Matsiyù 27

È byɛ̀un à mà min niì ci Yesù yè vu

(Marikì 15.1; Lukì 23.1-2; Yùxanà 18.28-32)

1Àyìwà jia seroun, gbishɛɛ̀mà muri, Saaka Jɔundzin neè, ko Dzyèèsìbee mòdzin neè rè bɔɔ rèè yè e tsuù, yè byɛ̀n à mà ci Yesù yè vu. 2Àwà yè Yesù shì tɔ̀un, yè b'a ka jàmààntsi Pilatsì rè, y'à wɔ tɔ̀ suun.

Yudasì yè e yɛrɛ vuu min niì

(Kɛɛradzin neè faadziɛ 1.18-19)

3 # Kɛf 1.18,19. Àyìwà Yudasì rìi Yesù jàànfau, tɔ dziu à myɛ̀n min niì ci è byɛɔ̀n à mà ci Yesù yè vu, è jàà e yɛr'la fɔ è bè geren. È warifyɛ moòtsyeòn sen tɔ̀un, è kpɛyn sèè à ka Saaka Jɔundzin neè ko bɔɔ rèè rè. 4À bèu wɔ, è dzin ci: «Mun gooɲaan fau. Mun mòò sìun san na jààma na ni nìi rà waa.» Twɛy yè dzin ci: «Tɔ̀ na ɲe re shi, à wo rìì kùùngoo.» 5Àwà, tɔ dèu min niì, Yudasì yè warifyɛɛ maa Ŋaablà re gbà blàa doùn, è bo è bè e vu dèyn. 6Saaka Jɔundzin neè yè warifyɛɛ tsɛ̀ tɔ̀un, yè dzin ci: «À na dàaŋnà nèe warifyɛ ree yè ji Ŋaablà re gbà blàa ɲɛɛn tsɛ waa, kàtsu à tsììn ni sɔ̀ɔ̀n.» 7Tà doùn, yè byɛ̀n à mà, y'à ka tsyɛnmyɛnbaa sɔn ne dzù fì, yè tɔ̀ bà tɔn'leè rè fùnwɔma. 8Tɔ̀ kamà, tɔ̀ dzùà yè bà kir'là arì she ci 'tsììn dzuà'. 9#Jkk 11.12,13.Tɔ̀ faumaà yè kɛɛra Yeremin ne gooma de dɔ̀unma sɔn bo e shi tsɛ, nìi yɛ ci:

«È warifyɛ moòtsyeòn seun. Isirayɛlidzin neè byɛ̀un dzii rìi mà ci è sàrà à re, à tɔ̀ rii.

10Y'à seun y'à sìn tsyɛnmyɛnbaà rà e re dzùà sɔ̀ɔ̀n, a ci Tsìfaà na à deò mun na nìi tsuru.»

È bèu Yesù ka Pilatsì rè min niì, kitsia yè mɛɛy à tsɛ

(Marikì 15.2-15; Lukì 23.2-5; 23.13-25; Yùxanà 18.29-40; 19.4-16)

11Àyìwà yè bè Yesù tsìì jàmààntsià jaaterema tɔ̀un, jàmààntsià y'à tey ci: «Wo rìì Dzyèèsìbee mòdzin neè rè màsà kpir'là ɔ̀ ?» Yesù ci à ra ci: «Wo rìì ci tɔ̀ tsuru.» 12Saaka Jɔundzin neè ko bɔɔ rèè goomau yè goo o goo sɔ̀n wɔ à ra, à na gèsɔn pɛn dè. 13Pilatsì yè dzin à ra ci: «È yɛ nìi sapɛ deè wo tsɛ wo na à myɛ̀na ɔn ?» 14Yesù na gooma à dzu kàjaa pɛn tsɛ. Tɔ̀ goò yè ji jàmààntsià dzii tsɛ fɔ è bè geren.

