Matsiyù 28

Yesù sèè kpunaun min niì

(Marikì 16.1-8; Lukì 24.1-12; Yùxanà 20.1-18)

1Àyìwà, ɲànwɔsiɛ̀ la gbee gbishɛɛ̀mà nɔ̀n, shikuan jisee jɔnaa, Màngàdàràkà taan Mariyamùn, ko Mariyamun tsoo soo ree yè bè, ci ye bèe kɔ̀ɔ̀ siin. 2È wɔumaà tɔ̀un, dzɔ̀nxɔ̀ɔ̀mà kpinin brisi sɔn yeè bàràma fu jaa soo. Tɔ fau min niì, Tsìfaà rè mɛ̀rɛ̀kɛ sɔn yeè jàà bo na jìrànxɔ rɔ̀n, è nà kpàà brisià kòròngoron bo kɔ̀ɔ̀ dzii ra, è tsuù à tsɛ. 3Tɔ̀ mɛ̀rɛ̀kɛɛ̀ min niì sapɛ na den deèn a ci ŋaa myɛ̀ɛ̀nkɔɔn, à mà vya reè yè bà fyɛɛ̀ tɛrɛ tɛrɛ, a ci kpaantsɔ. 4Nìì reè na kɔ̀ɔ̀ kplatsuɔ, twɛy shi ɲaanfaa suun à jɔun, fɔ è màsɔ̀ɔ̀nkɔɔn yeè bè cìrì, yè bà a ci fun ì.

5Mɛ̀rɛ̀kɛɛ̀ yè dzin tàan rèè rà tɔ̀un ci: «E maà shi waa. Yesù rìi gbaun gɔɔ̀ rà, m'a tɔ̀ ye tɔ̀ rii gaa. 6À na ni mìin dɛ waa. À sèè kpunaun, a ci à y'à deu nìi tsuru. Ye nà à ɲɛnmaà siin. 7Ye e tabe ye b'a dè à re kàràndzin neè rà, ci à sèè kpunan bou fùn nèè fi. Y'a dè è ra, ci è maa beu è jɔun Galile mar'lɔùn, ci è nà bè à jà mɔn. Tɔ̀ rii na ni, m'a dè ye ra.» 8Tàan rèè yè e tabe bo kɔ̀ɔ̀ dziɛ rà tɔ̀un, yè dɔ̀n be. È na shiunà, ŋà è taama sa na dzi fɔ è bè geren. Yè vwɛ̀yn be, yè bè kàràndzin neè toro kɔ̀ à goomaa nà. 9È bèkɔɔn, Yesù yè bàràma è kùùntsi, è dzin è ra ci: «Tswɛ̀y yɛ e re !» Tàan rèè yè e kpɛrɛ̀ à ra tɔ̀un, y'à kun e san nèè rà, yè e kuu à bììn, y'à blàbe. 10Tà doùn, Yesù yè dzin è ra ci: «E maà shi waa. Ye bè à dè n neema reè rà, ci yè bè Galile mar'lɔùn, è nà mun jà mɔn.»

È kɔ̀ɔ̀ kààwɔbaa kaadzin neè duùn wɔu min niì

11Àyìwà è tàan rèè to shia tsɛ, kɔ̀ɔ̀ kààwɔbaa kaadzin neè swey yè fù, yè bè wɔ̀ɔ̀ doùn, goo o goo fau, yè tɔ̀ sapɛ lakɛ̀ɛ̀y Saaka Jɔundzin neè rà. 12Tɔ̀un, Saaka Jɔundzin neè ko bɔɔ rèè yè e si ladzyeè. Yè e tsuù, yè byɛ̀n à mà, yè ɲɛyn giri sìn kaadzin neè rà. 13Yè dzin è ra ci: «Y'a dè ci è ye to ciɛ̀ rà, à re kàràndzin neè nàu fene rɔn, yè nà à fùàn shɔn sen. 14Jàmààntsià y'a goomaa myɛ̀n, ɲe nà e maxɔbe ɲe yè dzi à dzuun, ye raa yè bo à ɲan.» 15Kaadzin neè yè ɲɛɛn tsi, y'à shi jiì, a ci à dèu è ra nìi tsuru. Tɔ̀ goomaa yè jee ji Dzyèèsìbee mòdzin neè fi, è bè suu fɔ she dzu.

Yesù kɛɛrɛbe rìi wɔu kàràndzin neè suun

(Marikì 16.14-18; Lukì 24.36-49; Yùxanà 20.19-23; Kɛɛradzin neè faadziɛ 1.6-8)

16 # Mat 26.32; Mar 14.28. Àyìwà kàràndzin teeŋ sɔɔn yè bè tɔ̀un Galile mar'lɔùn. Yesù jèn nìi goo dèu è ra, yè bè mɔn. 17È wɔumaà mɔn, è Yesù jàu min niì, yè e kuu, y'à blàbe. Ŋà, è swey yè e ciri. 18Yesù yè e kpɛrɛ̀ tɔ̀un, è gooma è ka. À ci: «Dzia sapɛ dzyeèma sìun mun na, jìrànxɔɔ̀ doùn ko dzɔ̀nxɔɔ̀ tsɛ. 19#Kɛf 1.8.Tà doùn, ye bè dziɲantsiɛ kun neè sapɛ re, ye è bà mun ne kàràndzin. Ye è jaara foò Ŋaablà re shia goo rèè rà, Fà Ŋaablà, ko à Dzin Kpir'la, ko à re Dzi Fɛnɛɛ tsoo ra. 20N goo o goo dèu e ra, ye tɔ̀ sapɛ karàn è ra, y'à màrà. Àwà fɔ dziɲan yeè bè dò, màan ji o ji seroun, mun ni ye ka.»

Currently Selected:

Matsiyù 28: BDZU

Highlight

Copy

Want to have your highlights saved across all your devices? Sign up or sign in

Learn More About Bible Dzùùngoo Unicode