɛ, tɔ̀ min niì sapɛ nà kɛɛy kɛɛy. À to nà mɛɛy mòò o moò tsɛ, à nà tɔ̀ tsìfa jɔjɔ.]»

45Àwà, Saaka Jɔundzin neè ko Faridziɲɛn rèè dziu twɛy gooma bɔɔ rèè myɛ̀n min niì, y'à tɔ̀, ci Yesù dziàn ye rìì là. 46Àwà à na ni è duùn tɔ̀un, y'a kun, ŋà è na shiɔ̀ jàmaà jɔun, kàtsu è sapɛ na ɲɛɔ̀n à ra ci Yesù kɛɛra rii.

Currently Selected:

Matsiyù 21: BDZU

Highlight

Copy

Want to have your highlights saved across all your devices? Sign up or sign in

Learn More About Bible Dzùùngoo Unicode