15Àyìwà jii sapɛ, Geren n tsɛɛ̀ sɛr'là ye ba na wɔu, jàmààntsià na dɛ̀rɔɔ̀n è kàsòdzian soo bo bàjia, nìi jàmaà sàò. 16Tɔ̀ y'a tàrà, kàsòdzin soo na ni kàsoò rà, tɔ̀ tsoo Yesù Barabasì, à gooɲaan fa tsoo yè bà boo fɔ è bè geren. 17Jàmaà ladzyeeŋmaà tɔ̀un, Pilatsì yè è tey ci: «Barabasì ko Yesù rìi kir'là Ŋaablà Jaara Modzìàn, twɛy fiɛ̀ ɲàn, ye sào ni min kɛ̀n ni bàji ?» 18Àwà Pilatsì na à tɔ̀, ci Yesù jaaɲininbe rìì kamà, y'à wɔɔ wò suun. 19Tà doùn, Pilatsì tsùuŋmaà kitsikununma nɔ̀n, à re tààn yè nèe kɛɛrɛbe rèe ka à re, è dzin à ra ci: «Maà a san ji nèe mòdzin tereonma rèe re goò ɲàn dɛ ! Mun byɛn gereun feèn dzuun sìrààn ɲàn à kamà.» 20Àwà, Saaka Jɔundzin neè ko bɔɔ rèè yè jàmaà duùn wɔ, ci yè dzin Barabasì yè bàji, Yesù yè vu. 21Jàmààntsià yè è sèè tey kɔn ci: «Ye sào ni min tsì rii soo baji ye kɔ̀, è fiɛ̀ ɲàn ?» È ci: «Barabasì rìì bàji !» 22Pilatsì yè è tey ci: «Yesù rìi kir'là Ŋaablà Jaara Modzìàn, ye to ci min fee fa tɔ̀ ra ?» È sapɛ ci: «È gban gɔɔ̀ rà !» 23À yè è tey kpɛrɛ ci: «À to gooɲaan kɛɛn nì soo faɔ̀ ?» Yè e vuà tèyn kɔn ci: «È gban gɔɔ̀ rà !» 24#Sdk 21.6-9.Àwà Pilatsì nàu à jà wò fa gèsɔn pɛn wùbe à ɲan dɛ, màànkaan blàbe beè vu rìi mà à blàbe beè tɔ̀ vuà rìì mà, è yu sen è sira foò jàmaà jaa ra, è dzin è ra ci: «Nèe kpir'lee vua na n ne goo, à ye rìì lè goo.» 25Jàmaà sapɛ yeè dzin ci: «Ɲe yè e tsiiŋ, à tsìɛn tsìì yè sàrà ɲe ɲan, è sàrà ɲe dzin nèè ɲàn.» 26Tɔ̀un, Pilatsì yè Barabasì bàji è kɔ̀. Ŋà Yesù, à y'à to yè tɔ̀ dɔrɔ sɛyn ka, tà shɔ̀ùn à y'à wɔ è suun, ci è bè gban gɔɔ̀ rà.

Kaadzin neè Yesù byɛun min niì

(Marikì 15.16-20; Lukì 23.11; Yùxanà 19.2-3)

27Àyìwà, jàmààntsià rè kaadzin neè yè bè Yesù ka jàmààntsì gbaà fɔɔn doùn kèrè, kaadzin kur'là sapɛ yeè bè e ladzyèè mɔn, y'à laguru. 28Tà doùn y'à re vya rèè bo à mà, yè vya xe bla ji à vu ra mɛ̀yɛ. 29Yè daà myɛ̀n màsà baanfla, yè tɔ̀ kuu à kùùn, yè kɔ̀n wɔ à suun, tɔ̀ yeè bà kuɔn à sirama sia doùn. Yè e kunun gbaàn à bììn tɔ̀un, y'à ɲanŋmɛɛ̀n ci: «Dzyèèsìbee mòdzin neè rè màsà kpiri, tswɛ̀y yɛ a re !» 30Yè dzweeyuà fyɛɛ̀ à tsɛ, yè kɔ̀ɔ̀n sen, yè tɔ̀ ka à baan e kuùn. 31È nàu à ɲanŋmɛn dò tà tsuru waatsi riì bwèy, yè mɛ̀yɛ̀ blà xee bo à vu ra, y'à re vya rèè ji à mà, yè bo à ka, ci ye bèe à gban gɔɔ̀ rà.

È bèu Yesù gban gɔɔ̀ rà min niì

(Marikì 15.21-32; Lukì 23.26-43; Yùxanà 19.17-22)

32Àwà, è bokɔɔn yè tsi kpiri sɔn ka, tɔ̀ tsoo Shimɔ̀n, è bà boò wɔ̀ sɔn ɲan ci Sirɛnìn. È ci tɔ̀ yeè Yesù gbaàn gɔɔ̀ sen fàan nà. 33Yè bè, yè bè dzi gàne sɔn ɲan, tɔ̀ tsoo 'Gɔligotà', nìi dzuɔn Kùngɔ̀ xɔɔ̀ gàneè. 34#Zab 69.22.È bèu dzi mɔn yè mììnge sìn à ra, jan sɔn gbiimaɔ̀n tɔ̀ ɲan. Yesù tɔ̀ nèeŋ, à na e tsiì à y'à mìn waa.

35 # Zab 22.19. Àyìwà, y'à gban gɔɔ̀ rà tɔ̀un, yè kaan ji, y'à re vya rèè tanan e si ra. 36Tà shɔ̀ùn yè e tsuù, y'à kplatsuɔ. 37À vuɔ̀ kùn nìi nà, yè tɔ̀ sɛbɛn fa y'à gban à kùngɔɔ̀ jìran, nìi yɛ ci: «Nèe Yesù, Dzyèèsìbee mòdzin neè rè màsà kpir'là.» 38Yè gookoronfabaa mòkun fii gban gɔɔ ì rà à tɛyn, soo ni à sirama re, soo yè bà ni à ɲɔ̀nma re. 39#Zab 22.8; 109.25.Dɔ̀nbobaa rèè y'à ɲɛ̀ɛn, yè e kuùn jia, 40#Mat 26.61; Yux 2.19.yè dziàn ci: «Wo rìi ci wo Ŋaablà re gbà blàa cià, wo y'à sèè ji bwèy zhììgi doùn, a yɛrɛ tsi sa kɛ̀. Wo rìì ye ba Ŋaablà Dzin Kpir'la, jàà bo gɔɔ̀ rà sa kɛ̀.» 41Saaka Jɔundzin neè, ko Sàrìyà Kaamoo reè, ko bɔɔ rèè sa y'à ɲanŋmɛɛ̀n, yè dziàn ci: 42«N ci à to mòò kpɛrɛ ì tsiu ? À fa dzi e yɛrɛ tsi ɔ ? È ba Isirayɛlì màsà kpir'là, è jàà bo gɔɔ̀ rà dòònuùn sa kɛ ! È dzi tɔ̀ fa, ɲe nà ɲɛn à ra. 43#Zab 22.9.À na e kɛɛ̀yfaɔ̀ Ŋaablà rii mà gbɛ ? À goo ye ba dzi tɔ̀ ra, tɔ̀ y'a tsi kɛ̀, kàtsu à dziun ci wò rii Ŋaablà Dzin Kpir'la.» 44Gookoronfabaa nìì reè na gbaɔn à ka, twɛy sa y'a ɲɛ̀ɛn tɔ̀ ɲɛ̀ùn'n kuru soo rà.

Yesù yè e xɔn bou min niì

(Marikì 15.33-41; Lukì 23.44-49; Yùxanà 19.28-37)

45Àwà, bwèè ni sènfi waatsi riì bwèy, tsitsiì brìsi yè wɔ jàmaàn min niì sapɛ. È to tɔ̀ tsuru, fɔ è bè suu fɔ ɲɛ̀rɛɛ̀rà dzu. 46#Zab 22.2.Ɲɛ̀rɛɛ̀rà wɔumaà, Yesù yè gɛyn vu blà bo. À ci: «Elì, Elì, lemà sabakitanìn ?» Nìi dzuɔn ci: «Mun ne Ŋaablà, mun ne Ŋaablà, fee y'à tou w'a bon wɔ mun na ?» 47Nìì reè na ni mɔn, twɛy swey tɔ̀ myɛ̀un, yè dzin ci: «À kɛɛra Àliì rìì kir'là.» 48#Zab 69.22.Tɔ̀ nɔ̀nkɔɔrɔn, è ɲan mòò sɔn yè vwɛ̀yn è bè fu sɔn sen, à y'à mùù mììnge kùunma nɔ̀n, à y'à wɔ gɔ̀ɔ sɔn na, è nà à tsùù Yesù dzii ra, è bà ni à mìn. 49Dzyee rèè ci: «À to mɔn, m'a siin, kɛɛra Àliì ye ba nà nà à tsi o.» 50Yesù yè sèè è gɛyn vu blà bo kɔn, è xɔn bo. 51#Jdk 26.31-33.Tɔ fau min niì, Ŋaablà re gbà blàa shiɲaanfi kunun vyaa yè vyɛ̀ fii è sen jìran nɔ̀n, fɔ dzɔn nɔ̀n. Dzɔ̀nxɔɔ̀ yè kpìnìn tɔ̀un, faa rèè yè tara tara. 52Fùnkɔɔ reè yè san ji, Ŋaablà re mòdzin saunma rèè giri yè sèè kpunan. 53Yesù sèè kpunaunmaà shɔ̀ùn, yè bo kɔ̀ɔ̀ rèè doùn, yè bè dɔ̀n Yerusalɛmùn, Ŋaablà re wɔ̀ɔ̀ doùn, yè e yɛrɛ kpadè mòò gir'la.

54Kaadzin jɛrɛ̀blàtsià ko kaadzin dzyee niì reè sapɛ na Yesù kplatsuɔ, twɛy tɔ̀ dzɔ̀nxɔ̀ɔ̀mà kpin'na ko goo dzyee fauma rèè jàu min niì, yè shi fɔ è bè geren. È ci: «Sààben na, nèe Ŋaablà Dzin Kpir'la rìì taki.» 55#Luk 8.2,3.Tàan giri na tsìiŋnà jeenà, yè bà siin faa. Twɛy tàan rèè rìì yè e gbaun Yesù kpɛyn è bo fɔ Galile mar'lɔùn, yè faagoò faa à re. 56Twɛy tàan rèè ɲàn, Mariyamùn, Màngàdàràkà taàn na ni, Yàkubà ko Yusufù na Mariyamùn ni, Zhebedè dzin kpiri fii rèè naà yè bà ni.

Yesù fùàn wɔu min niì

(Marikì 15.42-47; Lukì 23.50-56; Yùxanà 19.38-42)

57Àyìwà ɲɛ̀rɛɛ̀rà nàu dzi, kpiri getsi sɔn yeè nà, tɔ̀ tsoo Yusufù, è bà boò Arimate wɔ̀ rɔ̀n. Tɔ̀ sa na baɔ̀ Yesù rè kàràndzin. 58Tɔ̀ yeè bè Pilatsì rè, è bè Yesù fùàn fyɛ̀n à re. Pilatsì to yè shi sin tɔ̀un, ci è sìn à ra. 59Tà doùn Yusufù yè Yesù fùàn sen, à y'à kasange. 60Tà shɔ̀ùn, è b'a wɔ fùnkɔ̀ɔ̀ ye sɔn ne, à na tɔ̀ niì ɲɛɛna faà ɲàn e yɛr'la raa. À dòu tɔ̀ ra, è kpàà kunun brisi kòròngoron tsùù kɔ̀ɔ̀ dzii ra, è kòmànà dɔ̀n be. 61Tɔ̀ y'a tàrà, Màngàdàràkà taan Mariyamùn, ko Mariyamun tsoo soo ree na tsùuŋnà kɔ̀ɔ̀ jaaterema.

62Àyìwà, ɲànwɔsiɛ̀ jɔun wɔɔ jisee la gbey rɔn, Saaka Jɔundzin neè, ko Faridziɲɛn rèè yè dzyèè, yè bè Pilatsì rè. 63#Mat 16.21; 17.23; 20.19; Mar 8.31; 9.31; 10.33,34; Luk 9.22; 18.31-33.Yè bè dzin à ra ci: «Kùntsiɛ̀, nèe mòdzìn sànfiribaa rèe jaamakɔɔn nà, à gooma sɔn deu, ɲe taa too nìi rè. À dziun wò saunmaà shɔ̀ùn, bwèy zhììgìraa sii sèè, wo nà sèè kpunan. 64Tɔ̀ kamà, à dè kaadzin neè rà, yè kɔ̀ɔ̀ kplatsuù fɔ bwèy zhììgia dzii yè bè tsyɛn. Tɔ̀ ma fa fyeu, à re kàràndzin neè dzia bè à fùàn shɔn sen, tà shɔ̀ùn yè dzin mòdzian nà, ci à sèè kpunan bou fùn nèè fi. Tɔ̀ sànfir'la nà xɔbe kɔn, è geren jɔ̀naà tsɛ.» 65Pilatsì yè dzin è ra tɔ̀un ci: «Kaadzin neè swey yɛ e re, ye b'a kààwɔɔ̀, a ci à dzi e ra nìi tsuru.» 66Tɔ̀un, yè dɔ̀n be kɔ̀ɔ̀ kplatsuuma nɔ̀n. È bèu dzi, kpàà niì ka kɔ̀ɔ̀ tsyeeŋna, yè tàànmàshɛn ji tɔ̀ tsɛ, kaadzin neè yè tsùù twɛy y'à kplatsuɔ.

Currently Selected:

Matsiyù 27: BDZU

Highlight

Copy

Want to have your highlights saved across all your devices? Sign up or sign in

Learn More About Bible Dzùùngoo Unicode